今日係我同台灣女生既結婚註冊六週年紀念,之前都無咩特別諗去邊,只係搵咗間日式放題食晚飯.晏晝去睇戲,都係因為我係電視睇到廣告好似好吸引,集魔術及神偷兩大元素.係新墟凱都買飛睇,我本人就俾95分.對上一次令我印象深刻既魔術為主題電影係2006年既"死亡魔法"(THE PRESTIGE),"非常盜"係現代背景,可以發揮既空間更大更廣,而且加入神偷,警匪捉智角力,神秘天眼組織....正~
每年既結婚週年前席都係身體不適,一係感冒,一係腸抽筋,今次就係拖花園時扭傷頸背肌肉,睇我條頸幾梗.....
我哋睇完戲就行番去市中心油站搭巴士出尖沙咀,行咗陣商場就去BOOK咗枱既"響"食放題晚餐.由於我地早到,仲可以享用送完即止既半打生蠔.雖然係細隻啲,但味道都唔錯,比酒店自助餐既還要好.
傷患困擾,希望啤酒能有鎮痛作用.呢度有吧枱,供客人飯後上黎飲番杯,價錢都OK,同普通吧差唔多.
上埋個三色刺身及和式沙律,卒之都上今晚放題既主菜,佐賀產和牛火煱啦~
其實未上火煱之前,松葉蟹已經上咗枱,只係我哋以為一定要等埋個煱上至食,原來已燒熟,食落仲係暖口.
除咗頭盤外,所有火煱配料都係任叫,最正係係湯底都係會添番俾你,唔係齋加水~結果我主力食和牛,人家主力食松葉蟹,大家都食得好滿意~
行商場時順便買咗個袋俾人家當係結婚註冊禮物,呢隻綠色俾人好夏天既感覺.見人家今日個袋都殘舊,建議即日換黎用,舊既順手掉埋佢.平日忙番工,家務同湊幸男,真係無時間準備禮物,希望人家唔好嫌誠意久奉.食完飯就搭巴士番去大興接幸男番屋企,週年紀念都唔可以成日賣甩自己個小朋友嘛~
PS:晚飯地點選址係因為我係公司見有雜誌賣廣告,向人家WHATAPPS人家提議搵日去試吓.價錢都算合理,好過去食自助餐.食過番尋味,我同人家都想再去多一次.
