朝早兵分兩路，我同幸男坐uber(A車)直接去機場。台灣女生就坐uber(B車)去外母家樓下，接外母同行李上車，再去機場會合。
七點就去做行李寄艙，點知航空公司職員提我哋好快啲去閘口，原來人家睇錯08:10航班時間為08:50。趕到相都影唔切，到閘口啱啱開始登機。
第一張A7iii相就係落機拎完行李，food court食晏既兩點半場景。兩婆孫都揀食拉麵，最緊要外母啱食。
原本我揀咗食天婦羅，但見得罐裝啤酒，就轉間有生啤既鐵板燒店。我揀咗厚切牛舌，味道非常滿意。領隊話胃痛，無胃口食，反而去咗搵機增值西瓜咭。
上機前無時間影三代同堂相，咁唔好嘥咗呢塊牌喇~電話上網方面，幸男既iPhone無痛以e sim上網。外母既舊機XPERIA 10，都順利以第二SIM咭上網。我既SAMSUNG FLIP 7要load一輪至得，反而領隊既XPERIA 1 VIII成日斷網。
.JPG)
搭一個鐘鐵路去大阪，迷失於車站與商場與酒店之間既連絡路......
商場邊既水簾瀑布，原來係嚟自地面公園既呢隻吐水熊。
領隊探完路，成功去到Hotel Hankyu GRAN RESPIRE OSAKA。幸男同婆婆一間房，我就同領隊住隔離果間。房間大細ok，浴廁有分隔，兩張單人床，仲可以有圓枱仔對坐。
領隊忙於兩邊走，安頓喼內既物資。沖杯膠囊咖啡飲，約定隔離房團友17:30出門。
行番去商場區，領隊先陪我去揀衫，成功係ZARA買到兩件短袖衫。
行天橋嚟商場過商場，望見公園有唔少本地人，閒聚或於水池消暑，享受小確幸。
唔知關唔關星期五事，今日街上都見唔少小家庭，商場食肆都好熱鬧。
下一站就係見幸男踼波用品，先安頓外母係地面樓層坐住等，可惜無心水波boot。
波衫已經係幸男既日常，反而今次想幫佢買番啲正常便服。
晚飯係舊年二月同領隊食過既蟹道樂分店，經過相熟珈琲店，買定蛋糕當宵夜。
點完餐，幸男就頂唔住要訓貓仔覺，始終今朝係早起身既。
以往每兩年，三婆孫都會去日本玩幾日，親子兼惠勞吓外母既辛勤。今次領隊話我都放假喎，不如一齊喇，反正幸男咁大個，點都要book兩間房。
希望我既參與，唔會影响三婆孫既亙動。
雖然蟹道樂唔係最好食既蟹料理店號，但貪佢多分店夠方便兼多選擇。
番到酒店至醒起未買睡前啤酒，點知落到去已經23:10......
唯有番上房齋食蛋糕。
