北海道-抵達札幌

帶定個嘉頓牛角包上飛機,一心係高空三萬呎上品嚐最愛既牛角包,點知個飛機餐都有牛角包食......不過個餐都幾好食,第一次坐日本機,當然餐飲係日本品牌ASASHI啤酒啦~~(同空姐一聲"BI RU",就手到拿來)

一落機出成田機場門口等巴士轉機場時,就感到8度既清涼,香港地真係好少有咁凍o架嘛~好開心可以踏足呢個由細到大都好想去既地方,可能係睇得太多日本卡通卦,搞到好似係好親切既地方.

搭咗一個多鐘巴士,到達羽田機場,雖然人多,但無香港既嘈吵.搞好機票事宜,就坐係細細既機場內既食店逛吓.

話晒都四個鐘機.又攰又肚餓,入鄉除俗,當然係買弁當,係機場既等候座位開餐啦雖然賣相幾好,但始終都係冷飯,味道一般.一餐半餐,裹腹無所謂啦(人家就好鍾意包牛奶)

等上機時望到塊牌話札幌得-8度,真係有啲驚,咪即係凍多16度?我地就坐多個半鐘飛機,去我地既目的地北海道 .

落咗機,攞埋行李,我地就去搭JR去札幌站.面對海外既售票機,我地都要望一輪至買到兩張車飛.

上到火車,各人都係安安靜靜咁坐係度,一係打短訊,一係就洽眼訓,再唔係就睇書同望窗,唔似香港咁,打PSP,打NDS,你一句我一句,高談濶論.我同人家都係靜靜咁,洽住眼訓坐到總站~

出到站啱啱十點,車站閘口隔離既火車頭造型大鐘響起報時音樂聲,好似係歡迎我同人家到訪咁~~同大家係度玩用口呵氣,拉住個喼走去車站附近既酒店,見到地上鋪滿白雪,忍唔住抓起地上既雪,扔向人家既褲腳~~~雖然係凍啲,但係著住羽裓,帶埋頸巾同手套都OK,,

放低行李,我同人家再行番落樓逛吓,被雪蓋住既景物對我地黎講確實係新奇.

我地經過一間路邊既流動拉麵檔,於是行入去試吓地道既食品,咁先似去過日本嘛~~

600円一碗味噌拉麵,貴過香港既味千拉麵,但味道就好好食,我咁大個仔第一次會飲晒啲麵湯,唯一係叉燒肉得一塊,真係唔夠喉我同人家覺得湯,料,麵,都係一絶.企住黎食,無華麗既裝飾,只有阿嬸同婆婆坐陣,邊做生意,邊睇住一部舊式電視,同客人閒談,感覺反而係溫暖同實在.

行埋去附近既LAWSON便利店買多少少熟食番酒店食,執好啲野,準備聽日既行程~真係有勞人家既打點,今日一切都好順利,好開心可以同我女人一齊黎補渡蜜月旅行.