朝早五點半至起身拉筋梳洗番工，夜晚就CALL的入機場搭長途機 。 
相隔4年，小學生已經係準中二生，開始從螢幕去探索網絡與現實纏繞既世界。
少主細個時會模住玻璃窗望飛機，而家只會望一兩眼，之後再繼續望電話。4年無困獸鬥去旅行，緊張自己腳力不繼，又擔心多磨擦。
今次係窗邊既三連位，我唔洗同陌生人坐隔離，起飛前自拍合照~
長途機同之前既短線機有唔同，定係疫情下有翻新?座位背既螢光幕好似大過及新淨過以前。
原本downnload定<<模範的士2>>，點知機上既娛樂介面都有，一於同步比較吓，都係我個電話芒色水好啲~
長途機伴侶之一-house whisky酒壼，今次帶既係竹鶴17年。
起飛一陣(近1點)就開始上餐，晚餐都係台灣女生放工係市中心買茶木外賣番屋企，所以大家都食得落呢個宵夜餐。
我揀咗中餐古法鹽焗雞，因為黎緊有一段時間無中餐食嘛~驚喜在有"鬼佬"手工啤酒揀，雖然唔係飲開既IPA，但呢款LARGER都唔差。話晒14個鐘機，人生第一次著壓力襪作應對，始終不再年輕。平時番工太攰兼長期睡眠債，機艙一熄燈我就訓覺。
PS:人家於機場巧遇同事送個女搭長途機去親戚投宿過暑假，唔知第時我哋會否將幸男託付德輝過暑假呢?
