朝早去番尋晚開餐既餐廳食日式早餐,真係幾豐富,前菜都有六小碟.主菜有三文魚同餐肉厚燒玉子外,配湯同飯,兩款小食(沙律汁撈豆腐同疑似關東煮既嘢)仲要有菠蘿片.即使我食唔晒,亦飽到頂住個心口.....幸男再享用酒店餐廳既免費餐,感覺好似好抵住咁.
原來每日早上07:00至10:00,係大堂內會有朝市擺檔,住客可以買到新鮮既生果及當地既食品.
我哋坐經酒店預約既的士去水族館,車身係黑色,車內無跳錶,價錢就一早係酒店經電話安排時報價.無私家車牌兼帶住小朋友既條件下,我哋只有坐的士,因為公共交通都幾唔方便同就時間.
一個鐘車程就到埗,以簡單日語兼紙筆溝通,約好司機5點係停車場接我地番酒店.即使係英文詞彙,我亦都會用番當地流通既日文拼音黎表達,例如THANK YOU,會以"生橋"黎表達.我覺得盡量以當地語言溝通係對別人既尊重.我仲以幸男之日文叫法YUKIO黎介紹俾司機知,司機聽到之後好開心,可能覺得日本名較親切.司機非常好客,帶我哋落電梯,再指示往售票處既方向.
幸男專用既BB車都有出埠,感覺好似平時係香港行街咁,掛埋啲袋上架車.人家帶住幸男探路,而我就係背後死命咁影相作紀錄.近海邊好大風,人家頂濶邊帽被吹走好多次,反而幸男同我個頂都無事,可能FIT SIZE兼無咁大既平面被風吹走.
正門有個巨型銅像,其青綠不均既顏色,令我想起陽光穿透流動既海水,照射到鯨魚身上之畫面.
幸男手執入場劵,但幸男唔需要買飛,因為未到學童年齡,果兩張只係我同人家既份兒.
平時愛食魚既幸男無問我哋啲魚食唔食得,只係乖乖咁觀賞壯麗既魚群.館內燈光較暗,好難至搵到個較光兼可以俾小朋友坐定既位置影相.
無論當地或外來既游客,都俾呢片濃縮既海洋感動.香港海洋公園可能都係參照過,至會有海龍皇餐廳既設計.
近一點鐘,係館內既餐廳搵位坐低,再由我出去排隊買嘢食.雖然係快餐模式,但味道唔單止係唔差,而係會令你想試埋其他食品.平時係香港既主題樂園裡既快餐,都係唔太好食,只求填肚.
餐餐食麵,幸男拎筷子既手法愈來愈純熟.一心叫杯橙汁加雲呢拿雪糕球俾幸男,點知飲到尾段雪糕熔埋落啲橙汁時,幸男嫌味道唔同咗,表態唔飲........
食飽後,我地去咗禮品部行吓,幸男坐住BB車無幾耐就訓著咗.買完嘢準備出番去戶外,趕睇海洋劇場時幸男就訓醒.即使香港海洋公園既海洋劇場咁多位(入場人數太多),我地都未試過有位坐低睇.今次係日本可以坐定定兼近距離睇(唔係海洋公園既山頂位),非常開心....
表演時間約15分鐘,但節奏明快,觀眾睇得開心.除咗海豚花式企泳,高速跳出水面頂波,仲有反身水面側鰭拍手,水中排串型氣泡,以及團隊大合唱.多得新引入既天涯鏡,我先可以影到呢張咁有動感既照片~
跟住我地一家三口前往水族館隔離既A級沙灘,設備唔錯,係最近石屎路既地區隔有圓櫈俾訪客安放物品.
圓櫈上仲有頂蓬遮擋太陽,啱晒怕暴曬既女仕同小朋友.我哋都係蓬下舖沙灘蓆俾幸男坐定定玩堆沙.商店有租借太陽椅既服務,唔會有職員於沙灘內兜客,感覺良好.
黎到沙灘點可以無啤酒同刨冰呢?啤酒當然係供自己享用,刨冰就係獻俾領隊。
當地日本人一家大細黎玩,可能當係國內旅行.寧靜既沙灘,比香港既氣氛好.係香港即使你去到一個較少人既沙灘,總會有人係你附近用手機或外置小喇叭黎"焚"機播歌.......
水質真係好清,淺水區域又無石,幸男都可以自己安心企係度玩水,以及行幾步.
由於我帶漏泳褲，所以只可係淺水地方同幸男玩,未能泵脹水泡艇玩.
幸男係香港時話要帶埋私家沙灘桶去旅行"畢"沙,身為父母既總算無令小朋友失望.
幸男係旅期間飲咗好多果汁,差唔多早午晚都飲,希望唔會縱壞佢啦.....
同小朋友影相都幾艱難,因為佢唔會好合作坐定俾你影,走走跳跳咁.自己部機唔夠快,有時影影到都會係矇同鬼影.呢張相都係之前既設定啱用,兼且又未熄機至可以影到幸男等媽媽時伸懶腰既古怪動作.
番到酒店放低啲袋,啱啱好係預約既晚飯時間.幸男今個晚餐都係唔洗俾錢,仲要果汁任飲.人家係自助餐區搜羅熟食俾幸男.
我同人家當然係主攻鐵板BBQ既配料,呢餐令我諗起當年係關島註冊行禮後既晚餐(當時係戶外用餐,較辛苦).飲品方面,我就叫咗個酒品餐,計過條數叫兩杯啤酒後,是但叫多一杯嘢飲就回本,結果我臨尾叫咗杯麻麻地既法國紅酒,早知就飲當地既泡盛.人家就揀咗非酒精飲品餐,但意外地職員無計到數.
友善既職員見人家用剷刀去除爐板上既油垢,就上前幫我地用水加剷刀清潔爐板表面,好似未開餐前咁乾淨~該職員仲主動幫我哋一家影合照.第一張就企得遠咗少少,之後我跟住我本日文旅游書講,想佢影得近少少就有呢個版本.我亦都好似晏晝咁,用有限度既日文介紹幸男個名俾職員哥哥.
見早食完晚飯,番上房間換衫,趕去泳池陪幸男玩水,幸男有得坐水泡艇,當然玩得開心.人家部防水手機XPERIA V,再次大派用場.雖然夜間表現差啲,但總算認到個人同背景丫...
玩完水既幸男理應好攰,但沖完涼食埋奶都係要媽媽講故事.擾擾攘攘,卒之都訓著,因為啤啤熊同手巾仔,係幸男入睡既寶物.
