零六年第一口月餅

今朝起身,見廳有月餅係枱度,於是心血來潮,入厨房攞把刀仔黎切開四份.我本人唔係太好月餅,都係有咪食吓囉,始終都係高能量兼高膽固醇食品嘛~

以前細個時,好多時老豆係鐵倉公司(源興)攞盒月餅返屋企,公司送俾員工過節(好多時都係美心).四份之一個月餅,加杯可樂,咁就係一個經典中秋應節早餐啦~

好多時個罐都係留番黎煲腊用,老豆老媽好興中秋節搵埋市中心姑媽一齊去燒野食,食到咁上下我就同大佬去玩火,玩吓玩吓會同埋其他唔識既小朋友一齊玩.

隨住老豆轉咗去萬昌,再轉行去做保安,再無公司送月餅呢樣野lu,但每次見到啲傳統月餅時,都會諗起老豆老媽後生時無咩病痛,要昂高個頭至望到既模樣,同埋一家人去燒野食既感覺.