朝早我地錯過咗自助早餐時間,因為無諗過時限至八點半,所以九點至到飯堂既我地,無得食,好在酒店職員都係厨房裡將啲剩餘物資砌番份早餐俾我地食.其實我地諗住睇吓啲紙模型,但睇落又好似係飯堂門口死守咁,真係有啲尷尬,
係等車士既時候,我砌咗我人生中第一個雪人!!
係巴士裡望到遠遠既硫磺山,雖然去火車站既車程唔耐,但如果要你行的話,一定係凍死都未行到去...........
川湯車站好細,經過coffee longue就到月台.
原來架車仲細,只得一卡,好似輕鐵咁,一眼望晒,但車內都有洗手間.
車頂上既風扇,好有懷舊感,唔通夏天時唔太熱,風扇已經夠用?人家係坐位訓緊時,突然有土多店員係中途站捧住貨品上車兜售.我見有人家喜愛既牛乳雪糕,於是叫醒人家睇吓啱唔啱心水,最終都買咗黎食.
到達網走,睇黎張相就知架車係幾短身.
出咗火車站就見到黎接我地既酒店司機,佢幫我地拎啲行李上車,好快就到達酒店.係窗望出去,見到一大片結冰既湖面.
房裡既陳設都好靚,和式房至似係黎過日本嘛~
我地間酒店其實係個高台之上,係大馬路要上一段斜路至到門口.我地為咗慳錢,所以徒步行落去巴士站.
落巴士時我地聞到好香既肉味,於是就入咗呢間漢堡扒店食晏,見佢有成十年歷史,應該有保證卦~
店員會以車仔送上閣下既鐵板餐,淋完醬汁之後,俾埋個架你鋪塊紙餐巾係面,唔洗自己揚起張餐巾係面前咁唔方便.
鐵板上有塊熱石,俾你翻熱涷咗既肉扒,估唔到"伙頭智多星"既點子會俾應用.我同人家都叫咗漢堡扒拼牛扒,大家都覺得漢堡扒好好食,顯得牛扒比較遜色.
醫完肚就搭巴士去天都山既流冰館行吓,人家話裡面可以睇到好靚既天使魚,好似之前香港海洋公園 都有得睇.
入到去望住個缸至知原來佢地係咁細條,連我尾指指頭都無........
不過係觀景台望既風景都唔錯,今日既遊客唔多,唔通去晒監獄博物館?
咁又日落了,好似用晒啲時間去等車同搭車咁,唔係去咗好多地方咁.
等巴士時,人家興致勃勃咁砌咗個雪人,睇黎佢個隻靚過我日頭整個隻添.....
晚餐係酒店包既,成枱都係嘢食,份量比川湯個餐適中,而且啲蟹肉比較鮮味.食飽飽,當然又係去大浴場沖涼同浸溫泉水啦.我地仲見到有啲唔係住客既日本人係特意黎浸溫泉水,睇黎呢個大浴場都幾ok潘~
