今日天陰,難得同台灣女生放假,於是照原定計劃下午一齊帶幸男去廸士尼.係市中心食完晏搭西鐵去南昌站轉青衣線再上廸士尼列車,到埗時己14:20(其間不耐煩既幸男係咁問"到未呀?落車未呀?"....
一出站就見中雨,撐住雨傘黎推落咗雨擋既BB車行條大正路至到售票處換年票.CHECK埋袋入到場內已近三點.第一站去咗室內商店行吓先,當係避雨都好.人家特意幫幸男戴上巴斯光年既公仔帽,自己就戴住三眼仔帽,我當然係渣機影相,齋影唔買.
入場時已好攰,無咩精神逐樣商品望吓,一堆回力摩打推動既三眼仔($30@)確實係搶眼,好似電影中等被隻爪帶走咁~
見細雨啲,同幸男行去隔離既未來世界同巴斯光年公仔影番張相.其實幸男由落車起都係燶口燶面,真至見到有巴斯光年主題既嘢至開心笑番.
星際歷險裡燈光太暗,所以未能影到坐我後一個車卡既人家同幸男射擊既情況,只能夠係呢個停頓住影到發光既巴斯光年同索克天王既佈景.幸男亂咁禁制都有千五分,人家抱住幸男從埋站既慢駛車卡落車時,差啲失平衡跌倒.......
玩完都成三點九個字,於是去咗附近既餐廳放下午茶.一個熱狗餐都要成七十幾蚊,有年票就九五折(慳幾蚊)...自己都攰到無咩胃口,所以買一份就算,最緊要人家同幸男有得食.幸男有得食薯條當然開心,踼晒腳同笑晒口~
一出餐廳就再見到有人扮既巴斯光年係有蓋頂既地方同遊人影相,人家第一時間走去隊尾排,因為入餐廳前見過巴斯但已被工作人員截隊.幸男原本唔肯自己同巴斯合照,要媽媽陪,但見到有小朋友同巴斯握手,幸男就話要同巴斯握手.職員以單反為遊客影相兼俾個冧巴你去買番張相,但我早就係人家排隊時用相機度定個位同構圖(人家抱起幸男同巴斯影半身相)....幸男一上我就行前幾步,但無諗過係握手......情急之下踎底影咗呢張相,好在效果唔太差.後來我吔一家三口同巴斯合照,被人家抱起既幸男想好似平時玩玩具咁"禁"巴斯心口啲制(笑).職員幫我地渣機影個張相攞得太多景,由頭到腳仲要加埋地板........
跟住再去排隊玩"飛馳天地",幸男入車先,跟住係人家,最後係我.諗諗吓應該俾幸男渣軚盤,於是好狼狽咁係車上狹窄既空間換位.幸男坐人家大髀黎渣軚盤,人家負責油門,我負責記錄.
幸男開車時玩到哈哈笑(令我諗起德輝描述當年表叔係龍鼓灘開車一幕),當軚盤方向同路軌彎向不同時,車身會隆隆聲同震動(因卡住車軌),幸男就大笑話"好搞笑呀".行車期間我同幸男講"爸爸條命同媽媽條命係你手上..."
諗番當年(2005)同人家拍拖黎新開無耐既廸士尼,飛馳天地外既呢部車已經係度,只係無話係咁主題將會動工.
今次就係我同幸男一齊影相,好明顯背景同部車都係翻新同更改過黎.
小朋友又點會唔玩迴轉木馬呢?今次幸男自己一個人騎,好隱陣咁扶實把手,我就係隔離隻馬怒影阿仔,搏有張會似啲樣.
停機之後,人家上前扶番幸男落地時,順便同幸男合照,幸男好似仲未想落地咁.
小飛象就等得耐少少,本來諗住人家同幸男坐一架,我就坐佢地之前個架,方便影相,但不善霸位既我未能搶到有利位置,結果坐後人家幾架.....其實其他人一睇我哋都知我地係想前後坐啦,不過正如平時搭巴士時,明明係一個人坐孖位,都唔會讓俾你......
結果我要用天涯鏡ZOOM到盡咁滯黎影.要配合高低又要避開中間既陌生人,真係有啲難度.
卒之都有張係影到兩位既正面,可惜太反光同質數差啲,但總好過無丫.......
最後坐埋觀光火車,因為幸男鍾意火車嘛,點可以唔遊火車河呢?
自己辛苦都唔緊要,最緊要係見到小朋友開心,如果唔係就會變成山長水遠兼勞民傷財.上次去海洋公園己參透到主題樂園年票既奧義,小朋友玩一晝三四個鐘已經好夠,小朋友攰之餘,大人仲攰.唔太好主題樂園既我,為咗幸男開心,我都會再黎陪玩同影相留念,兼且沾染多點幸男既童真.
人家話今日比佢同大學書友十月時多人,但我就覺得比05年個次少人好多.幸好走個陣時無落雨,唔洗拖慢節奏.人家讚我有耐性同正面咗,比著以前落雨黎主題樂園我一定黑面,唔會仲笑得出.
回程我地揀係青衣巴士站等68A番入屯門,幸男係等車時已經訓著咗.臨走時我哋係開頭避雨既美國小鎮大街既商店買咗隻回力摩打推動既三眼仔玩具.上車時,人家抱住幸男上車,我就收bb車跟上.鐵路加坐巴士,舒服過全程鐵路但要轉三次綫兼無位坐.晚餐係藍地同同事一齊食日式火煱放題,各人都覺得我地好精神,唔似去完廸士尼,但其實我地三個都又餓又攰.
PS:幸男沖涼時同人家講"落雨都帶我去廸士尼既?下次好天先去啦".希望幸男你會有多點回憶,就好似爸爸記得細個跟霍氏(外曾祖父)及爺爺嫲嫲去荔園玩一樣.
