幸男見到飛機及停機坪上忙碌既人員和車,覺得好奇及開心.出發前幸男問過人家,所搭既飛機係咪白色,當幸男見到將會登上既飛機時就話"飛機真係白色啊".
臨上機前係STARBUCKS買咗份芝士火腿包俾幸男,因為怕飛機餐唔啱幸男口味.除咗暴雨及塞車外,其他一切都算順利.搞笑啲既係我過海關時唔PASS金屬探測框,要人手再掃,棒型金屬探測器掃到腰前腰後腰側都響,心知不妙既我忍唔住笑,因為我有條滿佈窩釘既皮帶....
十一點幾機,航程為兩個鐘多啲,航空公司竟然只係提供一個類似熱狗長度既菜肉包,正統有飯有肉既午餐都無份.其他乘客向空姐攞多一個包抵肚餓,空姐都話要睇吓有無得剩先.....好在幸男唔食STARBUCKS既包,結果俾我同人家分埋黎食.
幸男同人家坐我前一行既孖位,由於係的士上幸男訓咗陣,結果係飛機上幸男無訓覺,全程好多嘢講同問人家.起飛時有軟糖食吞口水,無叫耳隻痛,但降落時就有喊住話唔舒服(全機既小朋友都係咁上下時間喊...).
落機排咗好耐隊等過關,但無端端有職員我哋帶住個小朋友就叫我哋入房做指模登記同核對護照.之後就經側閘過關,我見該職員再走去隊中有小朋友既家庭.大熱天時,我推住兩個大喼,人家推住載有幸男既BB車去隔離既內陸機場,見到個水缸就想去海洋館.
卒之都開餐食晏,我地揀咗4樓既一間麵店,因為要幸男啱食嘛.幸男一飲杯水就話"杯水好好味唷",都唔知好嬲定好笑.
雖然我哋入座時店內只係得一個當地既中年日本人係度飲啤酒食支豆, 但坐坐吓就愈來愈多人入座.
北海道到處都係拉麵店,而沖繩就十居八九係蕎麥麵(そば)店.我當然係點最愛既海老天婦羅,因為香港既點都唔及日本既味道,可能蝦同炸粉都唔同既關係.
人家就揀咗個冷麵SET,連我平時唔食既腐皮壽司,我都覺得甜甜的,好易入口~幸男就食叉燒蕎麥麵,雖然食唔晒大人份量,但總算係啱胃口,尤其係叉燒肉.
食完嘢就落番去地下買巴士飛,再去LAWSON便利店買飲品.呢期LAWSON同銀魂CORSS OVER,唔好意思直接影近口架上既精品,所以只係店外遠影.
巴士車程一個鐘零四十分鐘,幸男坐咗無幾耐就訓覺,話晒都無訓晏覺兼舟車勞頓嘛.幸男訓覺呢個樣好似貓仔咁,托住塊面黎訓覺,好可愛.
去到MARRIOTT酒店己經係傍晚,係1303號房間露台望出去既景色唔錯,,遠望大海兼近觀酒店內泳池.
黃昏海景,美中不足係無個鹹蛋黃作襯托.雖然望到酒店沙灘同附近既便利店,但行落去都好似幾遠.
安頓好行李,就落去地下酒店餐廳食飯,係五間食店中揀咗室內鐵板BBQ.職員話已FULL BOOKING,唯有預訂聽晚,轉陣去食和日本料理.
酒店大堂既LONGUE,除咗有酒品外,竟然仲有CAKE SET-非酒精飲品配蛋糕,真係啱晒一家大細,男仕飲酒,女仕同小朋友就食蛋糕.
我哋散叫鍾意既菜式,先有六色刺身,塊塊都係厚切,真係好鮮味~
主菜係壽喜燒,齋睇個賣相點都好過屯門個間牛一,味道當然係驚喜,連幸男試過都話"我要肉肉".無諗過酒店餐廳會為小朋友準備兒童餐,雖然只係細碗既叉燒蕎麥麵配米餅同果汁,但呢份關顧已令我地感意外同細心.原先仲諗住要加嘢食,但食埋啲配菜已啱啱好飽肚.
行完酒店內既小商店同便利店,就番上房間.幸男第一次係外地訓過夜,特意帶埋每晚都攬住訓既啤啤熊(以前樓上包租婆孫女送俾幸男既禮物)出埠.幸男好似平時咁食過法國配方奶品,聽媽媽講THOMAS故事書(帶咗2本細),就乖乖咁攬住啤啤熊訓.
第一日既行程都係用係交通同膳食,無咩景點可言,最多話機場去酒店個段車程係少少市內觀光.對上一次同人家去旅行已經係5年幾前結婚去北海道.上次兩個人去日本最北既冬天,今次就多咗幸男加入去日本最南既夏天.第一次帶小朋友外遊,希望唔會太辛苦同勞氣啦~
第一日既行程都係用係交通同膳食,無咩景點可言,最多話機場去酒店個段車程係少少市內觀光.對上一次同人家去旅行已經係5年幾前結婚去北海道.上次兩個人去日本最北既冬天,今次就多咗幸男加入去日本最南既夏天.第一次帶小朋友外遊,希望唔會太辛苦同勞氣啦~
