一朝早坐火車去旭川,就係為咗去呢個旭山動物園
喇.呢度真係幾凍,日頭都係得-9.8度,排隊等入場時真係騰騰震.............
第一個節目就係霸個靚位,等睇十一點既企鵝巡遊,佢地肥嘟嘟,真係好可愛.
睇完企鵝仔,跟住就去咗海豹館行個轉,影咗好幾次,先至可以捕捉到佢既全相~~~
我地又一睹地上最大食肉動物-北極熊既風采.雖然佢個樣睇落幾得意,但係真係諗唔到佢係一隻兇獸,絶對唔係幫可口可樂賣廣告咁純情..........
跟住我地又去睇工作人員餵飼海豹,望住佢由水中搶灘上岸食魚仔.係陸上既活動能力無咁好,要典吓典吓至可以向前移動.
係咁凍既地方,總係覺得比平時快肚餓,可能熱能消耗得比平時多卦,於是係公園既餐廳食住拉麵同烏冬頂住肚先.
園內仲有其他動物俾遊人觀賞,你睇吓佢地幾得意.
全球得番三千多隻既丹頂鶴,原來都幾大隻~~
人家最鍾意雪景配上禿枝,於是幫佢影番張相.由於太凍,我地都要中途入咗間精品兼小食店歇腳同嘆暖氣,我仲買咗杯熱朱古力飲添,臨走前仲係部紀念品機,即席壓制一個金屬紀念片塊.可能趕時間,唔記得影相.....
行完動物園,搭番JR番札幌"殺波羅",係站內見到呢間啤酒屋,menu上仲有各式既助酒小食,真係好吸引,但由於飯都食,所以無入到去,只係影張相留念.
係酒店再出街時,撞正第二次既落雪,於是用DC補拍番短片,咁啱有個派宣單既哥仔話幫我地影合照.
我地用酒店送既coupon,上JR
TOWER睇夜景,人唔太多,有公公婆婆,亦有年青情侣,.昏暗既燈光,加上輕和既音樂,令人好relax.如果你喜歡啲音樂,仲可以係精品店買番隻cd番屋企煲,不過我地只係睇其他精品,最後買咗張明信片~~
我地一人有一杯cocktail welcome drink,雖然選擇唔太多,但勝在免費嘛~~~人家杯gin
tonic好飲過我個杯tequila sunrise.....
出面既風雪突然大咗好多,能見度大減,好在早咗上黎啫.其實我好鍾意係啲咁舒服既環邊飲邊傾心事,突然諗起同教練搵日去同emma聚吓.
我地見到有紀念幣賣,仲可以刻名同日子添,於是又乖乖咁入錢,跟住指示去禁掣.
雖然個銀仔唔係即場壓制,但勝在圖案精細.不過刻名同日子要入錢落另一部機,日本人真係識做生意.............
戶外既風雪真係好勁,你睇,橫風橫雪咁,汽車都鋪住冰雪,搞到個吸風位好似流鼻水咁
晚餐係一本當地雜誌介紹既拉麵老店食,雖然係大碗但湯底同麵質就無第一晚街邊檔既水準,搞到我地都無食晒一整碗麵同飲晒啲湯.不過又見好多日本人都入黎幫襯o架喎,只係得我地兩個遊客.雖然呢餐有啲失望,但仲有好幾個晚餐等緊我地.
