訓晏少少，行去車站附近商場搵"City Bakery"食早餐，但搵極都無，結果去咗呢間。
我同幸男都係揀咗GOOD MORNING BURGER，自拍時幸男咁啱拎緊自己個份番嚟。
領隊幫外母揀Tangzhong Bread & Spain Omelette，但要先番酒店幫外母拎番餐前葯。預咗沙律唔啱外母，但無諗到個奄列都只係食一半，幸好個包啱老人家口味。
領隊用AI揼既Day 2行程為"露天神社 & J League 觀賽熱血夜"，途經斑馬線附近有熊仔糖派。幸男同領隊各拎一小包。呢款糖正正係幸男細個食自助餐，食到肚痛果款~
鬧市中竟然有個神社，舊年嚟梅田都無特意去睇吓。
貴為賢婿，當然先幫兩母女影合照。
沿路行入去都幾靚，企係中間都可以當打卡位。咁多心形繪馬，唔通呢間神社求姻緣好靈?
場地有智能電話自拍架，但有得揀既話，當然要用無反大感光件嚟成像三婆孫合照。
1300年歷史既神社，一邊見證周遭既發展，一邊庇祐昌盛。
如果唔係多人既話，會叫領隊企後啲，方便我係側邊(求籤機前)擸晒兩個人同錢箱入鏡。
有後生當地女生著住傳統浴衣，影靚相同求戀運全都要。
買埋御守之後就開始購物環節，外母大人係百貨公司睇手信兼今晚既便當，幸男買波衫，我同領隊買自己衫，最後去百貨公司會合外母大人(與17包冬菇)。星期六勁多人，食店樓層間間都要排隊，好唔容易至搵到間少啲人排既吉列豬。
番酒店安頓好戰利品，外母安在房間休息，我哋就出發去睇J League。無諗到個球場係咁大咁靚喎，規模同英超有得比~
原來比賽球場係另一邊，要兜個大圈去門票所屬閘口。
入場前先打吓咭，兼且買芒果忌廉薄煎餅(味道一般)，話晒要番酒店至食晚餐。
幸男著住今日買既波衫嚟支持大阪櫻花。
趁未咁多人，嚟番張自拍合照。領隊話上次同幸男睇橫濱水手主場對FC東京，場地有埋田徑跑道，應該似一開始見既STADIUM。
主場球迷區兩層，大合唱同打氣聲夠晒熱血死忠~
雖然對家清水心跳球迷區得一層唔夠，但球迷仍落力應援愛隊。
球員開始落場熱身，幸男件波衫係球員版。
熄燈，音效，燒幾發煙火，揮旗，卒之都準備開波喇~
半場無入球，熱到個人𥹉黐黐，我就留意住F1荷蘭站衝刺賽成績。
雖然觀眾席有啤酒姐姐穿梭，但我都係中半場去店舖位買生啤，貪佢會冰凍啲。
幸男欣賞既球員只係踢上半場，全場唯一入球係62分鐘出現。11號前鋒接應近中圈既傳送，突破雙後防同門將，窄角射入空門。
番酒店前係超市買食糧(十點半左右)，兩母子揀杯麵同冷蕎麥麵，我就揀忌廉雞肉漢堡(係酒店6樓Guest Lounge外有微波爐翻熱)，再一齊分外母無乜點食既醬汁羽手先。
