Play Doh & 電動車

朝早起身,台灣女生就開尋晚買既Play Doh泥膠俾幸男玩.自己細個時成日係電視機見到有廣告賣,但自己就未曾玩過.

幸男玩得好投入,利用壓條機及壓模,再配合唔同顏色既泥膠,幾可亂真既食物模型呈現眼前(當然要媽媽指導).

一眼就睇得出有薯條,麵條,士多啤梨,冬甩,只係漢堡包頂既麵包太薄,似奄列或芝士多啲.問番人家,原來係想慳泥膠,所以包頂唔夠挺身....

人家番晏,我就同幸男出球場玩.今次我用遙控瑪莉奧賽車黎帶領幸男既電動車,好似"金牌路路通".

期間有一男一女小朋友(約五六歲)走過黎湊熱鬧,佢地對瑪莉奧好有興趣,不停追住遙控車.由於我要不停廻避小朋友既追捕,瑪莉奧係無休息既狀態下,好快就無電,繼而被小朋友捉到.兩位小朋友都唔算太搗蛋,只係放石頭作障礙物影響我既路線,而且無搶走或破壞遙控車.

之後佢地轉移目標,不停阻撓幸男既電動車前進.其間有一個學行既BB女行過,好在幸男及時扭軚避開.我同兩位小朋友講,"再咁樣,下次玩遙控車唔預你地0架",佢地至乖乖地去其他地方玩.

幸男玩多陣電動車就去遊樂場玩,幸男話今日好似玩"瑪莉奧賽車"咁.