特意唔騎愛駒番早更，因為今日要同台灣女生出大球場睇傑志對馬體會。收工去市中心會合人家，一齊搭巴士出去SOGO附近搵地方食晚餐。呢間“鬼金棒”拉麵店既叉燒係用牛肉代替豬肉，雖然要成舊水一碗，但味道係唔錯既。話就話係日本東京過江龍店，但店員既服務有啲譚仔feel~
未入座前，影張自拍照。入場前check袋被發現一支茶品，要即場隊晒佢（好在個拉麵唔係太頂胃）。無諗到個小賣部好似停留喺80年代，嘉士伯生啤$80。放低隻膠杯，同熱身既球員作遠距同框。一心睇Griezmann至買飛，可惜今次無隨隊來港，唯有睇葡萄牙國腳João Félix。三十幾度，中場要再去買多杯啤酒，順便買可樂俾人家(已頂唔住熱浪)。一滴風都無，REON POCKET 5插住尿袋推5+製冷，我都身水身汗。半場前從宿舍群組得知Percy都在場睇波，但因中場時段排隊買嘢飲無時間剩，無約見面。散場時竟然係閘口位撞見，點唔可以影番張相先?
PS:幸男身在遊學團，父母可以多一點放空時間。
