星期五番完晏晝更就騎羊去市中心UA買定飛,為咗今日放假同幸男睇THOMAS電影.中銀信用卡有九折,但都要$59,唔過一米既幸男可以唔洗買飛.
本來諗住坐輕鐵,但執吓呢樣執吓個樣,結果都係好趕,要搭的士去市中心.一點七個字去到戲院,院內已有3部BB車泊係銀幕下,入座率都有七成,個個都係一家大細入場.由於上映時間得九點幾同一點四十分,番早更既台灣女生未能一齊睇,所以得我同幸男兩父子入場.
片長一個鐘,全電腦動畫,起初仲擔心係講英文,我要做翻譯,點知係中文對的.幸男全程坐定定咁睇,無話扭計要去廁所或離開.雖然隔離個位無人坐,但幸男都無自己一個人坐,因為前行既椅背對幸男黎講太高,望唔到銀幕.我要將背囊放係我大髀上,再俾幸男坐上去,好讓幸男既視線水平同我相若.幸男全神貫注咁睇戲,無答我好唔好睇,直至散場時至答"好睇~".
放工既人家黎到市中心會合我哋,一齊去元氣食晏,點咗個烏冬同燉蛋俾幸男專用.幸男見媽媽食軟殼蟹手卷,又話要食,結果係俾佢食咗半個手卷.
跟住我哋再去STARBUCKS食芝士蛋糕同飲咖啡,都好似幾耐無咁坐底飲杯嘢,通常都係百佳買台式飲品,邊行邊飲.
幸男都有享用私家茶點,小朋友有得食又有父母陪就最開心.
幸男性格都係怕事,係BB衫店外玩緊軚盤時,一見到有另一個小朋友坐係隔離玩,兼有大人望住,就好似驚到想走人咁.我開聲話"唔駛走,同姐姐一齊玩咪得囉",幸男至坐番低繼續玩.
臨去搭小巴上老家黐餐前,我地去行大眾書局,搵到有THOMAS既故事書,一SET十本.夜晚番到屋企時,幸男心急咁話要拆出黎睇.臨訓前由幸男揀一本出黎,等媽媽講新故事佢聽.幸男今日好似好開心咁,我亦為幸男既開心而喜悅~
