quarter past three, afternoon tea

早班過後,去咗搞退制服手續,所以成三點至騎羊離開公司,返到入村叫埋個下午茶,上得黎又真係三點三喎

雞翼薯條+凍檸茶,係我多年下午茶既首選.加上呢間村口茶餐廳真係無咩邊樣野好食,只有呢款雞翼薯條係正常啲,所以次次坐底都係食呢個例牌($22).早餐都尚可接受,午餐就奉勸各位唔好試啦.

仲記得以前student時,返完早更同小強去市中心間燉奶佬食飯(下午茶時段)我又係叫呢個例牌,但侍仔話今日無呢個餐,因為原來係日日唔同款既,上次食呢個餐時唔係呢個星期天.由於個侍仔口肳幾串下,當時年少氣盛,不甘受串,於是就散叫(雞翼+薯條+凍檸茶)"我鐘意食雞翼薯條得唔得丫?",侍仔無奈地答"得~"點知散叫既價錢仲貴過小強既菠蘿飯+菠蘿冰套餐!要成三十幾蚊!!!!!小強仲係咁忍住笑.......

夜晚同人家一齊去大戶人家食九點後特價火煱,埋單都又係百二蚊,但野食選擇同質數好過明星好多,起碼啲肥牛唔係全肥膏肉都唔多忽丫.騎羊去食飯,再騎羊返屋企,感覺幾好~

ps:自小學就無再寫過紀念冊lu,今日臨放工時為一位last day係度做既part time見習生再次執筆.好耐無用手寫咁多中文字,我同子健都亙相問字,當見到卓敏後,就好似命理測字咁,俾啲字卓敏大師睇得唔得.希望呢位小姑娘係新工作環境,事事順利.

藍天白雲,假日閒

今朝起身咁好天,於是收拾細軟騎羊去泳池游水.之前幾日都係多雲兼煙霞,好耐無見過咁晴朗既天色,心情都好啲.

去到泳池,無咩人,可係啲後生仔趕住準備返學,例牌游十次來回就收工.呢排天氣唔好搞到無得游水,令我擔心運動量不足,怕會keep唔住條腰嘛.尋日去電單車鋪買野時,售貨員姐姐都話我算瘦,叫我好好地咁保持住,唔好跟30歲大軍有肚腩~

跟住又騎羊去置樂食單身漢餐,行咗一陣都睇唔啱野買,於是無功而還.係屋企睇埋軍曹keroro eleven就駕羊去接台灣女生放工,再買啲野返入村邊睇saturday night fever邊等食飯.食完飯,睇埋齣戲,就騎羊到波記試食原桶豆腐花.

係就係好滑,但係同人家都食到有燶味,要落啲黃糖去冚住陣燶味.經偸聽後,原來係可以連埋個桶外賣,不過要俾按金,還桶時至攞返啲按金.二人前份量都只係廿四蚊(上圖),真係食豆腐花都會食飽人o架~

ps: saturday night fever結局有啲差,尾場都唔係跳好激,片頭個幾場少年肥尊個人show已係高潮.(不過軍曹都跟佢姿勢跟得幾似~)

夜班前夕無覺好訓,翌日購禮二重錯

今日要返夜,同台灣女生食完晏,買埋魚生宵夜,返到屋企諗住訓夠二個半鍾至起身返工.點知老媽同姑媽六點左右返黎,邊高談闊論,邊準備晚飯,搞到我訓得個零鐘就醒,再訓都係得個"典"字.我就最怕星期日返夜同有客人黎食飯.星期日食飯要等,買魚生又要排隊耐咗;有客人黎食飯,老媽又會好高興咁你一句我一句,造成聲浪...
食完個晚飯,騎羊去新墟相熟糖水鋪買埋楊枝金露,好趕咁上公路返工.因為今日有阿sir抄牌,我唔可以泊係糖水鋪門口,要泊係50米外既排骨位,但有私家車頂住,入唔到.起初諗住擺住係路邊就算,但見阿sir向我隻羊方向抄住黎行,於是又行返轉頭,係私家車之間攝入排骨位..
夜晚除咗中場一個客仔較麻煩同無禮外,大致上都幾ok,係三位小妮子同阿姐既努力下,安安樂樂就放工lu.

 註1

訓到近兩點至醒,咪咪嚤嚤成三點幾至出門.搭小巴去市中心轉61x出九龍城,補購生日禮物俾師兄(八月中).主題係電單車手套,精品之類物品,因師兄學緊綿羊仔,十月考強制試.

太耐無出黎睇野,第一錯:我竟然遲咗一個站落車,搞到要行返轉頭一個站,經過<宋王台公園>呢個歷史古蹟,至可以再跟舊路去張記.當行到開始出汗,到達目的地時,見鋪頭拉咗閘,再望真啲,第二錯:原來係執笠,得返間總店繼續營運...一場空....

跟住由沙浦道行十個街口去到聯合道,先至去到另外兩間大間啲既電單車商品鋪,好在唔係相繼倒閉啫..手套又睇唔啱,好多都係racing款,精品又無咩好買,最最買咗件正廠出品既araiT恤一件,起碼多件衫著嘛~

之後搭小巴去旺會合台灣女生,人家係護協排咗成個鐘至買完月餅禮劵(辛苦晒).由於大家都攰都肚餓,我地係六點多啲就係大久保食飯.話係order任食,但啲野食上得都幾慢(仲上漏添),加上真係麻麻地好食,其中生蠔煱竟然得菜同蛋,撈極都唔見蠔,於是向職員查問,原來係師傅落漏咗......(信心大減)埋單時,基於賣相同味道既關係,我地都有好幾碟野無食.會唔會係特價時段差啲呢?呢餐飯令我諗起上次係青森食飯既回憶~

食完飯,我地去薯嘜通搞我個電話收mms既問題,之後再行多陣玩具鋪就搭車返屋企lu.

ps:無線既世紀天道行既講解麻麻,齋講幾句又唔解釋多啲,圖都無張,睇完都唔係太明.

註1:
宋王台位於香港地區的九龍。香港地區在隋、唐時期屬於南海郡寶安縣或廣州府東莞縣。唐時屯門已設立兵鎮，由朝廷派兵駐守，並成為當時廣州對外交通的外港。南宋末年，宋臣奉兩名小皇帝趙、趙昺逃避元軍，曾到過九龍半島南部，其部分從屬還避居大嶼山。為了紀念其事，當地居民便把兩名小皇帝逃過難的地方稱為「宋王台」。今天，香港的九龍有宋王台公園，園內置有一塊刻有「宋王台」三字的石碑，現為香港的名勝之一。  

說明書

細個時無咩機會老豆買玩具,好多時都係玩老豆係倉執番黎既舊爛玩具俾我同大佬玩.到我小學尾初中時,老豆至會帶我去揀玩具買,由於覺得好珍貴,所以會儲起個吉盒同說明書(就算玩具本身爛咗,都仲可以留念).但日子耐咗,發覺啲吉盒好"雅訂",於是就只係儲說明書.

中學時期開始有零用錢,開始愈黎愈多買玩具,所儲既說明書亦愈黎愈多,直到而家出黎返工,儲說明書既習慣繼續keep住. 呢一兩年都較少買玩具,一黎要養綿羊仔,二黎又真係無咩新野出,三黎無位擺(間房已有人滿之患),四黎都真係想儲番個錢.除非真係好吸引,如果唔係都好係睇過就算.

咁多年黎啲玩具都唔係件件都keep到而家,但有說明書既收藏,都好容易記起流失咗既玩具模樣.

中華新類型生果or英倫滑口啤酒?

忙碌既早更過後,係台灣女生樓下既名牌茶餐廳食過下午茶(對我地黎講晏晝飯),行路過紅橋買禮物俾八月生日既前輩,因為之前諗唔到買咩,所以一路都未買,但尋日諗到佢學緊電單車時,就浮現手套呢樣野.好可惜行到去時見門口貼住休息一天....不過算啦,都可能係無咩款揀,禮拜一訓醒去九龍城睇,反正都好耐無出去.
跟住我地行去市中心睇返之前入選既背囊,經過一輪評審,最後買咗個橙灰色既 lafuma,八折咗都要三舊幾....由於今晚人家上我屋企食飯,所以去市中心買啲野,點知俾我地見到下圖既生產品:

我地見到之後都笑咗陣,大陸既野真係咩都有,佢既意思係二十世紀山東種出黎既梨?定係批梨可以食足二十世紀咁耐?我地當然無買到啦,行去買支裝啤酒.無意間見到有Tetley's既罐裝啤酒,於是買返罐黎試吓,買埋雪糕,我地就搭小巴入村.

晚飯有老媽整既炸魷魚鬚,啱晒送啤酒~Tetley's係我地屯宿之男去黃金相熟酒吧飲野時1st round指定飲品,事源係華b介紹俾我地,飲落又幾易入口同重大麥味,於是久而久之,咁就做咗指定飲品.罐裝斟出黎時都好厚泡吓,同係酒吧叫既口感一樣好,酒吧唔係有部生啤機,會新鮮啲架咩?定係都係斟罐裝俾我地呢?

唔睇個罐都唔知佢係"offical beer england rugby",咁有來頭,都係人家見到話我知.唔知係唔係有"england"字眼既關係,人家食飯時主動試飲一兩口,老豆仲離譜,唔戒口話試兩口,但係就大大口,混亂期間都唔知老媽有無攞黎試食完餐飯,飲完罐440ml既tetley's,都覺得眼訓咗啲.當我地怯睇返個罐見得3.8%時,老豆話"3.8好少咋喎,普通啤酒都5啦",年紀大3.8%足以令我集中力降低...我第一個電單車鎖匙扣都係用黃金相熟酒吧送既tetley's啡色皮鎖匙扣o架

行到出村口時至醒起唔記得攞老媽叫我地帶一盒仔魷魚鬚俾伯母食,於是又行返轉頭攞.送到人家入屋,睇咗兩集軍曹就走lu,攰都暈低咁滯,所以都係搭番的士返入村..

ps:幾經波折,卒之都同人家打爆gundam seed一次,tetley's好滑口,第時陪人家睇英超飲tiger~

房間藍天行動

間房執咗好耐,先至見返張書枱面.我間房不停都係度"無常輪廻":整齊,小亂,大兜亂,層層疊,封塵,無間.而家既情況已經係整齊,而呢個狀態唔會維持都好耐,不出一個星期,"無常輪廻"既巨輪就會轉動~我貴為房主亦唔可以阻止呢個宿命,只係偶爾以"無相轉生"黎破解呢個災難.

香港有藍天行動,我間房都要堅持藍天行動,確保清楚見到書枱面,控制書枱上既原浮雜物,一片清新景象!希望藍天行動可以擴展到房間每一個角落,因為有時想搵野時,搵極都唔見都幾煩吓.

放假抖一抖

今日放假,朝早做洗吓衫,打陣機,又夠鐘接台灣女生放工lu.我地騎羊到市中心pizza hut食下午茶餐,因上次幫襯時有coupon送.我地叫咗個小食拼盆,因為裡面有蝦多士,我好耐無食過.

上一次食都係幾年前同教練係李白吧,emma整俾我地食.我同教練都係第一次食,感覺好新鮮,但emma地懷疑我地係咪咁大個都未食過.唔知點解,感覺好似無上次咁好食,可能上次係飲緊酒黎食,可能醉醉地..

另外我地仲叫咗個奶油甜批,其實只係一個細薄餅皮無上餡料,切塊連奶油上碟,有點失望..

今日人家仲同我一齊係屋企打PS2 Gundam Seed添,起初人家用至愛既神盾高達單打(人家鍾意佢係粉紅色,仲叫錯做神勇高達),我從傍指引,之後再以協力形式加入戰團(我用廉價機體M1咋),一齊對電腦.基本上人家係無意識要走位,好多時係企定一點,胡亂射擊眼前既敵人,好似一座炮台.咁話雖如此,但人家都試過係一關內擊毁四架敵機係咪我掩護得太好呢?定係人家咁啱執死雞呢?

夜晚我地騎羊入元朗食泰國菜,今次啲咖哩蜆無之前咁好食同多,必食既生蝦當然好食啦,唔多食熟魚既我地繼續食明爐烏頭,初試既芝士蝦餅,原來係蝦餅球包住熔咗既芝士心,好香~

行過一間叫為食街既小食店,叫咗一人一隻沙爹烤雞全翼,五蚊一隻,又無諗過咁好食,我地係七仔買野飲,仲係入面食埋隻雞翼,用埋啲過多又無用既冰粒黎洗手至走,好在無俾人話我地攪攪震食外來野~

行上雄峯睇背囊,仲少款過市中心..唯有下次去市中心買啦.

做定運動,食高熱量餐x2

朝早起身食少少野,就動身騎羊去泳池游水,由於遲咗出門要趕住走,所以只係九次來回.

咁趕去邊?趕住兜去建生某一樹底下等台灣女生電話買麥記外買,同接人家囉.人家今日同我都係返晏,但十二點左右要同前老細傾SDR.我預番咁上下時間游完水,等人家搞掂走人時俾個電話我,就入去買熱乎乎既薯條同香口既双層芝士漢堡(我就仲有多個蘋果批添)~再返公司接人家上羊,去我屋企食外賣午餐.


好在揀咗係樹蔭下等咋,都等咗四個幾字時間.我坐係愛羊上邊打短訊,同幫羊仔影吓相.我仲有時間諗定如果俾阿sir"逗"個陣時,應該答"我有啲唔舒服有啲暈,所以停隻羊係行人路樹底坐住黎抖下,我抖多陣就走架啦" @_@"

大佬健繼續"食老虎"係屋企打機(dead rising),我就同人家係廳度開餐.大佬健有得睇,無得食,哈哈,最多下次得我同佢係屋企時,我出羊去建生買麥記外賣返黎一齊食囉~食完野坐多陣,我同人家就騎羊返工lu.

晏晝返工都係例牌咁忙,無得tea,工序一浪接一浪,係到食飯時間至可以抖吓.我同emily都無食飯,只係一人一杯$3特價紅豆冰,因為放工後要去市中心明星同大姐打邊爈.

大力踼完波,就返黎公司樓下等埋滔滔,emily同我一齊打的去市中心.今晚大vicky,漢仔都有黎,大豆呢個鐵膽當然係度啦,德輝就被臨時懲召,湊夠十個人.

大姐都係咁好中氣,無咩憔悴咗,麥生依舊生鬼.前輩們傾佢地既苦水,身為後輩既我地零星咁講下自己啲野同八卦野.咁耐無見,聚下舊都好既.火煱係任食,但選擇就無大戶人家咁多,人地有生蝦,包心丸,芝士腸.....不過呢都搭車就方便好多既.

朝早游完水,又返完工,又飲埋啤酒,搭輕鐵時已經眼dupdup,今晚應該會好好訓

ps:係泳池攞咗份手信俾人家,係麥兜既泳池守則書仔,幾得意~

甜品

今日返晏都幾忙吓,收工同台灣女生騎羊到置樂一間叫波記既甜品店坐吓.呢度地方企埋,掛住雜誌既報導同三色台煮食節目既介紹.台灣女生叫咗個名叫"榴芒戀"既甜品,而我就叫咗個叫"冰極"既雪糕特飲.人家既甜品面有層好酸既野,人家都只係食下面既榴槤同芒果.我個杯特飲無咩特別,雪糕加汔水同糖槳囉.

呢度好似專攻車會聚腳活動,指定既車會幫襯會有九折優惠添,我一眼就搵到其中一個係電單車既會名<綿羊硏究社>.門口仲有塊牌寫明近日最多幫襯既三甲車會名,搞搞綽頭.

甜品呢家野,真係啤友同成班人至會去既地方,飲飲食食,傾吓計,唔似咖啡屋同酒吧咁,有人會一個人黎,飲住野,聽住歌黎睇書,煲煙,發呆或沉思.呢間野仲招攬車友以車會形式黎幫襯,顯得好match.

其實呢檔野係我前前住宅既樓下,當時係我小六至中四時代.我住個陣樓下無咩食店,只係得一兩間餐廳,同一兩間酒吧,所以無論駕羊或搭車,行路過黎我都好熟路架.而家附近都開咗好幾間食店,可能係住係附近既新一代夫婦比上一代少係屋企煮野食,變相多咗出街食.咁又係既,以前煮一家四口份量好易預,但兩個人有時真係會懶啲既.


下次想黎試吓個原桶熱豆腐花先~


PS:好欣賞呢度近住馬路邊,可以望住隻羊黎食野.

過去的錯

返完夜班,駕羊住建生相熟麵包店買麵包做早餐,係鋪頭附近見到呢架YAMAHA既SR400,鐡锈橙油缸同側殼,配雪色seat位,襯得幾靚.


原廠seat位係黑色皮,車身亦無鐵锈橙,相信係車主自己換過個白色皮seat同噴過車身.見到呢架車令我諗起前羊既事.當時我為隻羊改裝唔少,但亦換黎唔少苦果:

冷光標版-標版出現螺絲鬆脫,頂壞速度錶支針,唔準,後尾成個標版要換過;
呔金屬死氣喉-令羊仔扭力輸出下降,即使追加台灣出品既扭力加速器都無以住正版時咁好,可能係最後死車既誘因;
氮氣尾避震-尾部吸震同轉彎時有改善,但令前後平衡失調,加大原廠弱雞前叉負擔,後期前叉漏油既誘因;
加上之前幫襯既鋪頭,維修時用埋啲非原廠同啱型號既零件,搞到隻羊五勞七傷,最危險係係公路動力急降險死火...

經過初羊既教訓,而家都無再搞改裝lu,加上而家羊仔直版咩都齊,藍光標版,電鍍側架,街車電鍍軚,暗色電鍍死氣喉隔熱版同喉咀圈,運動型單筒尾避震.暫時仲係保養期,仲享有兩次check車,相信往後都會去返原廠換機油同整野,較早前尾呔食釘漏氣,我都係去返觀塘搞.係就係遠啲同貴啲,但當係買個信心保障.
BURGMAN150,我係唔會忘記係你身上學懂既野(駕駛,保養,危機感,認路..),同你一齊累積既經驗值,一直守護住我,安全駕駛,令現任羊仔保養得靚靚仔仔.我既電郵會繼續以你既型號為名,因為你教曉我太多太多了,我亦欠你太多太多了. Salute!

新吉祥物

今日一返工,就見到新既吉祥物,今次仲要係一對添,有埋個護法.之前果個吉祥物只係得左邊既角色,但因為時間耐咗,個氣球日漸漏氣,搞到不似人形.下圖為前吉祥物既模樣,本人覺得前作出較為神似同手公精巧,正所謂唔怕貨比貨,最怕唔識貨,唔知大家鍾意邊個多啲呢?

省城日

今日六點半起身,七點鐘出門,就係為咗去瑪麗出DM center placement,唔出席既話之前報既course同考試會白費,因為會出唔到張cert...所以我都好神心咁出黎省城學習.

(上圖為八點四十分係QMH影落去之風景)問咗好幾個人至搵到L2既DM center,上到去sister分唔到我係patient定學生,於是我表明身份.由於地點偏遠,相熟既兩位同學都晏少少至到,成日係度聽書,中午仲要俾$35同聽講座既dm 病人一齊食健康少油少鹽健康金字塔餐(dm餐),聽下營養師既講解同病人既發問.個餐真係幾清,但都未至於寡,有魚有菜有肉咁啦,無餐飲....我地一枱學生食完就出去行下,我同相熟同學去七仔買野飲,卅蚊係新界西都可以食個set lunch連餐飲啦..

食完飯,又係繼續聽書,悶到"鐘"眼訓,臨尾見足部治療師時,人地都問"呢位好疲累既阿sir有無啲咩問吓咁?"我當然話無啦.四點三左右就散lu.


約咗台灣女生係中環等,一齊去太古既香港水族廣場行下,我搭小巴唔洗半個鐘就到.係地鐵站等咗一陣就見到人家.個水族廣場又真係唔太大兼無咩野睇,加上我地又唔係真係養魚之人,更加係得個行同望字,我地係要影下相黎助慶下.最深印象都係一個好大既魚缸裡面有好多隻水母,好似膠袋咁飃浮咁.其間有個會場姐姐同我地做問卷,問完佢好似有野送俾我地咁,原來只係一張宣傳單張.....

廣場另一邊既高達街,有成排扭蛋機同高達模型,幾壯覯,但相關精品就唔多見.好快咁又行完,相信都唔會再黎.跟住我地行返去太古城搵方食野,搵到個叫"大食代"既foodcourt(個名有啲怪),啲野食幾唔吸引吓.見有一間鐵板燒幾多人排隊又幾特別吓,點知一睇個餐牌先至出事,$98個餐只可揀一種肉拼菜,見個個都係食師傅燒好既芽菜....肉都唔多塊,點搞呀?於是行返去之前經過既一間西日餐廳食,叫咗兩樣野,同野飲都唔太飽.

於是我地去咗pacific coffee飲多杯野,一人一蛋糕醫肚.好耐都無同人家坐cafe,大家一齊掀今日買既雜誌,我睇睇下開始係咁"標"眼水,可能太攰既關係.好寫意咁係張軟綿綿既梳化攤咗一個鐘,食飽就搭地鐵再轉巴士返歸.

本來係灣仔地鐵站附近既巴士站等車,但無位上,架車埋站時已無咩位.為咗有位座,我地行返去總站上車,行到身水身汗,咁啱見有960準備開車.好在都追到上車同有孖位坐.去到下一個站時,啲人已坐滿啲位咁滯,去到我地原先等車個站時,啲人都係上黎企咋.我好快就訓著咗,係中途醒咗一醒,因為企位啲人撞到我同係我隔離講電話.我又好快又訓返.愈訓愈熱,落車時發覺條牛仔褲都濕咗啲汗,架車太多人,冷氣都頂唔住....

省城啲野好貴,又迫人,愈黎愈鍾意自己長大既社區,望到個天空,多沙灘(雖然唔係太水清沙幼).,省城都係偶爾出去襯吓好lu.

chi住隻羊,悠悠閒,奶茶故事

十一點左右起身,大好陽光,但無力去游水,於是清埋返之前去沙灘玩用過既沙灘蓆同吹氣黥魚,晒蓆同晾乾吹氣公仔.

兩點左右坐羊仔去咗置樂食例牌既單身漢餐,我就係係呢間up dup食店飲我人生第一杯奶茶.以前住置樂時(我讀中四),有一排老媽無咩心機煮晚飯,搞到三仔爺好多時都少少餓住個肚黎訓.有見及此,老豆係四點幾五點時,打電話返屋企,叫我同大佬落呢間up dup食店一齊食個粉麵餐黎打打底.老豆成日都係飲熱奶茶,我坐係隔離覺得好香,於是有一次叫老豆俾我飲一啖,覺得香得黎飲落陣好以怪怪地,幾得意吓.

之後無耐我地就搬咗入圍村,我放咗學,偶然會去置樂睇玩具時,都會去呢檔野食下午茶,繼續養成飲奶茶既習慣.

而家我放工或放假一個人食野,好多時都會黎番呢度食單身渶餐,因為呢度令我諗想以前細個讀書既事,老豆後生既模樣,期待儲夠錢買玩具既心情,仲可以順便去番相熟商場睇玩具精品添.我住係置樂成五年,有好多回憶收藏係呢度.

係相熟商場見到有人家喜歡既軍曹精品,行多幾間格價後就進行收購.我仲係附近一間零食店,買咗人家歡喜既小食添,比省城平啲~

駕羊歸家,又執齊野幫愛羊清洗同打腊,中途入番屋企客廳睇相熟卡通片,低低能能咁又半個鐘,繼續打腊.沖返個涼,又騎羊出市中心.

晚飯係應oscar約同埋教練係市中心食韓國燒烤,大家聚下舊,而家好多時都係得三四丁友出黎,好耐都無七人到會lu,咁又識咗就黎十二年啦...

食完飯,我就騎羊去人家屋企送貨,包裝紙都係泊低隻羊係人家樓下包咋,好趧,用羊仔seat位做包裝部平台.點知上到樓,包裝紙係背囊度散開咗,搞到要係電梯口再包過,好尷尬......

人家開門時,從我手上將一收下小食最後我係人家鐵閘頂攞埋份重新包好既軍曹玩具俾人家(suprise).陪人家砌好個軍曹部屋,坐多陣就騎羊返屋企lu,聽日仲要出對面海placement.......

久違了的豐富住家飯

自從老媽搞搬鋪,周太好耐都無試過下廚煮咁多味同豐富既晚飯lu,老媽話街市啲人都話好耐無見過佢咁話喎.

等我介紹下呢五道餸啦,左上角呢味係周太既得意技-酥炸雞軟骨,上方中間果味就係清蒸倉魚(無咩綽頭),上方右邊香噴噴既就係楜椒蒸蝦,左下方既唔洗講都知係清炒時菜,右下方就係市價十蚊三斤既蒜蓉炒蜆.

今晚咁好餸,都係多得姑媽姑丈黎食飯,老媽有伴隊啤酒.為確保老豆有餐安落茶飯食吓,我同台灣女生夜晚留係屋企食飯,萬萬無想過會咁多餸放係枱度.

以前老媽會整好多野我地食,朝朝返學前有西式早餐(煎蛋或抄蛋,拼腸仔,煙肉或火腿;西多士;翻熱脆皮粟米腸仔棒;生命麵包夾雪糕蛋糕).平時偶然會炸雞翼薯條俾我同大佬食,試過有一次老豆又想食,於是叫老媽整,但老媽開價要收老豆一舊水至開鑊,最終一手交錢一手交貨,我地三仔爺有熱乎乎既雞翼薯條食.

細個時老豆老媽雖然都係火爆同偶爾會嘈架,但感情點都好過而家好多.就其係老豆開始有病,活動能力差咗,搵少咗錢後,嘈架就愈黎愈多lu,再加上老媽更年期,情況更加惡劣.

希望多啲人黎食飯,可以令食飯既氣氛和諧啲,令佢地兩老重拾當年一家安樂茶飯既感覺.

ps:其實老媽煮既野食係唔差架.不過我地通常都係答佢"咪又係咁",但意思係"咪又係咁好食",只係唔想佢太囂同坐大.

辛勤的回報

今日返晏好忙,基本上成班同事都係全攻型戰陣,水都無啖飲,但都總算能完成各項事宜.

放工之後,同台灣女生一齊騎羊去元朗b仔食糖水,鮮什果涼粉兩份分,仲打包咗個榴槤糯米糍俾伯母添.送人家返上樓後,仲睇埋今日錄低既keroro軍曹走.今集講keroro係網上投到架騎坐式飛碟,外型係一架無轆既farling電單車,所以睇得幾開心~

以前新牌既我都成日係區內都蕩失路,有次仲係九龍城兜極都出唔返去,又晒又熱....好徬徨.現有三年經驗既我係區內當然無問題啦,但出去出邊都仲係會兜錯路,不過都總能到達目的地既~騎住電單車去四處走動,同買野俾朋友仔的確係一件賞心樂事.

番到屋企見書枱上有加德士既信,裡面有張一百蚊油劵呀~~~~用積分咭入油儲滿三千五百分就可以向禮品部換取一百蚊油劵(加德士"闔府統醒"積分大賞).之前隻羊油缸細,就算儲到張油劵都無用(唯有轉送俾朋友仔),因入滿都唔夠一百蚊.但而家就唔同喇,係油價飊升同新羊油缸容積增大既情況下,每次入油都係要一百四十蚊左右.今次係我卒之都可以享受油劵優惠啦~

返工辛苦一日,同人家遊羊河兼食糖水,可以睇軍曹渣電單車式飛碟,同收到油劵,都算係有回報~唔錯!

ps:我都幾鍾意卡通片既電單車,原創既好科幻,好型,劃時代;寫實既就好經典,具代表性.曾經買過一本介紹歷年日本卡通片電單車造型既書添~

沙灘遊之準備+星期日之人山人海

星期日,放工就用專羊接人家,今次因為多咗少少野飲,所以我要揹住背囊黎開車.由於之前去過目的地,所以都好順利追牌,唔洗問路.一個鐘唔夠就到西貢,泊隻羊係鄧x堅運動場門口,行去附近既大士多買咗隻whale rider 透明藍吹氣鯨魚公仔($60)俾人家係沙灘落水玩.再上返羊仔,用多五個字時間至到目的地清水灣,因為好多車都係排住隊往大清水行.

兩點幾,停車場全滿,電單車位一樣,好多人係度等位,於是將隻羊跟大隊泊上山,行返落沙灘,好甘...一落到沙灘,嘩~~~~~~~好多人呀~~~~人海戰術呀~~~有相為証!搵咗兩個幾字,好彩係人群堆中搵到個吉位,有好多人係石屎台度鋪蓆咋.
set好個本陣,我就用我真氣吹脹隻102cm長既whale rider 透明藍吹氣鯨仔!

但見未夠打氣既脹卜卜感,於是問附近泳客借咗個手動氣泵黎打脹啲,但效果不大,始終唔及機打既咁勁.由於漏咗相機同其他野係羊仔,我要行返上山攞返,一來一回四個字時間,但烈日當空上斜真係好攞命....

返本陣抖一陣飲飲食食一會,就貯袋係沙灘士多(五十蚊兩個袋,幾好搵~)一齊落水玩,人家一邊駕住隻鯨魚一邊踼水,我就做苦力拖行,總算行咗大半個沙灘長度.停低抖下嬉水,又拖返本陣對開水域,抖一陣就上番岸(17:50).落水玩咗一個鐘都好攰下,飲埋香檳仔,食多少少野(包括當地雞脾),就執野走人.

更衣室等候人聚多,排晒長龍,人家不勝悶焗,排隊時頭暈,向傍人求助,但換黎只係一句"後邊丫,後邊有求護站",可憐既台灣女生坐係地下,眼蒙蒙咁行返去長椅位搵我,一坐低就嘔(我坐係對面見到之前既雞脾被嘔出),傍人無咩理會,我上前扶人家坐第二邊椅,用毛巾撥風,凍水整濕紙巾黎抺面,一路用說話安撫下,好在抖一陣就無咩野.


為免再出現類似情況,我叫人家唔好再排隊,坐到八點三,等人走晒咁滯至俾人家再去唔人多既更衣室沖洗.人家梳洗完後,我就叫人家坐係露天沖身處傍既長椅看住啲袋,而我就可以邊洗頭沖涼,邊睇住人家(夜嘛嘛又有不良少年,都係睇住好啲~)

人家同啲袋係小巴站等,而我就一個人手持電筒仔沿馬路上山攞羊仔,再落去小巴站會女友.回程約一個鐘零三個字,係清水灣至西貢時,俾一架benz推,當時羊速五十至六十,路面多彎又斜,仲用埋大燈射我地,響安!我繼續保持羊速,不為所動,點知架benz唔埋雙白線,抽頭過我地,實在太過份~~~~~~~~

返到我屋企放低隻羊同袋,我地搭的士去新墟食打冷,再散步送人家返屋企.唔通今日既沙灘遊既決定係錯既?
ps:香港人真係無咩同情心同無品,新界西啲人品差?出到省城咪又係一樣.我諗起一句舊說話:"香港地人情紙咁薄"

特價日

本來諗住今晚只係會享用呢個特價火煱(紅橋,大戶人家-兩個人叫咗成十碟野+$10三枝細啤酒,埋單都係$130),但點知晚飯前仲好其他特價項目等緊我同台灣女生.

雖然今日係放假,但我都八點左右醒咗,由於屋企無乾糧食,所以搭小巴返工作地既停車場攞返隻羊仔,再去建生買麵包,再係ok幫老豆買大腳板雪條.

返到屋企食完野,打吓日記,又騎羊出門去市中心晒番之前老媽新鋪喬遷既相,再返屋企換過件衫,搭小巴出市中心會台灣女生食晏同開始我地既特價日.

我地搭263巴士去沙田,其實今日主要目的係睇下有無心水背囊,同買襪(舊一代黑襪已變成灰襪).背囊就睇唔啱,但之前睇啱既一對new balance跑鞋就咁啱有八折特價.睇均其他鋪頭都係八五折,所以係去番馬拉松買,惠顧滿$600,仲攞埋張八五折咭添(各路好友要買野請出聲,定當仗義)

之後又行西田,無印,city cuper,買埋特價襪(好搶手,好多師奶同女仕們幫自己既細路同男人買),同幾樣濕碎野.係ice fire度問過自動縮骨遮既貨源,sale哥哥話全線售罄,下年請早..

我同人家跟人龍上263返歸時,無留意有一級壆位,只顧望住前面個人既背脊黎行,結果一齊air walk同兩吋高free fall.好耐都無試過大家都係放假咁出街,好多時係返完早更出,因為攰而無咁好心機行.放假同放工出街既心情真係好唔同o家.


打邊爐時,人家話叫啤酒飲,斟下斟下,飲咗一細枝唔夠,人家已經面紅晒,而我就飲咗兩細支同人家杯裡面少少(杜絕有人唔聽話會再飲).食飽飽,再慢慢行返去人家屋企當飯後散步,一齊放假真係好.

更衣室怪談

200608100743更衣室怪談

16未分類

以前曾經打過一隻電腦game-diablo ,係遊戲內既宝物武器都有名子,如果名子係金黃色,就叫unique item,即係係game內只會得一件,,唔會有重覆相同,通常都係勁野或值錢.今朝返完一個幾忙既夜更後,我就係更衣室洗手盆搵到呢件unique item!!

事源係我臨走時,哥頓同我講樓下更衣至有條發黃既布質物件,叫我幫手認吓係邊個既失物,點知落到去,真係仲係度,嘩,真係發黃,太想吐了..相信係有人漏咗係沖涼格,俾下一手見到,於是陳放係當眼處等物主認領番.

除咗呢件事外,其實更衣室仲有一個傳奇既人物,佢就係"果王"!傳說中既"果王"最愛係三格沖涼格中最埋角既一格開餐食野,同留下一堆殘餘食物,包括蘋果芯,食品包裝紙,如時令月餅包裝膠兜.呢位傳說中既人物之所以被稱為"果王",係因為佢好多時都係遺下生果皮或生果芯,睇黎佢好似好鐘情於生果.

我同我既同事推測,"果王"應該係特別既部門工作,因我地大圍放工換衫時都已經見有"果王"既遺物,"果王"應該係人流最少既時段入更衣室享受佢既嗜好(邊沖涼邊食野,食完野沖涼,沖完涼至食野,or唔洗涼淨食野).上個月我仲見到係locker櫃同牆之間有蕉皮添...

本人亦曾係非返工放工時間入更衣室攞返啲野時,見到一個四眼和尚頭既小肥仔係locker櫃之間既窄巷,坐係一張椅上食雞脾.佢見我望住佢時,佢有啲慌張,一直坐係度唔郁,停止進食同望住我,而我攞完野就離開.佢會唔會係傳說中既果王呢?點解佢唔坐係鞋架附近較空曠既地方坐係度大大方方咁食呢?個一刻我諗想盧海鵬扮羅記唱<幾許瘋語>時個句"似個痴漢,食飯另轉面"

ps:尋晚真係有啲忙,大壯漢身水身汗,兩位小妮子都無停手,所以係escort時我都自己上陣,等佢地抖吓,同免得俾樓下無埋取鬧,因打電話俾樓下時已經有人話"有無搞錯,咁都收落黎"...都係搵食啫,唔好難為我地呀~

night food 之進化論

夏日炎炎,三十幾度,為咗提供安全衛生既魚生宵夜俾一齊返夜班既同事享用,今日早更後,我駕羊回家攞冰袋同冰種,再騎羊去市中心.食完單身漢餐,再去吉之島選購魚生,放係裝住冰種既冰袋內,以確保運送期間之保温.

其實以前啱啱畢業時,返夜我係係和生飯店買卤水鵝,再+/-泰式辣鳳爪或燒豬頸肉,將袋外賣掛係綿羊左邊把手,行兩個街口就到工作地方.

後黎好多女同事反映話太油膩,唔健康,諗咗好耐,於是轉買壽司,反應都幾好.不過由於係放係綿羊seat位下既倉仔,行公路返去工作地點(約四公里),有時啲壽司都係被震到分體,飯同魚分手收場.再加上個人認為夜媽媽食飯好似感覺怪怪地.


最近期既方案都係市中心買魚生,啖啖肉,一口吃,反應比之前壽司還要好(自己都鍾意食).如果咁啱有唔食生冷野既同事,就叫kfc外賣(落雨同買唔切宵夜都會),或返夜班前買楊枝金露糖水.今個夏天仲將買宵夜既時間由返工前,提前到返完早班,係市中心食埋晏晝飯就買,多啲魚生揀,安心訓覺,無咁趕時間(慳咗夜晚出市中心程車).

週月飯局

返完個早更,都幾攰下,約咗台灣女生係市中心等,我地差唔多同一時間係輕鐵站落車(我搭751,人家搭610),一齊去買魚生.行過廣場空地(八佰伴噴水池之舊址),見到有2006變形金剛展,於是同人家行去望下同介紹我我擁有邊幾隻.(之前人家係我屋企食飯時,都能成功將一個BINALTECH系列既變形金剛由吉普車變成機械人).之後係冷氣強勁既超級市場揀選魚生,再搭車返入村,享用剌身午餐.


食完剌身,睇埋keroro軍曹,換過件衫,我地就出發搭van仔去深井食西餐.行咗個轉,一間返車站既餐廳有一男一女係門口向我地招手,男既仲好滑頭咁介紹菜單俾我地,價錢ok,百零蚊左右一個餐,但原先上網check同朋友介紹果間反而門面無咁靚之餘,仲要貴啲.基於先入為主既關係,我地都係去咗貴啲個間.

我地叫咗個二人餐,忌廉湯好滑,好流質,唔似罐頭湯咁糊質;鮮蝦沙律令我對生果味道既定義有所反思(點解木瓜係咁甜同無咁木瓜味?);銀雪魚煎得又香又滑;法式田螺大隻肉同多汁.整體黎講係ok,只係個造價較高,同菜式無咩驚喜.

食完飯,我地又搭返van仔走人,下次目標係印度咖喱寶或Kcal,當然會騎羊去啦.今次因為係週月飯局,著得斯文啲唔方便騎羊黎啫.


今個週月無準備啲咩俾人家,好似有啲懶添,要諗一諗計至得....

返晏日+密室建築廢物事件

今朝起身見有太陽,仲有藍天,於是駕羊住泳池出發,做個健康都市人!點知係公路上遇上塞車.見前景不明,立即轉線,經置樂,藍浪,屈返入泳池,雖然係多啲燈位,但勝在唔洗塞嘛.
用咗比平時多一倍既時間到達泳池(平時三個字),同平時一樣游十次來回,好明顯無上次咁快,真係有啲攰 .今日都係游大池,因為副池多細佬仔,難游直池.

游完水,沖埋個涼(期間隔離格既小朋友唱麥兜泳池宣傳歌"阿媽教落有豬腩肉就游多游"  ),騎羊去置樂老媽間鋪.老媽食咗野,我奉命去買咗兩罐啤酒,自己就係粉仔檔買咗碗粉仔同潮州粉果,餐飲係七仔既支裝可樂.呢個餐都幾油吓,不過做完運動,都仲有啲quota既~

返完晏晝更,駕羊返到屋企,老媽話後園有好多塊成個人咁大既隔熱板(polyester foam),係咁嘈話係人地三樓整野掉落黎既,老豆就話係之前打風係人地天台度飛落黎,唔係有人有心掉落黎.由於老媽唔老黎老豆幫外人講說話,於是又同老豆抄一鑊.案發現場如下:

我覺得老媽老豆既推埋都係可以被推翻,首先老媽話係隔離屋或自己三樓掉落黎,但我覺得好難將所有既板掉中我地後園,起碼有啲會係鄰屋同我地既玻璃屋頂上,但我用櫈仔企高望過又唔見喎,仲係鋪住好完整既塵面.老豆既大風吹論都係落點有破綻,如果係打風吹倒既話,落點一定會更擴.再加上係三樓掉落黎一定會較大聲,同座既二,三樓住客會聽到(三樓好多時都係有人).

本人覺得係附近既建築工人或惡作劇者,係圍牆外既另一邊,將隔熱板掉過,所以無咁大聲之餘,又會全數落係我家後園地上.

自由坊喬遷大吉

今日係老媽間自由坊喬遷之日,我同大佬健搭的士去老媽新鋪(十一點唔夠就到).在場有一個由老媽前清潔公司既同事送黎既花藍,唔知邊個送黎既果藍,拜神套餐(燒豬,油雞,燒鴨,生果)好幾個老媽既"朋友"同表姨.一輪照相同拜神後,台灣水生安排既花籃就送到啦~由於有個架既關係,睇起黎好高,呢個賀禮係人家出去花墟格過價,唔啱又返入屯門新墟一間小花店揀既(幾有誠意,我就無lu).整體黎講,呢件賀禮係大方得體.

十一點半左右,午餐係拜神食品,全場汽水啤酒任飲(解說:老媽朝早出門時,用發泡膠箱同冰包座住啲雪凍咗既飲品,用手拉行季車仔運送),食咗幾舊肉,飲埋罐可樂,補多幾張相,我就走先.行去栢麗還漫畫時,經過花鋪,見大佬同阿嫂既花籃進入最後工序,我仲用電話話俾大佬知,叫佢耐心啲等.

見今日出返啲陽光,返工作地方既停車場攞返隻羊仔兜返去屋企,執好野準備晏晝游水鍛鍊身子.執完個袋差唔多兩點,駕羊接人家放工去老媽新鋪拜訪.今次見到多咗幾個花籃同多咗幾個人,包括鑽媽(老媽既家姐).其實佢同老媽都好似無咩邦交,唔知點解會黎,朝早有個之前都同老媽翻咗面既"朋友"都有黎,有時都唔係好明老媽想點,政制變得好快,"離離合合,我已覺討厭"(某舊歌既歌詞).

打完招呼,同人家去買粉仔同生菜魚肉返新鋪食.隨後影多幾張相就用羊仔送人家返屋企(今晚仲要返夜).

我就駕羊去泳池游水,半個幾鐘就完成十次來回,美中不足係厚雲,無咩太陽.沖個靚涼後就騎羊入元朗買扣布冚用既單車鎖,再順便去b仔買榴槤班戟外賣,兜番去人家屋企,送到上門.伯母誤以為我係sell有線,所以我敲極門都唔開,直至伯母聽到我打入屋既電話至開門.

放低元朗手信,洗個臉,飲埋支益力多,就返番屋企放底游水啲野,幫大佬攞舊相機電,就打的去天悅酒樓食晚飯,我仲飲咗半杯紅酒添~

老媽今日好開心,可能係多"朋友"黎鋪搵佢,收得多花籃(約十個),又有一兩個果籃,又有兩個仔做紙版公仔,又有相影,又有阿嫂到訪,熱鬧既飯局,令人痴醉既啤酒,係商場度攞晒彩....希望今後回復正常,老媽返屋企煮飯或一齊出街食,唔係顧住搞鋪頭野,要我同老豆自己食啦,同埋唔好成日同老豆嘈就好lu.
本來同andrew,楝哥飲野,但因andrew太夜至得閒,所以取消.聽佢講新工都搞到佢幾攰吓,今日踩單車都無力(佢話"不舉"喎),唯有下次先再聚舊啦~


PS:點解起初鋪頭要叫"自由坊"?事源老媽問我間鋪叫咩名好,我一口就答"開心坊",老媽問個名有咩好,我話"開心坊"係東方日報以前既鹹濕版嘛.老媽俾我胡鬧完之後無耐就話叫"自由坊",因為自由開店時間,佢幾點開就幾點開,咁我都有份出個"坊"字丫

房間重組

朝早七點幾起咗身,出客廳咗幾塊消化餅,都係提唔起精神執房,於是"剿"返之前係元朗買既七武士卡通DVD($33.3)黎睇,質數又幾好喎,無起格.故事都唔太悶既,睇咗兩集就又好攰咁訓著返.
到十點幾時至起身動手執房,仲有抺下啲超合金,借機幫超獸機神分體,變做野獸MODE,再合番體,方便抺乾淨啲塵.執到十二點幾覺得好肚餓,但又唔想出村口間茶餐廳食.

台灣女生提議叫KFC外賣,點知外賣接線生話要滿六十蚊至會出綿羊送貨,失策...係無辨法之下唯有搭小巴出市中心食單身漢餐,眼見惠比壽既造價較貴,大利茶餐廳既午餐又唔啱食,結果都係食kfc.

食飽後,行返去栢麗租漫畫,有金田一添呀~行返去百佳買番啲糧餉作貯備,有杯麵,薯片,洋葱圈,餃子,雪條,提子飽同紙包檸檬茶.埋單時姐姐仔話"多謝一百蚊",又會咁啱咁齊頭既?抽住三袋糧餉,行去等van仔返入村.同車既師奶眼望望,可能諗我唔似係住家男但又抽住咁多野上倉卦.我都好耐無係超級市場行咁耐,之前係市中心住時多時間一個人去買日用品,買餸(其實好少煮餸).
返到屋企就係咁刨漫畫書,睇埋雪花版軍曹,收到老媽來電,話唔煮飯,叫我同老豆食,於是我約咗老豆係市中心七點半等.本來話食大娒指茶餐廳,但我諗兩個人都要近一舊水,加上同事話稻香啲野都抵食,於是一齊去.

老豆早到,所以已攞埋位,坐定定等我,我地叫咗個是晚推介,百四蚊有燒雞半隻,班腩塊,兩個人食啱啱好(另外叫咗個白飯兩份分,因我食唔到咁多飯).老豆問我飲唔飲啤酒,我話唔啦,點知佢話特價喎,佢又想飲少少,於是叫咗枝大喜力,老豆飲大半杯,其餘我包底,但我都飲剩細半杯(有相為証老豆唔戒口,偷飲酒).

回程搭輕鐵時,心血來潮,中途落車,等人家放工,係接女專區坐底等(七仔對開既座位).發咗半個幾鐘"毛",卒之可以見到人家,徒步回家,係人家屋企坐咗陣就搭輕鐵返自己屋企lu.

困愁城

返夜時食食吓宵夜收到電話要收過arrest客仔,於是好快就食多一兩啖,就拉簾兼封印住啲糧餉,快快手借機,set番個架部黎嚴陣以待,搞咗近一個鐘至可以再埋位再食過...

好在都唔係好多野搞,都有等坐下叉電~ic姐姐係咁忙於與外通信,我就中途"鄧"下腳,無驚無險又到放工時間,感動~~~

放工時都仲係三號波(細個時阿婆話打風係咁叫,三號波即係三號風球"猷公,而家打緊三號波呀"),雖然尋日返早時己將愛羊既大架落好,綁好布冚,但都心掛掛,換完衫就去睇下有無被吹倒.
雖然無被吹倒,但德輝架sprada俾個路障膠樽"i"住車身,於是急急攞返開同擺遠啲,免得被吹倒再壓向sprada上.搞好晒,望多幾眼就行去打的返屋企沖涼訓覺.

訓到十二點無故醒咗,上咗陣網,至可以訓返,之後到近三點至醒.係村口茶餐廳食個雞翼薯條下午茶,就返屋企睇軍曹,但天線俾強風吹到收得唔清,係雪花既部同下睇完軍曹卡通~
可惜今日打風,無得出去行下,無得駕羊,天氣仲要差到今周末,真係激"水"~~~成日係屋企對住個電腦芒,打下日記咁,但又無咩霊感...

ps:今日得知一位女同事有感情問題,希望佢可以衝得過去啦.細個時睇IQ愽士時,粟子頭老師話:"愛"字係有個心係中間,如果一個人無付出自己既心,咁佢係唔懂得愛,咁就變咗係個"受"字,即係只懂接受別人對自己既"愛".