北海道-漫遊札幌

朝早起身隔住鋪滿水珠既玻璃望向窗外既景,心中一句"早晨呀,札幌"

過去對面街既華盛頓酒店check in,上房放低行李就落去JR票務處book我地呢一星期既JR車位.人家仲係隔離既資料中心係咁刨啲小册子同地圖,你睇領隊幾忙幾勤力~~

JR站對開既廣場有好多白鴿係度聚集,佢地係咁啄地上面既雪黎搵食物,好似係都食雪糕咁.我都係第一次見咁多白鴿,真係好得意,係香港就無咁既機會lu~~

搭完一個站地鐵,一出地面就見到我地一生中第一次既落雪,好靚~雖然只係普通既現象,係電視見得多,但親歷其景係最微妙既,就好似小朋友第一次到落雨一樣.

我地沿住狸小路商店街 一直行,兩旁好多店鋪,但我地既目的地係最未端既"二条市場"目的就係係呢度享用我地以蟹為主題既blunch~~~單係呢碗蟹腳面士湯已經夠晒鮮味,一啲都唔涸喉,絶無味精.另外我同人家一人一碗魚生飯,新鮮同美味完全成正比,正!正!正!

呢隻燒帶子係另一個驚喜,嫰滑既肉質,加上美味既湯汁,最後當然只係剩番塊貝殼啦~

未試呢個燒皇帝蟹腳前,已經聞到佢既香味.無須醮任何醬油,剥殼即食,食落就知道原來係比預期中更惹味..諗起我地係香港黃金海岸既bbq場燒蟹仔,簡直係無得揮!

食飽飽,係附近行吓,見有啲檔口除咗賣啲獨立包裝好既海產食品手信外,最特別既就係賣一隻隻既帝皇蟹,上機前一日黎買,老闆會連雪劑包好俾你.

係一間精品店門外見到呢部以札幌特式為主題既襟章扭蛋,於是入咗數個100円黎扭,當自己留念同送俾朋友仔都好嘛~~

沿住狸小路行番轉頭,見到有間神社仔,雖然無符賣,但都入錢兼抽張籤,好彩係"吉",心安理得~~

經過一間角子機店,一場黎到日本又點可以唔入去望吓呢?由於我地一向都唔曉玩角子機,於是只係玩夾公仔.你見人家咁既樣就知道係夾唔到啦,其實我地係校好位夾中個公仔頭,只係個鉗好似無力咁,夾唔實個頭,最後sir番落黎......呃錢.........

行吓行吓,領隊叫我望向商場頂既摩天輪,話係今晚我地要去既節目之一,我都係第一次見摩天輪係商場頂開檔~

落番地鐵站,就係地下街度係咁逛,行到好攰,於是係一間蛋糕店叫停領隊.假借請領隊食地道既土多啤梨甜品為名,實質係我想停低坐歇吓腳,女人行街真係唔會話攰o架嘛..........

單純既領隊好開心咁坐低享用士多啤梨布丁,而我就趁時間上洗手間同坐低回氣成間野都係賣士多啤梨,無樣野啱我食........

夜晚番酒店放低啲野,就坐地鐵去一間老字號既蟹店食晚飯.雖然撞到香港人黎幫親,但我地就無跟旅遊書食佢地既定食,因為我地見到menu有蟹刺身~~~~雖然係貴啲,但經過我同人家既商量後,覺得蟹刺身唔係度度都有得食,而且之後我地都會係温泉酒店有一餐熟蟹既飯局.再者之前結緍週月日13號無慶祝,適逄今日係17號-擺酒週月日,就好好咁享受吓啦~

結果係點?當然係好好好好食啦!毛蟹,松葉蟹,皇帝蟹,各一隻,配上醬油,真係搭幾個鐘飛機同轉機都值呀.我地叫多咗個小型壽司拼盆,同兩個燉蛋.美食當前,我當然有叫啤酒助興啦我同人家都食到好飽,好滿足,枱角用黎收集蟹殼既樽,散發住海蟹既獨特鮮味(你洗咗手都仲會殘留係手上個種味道).

店內既小水池放咗好幾隻活蟹,好有心思,唔知係陳列品定係真係會被撈上黎上碟呢?

食飽飽,我地趕去附近商場既天台,搭最後一班既摩天輪,可能係太夜,得我地兩個玩,包咗個摩天輪~係高處望住札幌既夜景,真係幾寫意同浪漫.

我地落番下去商場四圍行吓,入咗一間機鋪,我就用100円黎玩呢部戰機game,雖然係兩年前既game,但都幾好玩,個seat位會左右擺,好彩有扣安全帶.........

唔知點解機鋪裡會有個幸福神社,人家當然去寫番隻字黎保祐吓.

同人家玩完森林冒險射擊game後,玩一齊玩扑地鼠,分數係全日最高!!

係kfc買埋個冬日限定既酥皮湯,就趕搭地鐵番酒店時,係站內俾我見到捉不到的戀人Leah Dizon既廣告板,睇黎佢真係紅喎~~~

ps:雖然番到酒店得知香港一件唔開心既事,但總算有驚無險,無咩損失.勞煩晒阿潘幫手,辛苦外母大人.....心神恍惚既我唔小心洗咗第一次見落雪既短片,對唔住丫台灣女生....