Disney半日遊

今日台灣女生接幸男放學,我就騎羊去燊光買外賣番屋企一齊食,因為我地趕住出去搭巴士轉地鐵入廸仕尼.三點幾入場,咁啱可以坐到觀光巴士,唔洗自己行小鎮大街.

人家唔知係咪見有遊客向職員借氣球影相,於是叫幸男向前影相.

首先排隊玩太空飛碟,可惜相機自拍失敗,前矇後清......

排咗好耐隊至可以玩幸男至愛既飛馳天地,明明人家話上次幸男玩得好好,但今次幸男入彎未能順著方向扭軚,結果令車身搖晃.

幸男指明要玩旋轉杯,結果一家三口一齊轉.一如人家所講,其實無想象中咁頭暈.

近七點就去霸定位睇夜間巡遊,感覺比日頭好睇.燈光既變化加強了動感及夢幻.由於無帶腳架,手持影夜景的確失敗率高.

幸男依依不捨既樣子,完全睇唔出幸男一星期前至睇過夜間巡遊.

唔係次次都霸到人家同幸男前一隻小飛象坐,今次再成功,影相方便好多.

去到反斗奇兵區域巳經好晏,幸男同遙控車合照.

呢個彈弓狗真係轉得好快,加上少少高低起伏,我左手渣相機錄影順時針轉動中既一家,但有幾吓就甩就甩手咁......

幸男想同胡廸合照,但部份區域已關閉,所以轉去搵泡泡龍.

諗住唔睇煙花就走,點知幸男話要食甜品,又俾佢見到有得賣DOLE蘋果肉粒啫喱,結果食住黎睇煙花.

城堡裝修,圍板外畫上原本城堡既模樣,感覺怪怪地.....搭R33番屯門,係築地拉麵食夜晚個餐,再搭的士番屋企,明早幸男又要繼續番學啦~