made in japan

今日番完早更,騎羊去置樂食單身漢餐,再係藥房買吓野.本來諗埋拜高電蚊香片,但俾我哨到有呢款之前用過既電蚊香片~除咗價錢平啲之外,佢仲有一樣好吸引既元素.望埋個盒背,睇吓你諗唔諗到?

無錯啦,就係日本制,made in japan!

由於今晚要番夜,所以沖個涼就訓,但訓咗兩個鐘左右,自己就醒咗.晚飯就求求其其,叮咗個波仔飯就算~簡真係都市人既恩物~

結集!十二黃金聖衣!!

朝早十一點起咗身,係櫃頂攞埋盒雙子座黃金聖衣超合金黎砌.其實買咗咁耐都未拆開過黎睇,因為之前係舊屋都無位display出黎,所以有好幾盒係無拆開出黎真正望吓同砌出黎.之前剛搬新居時就砌咗雙魚,射手,金牛,而家就係last壓軸既雙子座!!(係動畫聖矢冥界篇,結集十二件黃金聖衣黎打爆"嘆息之牆"時,雙子座都係最後一件到達既黃金聖衣黎o架~)

原來盒裡面有多個人形素體,用黎著教皇件"披",開頭仲以為著得黃金聖衣黎就著唔到教皇袍添.教皇頸上既掛飾好"拱",做唔到貼服既感覺,可能係用魚絲黎穿既關係.突然靈機一動,入房用縫紉用既線黎拉住頸飾,線頭收藏係腰帶,成功製造出頸飾貼服既感覺.

嘩,砌好晒幾莊觀~當十二件黃金聖衣結集時,就等如太陽既力量,威力之大,足可以打破分隔人神既"嘆息之牆"~感動~~~~~~~~~經典場面,此刻無價~等我搜尋吓啲透明膠品黎架起大後方既教皇先~

點幾鐘,開始煮晏仔食.台灣女生負責煮河粉,我就負責炸雞寶,呢次係我第一次炸野食~係人家既指導吓,既無炸燶,中間又無生RR.嘻~人家仲讚我炸得幾好~

食完晏,同人家係客廳睇cyber formula zero 第三至八集.本來諗住睇住一半先,點知人家話想睇埋個ending.本人對呢套動畫有情義結,一黎故事吸引,二黎tv板同ova板係我中學讀書既時代.double  one同zero係大佬健係响葵芳商場租laser碟(成個pizza咁又個隻)黎睇同錄落帶,得閒又攞出黎番睇.saga就係我同主機係市中心newtype租.

大約五左右,我同人家騎羊去伯母家,睇吓裝修成點.原來伯母為咗等裝修師傅,連晏都未食,於是督促伯母叫外賣同食飯,又幫伯母問工程事宜.之後得知今晚都係無得用厠所同沖涼,厨房sink盆最好禮拜至用.

我同人家六點幾至騎羊去市中心買餸,而伯母就繼續留守等師傅鋪瓷磚,等師傅收工,收拾吓場地就過黎過夜.

今晚既菜單係"牛油香煎比目魚扒","沙嗲牛肉白菜仔","紫菜豆腐湯".先係惠康買"紫菜豆腐湯"既材料,牛肉絲,白菜同沙嗲醬,跟住係吉之島超級市場買比目魚扒同牛油塊.由於週末兼太晏,好鬼多人買野,要排長龍,要成七點半至起程騎羊番屋企.

人家負責搞煲湯,我就煮比目魚扒同兜沙嗲牛肉白菜仔(落沙嗲醬炒時,好鬼大煙同攻鼻).等飯熟至開始煮餸,搞到九點至開飯.太肚餓,掛住食飯,唔記得錄明珠台既italian job.........當時巳經係十點半..........

伯母黎到時,已經十點,試過沙嗲炒白菜,都話好食,不過牛肉就炒得老咗啲...有待改進..魚扒都無話唔熟,兩味餸都係多得人家既醃制調味,先至可以煮得好食~

觸及龍既逆鱗!!!!

十一點幾,食過人台灣女生既愛心百搭早餐(真係好似公司canteen既陣勢),洗埋碟,meme momo,兩點鐘同人家騎羊去碼頭既大新銀行交做美國visa既錢.跟住收到ikea既電話話15:30送cd架黎(弊,唔記得今日送貨...)

搞掂手續,騎羊去公司人力資源部攞埋少少文件.15:15到達,我叫人家上office攞,我就係樓下睇住羊仔,你知啦,沙塵滾滾,地盆多車出入,都係睇住好啲,唔知rehab building幾時完工呢?

騎羊番到屋企門口,都只係15:30.電話無miss call,即係送貨都未黎.無幾耐收到電話,話係天水圍出發黎,唔洗半個鐘就到.師傅好快砌好個架就走人,我同人家吸吓啲塵收拾吓,就騎羊去深井食下午茶.

五點未夠我地就到,見排骨位滿,於是泊咗係排骨位上面行人路,靠住標貼第幾類危險物品既倉仔.我地入咗去皇后,人家叫餐時,哥仔話可以轉什果冰,但我話個餐牌寫明d餐係西多士配紅豆冰,唔可轉其他飲品.跟住哥仔忍住笑咁講"其實我地無晒紅豆冰..."我同人家即時笑出黎.人家話佢叫既西多士幾脆口,但我既燒牛肉三文治,唔知點解啲牛肉係凍既.....好在叫咗烘底.食野時接到契細佬既電話,同佢講吓近況,又得知佢去睇醫生黎,星期一都要覆診.埋單時,撞正職工用膳時間~

食完野,行番去攞羊時,見泊羊位置有所轉變,原本羊仔停泊既位置,變咗係一架石油氣車,仲有人係度上落貨.再望吓愛羊係邊,原來係俾人移前同轉咗個右彎,好貼排骨位既電單車尾.我好嬲,有無搞錯,我落晒布目同碟鎖,你鑑粗推我架車黎吞位?布冚鎖食實咗係前呔同地面之間.最怕係個碟鎖跟住個前輪轉時,撞到個鮑魚!!拆開布冚睇,當時碟鎖位置已經唔係當初既位置,好近鮑魚,真係唔知有無撞過.左邊側鏡俾推到歪晒.

上前幾個石油氣車既外籍工人理論,仲好串咁答我成條村都知呢個位上落貨,又話阻住佢架車入位做野,所以就推開,仲話架車無問題.我好慶咁同佢講,架車落晒鎖唔可以鑑粗推,點知佢毫無悔意,話係咁架啦,有咩同佢大佬講.我立即問佢大佬係邊,佢指住食店後面既村屋話係合光行.

怒氣沖沖既我,拎住個布冚鎖,拖住人家去鋪頭理論.店內有兩個女人,一個後生啲,一個中年,仲有一個叔父.我同坐枱既後生女講出事情,話事人打電話叫個外籍工人黎詢問.個工人認有郁過我架車,但都係唔覺得有問題,仲話你試過著到車咪得囉,唔願負責,仲大我叫我去報警.人家都有出聲理論,我話咪報警搞大佢囉,再好大聲咁鬧佢,"係咪我架車有咩事剎唔到車炒咗死埋你負責呀!"

我同話事人要求寫個字話會負責呢件事,我要去原廠驗車,有事既話就要佢地俾,但後生女話只係作口頭承諾,俾張咭片過我,話個叔父做證.佢地話我唔應該泊架車上去,我都承認係,但最多你咪報警黎抄我架車,再call上台問資料再call番我囉,但唔係咁樣亂黎.佢地仲話呢條村所有位都係姓X既,係俾姓X既擺車.有無咁唔講道理架?人地渣車黎食飯,都係帶旺你條村,俾錢你地賺咋,你咁惡,咁盞趕客啫.臨走時至撞到真正老闆(中年男人),起初佢都話我地唔著在先,推開無問題,但後黎好似係中年女士講係工人鑑粗黎,老闆至話咪照佢地咁做囉.

係路邊試過羊仔前brake,心理上點都覺得唔妥,但又dup到,點都係行一轉至知有無問題同前叉有無漏油.沿下路入回程,雖然有日落鹹蛋黃,但真係無咩心情去欣賞.

平安番到屋企,望過羊仔應該無新花痕,再攞士巴拿扭番正個側鏡,心情好差好差,覺得個班人好亂黎.

七點鐘同人家出門搭輕鐵去兆康會伯母,再一齊行去和生食飯.由於太慶,叫咗支asashi黎降溫,人家叫咗支jolly shandy.餸就叫咗泰式辣鳳爪,燒豬頸肉,粟米魚肚羮,腐孔通菜.

食飽飽,就截的士番屋企,伯母屋企裝修無水用又亂糟糟,所以黎借宿一宵.
PS:竟然咁樣對我既愛羊,太過份了!初步懷疑,壞人見羊仔軚向被鎖向左,不能轉右彎,於是抬起前轆,以後轆單輪推行向右轉,再放低羊仔....

觀禮,揀婚紗,睇戲

朝早十一點去到市中心婚姻註冊處,同一眾兄弟(percy,德輝,子健),朋友同事一齊參加觀禮.新郎哥有啲緊張,埋位等宣誓時有抺汗摸面既小動作~簡單而莊嚴既儀式完成後,大家都繼續影相,仲落埋去廣場既花甫再影添.新郎哥叫晒我地觀禮人仕一齊去隔離明星飲茶食啲野,認真客氣~

食完野,德輝,percy陪我去高登攞con(竟然今日至有....)兼篏埋對鏡片去個框度,跟住就分道揚鑣.本來諗住去搭巴士,點知大塞車,我仲係巴士站見到仇姑娘係巴士上層,我諗佢應該係趕番晏.

走去搭輕鐵,落咗車行緊番屋企時,收到台灣女生既電話.人家話得佢一個人試妝,好似好慘咁,於是我係屋企洗個臉,攞埋人家既眼鏡(怕夜啲人家會眼攰同唔舒服),提早出門去會人家.

三點半出到尖沙咀,其實人家已經試完妝,只係地鐵站等人家一齊過中環揀關島既婚紗.係中環站等埋人家兩位朋友仔,就一齊行上office.(約咗四點半appt)

人家試咗好幾件自選婚紗,之後再試姐仔介紹既新款,最後揀咗呢條吊帶兼紙碟裙腳款,Brenda,Rita同我都一致通過

.賣吓關子先,遲啲睇相簿就知成條裙係點

我地搭地鐵落去旺角朗豪坊既元氣,會埋人家另一個朋友仔Iris一齊食晚飯,好耐無食過啦,燉蛋,劍魚腩依然好食,但相比其他新店既手握壽司真係遜色少少,不過都仲有好多人排隊既.

食完飯,我同人家行去信和攞番之前訂咗既雞脾咕o臣,人家鍾意食雞脾,包裝label上既公仔都好得意~跟住就趕番去朗豪坊既UA同大隊一齊睇20:10既"十分愛".小本制作,無咩驚喜,搞笑位唔太多,著重"掩眼法"-人好多時俾其他人既包裝欺騙而做錯選擇.

婚沙攝影日

放假都要六點起身,因為今日要去影婚沙相.梳洗完之後,又跌又戴咁,用咗三個字時間上con,共用咗四隻(唔知解有一隻戴咗上去都好似無度數,睇野矇咁).七點鐘,一袋二袋咁同台灣女生出門,搭的士去兆康西鐵站,到美孚出站食麥當勞早餐,為辛勞既一日打底.

搭地鐵去到九龍塘站已經係八點半,比約定既08:15遲少少.由於影樓係係另一邊,所以我地拎住釘係張單上既地圖搵,點知兜錯路,成八點十至摸到門口,原來只係上次去揀衫既店鋪斜對面,職員仲係咁打我地手提,但我地一袋二袋咁無手攞電話接.
locker訂金$20,但無細紙,所以俾咗一舊水.食完個早餐,好肚痛,幫襯完w.c.出黎時,人家已經去換衫化妝,我就俾個姐姐仔帶去試衫.黑白兩套都有著俾人家睇,都話ok~跟住俾人捉去上妝,咁大個仔第一次撻啲粉落塊面度.執埋啲野入個婚紗公司既手抽大袋裡,坐住兼訓住黎等人家set頭.今日既攝影師叫patrick,助手係後生新潮男仔阿安,補妝及褓姆係peg姐.

九點幾十點至出車去西頁,我地拍攝地點係白沙.今日無好似尋日咁倒水落雨,但天陰涼涼地咁啦.落碼頭之前,係郊野公園影咗陣相,人家話咁都唔洗特意去台灣影相都有咁上下feel丫.坐快艇去上遊艇,感覺幾好.我地先係外邊影相,欄杆,船頭,掌舵位...最後先係船艙內影.係至白沙前,我要去換casual wear,出黎繼續小休.patrick話試吓我同人家呢對新人,問我想著重外影多啲,定係廠景多啲,我停一停,諗一諗至答外景,好在係同人家既答案一樣,如果唔係就又糗又影響心情.係遊艇上飲過暖水,食過曲奇,peg姐都幾細心.

坐快艇上島,有好多隻野狗係度.人家驚到震,但佢地見我地行過去就走到另一邊避.安仔話佢地成日都係附近幾個島出沒,游渡海泳~我地係石灘陣同沙灘影相,又坐又抱又孭又踼水(仲俾patrick話我地無力,踢唔出水,要ng).有道具太陽傘,木枱,木椅營造氣氛添.其實影相時間唔中都有啲毛毛雨,,坐快艇上遊艇執埋啲野,著番對鞋,又上番快艇去碼頭.一上車就落大雨,好彩~
係車程中,Peg姐幫我地叫外賣飯盒,(早知唔帶咁多麵包做乾糧啦..)坐咗幾個字車就番到影樓(兩點幾).一落車就見到送外賣既伯伯同佢既單車已經係門口守侯,問我係咪x生.人家儍奸奸咁問我,點解阿伯識我,我唯有答佢係送外賣......

人家叫咗佢既至愛,黑椒汁炸雞脾飯,配凍檸茶~(隻脾係原隻上,入係另一個袋裡,無俾黑椒汁浸住)

我當然係叫咗麻甩佬之選,中式牛柳飯+凍奶茶.全數都係$52,係省城算相宜,味道又好食

食飽飽,我去換番禮服,人家換衫同set頭.跟住就去影園林影,唔知點解係個大閘度都要影好幾張相,又開又關,又"艾"又企.園林之後就係廠景,由於兩個影樓都有廠影,所以要兩邊走,但好在都有七人車黎接送,唔洗自己行.唔知點解,廠景幾殘吓,地板爛,吊燈有下墜情況,電線外露...入牆插穌又係電線外露,脫離母體....其他佈置都係幾舊吓......較為吸引既都只係last既鋼琴同水池景.

近七點至影完,換埋衫,落埋妝,要成七點幾至走人.姐仔話星期一有得睇相,但我要番早番夜,於是暫定星期二,等人家問到更期至再confirm.

抽住一袋二袋咁行去又一城,八點多啲係板前等飛,要等六十幾個冧巴,坐住係對開既溜冰場觀望台,打住nds,食住百力滋黎等咗近一個鐘至可以入座.

係巴士度係咁訓,十一點幾至番到屋企,好攰~希望啲相唔會太唔好睇啦,始終我都係笑得唔好睇....

ps:影相時要攝影師係咁叫我笑得假啲至笑得出...

辣槍手

今晚約咗阿潘同阿飛去巴倫紐荷睇七點半"辣槍手",咁剛陽味重既戲,當然係同雄糾糾既男子漢睇啦~

齣戲都幾火爆,無咩冷場,唔係炸到飛起,就係射穿頭同射爆手.第二男主角被裝上臂架同wire,被迫開槍自殺一幕幾新鮮(特別係男主角個句"邊條pk諗出黎架?")~雖然劇情係意料中事,但最後既結局可以話係麻麻,又可以話係似以前西部牛仔片咁執行私刑.

睇完戲,約阿禮出黎襯吓.阿禮係戲院附近搵我地,去七仔買啲啤酒同零食,就三條友行番去公司攞車.阿潘渣車去我屋企坐吓.雖然見到road block,但見其他泊街既車都無被抄,我地都決定照擺係街邊.

耐無見傾吓飲吓,今次仲買咗支黑啤,飲落有啲似李派林喼汁既味道.阿禮話溝落啤酒度會好啲,但當我溝咗之後,阿潘話都係似喼汁味.

一雙一對行街街

訓得晏,起身同台灣女生食過cp雲吞,就換衫動身出旺角,目的係買禮物同約雞脾食飯,順道出黎行吓~

四點幾至出到旺角,一落車就好肚餓,去咗拮魚蛋同食燒魷魚鬚.咁啱食魚蛋時係對住城城既宣傳海報,搞到好似係餵城城食魚蛋咁.

跟住我地行去兆萬搵目標master piece麥加登,但間間都話賣晒,連之前我買個隻星星叫都賣晒,一下子咩都賣晒?見到有影月既頭像賣,但要兩舊水,諗諗吓都係唔買.

萬念俱灰咁離開商場,係兆萬樓下見到有間冬甩店,於是貪新鮮排隊買咗個黎食.起初諗住要焦糖脆米,但後來見有紐約芝士冬甩,於是轉軚~

夾心系列$12隻,芝士味唔夠多,中間夾心cream味較重,但都好食既.係信和"宇宙船"見到有得賣麥加登,但炒貴咗成兩舊水(不住我同大佬健以前叫佢做"賊船")....行番出黎諗咗好耐都係覺得無咩邊樣好得過佢黎做禮物,人家都話靚,於是番轉頭買咗落黎.

我地行去奧海城搵雞脾食飯,送上牛一禮物,同雞俾形既手枕(晾起隻手用mouse),就去咗別府食晚飯.食食吓傑傑都過埋黎送野俾雞脾(順便買貓用品),跟住就出去同阿嫂搵地方食野.點知食食吓見佢地都入埋黎係另一張枱食野.

食完飯,雞脾同我地行去旺角,佢去買麵包俾脾嫂,我同人家就去信和買機動警察既dvd.台版都要$190,對番台幣定價,貴咗四十幾蚊...但之前行過好多間都係無得賣,可能太舊既關係吧.番到屋企試播時,見個menu又幾靚,唔似cyber formula咁雞,而且background音樂係完整一首,唔係播卅秒就repeat個隻,有誠意~睇黎除咗人家外,台版都仲有其他好嘢執.

大假前席

"I wanna be your pop star........."六點零八分電話鬧鐘響起,動身梳洗換衫,騎羊去建生買老麥既熱香餅早餐同薯餅俾台灣女生,自己就係相熟麵包店買腸仔飽同菠蘿包.同羊仔番到公司,係neats附近駐紮,坐係行人路上既"水馬",打住機械人大戰黎等人家.

等咗四個字左右,人家至出現.人家見有人接放工,兼且望見行李倉仔有麥當勞早餐,既驚喜又開心~羊仔孭住我地番屋企,十分鐘唔洗就到.人家成日都想食老麥早餐,但又早唔到起身,所以咪借接放工呢個機會黎滿足下人家.本來諗住兜人家去老麥食,但又怕人家太攰,所以就外賣係屋企舒舒服服咁食.(食到訓著都得嘛~)

晏晝番工前,騎羊去市中心還漫畫書,去老麥食晏.由於係星期六,好鬼多人,好難至搵到個搭枱位.輕輕鬆鬆咁騎羊番工,點知係更衣室回頭同阿飛打招呼時,哎吔,扭襯條頸添.....

上到ward,傑傑幫我捽咗幾野,仲借支安美露俾我搽(唔該晒).成日個頭都dup唔低,同擰唔到左右,痛呀~

放工騎羊番到屋企,用冰袋敷頸,點知乾咗既安美露遇凍變成發熱,搞到好似發滾咁.係sofa度坐直又唔係,"艾"住又唔係,辛苦咗成個鐘有多,沖埋個暖水涼至好番啲.臨放假黎頸傷,希望星期三影相時無事啦

小型放縱(後記)

<以下內容,實為昨日既事情,敬請留意>

番完個早更,騎羊去市中心還碟.還完碟至記得要配con,跟住行番去路邊"吞"羊埋相熟位置落布冚碟鎖.行過精美,望吓cyber formula dvd幾錢,因為上次係又一城既cd店見到要$180.咦?平啲喎,$138,$168,仲要係11,zero,saga,sin都齊,但都係諗清楚先~

係秋田食完單身漢餐後,行去附近既眼鏡88配con.見人頭湧湧,於是行入去隔離無人問津既高登.驗眼房張櫈係電動升高降底,陳設都幾企理,無話亂糟糟.出房試con時只得johnson俾我試.我問"mug唔係仲有隻ciba(可愛教主賣廣告隻~)可以配咩?"視光師哥仔話ciba個lens窄啲,而我個角膜又比較平闊,所以會唔適合,戴咗都會好難除同辛苦.佢仲話我之前帶個款博士倫都係唔啱我角膜孤度,所以會有就甩就甩同易攰既感覺(呀,全中呀~~~

).哥仔仲俾我試有散光既con,話做緊promotion,可以用手機send sms去johnson,收番個code,就可以平$100,以無散光lens價錢攞走有散光lens,抵玩~哥仔話要星三至黎攞貨,但我話想星期三去照結婚相時用,佢跟就話urgent攞就星期二兩點後call我去攞.

搞掂晒就行去置樂睇吓dvd rw既價錢,見無咩選擇,睇完就走人.係parklane漫畫店租"魔法小金毛加旋"同"蒼天之拳"(太耐無去,差啲連會員冧巴都唔記得),仲順手買埋本星矢G添.

行去吉之島電腦部睇吓dvd rw,再落精美買埋cyber formula dvd.我只係買咗zero,saga同sin,一黎銀根短缺,二黎11太舊同色水畫功無咁靚,買dvd有啲嘥. 行埋去best瞄吓,最終都係上番吉之島電腦部買tdk dvd rw 1pack10隻,跟住就騎羊番屋企.

試吓cyber formula啲碟,都無花又read到,不過制作有的"那西"個menu真係好"雞".跟住就試吓用dvdrw碟黎錄電視,又試埋預校錄影.Andrew約我八點係大排檔食飯,我七點九就出門去截小巴.
我地都係例牌一人一隻燒乳鴿,再分一個雞煲.哥仔介紹放烏冬落雞煲好X正,我地試過又真係幾好味,烏冬索晒雞煲既湯汁~哥仔又介紹窩蛋綠豆沙,話係有個客問佢地攞個生蛋打落佢地送既糖水,見幾過癮,所以推介其他客,仲話好"補"添~我地婉拒咗,一黎太飽,二黎我答個哥仔"今晚無對象"...

由於食得太晏,所以無返公司接台灣女生,要人家自行搭的士番屋企添....臨走時,應人家所求,去咗盈記買楊枝金露,芝士春巻同穌炸魷魚鬚.搭小巴,十點半就返到屋企,再同人家食宵夜餐..

今日又食咗好多野又買咗好多野,真係有啲"奀"~

住家男

sleeping day,點零鐘 訓醒就動身去市中心中原換過部dvd機.出門口前試多次,咦?又得既?那那聲係個tray度攞番隻red bull x fighters 碟出黎,跟住熄機,拆線,入盒,出門.

去到中原,哥哥仔試過部機又係正常運作.我同哥仔講都係想換過部新既,因頭七仔包換期都無咁一半,唔想再出事無得換,要抬出去整.哥仔都話可以換一次,但如果都係唔得就真係要抬出去原廠搞(都好丫,有得換).

等換機期間,有對男女入黎問哥仔dvd機價錢,話想要部14bit,哥仔話有,但要七千幾.男女既反應好大"mug多兩bit就差咁多錢o架?"好明顯佢地係唔知價.跟住佢地又話想要部讀碟能力高既機,例如d9碟.一聽就知佢地係睇大陸老翻d9壓縮碟啦...哥仔頂唔住,問佢地究竟想要畫面靚,定係要讀得多碟,bit數高係處理畫面好,並唔係讀碟能力高.男女一輪"而醫鵝鵝"後就離開.sale哥哥係度"伸"話啲友仔梗係係網上既forum度信埋啲人亂up既野,又要靚,又要睇老翻,又要平,"香港人貪心".

由於收到ikea既電話,所以換好機,試完就急急腳去搭巴士番屋企.三點唔夠就已經收咗張梳化床,雖然見天色麻麻,但都係好想行吓隻羊,於是騎羊置樂食玉林苑.食完野係相熟商場睇野時被人叫我既名字,踎底既我回頭向上望,原來係gordon(返完早更過黎行吓).近排都好似無咩新野出咁,同gordon行咗陣就分道揚鑣.臨走時我仲同gordon講唔知買咩餸好,gordon仲笑出黎添.

未買餸,先去東亞買柔順劑同冰療痛膏.係雜貨店搵咗耐至搵到個啱size既兜($10)用黎蒸飯用.行過菜檔,人頭湧湧,又唔知買咩好,於是騎羊去吉之島.先係家品部買咗隻啤酒杯,再去影視店租咗隻"俠影魔龍".順道去惠康望吓,但都係無咩諗頭.去埋百佳,見有一份份既扇貝賣,於是就決定係度買.聞到好香既鹽焗雞味,望到有鹽焗雞脾兩隻一份咁賣,於是又放埋落架車度.健康都市人點可以唔食菜呢?好似好識揀咁係度揀菜心,其實只係望吓有無邊啲係特別樣衰.執埋牛角包做早餐,雞翼餃子做存貨,芝士圈做小食,就去埋單~

攞羊前,係吉之島既超級市場買多兩罐tetley's,用黎試新啤酒杯既容量.番到屋企,send短訊俾人家話"買好餸等你番黎",就洗好個兜,洗米,較水煮飯.洗菜,浸菜,浸粉絲.本來諗住將隻雞脾劈成一件件,但張刀唔夠勁,唯有先去骨,再斬件,但效果唔太好,所以另外一隻原隻上碟就算.

人家番到黎,都未有得食住,搞多半個鐘至開到飯.無上鏡既蒜蓉粉絲蒸扇貝就無咩蒜汁味,粉絲都無咩汁吸到,失敗.....不過都無蒸到韌口,只係唔太夠味啫.今次用新買既兜黎蒸飯,較水較得幾好,無話焗咗好耐都係又濕又黏.炒菜依舊無問題,原來我只係煮簡單齋菜至得.....

新買啤酒杯又唔能夠裝晒一罐tetley's......錯晒

食完飯,為人家準備聽日番晏既飯盒.煎咗今日買番黎既餃子釀雞翼,"霎"埋雪櫃裡既菜,蒸多次飯,排好個位,人生中第一次做既飯盒參上~

洗完碗,同人家夾手夾腳駁好換番黎既錄影機,試過都無問題~沖埋涼,就食住雪糕,睇燭光電影"俠影魔龍".評價一般,真係有啲似"魔介".

arai

今日係公司停車場見到有個阿姐騎住隻台灣羊,但係佢個開面式頭盔就一啲都唔"雞",係日本名牌Arai~

其實之前我都想買呢個品牌(通風孔設計好型),但係由於造價太高,所以無限期擱置,SHOEI就更加貴啦..

講開又講,係街上見到好多p牌出250豪華羊,07 skywave type s,forza z.大家都好捨得買好啲,當然老老土土,單單薄薄既台灣羊依然有支持者啦.

no sync signal

番晏之前兜咗去市中心相熟電子店買天線分插座($15)同天線($98),反正dvd錄影機個tv tuner麻麻地,所以唔買咁貴.阿姐仲話如果個用分插座都無咩改善,就可能要用插電既加強器.

順手去隔離買埋拖板,分擔吓客廳既供電問題,老細見我剛買幫襯完,平5雞,以$75賣俾我.
夜晚係台灣女生既幫助下,卒之都駁好晒啲線,電視再無鬼影,問題得到解決~可惜,好景不常,當我係錄影機台睇吓收電視既效果時,畫面中"空軍一號"既夏李遜福突然花晒,跟住畫面一黑,再出現以下畫面.

唔通燒電視?唔會丫,出住no sync signal喎...試吓電視台,又無問題喎.望吓個dvd錄影機,嘩,熄埋機,pannel無顯示添.再襟個power制,pannel只係出sart up,而畫面一樣係no sync signal.等咗好一陣子,都係咁,襟其他制都無反應,連個tray都彈唔番出黎......我人生中第一隻dvd錄既電視節目呀........

"炆"過插蘇出黎又插番入牆,都係無反應,power制都無反應,pannel漆黑一片,連standby mode既時間都無打出黎....certified ........

唯有聽日打去中原理論吓,話晒未過"頭七",點都有得換卦?又會買著部"直燒電器"既......

Red Bull X Fighter

番完早更,騎羊去市中心會脾脾同大豆.本來去明將,但幾多人等,去對面惠比壽,要等三張枱.大豆話去kfc,於是行去食個$98既桶餐.

食完野,大豆自行歸家,雞脾就陪我去睇吓dvd錄影機.豐澤無咩款,於是行去百老滙望吓.係就係多款啲,但有硬碟既款最平都要成兩千幾.....再行去best睇吓,款又再多啲.聽完sale哥哥既介紹,諗住買部無硬碟,齋燒碟既飛利蒲,反正我地都唔會點追一至五既連續劇.價值一千三百幾蚊,又可以粗粗地俾人家煲韓劇dvd同錄吓電視節目.

行埋去中原,sale哥哥都係建議買無硬碟既機款.雞脾"目及"到之前睇中個部飛利蒲寫住"照價再減".sale哥話有AIG信用咭就有優惠,我同佢講無呢款咭,但佢話照俾番個折扣優惠,折實一千二百幾蚊,平一咗一舊水~

刷完咭,拎住部機去攞羊,但又放唔入行李倉,開始落雨添.唯有行番去中原放低部機,自己騎羊番屋企先.之後再搭小巴出市中心攞番部機走.一出一入,用多咗大半個鐘.

番到屋企,好鬼攰,沖佪涼,set埋洗衫時機就訓.訓咗一個鐘,八點阿潘打電話黎問野,醒咗就去晾衫.由於太攰,叫咗人家幫我煮個米粉當晚餐,人家仲煎埋餃子添,辛苦晒~

同人家夾手夾腳set好部dvd錄影機既線,發覺電視畫面差咗好多,可能係經過錄影機後,天線訊號差咗,有鬼影同粗粒,嘥晒條靚天線......聽日去買個分插頭同獨立天線搞搞佢先

晚間新聞後,係明珠台邊睇邊錄Red Bull X Figther.點知啲旁白冚過晒現場既聲,無晒氣氛.澎湃既引擎聲同死氣喉聲,觀眾熱情既歡呼聲,全都被平板悶人既英文旁白壓下去....真係無癮....

區內活動(後記)

<以下內容,實為昨日放假既事情,敬請留意>

訓醒覺,食少少野,十一點鐘左右就騎羊番入村執多幾件玩具.meme momo,成十二點幾至番到屋企.
入到屋,立即著手將新運到既幪面超人玩具,安放係display櫃裡.由於空間有限,所以要諗過度過.幾經難苦

(好多次既fall同合唔埋玻璃門),卒之擺好rider陣.數係黎,都係faiz系列比較多,其次就係kuga~ 台灣女生話係前排既kaiza,faiz,delta三位拎住個既幪面超人,好似係班馬線等過馬路既上班一族.

晏晝叮番熱尋晚食剩既外賣pizza,可以足不出戶.兩點鐘,換好工衣,就動手抺羊打腊.屋外有水喉真係方便,不過都有出出入入咁攞其他"架生".由頭抺到尾,連踏板位都用擦清理得乾乾淨淨,但成五點半至收到工.係抺羊期間,人家好他條咁係客廳攤係sofa,邊睇雜誌,關島旅行書,邊播住滨崎步既mv DVD.人家跟住就著手抺地(辛苦晒~). 
咁辛苦抺好愛羊,硬係要行吓街街啦.六點幾,騎羊去市中心還dvd碟,再去置樂相熟商場買咗個人$185既display膠箱黎收容無家可歸既高逹,本人覺得有啲貴.....

六點幾,應人家想燒野食之求,騎羊去黃金海岸bbq場.羊仔泊係排骨位,行十分鐘左右就到商場.個燒烤場係一樓,望正游艇會.每位$68,任飲任食(一渣渣既vita汽水,同全場野食),但係額外既炭,調味料如牛油,蒜蓉,酒水等就要加錢.我地燒燒吓見人地有個網,可以鋪啲野係上面燒,好爽咁,但要加$5.我諗咗一陣(因為覺得係明屈),人家話"加啦~",於是就加快咗燒烤既程序,好似開咗條生產線咁~
雖然係平日,但都只係坐剩一兩枱,我地隔離仲係一枱聯合國,好多唔同國藉既西人坐埋一齊飲酒燒烤,有男有女,廿幾歲左右.其他枱都係一家人或一pair黎燒,我地見到有一個男人企係度燒野食時,女伴企係佢背後攬住"艾"住咁,人家話佢sweet,我就覺得"洗唔洗咁痴纏呀?"
食材都係大路野,但粟米就無包鍚紙無搽牛油(牛油要你另外加錢買......),赤裸裸咁燒當然係無咁好食.蕃薯就有用鍚紙包好,而且又幾甜吓,size適中,一個蕃薯切成幾餅,快熟啲又唔洗食唔晒咁嘥肉類食品都醃得幾好,無話好似小欖個啲樣樣野都醃到一樣味.

最特別既就係有蟹仔燒,雖然細細隻,但都有膏有肉,仲有調味鹽供應,灑係蟹上面黎燒,食係上黎惹味啲.我同人家食過都話好味,於是我係密住出去攞,每次四隻咁,成晚我地都食咗有打半蟹仔,嘻~

十一點左右食飽飽,行去白海豚廣場當散步,坐咗陣,十一點半就騎羊番屋企.

PS:其實之前都同屯宿兄弟黎過呢度燒野食,只不過因為屋企事好唔開心,只係同大家吐苦水同聽意見,無咩點燒野食,今次先至可以好好咁享受吓.

九龍塘trip

今日同台灣女生去九塘既法國緍紗揀衫,人家既同學仔trace都一齊黎幫吓眼.約trace13:45係地鐵站等,但我地都遲咗少少.大約兩點幾至去到法國婚紗(比原先約好既兩點晏咗少少)
睇咗一大叠clear book sample,一輪試衫,人家揀咗1件晚裝,2件緍紗(另外1件上船),而我就揀咗2套西裝.係我試衫既同時另一邊有一個男子又係試衫,佢著住同我一樣既恤衫,但佢就打出條士啤呔,仲係咁叫"嘩,唔掂呀,爆褲呀"

好在我仲保得住條腰啫~職員姐姐仔好好笑容同心機黎介紹每一件衫,仲俾唔少建議添由於我同人家都揀咗啲要補錢既款,買埋個花球套餐,俾埋尾數,咁又完成咗一條數.

17:30至走人,行到又一城有啲肚餓,因為晏晝只係食咗少少乾糧.六點未夠,係水牌見有板前壽司,於是行去睇叿有無排長龍.原來無咩人排,我地都只係要等幾張枱,前後唔洗三個字既時間就可以入坐.之前係旺角成日都係太多人,搞到無得食,今次卒之都可以品嚐吓啦

叫咗個老虎蝦壽司,係就係幾特別同大隻,但始終係熟既,點都係唔及生"勾勾"既鮮味~

相熟既甜蝦亦都比一般既壽司店大件,一客只係得一件咋.另外,燉蛋麻麻地,鹹得滯,點都好似係元氣既好食啲,不過元氣好耐都無賣廣告,加上新晉既壽司店都係以手握黎做招來,真係有啲擔心佢既前景,加上市中心遲遲都未開番間新店....

食飽飽,行吓睇吓有無白色皮鞋或波鞋買,用黎影相著.睇咗幾間,都係le sauda既皮波鞋款啱心水.由於有啲貴(九折咗都要七舊幾水),於是行去franfran搵吓杯兼且諗真啲先.

原本想買既啤酒杯揀唔到(要容納到430ml既罐裝tetley's之容量),但見呢隻airline做gimmick既杯幾靚,加上佢係我地遲啲去關島唯一既航空公司,於是買咗落黎.

臨尾人家見到有玻璃兜同假花賣,靈機一動想點綴吓個食飯枱,於是拎埋去cashier,番屋企放好水,砌好咗就係咁既樣,都幾好丫~

買完野,諗諗吓又覺得白色鞋都幾難買,加上就算金都有得賣,都要差唔夠三舊水,仲要唔知舒唔舒服,最怕係老老套套咁.仲有兩個星期就要著,而且去關島都可以著丫,於是行番去le sauda試吓.著落幾舒服,但人家話唔肯定襯白色褲好唔好睇.我提意用今日帶去試禮服既白恤衫黎襯吓,跟住就用隻長衫袖放係腳面黎模擬著白色褲襯唔襯對白色皮波鞋.人家話ok,我照鏡都覺得幾好,雖然係有啲黑色線,但整體都係幾靚同young啲,結果當然係成交啦~

搭番地鐵去旺角轉巴士,但唔記得去朗豪坊買埋條頸項,唯有下次出開黎至買啦.今日係豐收既一天~

屯宿兄弟聚會

今晚我同台灣女生係屋企睇租番黎既"踎低噴飯"dvd,叫pizza hut外賣,但好可惜三重芝士批要有滙豐咭至有得食(種族歧視??),唯有叫個至尊批餐.

食飽飽,睇完隻dvd,就動身出去巴士站等上阿潘既順風車入元朗飲野聚吓~返p既阿潘,先去碼頭接強少,阿禮,再係市中心接percy,最後至係下路湊埋我上車~

我地去咗博愛醫院隔離既泰屋飲野,原來佢同傳說中既新港酒店真係正隔離.我地叫咗個3L既singha泰啤,串燒一打,每人都係60,又幾扺喎

由於間野十一點半last order,所以唔係坐咗好耐,不過佢地都無趕客既,只係熄燈熄音樂啫.好耐都無出黎聚吓,對上個次都係一月華b屋企個次.坐底傾吓飲吓,講吓近來忙啲咩,有咩搞鬼事情.

大家各有各忙,希望搵日可以搞個飯局啦~~

night前心靈小休

番完個早更,騎羊去市中心秋田食晏.見陽光普照,心血來潮,想去海灘散吓心,於是騎羊去黃金海岸行吓.自己都發覺繃緊既心情,令脾氣都大咗啲,少咗啲包容....
今日係公眾假期,停車場擠滿等位既私家車,好在電單車位就仲有吉位.泊好羊仔,行去沙灘途中見到有富豪雪糕車,當然上前買個云尼拿軟雪糕至落沙灘啦

陽光,海灘,雪糕係一大絶配~

雖然係有太陽同暖咗,但大家都只係係沙灘上玩,晒太陽,傾吓計,只係見到一個阿伯係游緊水.今日收到老豆既電話,得知老媽仲係ill treat緊老豆,同埋無意收補關係,真係好不是味兒...無法子,我最細,講句說話都無人理,咩都係我處理得唔好,我永遠係壞人.....

搬咗出黎,的確係煩少咗好多屋企嘈吵,但多多少少都形響咗我對家既信任.番工就要小心麻煩既客人,找碴子既公司員工(部門內外都有),好在都有啲義字行頭既兄弟,"好相與"既同學同friend底既同事分擔吓.講到家人,除咗老豆,就只係台灣女生係唯一同我距離近又俾到可信既感覺.

行行吓,見到有對外籍新人係度影婚紗相,令放鬆既心情,增添一點甜意.數數吓,我都仲有兩個禮拜就去影相,兩個月左右就過關島~應該向前望,由自己建立既家開始,營運一個溫暖同包容既家~

好耐無黎沙灘,海風,浪聲,陽光,藍天,笑臉,小朋友,海景的確令人心曠神怡.以前睇過本書,話海洋係生命之源,人類都係唔例多,所以當人走到海灘會特別開心,平日沖涼時會有放鬆既感覺,因為有水既存在.唔通係真既?

三點多啲,行番去攞車時,見到一架私家車泊咗係排骨位度,真係有啲過份.後來有架電單車想泊位時係咁"bit",好在私家車司機咁啱番到黎準備開車走,如果唔係,佢都只係係泊係我隔離個吉位.個鐵騎仲發牢騷咁講話"我地受盡風吹雨打,連呢少少既著數都要攞埋我地?"

騎羊番屋企,沖個涼,雖然有啲狗吠聲,但都訓到兩個半鐘,起身都無四肢酸痛火熱,唔通沙灘一行咁駛得??

忍肚痛,笑住黎影相

今朝台灣女生肚仔唔舒服,食咗葯都唔係好好多,於是番完晏就陪人家去市中心睇醫生.係商場見到花師奶既紙板公仔,於是叫人家行去照番張相~係診所等咗好耐,先至見醫生番黎.醫生開既藥同屋企既一樣,只係多咗隻buscopan,咁又收近兩舊水...

突然覺得staff clinic好偉大,不過今日仲係公眾假,點都係谷住要睇GP.

其實尋晚我都有胃痛,搞到杯tetley's飲剩一半,就要棄糊,番上床蜷埋一舊訓覺,好在今朝起身無咩事.初步懷疑係其中一味餸唔夠熟所致,因為伯母都有肚痛同肚瀉. 

加油呀!補給號!

番完晏,趁無落雨,騎羊去市中心補吓貨.台灣女生既檸檬茶已經無咩得剩,加上我呢幾晚都飲tetley's,所以今次既行動係必要既.

見厠紙,可樂同薯片有特價,順手買埋.我覺得手抽住條厠紙係有啲唔太好睇,而且攞住啲飲品係好鬼甘既事(太重啦).有愛羊係度,當然係方便同瀟灑好多啦~

除咗以上既貨品,基本裝備:碟鎖,布冚,布冚鎖,都係收納係行李倉仔內.雖然背囊就要孭住黎開車,但係都算係瀟灑丫~

本人幾鐘意電單車既生活,方便代步,買餸補貨,沙灘接送,來往區內吊腳地點,郊遊兜風,探訪朋友..近來係ibike網站見yamaha majesty既CG宣傳片,好正,好有feel,勾起我好多同電單車既回憶~

http://www.ibike.com.hk/01_bike_report/07/yamaha/majesty/m.htm

只要我能力許可,都想繼續係路上左擺右轉,與風並行,看著電單車既演進~

奔波的波波

今朝起身,打電話去沙田宜家問個茶几係咪已經係有得換,confirm好就抽住個爛貨行出去搭小巴出市心.食個老麥餐,搭263出沙田.係沙田見到display緊個張梳至係最後一張,睇黎我屋企個張真係倉底剩貨~

急急地,行去隔離既厠所,咦?點解厠格有皂液既?唔通錯女厠,係M巾膠袋dispenser至真??

睇真啲,而來係厠所版既消毒液,有埋指示圖添,真係少出省城....去到宜家既客務部,同阿姐講話黎換過個茶几.點知個阿姐好似只係想換爛既架俾我,唔係成盒換.我同佢講話hotline話已係上水換個全新既黎沙田分店等我黎換,唔係只係換爛架.後黎有個哥仔出黎,又check吓電腦,先至攞過盒新既俾我,仲叫我係包裝枱開黎睇吓有無問題至攞走.拆開睇過後,無穿無爛,包番好就去搭巴士入番屯門,一來一回成三個鐘,番到屋企都已經係兩點幾,台灣女生仲訓緊覺

係客廳砌好個茶几,坐咗陣,人家至醒.同人家食少少野,就搭輕鐵去元朗田中食晚飯~

途經一間租褂既店舖,見橱窗有好多對車頭公仔,但配對真係有啲離譜.好似小新同自己既阿妹結婚,松鼠兄弟其中一人反串著緍紗,仲有未有入鏡既大口仔一人分演兩角,一個著禮服,一個著緍紗

六點兩個字去到田中,由於時間尚早,所以唔洗等位就可以入座~兩舊水有找,一粒飯都無食過,全部都係刺身,仲有一個什錦天婦羅.坐我地隔離既既一對中年男女好似唔太鍾意四十五分鐘既入座時間限制,好明顯佢地係第一次黎又未試過晏黎等位,如果唔係佢地應該好明白四十五分鐘係需要,以及係對等候人客既保障~

搭西鐵前,係相熟影音店見到濱崎步best2既cd連dvd box set.一套兩set,各一百零六蚊,雖然有啲肉赤,但見有dvd MV都扺丫,人家話可能收山在即,此情不可再,於是就成交~

去到市中心,諗住買番隻鑊,但已無貨,加上同品牌既其他型號又無特價(要四舊幾水).係文具部,人家帶我睇一本之前睇中左既日式結婚相簿,都幾ok,粉紅色.好在叫人家買咗先,因為得番dislpay一本咋.

係cashier見到大減價宣傳單張話有軍曹轉眼公仔賣百三蚊(之前最平都要成兩舊幾水),於是係玩具部搵咗好耐,以為賣晒,原來係係上落電梯口既攤位.人家話得擺字,好以有啲嘥.但後黎細問下,又表示真係幾得意,於是行去搭巴士時,順路兜去買~

百零蚊,當係擺設都抵呀,更何況真係跳樓價?今日係兒童節嘛,大家都買少少野黎開心吓啦~

外行人煮飯煮到刮花隻鑊

今朝番完夜班,同台灣女生一齊騎羊番屋企,食過早餐,梳洗完, 一訓就訓到近四點.

上陣網,約五點鐘騎羊出市中心吉之島超市買啲野番黎煮飯食,好讓人家可以安安落落食飽就番夜班(dub night).

六點多啲番到屋企,洗落米,就開始煮餸.由於之前試過醃過啲無咩味既雞翼出黎,所以今晚都係買啲已調好味既餸黎煮.

搞到七點左右就開飯,賣相好似幾好咁,但其實啲蟶子唔太鮮味,可能係急凍既關係,下次都係去街市買.

海鮮真係幾難搞,煮得太耐又會韌,我太快上碟,反而有三分之一係未夠熟....雞脾肉串就無咩點出事,加埋黑椒黎炒,都ok喎,只係有一兩舊肉仔唔太熟.唯一係個蒜茸炒菜係無穿無爛~(可能係我住市中心時煮過既關係)

唔好以為都好似係幾好成績,好可惜我用咗隻易潔鑊黎炒蟶子,隻鑊刮花晒....

睇黎聽日要買過隻易潔鑊同銀色既生鐵鑊至得......料理既道路真係好崎嶇....

ps:希望人家同我今晚唔會肚痛啦