元朗家鄉小菜-鬆骨蒜爆蘆檸桃

今日返晏,一位健碩既男同事向我地介紹元朗一味家傳戶曉既家鄉小菜-鬆骨蒜爆蘆檸桃.話說男同事同佢既舊師兄弟係尖沙咀一間酒吧聚舊時,從一位女拳手得知呢味小菜全酒吧既人都知,享譽盛名~

相傳呢味菜源出於凱爾文先生,為咗令心儀女同事應爆房之約而成名既作品,凱爾文先生大膽以"鬆骨","蒜爆"同"蘆檸桃"三大元素作為一絕配搭,並以獨特"足電"處理方法黎俘虜目標.(詳文省略)

一眾同事聽過後都不禁驚訝同佩服,相信呢味小菜係元朗區已成為一時佳話~

電話重傷留醫,買mouse一頭煙

朝早十一點幾就同台灣女生出到太子既nokia professional care打飛等電話,打住nds黎等咗廿幾個位,唔洗一個鐘就可以去到櫃面.講完病徵,攞番張單,哥哥仔話一個鐘頭後約一點三個字有得攞.

為打發時間同醫肚,我地行咗去朗豪坊既italian tomato度食晏晝,人家食意粉,我就食黑椒豬扖飯.野食無咩問題,只係個湯好似茶餐廳既中式例湯味,仲要係好重味精個隻,同埋紅茶啲味好似提子汁既味咁,搞到人家杯凍檸茶同我杯凍奶茶啲味怪怪地.

食到近一點時,人家既電話響起,話搵陳生,人家話佢打錯,但我叫人家問吓係咪搵周生至真,因我估係nokia打黎又睇錯chau 係chan.原來真係nokia打黎,佢話無零件,要大約兩個星期至有零件返...

於是食完飯唔洗去攞電話lu,係電梯口有個city bank 既I.T.信用咭檔口.外貌同制服都好似SECURITY既PROMOTER向我地發傳單,人家之前都幾想出呢張咭,於是坐底填FORM,仲有張PACIFIC COFFEE既COUPON換咖啡,同$300既I.T.現金劵(要簽夠額至有).

跟住我地行去旺電睇mouse,問個哥仔(一樓某鋪)
"LX5同呢隻有咩分別?"
"你有無見過LX5丫?"
"有呀"
"咁你睇唔到咩唔到咩?"
"....睇唔出喎,個盒又無SPEC印出黎"
"個外形唔同囉,接收能力唔到囉!"(態度負氣同串)
"咁你有無LX5賣丫?"(我反問)
"無喎"(不屑)
"好,唔該"(放底盒mouse,商量幾句,拖女友走)
跟住就同人家去咗對面個間"皇城電腦公司"買LX5個型號,省城啲人係咪咁惡呀,咁黎答客人.就算我真係一個電腦白痴,都唔係要俾你串同玩呀?答句邊隻新款啲同級別高啲都好丫.我即時諗起andrew個句,"我係客黎o架,唔係嚇人個嚇呀,你呢啲人真係唔x唔鬆化!"

買完mouse,係信和買埋隻變形金剛masterpiece starscream,$460,哈,當係奬勵下自己,舊年呢個時候我買咗幪面超人faiz系列既kaixa連專用可變坐駕.

我地再去埋護協報course,攞埋韓國既張程,就搭巴士入屯門,再係市中心啲旅行社攞啲資料.送埋人家返屋企,自己至返入村食飯,裝埋隻新mouse(左邊),舊個隻係滾球式同要對reciever至work個種老套紅外線,我認咗佢好耐o架,今晚一於同佢講byebye!!!

夜晚拎住人家借出既舊手提電話黎出街,同屯宿兄弟飲酒聚舊.睇黎都要一段時間黎適應個電話~

ps:今日仲買咗兩本漫畫(星失g同angel heart),要慳啲洗...
人家既親子團睇黎都要因時間問題而取消..
今晚酒局順利完成,人腳有:percy,阿潘,禮,屋主強少,華b同ball ball,無特別嘉賓

屋企有重力裝置?

返完夜班,騎羊兜埋台灣女生返屋企,係自己屋企個廳食住月餅早餐等電熱水爐煲水時,聽到廁所"轟"一聲.原來係假天花有一塊铝板跌咗落黎,其實今次都已經係第二次,兩次都係我等熱水時發生,好在兩次都無人係廁所度咋~

安置好塊铝板係厠所一邊,沖好涼,刷埋牙,就訓到點幾兩點,人家三點至醒,約咗係人家樓下兜人家去市中心攞月餅同行吓.搞到成六點幾至騎羊上人家屋企食飯.

食完飯就睇埋back to the future part3,卒之都完成個boxset lu今次既時代係西部牛仔,個個都係騎馬.我覺得騎馬同騎電單車既坐姿都係差唔多,咁我算唔算係現代牛仔?唔怪得渣電單車既人士都係鍾意著住皮褸同boot啦.無咩技能同過人之處既我,只係幾經挫折至攞到個電單車牌,同擁有一架喜愛既電單車係身邊,但我已很開心,因為佢令我平凡到極既生活帶來好多點綴同方便.

返到入村時見門口盞燈無著,摸黑入屋,見枱上寫住門口燈壞咗.問過大佬健,原來係晏晝時,盞燈自己跌咗落地散晒,全屋跳制停電,要打番著個fuse制.

接二發生高空物件無故下墮事故,我仲以為係屋企既重力場出現問題,或者係之前既3點幾級地震所致.後黎老豆話原來個裝修師傅江強(曾經飲完酒車我地返屋企,我仲係後座落緊車時,俾油開車走,將我拋出車外,眼鏡飛脫個位先生)只係用咗兩口螺絲黎拉住盞幾重既燈,其實盞燈有四口螺絲位,只係佢懶!!如果揼到人,真係爆硬缸!樓上阿"dee"腦筍都未生埋,俾盞燈揼中就弊啦~~~~~~~

失眠

訓唔著時就會好似隻毛公仔咁係張床度眼光光,自從星期日誤點事故後,新一輪既失眠浪潮又展開lu.

過咗輪班捱夜既生活八年,精神體力差咗不特至,仲會有時會失眠.飲少少酒的確會好訓啲,但又怕第二朝會頭痛,鮮奶我又唔飲,都幾苦惱吓..

如果個排有時間去做吓運動既話,失眠情況就會少出現,睇黎我都係少做運動所致~精神上既攰亦令我難以入睡卦?都市人真係好需要運動~~~

尋晚都好似無訓過咁,返工無耐已經腳仔軟.放工同人家去市中食飯,我又餓又攰,食咗大半碗飯,咖哩雞扒當然係食晒啦.係吉之島買埋魚生做宵夜就騎羊送人家返屋企,再自己入村訓,但都只係feel到自己係張床度碌黎碌去仲有感知,無LOC既感覺....
希望番完夜會訓得好啲啦~

手提電話真的內置自毁程式?

之前我有好幾部手提電話都要拎去維修,今次都唔例外,逃唔過呢個宿命..

今次個電話係"伸直"狀態下,個攘聽,拒聽同下方既選擇制會無反應,要電話係"收縮"狀態下至有反應.其實佢係買番黎一個月左右已經壞過,當發sms時,佢會不停咁重覆熄機同開機.之後拎去原廠nokia professional care 維修,跟住無幾耐就收唔到mms,我都無埋會度,只係去咗網絡商"薯o麥通"度問過同set過啲config,但都唔係成日收到. 唯有係sleeping或者之後個日出去整啦~

好多人都話啲手提電話有內置自毁程式,一年左右就會壞,迫你買過部新.但係我個電話都只係用咗六個幾月咋...又話nokia啲電話襟用啲既

係我記憶所及,呢部係我自1998年底起既手提電話生涯裡面第九部電話.當初入行之前一個禮拜只係出咗部call機,但一眾屯宿之男,阿潘同華b都係用samsung cdma制式既電話,只係percy有部Ericsson既GSM手提.個陣時電話費貴,我試過係十五樓用宿舍電話打去percy手提度,諗住"嘥"佢啲分鐘,心裡咀咒住"one 2 free 丫嗱, one 2 free丫嗱..."點知percy好醒目咁飛咗去留言信箱度,戰術失敗....

出咗糧至有錢諗吓出邊部電話.個陣時無咩選擇,得nokia,motorola同ericsson,再唔係就samsung既cdma電話,我當年就揀咗黃色Ericsson既PH768.我戅居到唔知要開著部機至會收到電話,以為係佢會自動開添,白痴x1.

之前睇報紙話都市人會有手機倚賴症,sign & symptoms有唔帶手機出街唔安心,要返轉頭攞番;係無來電既情況下,誤以為有來電鈴聲或震動....睇黎我都有啲添以下就係我手提電話既歷史(1998至今):
1st Ericsson PF768        > 黃色                                       sunday
2nd Bosch 909 Dual      >  灰色                                      people
3rd Siemens A40            > 藍色                                       orange
4th Ericsson T29             > 銀灰色外殼,紫色panel      one 2 free
5th Ericsson T39             > 灰藍色                                   one 2 free
6th Sonyericsson T300 > 紅色 (紅豆)                           smartone
7th Sonyericcson T630 > 黑色                                       smartone
8th Nokia N6260            > 銀色                                       smartone
9th Nokia N6270            > 黑色 (深啡色,铝金屬外殼)  smartone
ps:

http://www.gsmarena.com/可以上呢個網睇番佢地既spec 同樣o架~

零六年第一口月餅

今朝起身,見廳有月餅係枱度,於是心血來潮,入厨房攞把刀仔黎切開四份.我本人唔係太好月餅,都係有咪食吓囉,始終都係高能量兼高膽固醇食品嘛~

以前細個時,好多時老豆係鐵倉公司(源興)攞盒月餅返屋企,公司送俾員工過節(好多時都係美心).四份之一個月餅,加杯可樂,咁就係一個經典中秋應節早餐啦~

好多時個罐都係留番黎煲腊用,老豆老媽好興中秋節搵埋市中心姑媽一齊去燒野食,食到咁上下我就同大佬去玩火,玩吓玩吓會同埋其他唔識既小朋友一齊玩.

隨住老豆轉咗去萬昌,再轉行去做保安,再無公司送月餅呢樣野lu,但每次見到啲傳統月餅時,都會諗起老豆老媽後生時無咩病痛,要昂高個頭至望到既模樣,同埋一家人去燒野食既感覺.

大力last day歡送準備+大食會實況

尋日放工奉命去超級市場收羅大力歡送last day大食會既物資,包括家庭裝燒賣,四支汽水,罐頭菠蘿,罐磺腸仔.我約埋台灣女生一齊先去係佢樓下既萬寧買咗對爽健鞋墊(用黎舒緩新返工鞋既薄底設計),再去"胃腔"超級市場選購大會指定物品,其間見到成排相熟香檳仔,心諗如果大食會可以飲就好lu.

係人家屋企坐咗陣,過咗一版超級瑪莉奧兄弟兼save埋,就騎羊返公司,將物資送上厨房.為慰勞夜班辛勸既同事,落咗去七仔買雪條返上黎等大家係稍後時間享用.
騎羊返到屋企,見書枱上有一封綠色既信件,唔...卒之都黎啦...

就係稅單啦!今年比上年交少咗啲,加上又比我預其中少,所以都平伏咁接受呢份公民禮物.好在平時都有篤定計數機,留定一部份資金用黎俾稅網封印.
講番正題,諗住好好咁訓醒覺就返工兼搞farewel,點知真係太好訓,電話鬧鐘响咗但自竟然一手"禁"停個alarm,攞埋個玩話入"被竇"繼續訓,訓到六點十一個字,阿潘打黎既電話至醒,仲驚動到老媽添.....第一件事打返公司話而家出門,再以極速梳洗換衫,騎羊返工,最終遲咗三個幾字......失策......
朝早食完早餐,同事們已開始為今日既functiom做準備,如精心既佈置~

你睇有幾多"架生"! 幾咁華美麗! 幾有心思!

當然唔少得充滿住暖意既美食~真係一入厨房門口就聞到香味,一聞就知邊個煮~~

點幾鐘左右,主角大力都到場,人齊啦!成枱都係野食,除咗壽司,三宝同油雞係現成買返黎之外,其他野食都係有心既同事煮出黎架!!(咖哩魚蛋+丸丸,瑞士汁雞翼,菠蘿腸仔串,煎餃子,肉醬意粉,蟹粥,燒賣...)

臨別在即,大家都有影相留念,我當然唔例外啦.All the best !  有情有意,好兄弟!!

癒著！東瀛碟鎖袋！

原來台灣女生送既係一個手制布袋,因為用開果個積勞成疾,穿咗個窿.之前講過吓想買個新,但又睇唔啱,點知人家就整咗個出黎,塊布仲要係日本制添~我都幾鐘意個花,夠東瀛feel(我無得救),唯獨係較單薄,怕會快爛,個碟鎖實在太重了.

朝早放工個人好攰,連去建生買早餐都無力,用底力直接騎羊返入村,一訓就訓到十二點幾肌肉酸痛到醒咗.出廳睇咗陣三色台重播既<天龍八部>,又再訓過.尋晚都算忙,如果無阿jack同大力都唔知點算,我仲俾一個escort既保健員串同發難渣,簡直係觸及龍既逆鱗!!!!!!!

夜晚同人家出咗去市中心,係元氣食晚飯.行咗陣商場,,原來頂層新開既cd店係同地下間精美同公司.我地買咗back to the future 既一套三集dvd box set.因為人家未睇過,但我覺得係好經典同好睇.

細個時無咩娛樂,又無得落街玩,只係係屋企度睇電視,卡通同電影.當屋企添置咗部pal線双磁頭錄影機後,彩華姑媽好多時dup啲港產片俾我地睇.到我升中學後,屋企買多咗部國際線路nicam錄影機後,我同大佬會預校錄影明珠台同國際台既西片黎睇.<回到未來>就係其中之一.當我地兩兄弟有零用錢時,買咗部laser機,我地會去影視店,租西片黎dup落帶黎睇.之後仲係葵芳租日本laser碟卡通添(連字幕帶一齊租),跟得日本發行表好貼o架~隨住影視店既末落,laser碟既淘汰,大佬健赴英升學,dvd引進市場,屋企既番dup工場就摺埋咗lu.

最後既project係我係市中心八佰伴new type分店租gundam w既laser碟睇同dup,同埋唔正經既日本動作片.我仲記得個次係度揀緊碟時,俾我"哨"到何福堂教我宗教科既阿sir係附近行過黎.我即行放低手上既"日本動作片",去隔離卡通個行,揀美少女戰士碟.阿sir認得我,我仲話幫阿妹租美少女戰士.(我邊度有個妹丫?)阿sir一走,我就攞返隻"日本動作片"黎租.

行完街,騎羊送人家上樓,睇咗第一集,人家都無話唔好睇,無咩冷場,笑吓笑吓又睇完,以當年黎講,一齣戲有三集兼且重咁連貫,好勁o架.而家就唔同啦,魔介都睇你三年,"蝦你老實"都睇你幾年,連演員都由未成年拍到十八歲.

ps:所謂既dvd珍藏box set,一打開就爛,個dvd碟托底同個紙皮分離咗,要用宝貼萬用膠黎"痴"番埋...

久休復出,返夜日

今日返早夜班,好難得係做自由人(細佬),可以跟隨前輩學習學習頭段比較忙,係早餐過後節奏就有所放緩.無返一個星期工,有啲野野唔同咗,例如客仔專用既座位已換咗新款,比較時尚同文明,有腳踏,枱面由木料轉為膠質,又有安全帶;會失驚無神有audit;拖板用法同叉電飯堂有所更改.

順順利利咁放工,係橋底停車場等阿潘時,影低愛羊既英姿,你睇佢幾靚仔,係我既打理下幾咁搶眼!同阿潘去咗美琪前址既茶餐廳食晏,原來格局都一樣,只係裝修得靚啲,我地仲認得落單個阿姐添.由我training時起,好多時都同啲兄弟係呢頭食飯,所以今日都揀番呢度食.

食完飯,去攞羊仔時至察覺有一架名牌羊仔係相熟泊車位置,唔好睇佢個樣咁"雞",仲印有sym既字樣,就認定佢係低價羊,你留意下個seat位

原來係LV皮位黎o架,幾貴氣!可惜係a貨我諗羊主一定有去睇<穿prada的惡魔>~~
騎羊去市中心買魚生做宵夜,吉之島好多人,排咗好耐隊至俾到錢今晚同大力,大豆,群姐返夜,人手充足!

訓得個零鐘就醒咗, 食過老媽煮既晚飯(幾啱胃口),打埋篇blog就出門lu.
ps:唔知台灣女生今日會有咩俾我呢???

復職

放完大假,今日正式再投入工作.返晏晝之前,係屋企煮咗個腸仔米粉黎食,跟住住駕羊返工.江湖傳聞我地個team人要被解體,部份去元朗,剩餘既留低,但都可能會再分散派到各team.可能遲啲要早啲出門,騎羊入元朗返工lu~

唔知係新鞋既鞋底比較薄,定係自己都係人口老化既一份子,唔係好企得耐.又可能係運動唔夠啦,真係想個運動場快啲整好,咁就可以返完晏去跑半個鐘至返屋企. 以前運動場早開時,我會五點半起身,早啲返去更衣換衫跑,再沖個涼,換返套工衣至開工架.
係白鴿籠度收到潘哥既台版偉大OS連配套程式碟一張,太感動~黎緊既十月五號,就係屯宿之男八週年既日子,希望可以出黎聚一聚啦.

向上抺，向下抺，不可放任胡亂抺～

聽日就正式返工,房間既藍天行動完成度只係70%,令人憂心,運動又無咩點做過,於是十二點去跑步.唔知係唔係尋晚搞得太夜,無咩力氣咁,加上一起身時巳經好肚餓,最終只係跑少一個輕鐵站,係泥圍就停落黎,行返屋企.沖完個涼,就出村口食咗個午餐c 咸魚雞絲炒飯,配凍奶茶,今次個飯無之前個啲咁難食,可能係我太肚餓既關係啦.

通常放假時都會同隻羊仔進行清洗同打腊工序,尤其係臨返工前一日,今日都唔例外.所需既用品有噴水壼,水桶兩個(個裝清水,一個裝皂水),保護膠邊既噴劑,洗呔鈴既噴劑,同埋腊一盎,以及碎布.

首先用噴水壼,噴水沖走尾轆同尾擔車底engine既沙石污糟野.之後用乾布掃走車身(包圍)既灰塵,再用係皂水桶扭條希黎抺車身,抺一忽仔又掉返落個桶度再扭個條.跟住係清水桶扭條布,用黎抺走車上既皂水,又係抺一忽仔又掉返落個桶度再扭個條.
等車身乾咗,就以打圈方式上腊.如腊沾上膠邊膠殼部份,就以濕布抺走.當腊吹乾後,就以乾布抺走腊漬,見到返原有平滑面就可以了.

打完腊,就用膠邊保護噴劑黎抺seat位,把手,膠殼parts.之後抺埋車前轆後既散熱糟保護膠殼,以及車底膠殼.
呔鈴保護劑抺前後鈴,再以清水用布抺走.前後刹車碟當然要用清水黎抺啦,回復原有既制動力嘛~

打開晒啲儲物格黎用清水濕布抺.錶板,風擋,前後燈都係掃走啲塵,再以皂水,清水抺拭.最後就清潔埋前叉外露既叉芯,以錶板既清潔方法去處理.

搞掂晒就繼續等隻羊吹乾同透吓氣,唔好心急"及"埋晒啲儲物格.再環觀隻羊有無咩地方抺漏,同有無腊漬之後就輪到我自己本人要進行清洗工序,沖個靚涼.

梳洗完就同靚羊出市中心搵大豆,emily,之後再去接台灣女生.係出發接人前倒車時,聽到"咇,咇"聲,隨後"卡"一聲,心知不妙.熄匙落車睇,果然未拆碟鎖就行車,個碟鎖仲食咗少少係個前轆包圍裡面,要上返車向前推至"吞"得返出黎,心痛x1.好在都包圍無爆無裂,無咩變形,但都覺得有傷羊體,好內疚................

夜晚同大豆,大力,emily,andy,人家一齊係置樂食泰國野,但小曼谷無開,去咗附近一間泰味軒食,評價係"唔得".我好耐無同成班人食飯,平時多濕野搞,有時又自閉吓咁,唔通係吊酒癮??
騎羊送人家返上樓,人家陪住打機,過咗兩版孖室兄弟,仲save埋,總算有啲安慰~

大假LAST DAY

今朝成三點幾至係andrew度走,四點至係屋企訓,一訓就成十一點幾先醒.其實已較好鬧鐘十一點,只係自己早過alarm幾分鐘醒啫.

由於今日大佬健話晏晝會將ingram mk3 進化至mk4,所以就忙於做資料backup.唔覺唔覺,成兩點都唔知添!弊!!!!我之前仲應成咗幫台灣女生,去買蛋撻返公司,等人家可以拎去前老細簽野兼探班.

啦啦林跳上羊背,直去相熟茶餐廳掃蛋撻(酥皮打半,椰撻半打),一手交錢,一手收貨(阿姐都入盒入得快,只係我太趕啫),打個電話俾人家講聲唔好意思,再駛返入公司.約兩點半停低隻羊,打俾人家,叫人家出黎門口接過蛋撻(因太多野,無手拎).人家上10樓,我就去七仔買支可樂飲黎等人家.

等咗唔夠半個鐘,人家就搞掂,可以鬆人.我地騎羊去建生食晏.送埋人家返屋企,我就急急返入村,再發江湖求救令(sms)黎刮隻win xp碟.由於太攰同未有回覆,所以訓陣先.期間收到回覆,更加安心訓多陣.

六點二左右出羊去山景搵棟哥攞啲野,,好耐無兜去佢屋企樓下,差啲唔記得係邊座樓.棟哥啱啱到樓下,我又剛剛同隻羊仔到達,我連匙都無熄過,接過棟哥隻碟,就放係羊仔既小儲物格,跟住就走人.

係屋企食過晚飯就開始工序,由大佬健操刀,我只係負責遞吓野,抺吓塵等雜務.上網搵條key都搞咗成個鐘咁滯,仲要有一個key generator話bbbbb bbbbb bbbbb bbbbb bbbbb係valid key,真係谷鬼氣.

搞完一輪,終於可以順利裝著win xp,係等待既期間,我騎羊出置樂買外賣宵夜俾人家.野食本體只係廿幾蚊,但個器皿要收一舊水按金,阿姐仲問"你渣電單車怕唔怕打瀉o架?",收銀大哥又問"你個避震掂唔掂o架?".返到公司,再打開袋野黎睇,又無打瀉喎,仲好靚仔添.人家見到當然開心啦~

兜返入村,沖個涼,入番啲野去ingram mk4度,三點至訓覺....仲諗住今晚可以早啲添..

ps: ingram係我電腦既名,mk3即係第三代,通常係收葺時經動到要換底板同cpu的話,就為之升一個grade.是次uprade 共用了$1820.......

係大假裡,卒之都清晒啲過期生日禮物lu,以後都係唔好咁遲至揀.

APM優惠日+區內游蕩

太耐無跑步,搞到尋日朝起身時好攰,於是訓到十二點至起身梳洗完執吓房,跟住就去接台灣女生放工.

一齊係人家樓下既名牌茶餐廳食過下午茶餐,上樓攞埋部nds(人家朝早返工著錯鞋,要換過對鞋),跟住就搭車去apm,行吓兼睇戲
對上個次出黎都好以係六月左右我同隻羊仔出去原廠check車兼補呔,我地先去戲院用指定信用卡買減十蚊既戲飛一張($45),再用我vip會員卡買張八五折飛($46),再係隔離既kubrick以會員價買咗副以cocktail調法為主題既防水啤牌(有我最愛既long island ice tea),下年泳季可以同人家玩lu.

跟知住又行咗去馬拉松買patella band,用優惠卡九折購入.開場前,繼續四圍行下,仲見到一條扭蛋機巷仔添,唔知香港水族館長啲定係佢長啲呢?

齣戲(穿prada的惡魔)就普通啦,好多話係名牌既衫褲鞋襪我都睇唔出係完場時係八點左右,係和民度要等五十張枱,唯有行多陣,再係鋪頭門口外既商場座位坐底玩nds既超級瑪莉奧兄弟黎解悶.入座後,我地又咁啱點夠$150,用信用咭寄黎既coupon免費換一杯$26既cocktail.哈哈繼續優惠.秋季新菜裡,鮮蠔野菜煱無咩特別,反而芝士煙肉丸子幾香口,但可惜煙肉好少,得幾條絲.坐我地隔離枱個對情侣好特別,男既無腰骨到,成個人"sir"晒落張蹬度,女既腳穿白色波鞋,上有個由數個透氣孔組成既細楷撩草b字(名牌A貨?);身穿粉紅色兼印有ANNA SUI字樣既t恤;手指帶住D&G字樣既介指.唔通佢係盛裝黎睇<穿prada的惡魔>?

食完飯我地就搭巴士返屋企,"o都",巴士綫有回程優惠喎~
今日起身後,都係繼續執房,去公司辦點事宜,就去咗置樂食單身漢餐,兼且睇吓老媽食唔食野,點知老媽話唔食,叫我幫佢看住鋪先,佢就出去行個轉買啲野.係相熟商場見過新出既patlabor可動figure,實睇無網上介紹既咁仔細,都係諗吓先買.本來想買多個diplay box黎放車仔,但已賣晒(唔知係咪俾我買晒呢?),要下星期至有貨.(老媽返鋪時,叫我車袋生豬肉同瓜菜返屋企.煲湯用喎,愛羊變咗係"買餸號")

 

人家既生日禮物已準備好,只欠包裝~今次唔會咁趕架啦!係屋企繼續執房,諗吓諗吓,又出羊仔去買多少少人家生日禮物既部件.

返到黎啱啱好開飯時間,老豆鎖完架單車,正在入門口.
食完飯,搭輕鐵去接人家放工,再徒步回家.係人家屋企坐到十一點至走人,去搵andrew,楝哥,大狗聚吓飲吓野.返到屋企都要近四點至訓覺,好耐無咁盡興lu.
ps:一出門口,老豆就問:"今晚出去飲酒呀?"原來佢見我唔攞頭盔同開定車warm up,仲話"唔落雨你點會唔渣車出去丫,除非係會飲酒啫" 醒目!叻仔!

秋風起,跑步期

今日卒之都好天啲啦,間中見到少少太陽.第一件事梗係同隻羊行個轉,run吓副引擎啦,咁啱台灣女生又差唔多時間返晏,於是騎羊去人家屋企樓下接上羊,兜去公司返工.

放低人家後,去置樂食單身漢餐,再係相熟商場行咗陣,買多兩個display盒仔黎擺電單車仔.騎羊返屋企,係咁咦抹下隻羊,見唔太似會短時間內落雨,加上自從上次泳池表現失準後都無運動過,於是換衫去跑步.

今次帶埋patella band黎跑,又真係無咁痛喎,下次買多個黎護埋另一隻腳先.路線依舊係由村口茶餐廳起跑,到洪水橋折返,以藍地輕站為終點,跑咗約廿五分鐘.呢條路線係我中五啱啱搬黎時就開始跑,返咗工至係運動場跑,而家個運動場搞維修,所以至用番最初期既路線,始終跑街辛苦啲嘛.

行返屋企時,正正係以前帶埋小朋友出輕站搭車後,自己返屋企既路,仲經過當年做補習老師既學校"屯門小學".呢間只得地下一層既小學,其實係我條村附近.中六個年係義工隊既阿頭(社工姐姐)穿針引線下,我就做咗呢間學校既課後補習班老師,由社署出糧俾我,當係打社署part time工.

當年一放學就搭車返屋企,趕入小學既操場,搵返個班補習班既同學,點好名,叫吓佢地企好啲,因為校長都幾惡吓(印象中係一個電攣頭髮兼中等身型既中年女子).

一輪訓勉後,各班隊都被老師帶走放學,唯獨是我個班要入返班房繼續上堂.呢班補習班由小一至小六組合而成,佢地都係大陸新移民,所以要補習黎適應番大圍既進度.其實我呢個阿sir個look幾唔掂,一黎著住套高中部既校服,揹住個書包,個樣又薯,髮型就更加唔好提.

我既工作就係睇住佢地做功課,佢地舉手,我就走埋去教佢點解同點做.仲好記得坐正係老師枱前既冬姑頭小一小妹妹,佢叫羅四妹,好多時都舉手問功課,每當叫佢諗吓,諗多陣,迫多幾迫,佢就好似想喊咁,頭擰擰話"唔識呀,唔明呀"跟住我就心軟,好啦啦,答案係....小妹妹寫低答案後,又繼續望住下一條題目.(威信積弱..)佢仲有個小五既阿哥叫"羅廣勝",成日流鼻水,比阿妹更懶散.

遇到壞份子時,我會要佢罰企,再搞事就企出課室門口,報串俾校長知.如果學生做晒功課,就要連埋手册攞出黎我老師枱,俾我批閱,無問題就自修.如果見有同類題目有幾個同學舉手問過,我就會係黑板上講解一次,等大家溫故知新.試過一次我奬勵啲好表現或有進步既同學,我問佢地想要小文具定係零食,之後係下一當堂時送俾佢地.

放學時,我要幫手帶隊,一部份過咗學校斑馬線就離隊,其餘既就跟我行到藍地輕鐵站至各自去兩邊月台搭車,我揮完手,就沿路行返入村返屋企,顧返自己壇書....

跑完步,沖個涼,係屋企一家四口食埋個飯(大佬健又"食老虎",好似日日都放大假咁),再騎羊去黃金海岸拎份過期生日禮物俾師傅.我停咗隻羊係七仔對開的士站隊尾,交收完仲傾多咗幾句.師傅都係放咗工,啱啱到佢屋企樓下既黃金同女友食飯.之後好趕咁同羊仔返公司接人家放工,再去建生既仙桃園飲杯野,我當然係獨孤一味飲薄荷奶茶啦.由我係trainingyr2開始,同親屯宿之男一齊出黎度食野都係飲呢杯.試過一次,一名兄弟笑我"古有哪叱削肉還父,削骨還母,今有猷哥削精還女".大假咁又去咗一半lu....

ps:唔知班學生仲記唔記得我呢?

雨中感嘆號

假落雨都算啦,仲要打埋風添,又要困係室內....想同隻羊仔運動下都唔得,你睇吓佢俾雨淋到布冚都透晒.以前細個好鐘意落雨,因為涼啲又可以著雨褸玩水氹.人大咗就唔太鐘意成日落雨,因為唔可以跑步,游水,渣電單車,出街又唔方便,洗咗既衫又晾極都唔乾,成日困係屋企又悶...原來細個成日都係俾老媽困係屋度先至會覺得落雨無咁悶同對自己無影響.

因大風大雨,同台灣女生原定既市區睇戲方案終告取消. 落雨最好就係係屋企打機,點知大佬健又玩"食老虎",又係廳度打x box360既bullet witch,咁唯有番入自己藍天行動既工地繼續工程...

兩點幾,大佬健話好肚餓,一齊出去村口茶餐廳食下午茶,中途見到架MR2好型,唔知係唔係極速傳說over rev主角既戰車呢?

下午茶個雞翼薯條讓咗一隻雞翼俾大佬健,因為自己胃口麻麻地(可能尋晚同人家去打邊爐食得太飽).食完野執陣房,就出去醫院ACC幫老豆攞藥,同將幾件唔會再著既舊衫(房間藍天行動之副產品)放低係PI對出既回收箱裡,再係市中心會台灣女生,一齊過置樂買師父份過期生日禮物,同安置我啲幪面超人電單車既display box,仲好好彩咁搵到之前係市中心被扭罄既NDS超級瑪莉奧touch pen,一套六支筆頭有無敵星,變大磨姑,磚塊,火神花花,金幣同寶物箱,人家見到咁得意當然開心.

買埋vcd就上人家屋企食飯,食完飯就睇<舞出色>vcd,一般啦~之後打多陣nds就搭輕鐵返自己屋企lu.

房間藍天行動第二波

難得放大假,竟然日日都落雨,唯有係屋企進行房間藍天行動啦~同上次一樣,扔咗好多野,其中包括呢部當年用$997買返黎既wonder swan colour(ban dai廠出品).呢部機個mon係唔會發光,一定要係足夠燈光下至可以望得到個畫面,我記得係yr3時買既.個陣時我上堂時都成日打架,玩<機械人大戰>嘛.
仲記得break時,同班無聊同組同學成日都話要開會傾進度,大家自己個part做成點.大佬呀,一日就review,迫得咁緊?但人人都開會,無埋由唔出席,唯有邊坐係度,邊打<機械人大戰>囉,我都好尊重大會,無開聲打o架.karen靜靜叫我唔好打,我都無點理,真係好無聊嘛,做個老人中心日間活動之嘛,洗唔洗開會講埋帶幾多個膠袋咁誇張?

希望呢個大假裡,希望我會執得好間房啦.始終間房太細,好難將咁多野好好咁安置.每次執野都令我諗返之前既事,人係善忘的,所以我好著意用日記去留低回憶既綫索.

初中時我都有寫過一本日記,入面有好多無聊野,唔睇返都唔會有印象.個陣時啲字好睇過而家o架(真係講你都唔信).基於我寫字慢,又無咩耐性,之後再無寫lu.我都係舊年九月中秋至開始係網上寫日記,貪佢唔洗寫字,我打打打打~~~~(北斗之拳風格)就可以整整齊齊咁睇返.

最近睇咗齣戲<命運自選台>click,裡面講出人生經歷既點滴同回憶係最寶貴,為免我唔記得睇過既卡通片,我試下記得佢先.
天威勇士+續集,長腿叔叔,反斗三宝,叮噹,IQ慱士,機甲桃太郎,魔神英雄傳+續集,Q太郎,超音戰士,宇宙騎士+續集,高智能方程式+11+zero+saga+sin,勇者王+final,功夫貓黨,卡新+ova,神勇飛鷹俠+ova,忍者小靈精,小双俠,小飛俠peter pan,神奇小子,鐵拳浪子,抵死泰山,深山太保,超獸機神,超時空要塞+plus,超時空世紀,機甲創世紀,蜘蛛俠,蝙蝠俠,新三一萬能俠,真三一萬能俠,變形金剛+續集+頭領戰士,聖鬪士星矢,魔動王,機動警察,高達z+f91+0083+機動武鬪G+WING+SEED,絕對無敵-獅人鳳,熱血最強,機械忍者-飛影,六神合體,虎威戰士,HE-MAN,魔法小金毛-加旋,唐老鴨-史高治,咖啡貓,KIM IMPOSSIBLE,鋼之鍊金術師,史廸仔,獅子王,天空之城 ,風之谷,千與千尋,幽靈公主,哈爾移動城堡,龍珠(至第二屆武林大會),電腦戰士,鐵甲小保,A子計劃,銀河烈風,我係小忌廉,橙路,touch,魔法天使麻美,美少女戰士,perfect blue,四驅小子,天空之艾斯方利亞,幽遊白書,銀河戰國群雄傳,赤光彈支利安,相聚一刻,腊筆小新,伙頭智多星,俏皮扮野貓,宇宙大帝,足球小將,鬼馬砵砵車,金剛戰神,十五機合一,童夢,未來警察,筋肉人,太空牛仔,.無敵三四郎-柔王丸,男兒當入樽,鎧甲聖鬥士,貓之眼....(記唔起,記得先再加上去啦)

PS:今日係屋企煮咗個麵俾人家食(A更放工),材料有出前一丁,約半隻斬件燒雞(尋晚同老豆係明星有剩打包的),同菜心數條(尋晚老媽買返黎但因唔舒服而無煮到).好在咁耐無煮都無搞到厨房火燭~

父子日

於尋日返工前愛羊死火,要第三次撻車至掂,於是今朝早起身,騎羊到大角咀換機油同火咀.今日好鬼大風,係汀九橋時,見有告示牌話"強風!小心駕駛.,果然唔係講笑,隻羊被吹到偏埋一邊黎行,我急急收一收油,減慢羊速,專心俢正航道.全程出入都係大風,比之前夏天行車較辛苦同無咁定,如果係之前個架羊仔一定會攰好多,因要成個人壓住把手黎得隻羊定啲.

係安定逗留咗半個鐘左右就攞返隻羊走,只係換咗火咀同機油,啲師傅仔問佢咩都話唔知,無咩信心可言,下次都係返原廠搞,唔好貪方便唔book期.本人同台灣女生懷疑係機油火咀到期之外,天氣轉涼(同之前差成八度),engine需要多啲時間wam up到工作溫度.唯有試下開車前煲耐啲至走人,睇吓係咩真係咁既原故.
返到屋企就洗衫,都積咗好耐無洗,一係無時間, 一係唔好天.洗完之後,好趕好趕上的士去新墟同老豆睇戲"狂野極速:飄移東京",點知司機聽錯以為我去綠怡居,我話卓爾居架嘛,搞到係藍地至發現同掉頭.落車時個標跳到三十五蚊,司機叫我俾返平日既價錢就好了,但我答佢唔知應該幾多,於是佢只係收我廿蚊,仲話唔好意思.

兩點三到達"巴倫紐荷"戲院買兩點四既戲飛,入場十二人左右(老豆中途去完厠所,行番黎時數的).齣戲都幾ok既,最好睇係地下賽車聚集地有好多女仔同尾段主角同佢半債主關係既朋友一齊係鬧市飛車著草避仇家.

老豆放咗幾日假,又話悶,所以咪同佢老人家黎睇場戲,得佢唔好成日屈係屋企.睇完戲,我地又去咗上次睇完"超人"落腳既茶餐廳食下午茶(我:雞脾薯條=凍奶茶,老豆:吉列豬扒+熱鴛鴦,奶油多係一齊分黎食),兩父子up三up四.

跟住一齊行去市中心吉之島十蚊城搵電話套,但已賣晒lu.老豆搭輕鐵返屋企,而我就係市中心同置樂買啲野.

行到好鬼攰,近七點時諗住搭小巴返屋企之際,老豆打黎話老媽唔舒服無煮飯,佢出黎市中心同我一齊食,於是我又係市中心繼續遊蕩多半個鐘,至係明星同老豆食晚飯.

返企放低啲野,墊埋個背囊,就騎羊去接人家放工,再去置樂食豆腐花,今次又無咩燶味喎~人家仲食咗個唔太好食既"好好味雞翼".跟住我地仲叫咗個外賣"肆波"(生果配大菜糕)拎返上ward,順道俾番啲野小歌仔同星陳.之後送人家返屋企,再返公司更衣室俾埋份生日禮物俾前輩.


ps:積落己又未經發放既生日禮物,只剩下一份咋~人家話係我形住隻羊仲係唔妥,搵日叫德輝試吓係咪先~

第一次

今日訓得晏(十二點十個字),起身梳洗後,就"陸"個杯麵黎食,呢個亦係我人生中食第一個杯麵既牌子同味道.

以前細個要到中一至有零用錢,兼係唔太多(一星期廿蚊),儲得黎買玩具模型,都唔太夠買零食.第一次食杯麵係我中四升中五既暑假,同成班同學仔去宿營時,有一個同學仔落山買咗一堆糧食上黎包括數個杯麵.個時我覺得好好食,好似人間美食咁,其實只係可能我第一次接觸咁大劑量既味精啫.

仲記得個次宿營係我第一次宿營,小六個年唔知點解,一年一度校方專為小六班而搞既"宣道會宿營"(唔知有無記錯個名)突然取消!升到中一遇到既宿營,只係為prefect同學而設,我諗係老師搞團隊兼領導教授卦咁又無得去.要至到升中五既暑假至有機會去宿營.

我仲好記得個次我係病住去,帶埋私家醫生既藥去食,成程都係度同流鼻水,打乞嚏,喉嚨痛.為咗可以順利去camp,我幾唔舒服都同老媽子講無野,食咗藥好啲.好多時同學仔玩時,我都係頂唔順要係房度訓,只係有一晚玩鋤大d玩得比較夜,但我都係訓先,訓醒時見好多同學仔訓係我隔離(因我地將幾張床拍埋一齊),有少少人叠人咁.

每一日都有老師黎睇住我地(要有成年人至可以bookcamp),有bio嚴sir,中文兼班主任羅月興老師,同身兼多職既數學+附加數科肥老黎.肥老黎仲帶埋個仔黎(小學生),放低個仔俾我地睇(美其名就係一齊玩uno,仲要係唔識玩,亂咁出牌),而佢就去咗篤枱波.....

之後再去camp就係中五升中六暑假一班義工去玩.讀書時代最後一次camp就係預科bio field trip lu(我記得我地捉到隻香港樹蛙,俾tutor話我地係hunter,攞得太多sample喎)

人大咗,食多咗,而家只會係趕時間又怕肚餓,或者係落雨絲濕唔想出街至會食杯麵,始終正餐飽肚啲同正氣啲嘛~


ps:每逄食呢款杯麵,都諗想中四五係崇真書院好開心既校園生活~

sleeping點過?

返完夜班,直接騎返屋企訓.訓到十二點鐘就醒咗,見咁好太陽,於是開檔抺羊打腊.本來以前都係keep住7-10日就進行一次清洗打腊工序,但好多時都因為天雨同太忙既關係,搞到有時要兩個星期至做到一次.

抺羊除咗可以令佢乾淨靚仔外,更可以了解佢平日既勞損,如車身邊忽花咗,前叉有無漏油,車胎有無食釘...從而反省自己既駕駛手法,增進拍檔之間既感情~~.最嚇人既一次就係發現前羊既尾碟有一條由外邊延至中心既大斷裂(成架電單車最堅硬既部件之一都會爛成咁?),令原本呈O形既碟變成C形既開口碟.個次拎返去原厰搞,免費換過隻新尾碟,之後無耐就收到原厰寄黎既信話我個款羊仔要回收,原廠免費更換尾胞魚,同尾擔架.原來係出廠有defect呀!!!可想而知,抺車幾咁重要呢~平日既保養,係可以減低意外既出現~

搞完清洗打腊工序後,沖個涼就出門騎羊去接台灣女生放工,兼且食遲來的午餐.送埋人家上樓,我就返屋企訓多陣(因頭暈暈),再駕羊出去採購紀念禮物既組件,但可惜都係買唔齊,弊..

夜晚係屋企同老豆,老媽子食飯,老媽子煮完無食,叫我同老豆食,我入厨房問"你無咩野嘛?唔係隻腳痛到食唔落野呀嗎?"老媽子答唔係,只係佢之前食咗啲野啫.於是我就返出客廳同老豆食飯.
食完飯,又騎羊出去收集禮物組件,距離完成階段又近一步啦.入返村放低啲物資,再攞返1-9期既聖鬪士星失G漫畫借俾教練,同隻羊仔入天水圍交書.其實呢套漫畫頭兩三期係教練相贈既,事原係佢細佬買咗頭兩三期之後就要去外國讀書,後繼無人,而我又問佢借黎睇過,覺得ok呀,於是教練就話送俾我,等我自己儲埋剩餘既期數.

回桯時特登追牌兜去濕地公園出面停低隻羊望吓,原來係開十至五o架咋.騎住羊四圍去既感覺太好了,夏天都係夜晚行車無咁熱(最好加多啲星星同明亮既月色啦)~

是日夜班

今朝早五點鐘就俾一個巨電轟醒咗,連電風扇都停埋,咁咪即係跳制停電?我同老豆係房門口既走廊相會,我手持強勁LED電筒(大健買PS 2 BIOHARZAD 4 送的贈品),而佢就拎住支弱雞燈泡仔電筒.一比之下,老豆攞咗我支電筒去厨房試吓打唔打得著個制,但都係唔得,要出門口打著番房外既大制至掂.好在老豆手腳快,如果唔係就要淋雨,因為佢返黎無耐就開始倒水.
係張床度,碌黎碌去都訓唔返著,可能係大雷大雨既聲音所致.本來諗住要搭小巴,但出間時又停咗雨喎,於是照騎羊返工!無咩精神咁返早班,但都幾忙吓,加下自己都未好得晒,所以臨收工時腳仔軟潻...

放工時又好好彩咁無落雨,於是照平時咁駕羊去市中心食單身漢餐,再買魚生做宵夜.
夜晚因為咁啱多同事落夜,好易做晒啲野,但收客仔就有八個.兩點一過,卓敏就入厨房整野食,但搞咗好耐(唔通食早餐?),成半個幾鐘至推車仔出黎開餐...由於老媽無咩心機煮晚飯,所以我都唔係飽住個肚黎開工,好需要食宵夜!

令人期待既葡汁四蔬,原來有少少辣同咖哩味重,撈極都係兩蔬,因剩低既兩蔬係制作其間被煲爛咗,做埋個汁底.咁大個仔未試過返夜食蜆,仲要係咁大隻添,感動!(點睇都唔係福壽螺,唔洗驚)
好多謝準備膳食既RONNIE,"星陳",群姐,ESTHER.做細佬兼且多人返夜真盞鬼~

分享

歌詞

受了點傷
曲：Gi Hun Lim/Jun Young Choi/Gyung Moon Ham
詞：施人誠

My love,晚安 就別再為難 別管我會受傷
想開 體諒 我已經習慣 不然又能怎樣？

這個城市太會說謊 愛情只是昂貴的櫥窗
沿路華麗燦爛 陳列甜美幻象 誰當真誰就上當

竟然以為你會不一樣 但憑什麼你要不一樣
因為寂寞太冷 虛構出的溫暖 沒理由能撐到天亮

前進 轉彎 我跌跌撞撞 在這迷宮打轉
死心 失望 會比較簡單 卻又心有不甘

這個城市太會偽裝 愛情就像霓虹燈一樣
誰離開之後 卻把燈忘了關 讓夢做得太輝煌

以為能夠留你在身旁 但是誰肯留在誰身旁
一首情歌都比一個親吻更長 這就叫做好聚好散

別說你對我感到愧疚 別說你會永遠想念我
我很知道孤單這條路怎麼走 請你不要安慰我

My love,晚安 別放在心上
我只受了點傷 只是受了點傷


ps:電單車歐洲旅行

http://www.kenandtoni.com/太正了!

power down!

炎炎夏日,忙碌工作,輪班八年,身心都已經好疲乏.諗住返完早班去游水做個健康都市人,點知游到第四個來回,開始噎親飲水,無理由愈游愈衰o架?噎親飲水情況持續出現,仲四肢無力,移動力同輸出力直線下降,夾水起身都無力,透氣淺速,心知不妙...於是係完成第八個來回後就放棄訓練,上水休息同沖涼走人.

應該係呢排太攰,訓得又唔好,有啲作病咁,搞到今日咁不濟.其實有諗過尋日sickleave抖下,但臨返工都ok所以至照返,今日返a又都係咁上下,無話頭重重,咪又繼續返囉,仲以為無事添.騎羊到置樂食單身漢餐,行陣相熟商場,配埋車匙電池就返入村,開冷氣訓覺療傷.

訓到七點多啲,台灣女生打黎,我都係仲訓緊,約八點再call醒我.之後醒咗call返人家係市中心元氣等,騎羊好快就到,但人家仲早過我係度排緊隊(失職x1),等咗半個鐘至有位入座.

大家既胃口都麻麻地,之後係吉之島行多陣,仲撞到崇真書友 oscar添.原來佢同媽媽,家姐一齊出黎食飯行吓.之後我駕羊送人家返上樓,自己再俾油上路返屋企.今日真係好"謝",年紀大,真係要多啲保養身子...

ps:令人疲憊既工作戰同煩鎖既事情,已開始影響我同人家悠閒既氣氛,多啲假就好咯~

歡送

又有一位同事要被調走了,所以歡送大會巳經接受報名.本人一直以黎都會出席大圍活動,更何況今次係歡送兄弟!

大力係一個好直同真誠既男仔,由佢初黎報到,到而家同撈同煲,真係有好多搞笑野.基於學識有限,所以只能將自己既經驗同佢分享.有一個阿姐(好姐)話我唔係好似做呢行,無耐性同無夠細心眼,其實我都幾認同吓.各人都有自己既所長,我係紀念冊上,寫住"相信自己既能力追隨自既感覺",後生仔跌低咗,咪再起番身囉.我相信大力係新既崗位,定能勝任!

大家一齊同大力呢位伙伴玩個夠,影相影爆咭啦~


ps:同行或同輩之間亙相扶持同幫助係一件重要又美好既人生元素,缺乏了的話,橫面既空間就會變得孤單.