每年清明都會約埋屯宿之男一去探吓阿強,之後都會一齊食晚飯,不過今年就因為各有各忙,所以順延至今日.無帶香燭,只係買咗罐生力啤,係阿強既靈位前點著3支香煙,奠酒.抹過碑石,待香煙燒盡後,大家就行落山,搭巴士去佐敦,準備一齊係"重慶燒"食晚飯.
阿彪要回家湊仔,所以無出席晚飯.由於要等埋收工趕過黎既阿禮同阿潘,我同PERCY,華B及瀟洒就食住小食黎等.
平日番工放工偶爾撞見,但可以坐低邊食邊傾既機會唔多,尤其係大家各自都有家室.
幾年前食過龍蝦燒,感覺上係樣樣都係差唔多味道咁.今次呢間重慶燒就無咁既問題,唔怪得可以係同一帶開咁多間分店.
再黎一張宿舍同房合照,特意帶相機出黎就係為咗影相留念,因為大家聚首既次數比以前銳減.各人係工作上既改變,確實令自己反思自己既生活態度及方向,可惜仍在摸索中,或者係自己既想法太天真.
燒蠔永遠都係咁吸引,原來諗住叫半打,每人一隻,結果都再"ENCORE",各人都試均芝士同蒜香味.
久未露面既阿禮比以往寡言,未知是否工作太忙既關係.年紀大了,每次出席聚會時知道大家生活安好,就已經心安了.
平日係黃金海岸聚腳時飲開TETLEYS,但今次就轉為HOEGAARDEN,近來都多食肆引入呢隻生啤~食飽飽,除咗阿潘同華B,大家一齊搭的士番入屯門,我就守尾站.係的士上,阿禮反而多講自己嘢,可能食飯時未能融入我哋既工作話題.期望有一次係大家齊腳帶埋小朋友一齊出黎飲飲食食,及大合照留念~
