沖繩親子遊DAY 5

黎到最後一日既行程,唔知係咪太攰既關係,老無病又出現-腸胃不適......夜晩訓得唔好,朝早起身就拉肚子.食咗葯都無好啲,落到酒店餐廳都係陪坐食唔到嘢.幸好食品都唔係好吸引,唔食都無咩大損失(但人家話呢度既餐廳都出名當地料理,唔通只限午餐同晚餐??),結果自己番上房休息多陣先.

番入房間休息時,雖然職員正進行打掃,但我都照攤係張床上抖.訓咗一個鐘,好似無咁辛苦,於是起身幫人家同幸男於露台影吓相.幸男想睇單軌列車駛過,於是人家就抱住幸男.當我地同幸男講今日要番香港,幸男話唔番,仲話沖繩係男男屋企,要留係沖繩.人家安慰幸男,等幸男大長成人再自己黎沖繩玩.

行李暫寄存於酒店大堂,兩大一小行去附近既商場RYU BO.幸男無興趣睇大人嘢,我又攣住個肚,結果我同幸男係商場既兒童休嬉處等人家.

無嘢啱買,番酒店大堂攞番行李,就一齊去搭單軌列車去機場.雖然最後一日預咗係無景點可言,但諗到得中間三日係全日活動,感覺呢個旅行好似好短咁(可能結緍北海道個次較長).

幸男係單軌列車上訓著,我地就係機場搵地方食晏.趁幸男未醒,填飽自己個肚先嘛.

上機前一餐,我叫咗個鐵板牛扒餐,肚痛都要食好啲,唔可以空肚番香港!!

 

人家叫咗個和式牛肉飯,配蜜瓜梳打雪糕球.時間啱啱好,大人食飽飽,幸男至訓醒,不過就情緒失控,怒喊. 

唯有帶幸男出去餐廳外,隔住玻璃窗睇停機坪上既飛機同工作車.

情緒平伏,幸男番入餐廳享用兒童餐,並以橙汁作今次日本沖繩膳食既句號.

食完飯,我哋好趕咁係機場買手信.雖然係趕啲,但總好過一袋二袋咁抽住去機場.

之前係國際通既三越齋行無嘢啱買,無諗過機場買手信會幫襯番三越....

幸男首度出埠旅行,有唔少反常行為,例如唔食平時喜愛既士多啤梨同薯條,突然主動食多咗肉,筷子熟練度飆升,訓少咗晏覺.....

番到香港約5點半,過海關,買埋芝華仕,就去攞行李,搭的士番屋企放低行李,再去老家黐晚餐.

帶小朋友去旅行,同兩個大人去好唔同,行李多咗,要帶BB車.照顧小朋友起居飲食,交通同人身安全,大人基本上少咗好多休息時間,更無咩閒情細味旅程既點滴.想去購物,但小朋友又會嫌悶同扭計,所以我同人家都無咩嘢買到番黎.如果得我同人家,可以租電單車代步,以一間酒店作基地,去更多既景點同影相,更充裕既時間,更輕鬆既心情,更情深既溝通.....但凝望著呢張相時,兩母子既笑容巳經係情深既對話,溫馨既心意,以及珍貴既時間.

PS:科學角度黎睇,今次既旅行只係海外湊仔服務令.不過本著家長對兒女既相處,一點一滴都會影響小朋友既成長發展的話,相信無一個父親可以推搪太太既親子旅 行之建議.

沖繩親子遊DAY 4

朝早食完早餐就番上房執行李,因為我哋今日要CHECK OUT搭車去番市中心那霸轉酒店,方便聽日去機場番香港.

泳池只係夜晚去咗一次,如果可以日頭時間去多一次就好,因為無用相機幫幸男影相,只係用人家部手機影過雜訊多既夜景.

係陽台望住海,飲住嘢黎傾吓計就夠晒寫意,可惜湊住幸男無閒情咁做.即使夜晚搞掂幸男食奶同訓覺,大家已經散晒.......

房門至床邊小客廳,係幸男最愛既疾走路線,每每邊走邊讓著"嗚~~~",或者以蹦跳形式黎完成路程.

由買咗新喼番屋企起,幸男就話係佢自己既,今日卒之都忍唔住要自己推個喼.見大堂地方大,兼且唔多人先至俾幸男做一陣酒店BELL BOY.

07年同台灣女生去關島影緍相時都係住MARRIOTT,感覺係日本沖繩呢間比關島既多設施(多餐廳同有泳池)同舒適,不過關島個間就係正沙灘隔離,唔洗搭車落山至去到.

坐兩個鐘巴士去番那霸機楊,我拉住兩個喼,人家推住載有幸男既BB車去單軌列車站,目的地係県庁前駅.

精打細算既人家帶住我去車站櫃枱買兩張全日通車票(由購買起計24小時有效),方便今日既行程之餘,仲可以聽日搭番去機場.

車箱內大家都好安靜,打短訊,睇風景,睇書,頂多只係喁喁細語,並無香港既高談濶論.中途上車既一群中學女生,被遊客外觀既幸男吸引著.幸男向佢哋以笑容打招呼,學生們邊笑邊細聲討論.

鍾意火車既幸男,當然喜歡坐單軌列車,尤其係無上方既電纜架兼全線係高架路軌,有別於香港既輕鐵,西鐵及地鐵既外觀.出站時見有單軌列車既手巾仔賣,於是用手機影低張相,再同女職員示意,由幸男親自程上300円及收過手巾仔.

今日投宿既酒店叫"琉球館",鐵路站行三分鐘就到.一見個地板同條門匙就知係舊式酒店.地下個層有CAFE,但座位係露天,大熱天時無人幫襯......

幸男一入房就走上客廳,攞私伙玩具出黎玩,睇黎好似想霸地盆咁.

房間係和洋式,客廳係日式,床係西式(唔係塌塌米),所以叫和洋式...廁所較迫,膠浴缸配膠浴簾,洗面盆同梳妝位置就係厠所外.

露台有一張小圓枱及兩張,望正高架單軌列車,但咁鬼熱,大家都係出去望一望就番入室內. 

放低行李,就推住BB車去車站.我哋係月台上可以望到投宿既酒店兼自己房既露台,感覺蠻有趣.

等咗十分鐘左右就有列車駛埋站,唔知點解日本既設計係靚啲,一架鐵路都係時尚過香港見到既款式.

目的地係那霸市第一牧志公設市場,但要先行入市場中央通商店街.店舖係多,但賣既嘢好似差唔多,紀念品同手信,無咩係個別唔同既店種.

搭升降機到一樓,搵咗間有中文餐牌既食店坐低,無諗過有位女店員識講普通話,睇黎中國遊客係當地都好常見.

除咗叫套餐,我同人家每人都叫多一隻燒大蝦,無諗過啲蝦膏有咁多.食食吓見隔離枱有人食龍蝦同海螺刺身,先至諗到原來可以係地下既街市買上黎加工食,錯晒......好耐無食過龍蝦刺身,對上一次都係宿舍年代,跟阿強車入元朗一間日本料理食晏晝套餐時食過.坐隔離既老外就食我哋個餐既加大版,隻蝦都係大兩三倍.

本來係BB車上訓著既幸男突然醒咗,情緒發作,係咁喊,結果要我抱住佢黎行一轉,望吓手信精品攤檔至收聲.見幸男回復平靜,叫埋個麵俾佢食,仲要出動埋留燒蝦既蝦膏至氹得幸男笑(當然仲要加埋我同人家既鬼臉).

見有鮮果雪糕賣,當然要買杯俾人家.喜愛士多啤利既幸男竟然唔肯試黎食,唯有益晒人家.

食完嘢就去最旺既國際通行街,但帶住幸男又唔可以點SHOPPING.人家提意去一間專賣TOY STORY玩具既商店,點知搵極都搵唔到.問埋當地人用手機上網搵地址,去到至知願來已執笠.......結果係條街來來回回,得個桔.

見國際通無嘢行,又記得係機場去酒店時經過一個站係有吉之島,於是又搭單軌列車.今次幸男有坐係人家大髀上,可以透過玻璃望到車長係駕駛室既情況.

 去到吉之島己幾六點,主力係行玩具部同童裝.幸男係玩具部試玩車仔,我就去睇Wii U.

行咗一個鐘左右就搭番單軌列車番県庁前駅,車站隔離有個商場仔RYU BO,印象中係北海道旅行時都有行過.早知國際通無嘢行的話,一片心行個近近地既商場無咁嬲.

夜晚係酒店附近既樓上燒肉店用餐,門口放咗個紅酒櫃,好似香港既酒樓咁.

今趙旅行既最後一晚,當然要食好啲,主打係燒肉,先有人家最愛既五花腩.由於太肥美,所以餐廳奉上生菜一碟,俾客人夾住黎食,試過又真係易入口啲喎.

黎到日本點可以唔食和牛?我地叫咗個3至4人用既和牛拼盆,跟餐我同人家都有泡菜同白飯.

燒既時候己聞到香味,食落口當然係好好味啦~幸男都有話"我要肉肉",小朋友亦都俾和牛既美味吸引著.

其實幸男都有食麵,不過就會黐我哋啲燒黎食.最後我再叫多一份細既和牛,飲多杯啤酒,好滿足咁埋單.店內環境唔錯,每枱都係獨立既細房,雖然聽到隔離既喧嘩聲,但就唔會望到其他人.起初有一個後生女侍應生用國語問我地食咩,雖然餐牌上有中文對照,但我地真係想望真啲有咩食.該女侍應生再入黎我地張枱,見我地未諗好,就好似有啲唔耐煩咁,真係有少少唔開心....不過之後我叫咗位行過既男侍應生就好好禮貌.唔知個位侍應生係咪華裔0架呢?因為好少日本當地人會咁唔好客既表現.

番到酒店幸男放咗個好臭既屁,但我見住從後抱住人家既幸男,淺藍色褲透著淡淡既黃色.人家聽到我既陳述就同幸男檢查,結果真係"賴屎",成板海膽"撻"咗係個籮柚度(唔知係咪和牛對小朋友黎講會太油膩).....酒店房既冷氣唔夠涼,兼且床單有蟻.臨訓前要係被舖裡捉蟻至安心訓(唔知係咪房內同露台有植物盆栽既關係).加上近馬路,半夜既車聲都滋擾到我.....但幸男同人家就好似不受影響.

沖繩親子遊DAY 3

今日早餐係自助西餐,幸男係房間食過早奶,所以黎到餐廳都係陪我同台女生,間唔中就試少少我哋既大人嘢食.幸男呢個姿勢,只係欠缺一隻腕錶就可以做廣告相~

 平時多食零兼煎炸食品,所以少食煙肉及蛋黃,但去旅行時都會破戎.Egg Benedict blackstone ,一次過令我放縱.

酒店自助早餐至可以食到咁大份奄列,配料仲係由你決定,有芝士,蕃茄,磨菇,煙肉碎.....當地既法式牛角包,我又點可以錯過呢?

早餐後,番上房執好嘢就落番大堂等坐接駁小巴去酒店沙灘.坐車都用咗三四分鐘,行旳話都要半個鐘.......一落到沙灘就見到一行行既沙灘椅,仲以為係體貼酒店住客,勢估唔要俾錢.3500円兩張沙灘椅連太陽傘(今日因大風不會開動),都幾貴吓.本來諗住舖沙灘蓆,但見四下都無人咁做,最多係有個後生日係近水邊既濕沙訓係度晒太陽,唯有去俾錢.....

今日真係好大風,場面有啲似沙塵暴咁(MISSION IMPOSSIBLE 4杜拜個幕). 

風沙令幸男怕怕,悲鳴"好大風呀....",結果我將自己副太陽眼鏡俾幸男帶住至好以平伏心情,繼續玩水.見俾咗錢,有職員係沙灘水巡視,於是一家三口一齊落水玩兼影相.海浪令坐住水泡艇幸男又升又降,幸男覺得好玩又開心.之後幸男一見到海浪,就雀躍地講"有浪啊".人家羨慕一對老公公老婆婆係度嬉水,公公扶住圍住水泡既婆婆;而我就羡慕一對膚色黝黑小朋友,欖住水泡興奮地係浮綫邊等海浪.

水清沙幼,真係要旅行至可以享受到.帶住小朋友,每次都係逗留一個鐘左右,因為怕小朋友曬傷及中暑,未能好似二人世界咁係沙灘度HEA.由於風沙持續, 我哋帶幸男去咗BB池玩多陣水.

晏晝個餐係駐沙灘既食店享用,上面仲有湯告路斯既相同簽名,以國際明星作招徠~

玩完水既幸男,又餓又攰,睇佢個樣好似就散就散咁,都唔知心痛定取笑好??

咖哩雞飯,竟然得一舊雞...我情願你賣貴啲,但係多幾舊肉填肚.起初想叫幾隻炸蝦天婦羅,但賣剩一隻,兼唔會話你俾錢就即做俾你.........

天時熱,食晏都要飲吓啤酒消暑.係沖繩度度都係賣本土ORION啤,其他啤酒選擇唔多,就算有會賣貴啲.

幸男例牌食叉燒蕎麥麵,而人家就食清新齋麵.碗麵真係寡到無人有,食完都唔知幾時會再肚餓.......

去隔離既LAWSON便利店行吓,見有沖繩獅子飾物扭蛋機,於是摷兩個100円銀仔俾幸男玩吓.

坐番接駁小巴番酒店,放低嬉水物品,就落番LOBBY坐預約好既的士前往名護自然動植物公園.感覺係幾懷舊吓,好以停留十年前既時代,無咩人入場.穿過一樓既精品部,就係露天既遊樂場,見有THOMAS火車坐,當然要俾幸男一嘗火車頭司機角色.

幸男真係好鍾意呢架會行兼可以坐上去既THOMAS,絶對無好似上次係SOGO見到個膠型THOMAS咁呆滯.

成日惹病我同人家既幸男坐住細菌小子既碰碰車,倍覺搞笑,可惜幸男未能掌握碰碰車既精髓,不時要我幫手扭軚.

跟住就係呢個公園既主菜-觀光火車,先係車站憑票上車,不過樓下入口個姐仔收咗我地酒店買入場劵既單後,無俾番公園既入場劵我地,結果擾攘好耐至俾我地上火車.

睇張海報好似好靚咁, 但實景當然唔係咁色彩繽紛,始終係大範圍既戶外公園嘛.當日雖然天陰細雨.但都未至於無陽光.

我哋就係坐呢架仿蒸氣火車既電動觀光路軌車,如果幸男係坐我同人家搭既北海道蒸氣火車濕原號,一定會好開心~

成架車除咗司機,就得我哋一家三口.司機沿途用廣播黎介紹園內環境,我哋當然係聽唔明........

司機會係個別景點停車,俾時間遊客去觀賞動物,我都未試過一次過見咁多隻生鴨游水.每位乘客都有一小盒龜糧,係火車停頓時可以扔出車外,引鳥類動物過黎.

呢隻會單眼既唔知係咪草泥馬?相比幸男幼稚園旅行去既鄉村俱樂部,呢度真係好好多,起碼唔會就咁得幾個籠困住幾種動物就算.細個跟阿公,老豆老媽去荔園玩既記憶已好模糊, 只係記得有用卜卜脆脆零食餵羊仔,同埋為咗手錶玩具機械人係轉轉盤用咗好多錢同扭計.

坐完觀光火車,係公園行多陣就離開.搭的士黎個陣見隔離有個小商場區,於是徒步行咗半個鐘有多至到.....見到有賣西班牙小食既流動車檔,但無去幫襯.行左間小型百貨公司,人家買咗條裙,我買咗套日式睡衣,幸男就有幾件童裝及一個THOMAS沙灘袋.

行埋隔離既小童商店, 買多少少嘢,就渣住本旅遊書以日文向職員求助,CALL的士去食晚飯既地方.職員走來走去,結果都幫我地CALL咗的士,兼用手機既APPS翻譯成中文話俾我哋知等司機來,該位熱心既職員仲送我地出舖口上車.

幸男繼續食意粉,偶爾試食大人既肉類食品.本來諗住試吓酒店外食晚飯,但無咩頭緒,結果係當地旅遊書揀咗呢間居酒屋.

前菜既熟食魚好難食,都係魚生刺身啱食啲,人家依舊係唔食有皮既刺身魚.

居酒屋叫既都係香口佐酒食品, 呢個芝士炸雞塊味道唔錯.餐牌上既選擇唔多, 可能大家都係飯後黎飲酒兼消夜,好少好似我地咁當正餐廳咁食.

勢估唔到人家唔鍾意食呢款腸仔,我諗住好似台灣腸咁,佢應該會啱食添.......

今晚人家按奈不住, 要飲沖繩ORION生啤,結果當然係飲唔晒(剩一半左右), 由我包底啦.

店主應該係某隊職業棒球賽既擁躉,CAP帽由2000年款掛到2013年,仲要有埋表揚狀添,打波直播時應該會好熱鬧.食飽埋計,重施故技托職員代CALL的士番酒店.可能職員習慣幫飲完酒既客人CALL車番屋企,好快就幫我哋安排好的士.今日既用餐雖然係普通啲,但叫做體驗吓當地人既日常生活丫.