今晚幸男又出夜街,為既係摩天輪同AIA嘉年華.
是日閒日無咁多人排隊,台灣女生提議先坐摩天輪,再去嘉年華.位位$100,轉咗5個圈就要離座.除咗維港景色,仲可以腑瞰嘉年華場地,感受熱鬧氣氛.
我地同卡箱係一男一女既籍遊客,我向男遊客請求為我地一家合照.
AIA嘉年華入場每位$90,包7個面值$10既代幣,變相係$20入場費.可能平日關係,幸男唔洗排隊就有得玩扒艇仔.話就話玩5分鐘,職員哥哥話無人排隊等候就等小朋友玩到叫停至為止.幸男不停打圈,花咗唔少時間至掌握到左右手一齊向前攪動,才可以向前推進.
反斗車王主題既機動遊戲,幸男點會放過呢?橢圓形路線,直線時均速前住,車箱係彎道上突然加速,營造高速入彎既效果.
意猶未盡,幸男玩完一轉後,向人家示意想玩多一次,並揀咗另一架車黎坐.
花車過山車無人玩,外籍職員為幸男啟動遊戲.幸男揀咗巴士造型既車卡,唔知係咪唔夠膽試騎乘式電單車卡呢?
幸男自己爬上充氣斜坡樓梯時,不慎被超前既大哥哥姐姐所產生既顛簸而失平衡,往後一翻,跟住喊住爬番落黎.我幫人家拎晒手袋同外套,好讓人家入場陪幸男玩三層樓高既充氣滑梯(原來人家話佢自己都好怕高).
以幸男既高度,原本要大人陪同至可以玩呢個旋轉滑翔機動遊戲,但職員哥哥又無示意要家長陪伴,結果勇敢既幸男自己一個人玩.
平均每款小童機動遊戲要3-4個代幣,只係呢個扔銀仔可以一個代幣玩兩回.
計埋額外買既代幣,幸男共用咗三十多個代幣,人家只係陪玩咗充氣滑梯,我只係負責攝影紀錄,全晚最開心既當然係幸男.....
八年前同台灣女生黎AIA嘉年華,我地只係籌備結婚中既情侶,而家我地已經為人父母,有一個四歲大既兒子-幸男.八年後,可能幸男自己同中學同學一齊黎玩,無我同人家既份兒了.到時我同人家就可以慢慢食吓嘢,影吓相,玩吓碰碰車,重現當年好似MI2齣戲,兩部車迎面一齊打白鴿轉既一幕~
