瘋狂購物十二小時

今朝原本約台灣女生係市中心263巴士站等,但由於人家遲咗出門,所以我係河田站落車,打住NDS黎等人家,係新墟既263巴士總站搭車向沙田出發.

其實今日既任務係購買新居既傢俱,主力係IKEA,因為我地係本catalog睇中咗好幾件大型傢俬.十點半左右,我地就落車,見@home自我家啱啱開閘,於入去望吓.門口有張橙色三座位連貴妃椅梳化好靚,價錢又合理(特價三千幾,原價五千有多).一坐落去,嘩~好舒服.我個人咁高,但"艾"落去時個梳化背兜住個後尾枕~跟住去睇埋其他梳化同傢俱,但都無咩睇啱.

渣住本catalog行IKEA,一方面搵mark咗既產品,一方面睇吓有無其他啱用既傢俱.有個阿姐走埋去人家,手指住一件家俬黎詢問,人家答佢唔係呢度做野.可能係人家手拎住本catalog同筆掛?

人家見到啲家俱好似好興奮咁,一見靚就走埋去,有好幾件都係我話唔啱新屋用同實用.好似趕鴨仔咁催人家行去睇其他野,你知沙田間ikea幾大架啦...(行去厠所,再去搵番人家都要一段時間)行完上層,泊好購物車,坐低係餐廳食少少野,選擇真係少,夾野食既厨部哥仔又串(我叫錯咗茄醬意粉做肉醬茄意啫)

食完野,行埋個下層,人家話我黑面,因為要諗太多野同計尺寸size,好頭痛,我最怕計數o架嘛~加上又要看住成個大細路既人家,又要睇住時間,好在人家都無明白我怕數字同無嬲我啫.

最終我地要用兩架購物車黎裝現貨(五千幾),再去去訂傢俱(三千幾).現貨最貴係窗簾同窗簾架,但無法啦~由於太多現貨,兩個人根本攞唔到,加上窗簾架同衣架又"雅炸",所以加少少錢送貨.本來諗住自己砌櫃同傢俱黎慳番啲錢,但當人家問師傅安裝要幾耐,IKEA哥仔話都要兩個鐘(我當堂呆咗).人地有晒架生兼熟手都要兩個鐘,咁我地兩條寒友咪搞成日都唔掂?結果大家一致通過,俾多一成做安裝費.

碌完咭,只係用背囊裝住幾隻玻璃杯,兩手fingfing咁買熱狗餐食,一人拎住一隻熱狗,一杯汽水.跟住行番落去@home自我家訂梳化,點知話無現貨,要一個月至送到貨.我地問陳例品賣唔賣,哥仔話唔賣,無法子,唯有等一個月啦...臨走前都坐多一次,真係幾舒服.

搭番車入屯門,本來諗住買定啲清潔用品,黎拎入新居,但人家望到吉之島傢俬部對面有床上用品特價展仲要係最後一日添,於是我地變陣去買特價被鋪先.買咗張100%純羊毛厚被,再係雅芳亭買咗兩套婚嫁系列,抵平時特價~~

跟住我地就一袋二袋咁上的士上人家屋企食飯,坐吓回吓氣.咁都未完架,再落樓下日本城買地拖掃把水桶手套等清潔用具,上樓放低,再搭輕鐵去市中心買多套雅芳亭被單(伯母都話抵嘛~)
我地再去埋隔離睇埋個晾衫架,雖然睇中個平平地,但好似有啲唔穏陣,問職員阿姐至知呢款唔可以晾濕衫,會起锈同唔夠力,叫我地去另一邊家居用品部睇.最後買咗個兩百幾三百蚊既摺合式晾衫架,好鬼大盒....(楝高到我心口)買完晾衫架,起程去輕鐵站時,望吓錶,嘩,十點幾,除咗食飯搭車,咁又買咗十二個鐘頭野......

本來諗住出IKEA一晝,晏晝番入屯門買清潔用品,入新居抺吓野,但而家要聽日至一次過搞清潔了,人家孭住袋工衣同毛巾都無用武之地,得個"孭"字,早知就唔拎啦~

添家電

今日番完個早更,急急騎羊去市中心會台灣女生同伯母,點知相熟泊車位有PC係度做緊野,所以要繞道去另一個相相熟位置安放愛羊.

由於人家趕住要上堂,所以我無食晏就同人家兩母女一齊去睇電器.之前人家係都話第時要買部panasonic雪櫃,今次係best師奶sales同我地講樂聲個摩打好過其他廠.見有一級能源標籤,又有折,人家又鍾意,所以決定買~

我同人家係中原睇中咗部特價hitachi plasma電視,今日都仲做緊promotion.第一位sales哥仔話貴啲個款好啲又送個20吋LCD電視,但係後黎再入去買時又話原本個model好啲同夠用,貴啲既model係無LCD電視送,要最貴個款至有,有都係TCL既LCD電視,於是維持原判買最初想要個款~

之前同人家係吉之島既電器部睇中部金章牌洗衣機(因特價又係名廠歐洲品牌),但係sale阿姐話500轉可能唔係好夠用(五成乾),唔問都唔知原來平時既半自動洗衣機"fing"完既衫係八成乾

 .考慮過後,我地補錢買咗個900轉既THOMAS洗衣機.(標榜45分鐘洗一機衫,洗出黎既衫有A級潔淨效果)

好趕好趕咁去實惠睇床,諗過度過都係擺唔落五呎床,除非擺係近馬路個間大房(但會嘈啲嘛),4呎半床都要兩千幾....於是暫時唔買住,人家去搭車上堂先,我就去配匙再騎羊去置樂食粉仔,入新居再度位.

約咗人家上完堂番入屯門係市中心一齊去吉之島傢俱部睇床,點知有平野執,二千頭就有四呎半油壓床,配金美夢獨立袋裝彈簧床褥(試過又幾軟同舒服,仲要送床墊兼兩個太空枕~)都係五千,但就要聽日再黎落單.因為姐仔好好人,話聽日係再有吉之島特價九五折,所以我地就等聽日至黎多次買,折上折嘛~去埋隔離睇衣櫃,睇中一個掛衫櫃同一個放摺衫既抽屜櫃,呢個阿姐又好好人咁叫我地後日至黎買,因為三月會有折扣,而家係正價,番屋企度清楚都未遲,哈哈,今日我地真係出門遇貴人

九點幾,同人家搭輕鐵去大戶人家打邊爐做晚餐,$120有找,食到飽飽.呢幾日係IKEA既catalog睇中啲產品,聽日朝就要去沙田為新居選購其他家俬lu

ps:係吉之島睇床時,我將配好既新居鎖匙交俾人家,人家半開玩笑咁話我無誠意,無用絲帶綁位條匙.又係既,呢排太多野搞,同屋企又內亂,自己都比之前少咗啲心思........

全民皆股?

今朝早去新屯市搞銀行野,排隊時見好多人圍住電腦mon,你一句我一句咁講大市走向.工作地方都好多同事有買新股,搞吓投資,唔通真係全民皆股?

騎羊去番市中心另一間銀行,好在唔係太多人排隊,好趕咁走去麥記食番個餐,跟住就騎羊番晏晝更lu.近黎太多煩擾,都無咩時間去投資吓健康添~ 

新居lock on

今日起身急急騎羊去台灣女生屋企,食過自取既外賣魚旦河,就同人家落樓.人家行去"禁"錢,我訧騎羊去櫃員機附近接人家去新居同業主簽約.

我地係路口燈位停低時見到agent師奶,佢見我地坐電單車,就示意佢自己行入去先.放低隻羊係新居門口,等咗陣就見一架七人車駛到門外,原來業主係一位老伯伯,代言人係佢老婆,司機係佢地既女.

婆婆好搞笑,係咁同我地介紹點用水龍頭,熱水爐,擺床....又話佢好鍾意個客廳夠大.....伯伯有啲撞聾,要戴兩部耳聾機(婆婆笑佢戴兩部都唔係好聽得真),但就好矯健,自己踩單車黎新居.伯伯好神化,唔知佢點解將張租約扔咗係門外,可能係佢拎住張約出門外搵我地時跌咗都唔知(當時婆婆帶我地出去睇晒晾位同泊電單車位)

簽完約,伯伯幫我地試晒全屋既鎖匙,大門個條就要遲啲至補番,我懷疑係住係一樓同二樓既屋企人攞晒但又無配spare.交埋上期按金,agent師奶收過我地既agent費同婆婆既茶錢,交收完成~

我地係度咗少少位,跟住就行出輕鐵站,搭車入元朗,係大會堂join埋大隊一齊行入欖口村食盆菜(都真係幾入吓).貞貞留咗兩張枱同我地一齊食,開席前有新年好意頭既"特備節目",在場助興既live band係舊年國慶盆菜個班,連啲歌都係差唔多,個豆皮姐姐依舊落台邊唱邊搵人影相,我地呢枱都不能幸免,大力,德輝,我.......

我同台灣女生走先,因為人家要番夜,我地行番去輕鐵站都用咗四個字時間.搭車去番新居,騎羊送人家番屋企攞night food,再送人家番工.

新居愈睇愈好,只係隔離有狗吠,同埋近馬路,大車經過時嘈少少,希望可以快啲set up好新居,過番啲安樂日子啦~

搵屋

番完夜班,訓到一點鐘就俾電話鬧鐘叫醒.梳洗完就搭小巴去兆康,行去輕鐵站會台灣女生.上商場既富景物業代理搵agent睇租盤,個位劉先生好似有啲SOB,stridor咁.坐佢車先去青磚圍睇綠宝闊,好殘,但都收四千幾,無野丫嘛?

跟住車我地去睇鍾屋村,都係殘同要四千五,又只係好過第一間少少咋喎..跟住又睇埋藍地大街附近既村屋.嘩,又多狗又入,真係好鬼唔掂.劉生叫我地睇埋聚康山莊,於是係劉金龍對出停低,等同事交鎖匙俾佢,再兜一兜上西鐵站分店,再車我地去睇聚康.係就係好靚同包洗衣機雪櫃,但就係細啲囉,五百幾呎,收五千三蚊租(低層)同五千五蚊租(高層).

係兆康簽番啲文件,急急腳打啲去另一個村見另一個agent(天時物業).呢個agent係我叫人家問ben弟攞既,佢介紹一個原居民出租既盤,700呎,地下,無落地玻璃同花園騎樓,全新裝修,無人住過,四千五蚊.我同人家都好鍾意,但弊在擔心人家出入.agent阿姐收咗$30車馬費就走.

我地行番去輕鐵站搭車去睇翠林同大興花園,美聯姐仔帶我地上去睇咗兩個盤,但都覺得好殘同要成四千蚊,加下大家都中晒之前個村屋盤既毒.係鋪頭簽文件時,被問到做咩工時,我胡扯話係隔離工廠區做office,同人家係唔同部門.

同人家行去搭輕鐵時,人家都話中間個agent介紹既村屋好吸引,於是打俾agent問吓可否平到四千三租.我地係市中心排籌食北海活壽司,agent話可以傾到四千三,但要盡快簽約交上期按金兼起租(8號),於是我覆佢話聽日晏晝三點簽約.新居事宜又好戲劇性地好快咁又有心水地方,傾好咗,下一步就係傢俱電器了~~

啞子食黃蓮

今日要a/n,中間時間去咗市中心食單身漢餐後,就番入村訓覺,訓到七點半起身.

今晚契媽同契爺黎食飯,我梳洗完後出客廳,老媽問我係唔係度食,我話唔係.同契媽契爺打招呼,契媽話知道我今年結婚,仲問我幾時好日.子.我答六月係關島旅行結婚,契媽唔知係聽唔真定係以為自己聽錯,話聽唔清楚黎問多次.我重覆多一次,契媽無問點解,只係話"好丫,今年金豬年好多人結婚"跟住我就騎羊去買宵夜,再番夜班.

其實我真係好想答契媽,"老媽打老豆,又成日話老豆出面有女人,但又無證無據,我好怕擺酒個日老媽又會失控打老豆,所以咪唯有唔請親戚擺酒囉,其實我都真係好想同你影張相o家"

講咗出黎只係令在場既老豆難堪,同埋俾大佬健插我處理得唔好....好想搵日去契媽番工間鋪度,同契媽講明一齊,再搵日約埋人家一齊飲餐茶,好讓內心好過一點.

ps:今晚買宵夜時買咗五碗楊枝金露,其實得四個人番night,睇黎呢排我真係好攰..

晚間拜年

今日番更,師傅打我手提傾計,又問我放工食唔食啲野,但我又係canteen食咗飯,於是約十點半係佢屋企樓下等,上佢屋企坐吓傾吓.

放工見仲有時間,搭輕鐵入村放低啲野,再騎羊去建生既7仔或OK買啲野當拜年.十點多啲,萬寧竟然仲未收,於是走入去揀貨,最後俾我揀咗盒lindt既薄片朱古力(萬寧果然係多啲選擇)

騎羊去愛琴海岸,放低隻羊就自己摸上門.師母開門歡迎,一輪恭喜發財,就入廳坐低.同師傅師母講晒呢排發生既事,大家都覺得大佬同老媽都有問題,最緊要係老豆肯走出個困局.

師母又沖蜜糖水又叮點心俾我食,真係感動,傾吓傾吓,成點鐘至走人.臨走時至記得背囊有盒朱古力,拿拿林攞出黎

同師傅師母傾完感覺到多一分支持同認同,起碼我知道我既做法無走錯方向.

勇者

今日番完個早更,大佬健叫我一齊出村口茶餐廳食下午茶,心知不妙,但都照去.坐低無耐,佢問我尋晚係咪同老媽講咗唔搞擺酒,我話係,叫老媽唔洗搵親戚同幫我搵租盤,我自己經地產搞.大佬健問我咁啲訂金點搞?我話我會自己搞,當食餐飯局.

我同大佬健講尋晚老豆食飯時話點開心,又唔想報警同搵社工,點解唔太想由佢提出離婚.我話我搬出黎之後,等老豆同老母分房訓囉,跟住佢就問係咪老豆訓我間房就ok,我話點都好過啲,但老母繼續咁對老豆,老豆點都係唔開心o架啦.

大佬健一句"咁你搬出黎同老豆住囉"

我聽到個吓好愕然,我問佢"我結婚喎"

佢答"邊個話結婚唔可以多個人住?"

我好慶咁話"我話"

佢又好妙咁答"係囉,你話之嘛"

我好火咁答"你屈我呀!"

跟住大佬健一輪咀咁x我係咪石頭爆出黎o架?屋企有事就走出去就算,又話我"盆pair"我話點解唔租個地方俾老豆住,佢又答一個人住好過癮呀?

我問番佢點解係我出黎住,佢話因為我結婚,佢未,我問佢係咪第時結婚會同老媽住時,佢無答.

我話我做咩都係啱o架啦,搞擺酒係咁,屋企兩老係咁,報警又唔好,永遠係佢處理得最好.我而家咩都唔理,又話我好唔理同"盆啤".我根本睇唔出佢有咩誠意去一齊頂呢個擔子.其實大佬健根本唔知屋企有好多家務都係老豆做,好似抺地,換床單,洗碗碟,偶而掠衫咁..佢連家務都無幫手做過,老豆平時係屋企做啲咩又唔知,憑咩咁大聲講野.老豆放假時,都係一個人出去食野,同係係屋企搞清潔,除咗晚頭睇住老媽面色咁食飯外,佢同一個住有咩分別,你又有幾多時間陪老豆食飯?

而家唔係話夾錢租個地方出黎,大家輪流去睇老豆,而係要我一個人去照顧老豆.我覺得咁對台灣女生同伯母都唔公平.伯母有血壓高又無老伴,就要一個人住公屋,無依無靠,而台灣女生就要照顧埋我老豆一齊住,照道理,人家都可以叫埋伯母同我地一齊住,咁我係咪要睇兩個老人家,一個女人?老媽見我帶走老豆,我只會做衰人,麻煩只會向我同老豆繼續逼來.

大佬健就可以一個人好安靜咁係屋企繼續享用酒店式服務,有人洗衫煮飯,大客廳享用佢自購既天堂,打機配5.1音效系統,大電視,dvd機,fit ball,健生啞鈴.得閒帶女友番黎溫馨吓,食吓親子飯局.

我好嬲咁答大佬"你話我"盆啤"咪"盆啤"囉",大佬健拍杯拍枱咁話"搬啦搬啦,以後啲野唔x你理!"跟住就攞張單去找數,跟住就走先.

夜晚同崇真書友一齊打邊爐邊食邊傾,都覺得大佬健係有啲私心,做大佬既理應一齊分擔,加上呢件事係老豆同老媽之間既事,係要佢地面對黎解決.

番到屋企,大佬健好平靜咁話我知枱頭有阿婆俾既利是,仲有台灣女生既份兒,無講他其野,就繼續係客廳砌電腦,真係唔知佢諗咩.一家人好似爾虞我詐咁,真係不是味兒...

ps:真係要有合金般既意志同無比既勇氣至可以係屹立於這片土地

老頭子

(昔日老豆既笶臉已不復再)

今日約咗老豆係市中心茶餐廳食晚飯,傾到屋企事,老豆都係唔想報警,仲話如果社工打黎就推咗佢就算.

老豆話唔想提出離婚,令願係老媽提出,可能係佢唔想做衰人卦.就算而家咁唔開心,只要唔好再嘈再打就好了.另外老豆又話擔心贍養費問題,怕要俾錢,佢份看更工唔多錢,又唔想一個人.

我同老豆分析,其實佢平時放假都都係一個人留係屋企,搞清潔,佢一個人出黎住都無咩大問題,最多洗衫咪我幾日上去一次幫手洗衫囉,再唔係咪家務助理囉.平日都係夜晚睇住老媽面色做人黎食晚飯啫,大佬健都無咩話同傾啲咩o架啦,我返工要輪班.
我問老豆係咪唔想轉變,因我之前見佢轉行都要好耐至可以適應,老豆答"係"同埋話"無勇氣".一個大男人俾個女人玩到話話無勇氣去反抗,真係幾可悲.如果老豆真係出面有女人,理應好主動咁搞離婚同分身家,但老豆又無咁做,只係最初老媽好顛時,佢話提出想攞番啲退休金,可惜財到光棍手,老媽話要老豆簽紙話一蚊都唔要(包括舊屋業權),至肯離婚放手.

即使一個人租個細細地既單位,老豆又怕無錢搞離婚同搵律師搞家產.如果話愛既反面就係恨,咁愛已經變咗質,老豆點解仲要咁留情呢?老媽都無為佢留過啲咩情義,仲要令成個家庭加上壓力,傷害到各人既感受,毫無悔意,永無應錯,只有愈來愈過火同失控.第二日唔出聲,扮無事發生過,搵日又做過大戲.

成個晚飯,我又傷心又嬲,替老豆不值,同為佢既軟弱而激動.老豆叫我唔好咁激動同老媽嘈,佢好驚,佢想今晚平平靜靜咁訓一覺.佢話番屋企都感到有壓力.聽到咁,個心好酸,但大佬就一直都無理過老豆既感受,只要屋企無人開口嘈就好啦,佢唔知道件事根本無解決到,受害既一方一直受苦,而佢既處理手法係縱容緊老媽既惡行.

拒食開年飯

今日訓到十二點幾,老媽入我房話起身食開年飯.開年?年卅晚開咗啦!當咩事都無發生過呀?

我梳洗過,換埋衫,就騎羊出建生一個人食晏.我真係唔想同啲咁既人食飯,我絕對唔buy"天下無不是之父母"呢樣野.

咩一家人?會有一家人出手打到爆血o架咩?換晒啲窗簾布,掛晒賀年裝飾又點?咪又係家嘈屋閉,野人文化....屋企唔係有水有電,有人洗衫煮晚飯,無人嘈有得訓就work.成年人要為自已做既事負責,唔係不死身,打橫行,愈來愈過份,變本加厲咁去傷害身邊既人.

我已受夠了,受夠了呢個"所謂"既家.

難民

番完早更,好攰.搭輕鐵入村,放低啲野,沖個涼.換過件衫,就出去台灣女生屋企.臨上樓前係樓下間超級市場買咗盒樂家杏仁糖黎做禮.

由於好肚餓,人家煮咗啲雲吞過我食,我一個人食晒12粒.個一刻我好似難民咁,好肚餓,無家可歸咁.廿七歲仔,搞到咁,真係可笑...

人家叫我上佢張碌架床訓,我又唔太想,伯母都叫我訓佢個張坐地床,唔洗擒上擒落.我當然係唔好意思同婉拒啦.挨住眼訓咁同人家係電腦睇"我們這一家",最後都太累要停一停.見伯母出咗去攞野俾朋友,人家開咗張墊褥係地,叫我訓吓.由於真係太累同唔舒服,所以食咗粒感冒藥就訓落地,人家就係電腦枱玩ndsl.

一訓就訓咗個半鐘,個人攰到不時四肢抽彈,好似spasm咁.醒咗就好似精神少少,伯母煮好飯,我地就一齊食.坐多陣就搭番輕鐵走.

今日我好似難民咁,無處容身.好後悔當初番黎呢個困獸鬥.

有血有淚既年卅晚

返完晏,係輕鐵月台等台灣女生,一齊入元朗行年宵,幫襯吓德輝~由於人家long night加上我本身家事,搞到都無咩特別準備搵日去行維園,於是今年只係行元朗.

今年德輝個檔好似好生意過舊年,我同人家去到就搵咗德輝整個氣球先,影張相,揀吓其他精品,行多個轉就走人~

上西鐵時有職員係閘口派膠袋俾我地呢啲拎住金屬氣球既乘客,用黎笠住個氣球~

送人家上樓時收到大佬健電話,話老豆俾老媽用電話車落隻耳,係咁流血,唔知洗唔洗睇醫生.我聽個吓有兩個反應.第一,有事既時候就搵我,平時又話我點處理得唔好;第二,係咪痴x線o架?

飛的入村睇吓咩事,見老媽係客廳換窗簾,我入老豆房見佢訓係床,已止血,臉有血跡,於是叫老豆起身,入厠所沖水,再用alcohol pad抺下,就見到個 laceration wound係咁(半吋長).

有無搞錯呀,人黎架!!我叫老豆換衫,一齊去睇急症醫生.出門口前,我叫老豆帶多件衫,點知老媽話"洗咩呀,佢個狐狸精大把溫暖俾佢",又話個狐狸精話要報警拉佢,"咪影相報警拉我囉"(好得戚咁講).我個吓好嬲,好想鬧佢,叫佢收聲,但我無咁做,因我覺得佢係一個瘋婦人!

問老豆做咩,老豆話本來同老媽係姑媽度食飯都好地地,搭的士番屋企無耐,又話俾足時間老豆,又話老豆有女人,老豆無理佢,於是佢用床邊既電話黎車老豆.老豆見係咁流血,於是打俾大佬.

去到急症,我叫老豆報警,但佢唔太想,又話自己個病(RA)都成十年,半條人命,死咪死囉,我聽到真係好心翳....我同佢講,有病都唔係要咁過日子,今次就電話,下次枱燈點算??再下次用刀點算?病都可以做喜歡既事,我知老豆四十零歲就有關節炎好唔開心,影響生計同生活細節.我同老豆講,佢既生活唔係註定要受屈,係應該做令自己開心既事,仲有好多齣鐵金剛等住佢去睇.

老豆又話唔想頭家散,我答佢頭家一早巳經散咗,有形無髓.我同佢講早個零禮拜佢地嘈完既第二日,我因為心神恍惚而跌車,都係因為屋企唔開心,就算我係行緊車時捲入車底做免治牛,老媽都係唔會知,唔會覺得佢有問題,我已經唔記得上次係屋企開心係幾時了.

大佬健黎到,睇埋醫生,本來我說服老豆去報警,但去到警崗,佢又話唔好,過兩日睇吓點先,加上大佬又主張唔報警,話唔係咁處理件事,再同老媽講吓於是無報警.

我好x嬲,我話老媽會聽一早就聽咗啦,佢根本控制唔到自己,係咪真係要老豆入icu,俾人用刀斬至報警呀?佢都唔係第一次打老豆啦,一次用手,一次用電視遙控黎車老豆,好在我當時一手截住.一個人要為自己做既事負責,老豆當初話叫老媽搞離婚算,但佢要老豆一蚊都無至肯,邊有人咁毒?佢一心唔想要分錢俾老豆,並唔係想挽救段婚姻,同埋唔衰得,一向要面認叻既佢唔接受有失敗既婚姻,一切一切都係自私既, 已經唔係有愛既存在...

搭的士番屋企,幫老豆係房攞被鋪入我房,見老媽仲好氣焰咁睇電視,我怒視佢後就離開.我同大佬講話老媽未訓係房睇電視,係咪同佢講呀?點知佢不為所動,沖完個涼,就入房訓,講?搞結婚時大佬話我點處理得唔好,屋企事又話我點唔可以咁講阿媽,咁你又做咗啲咩?只係隔岸觀火,煩唔到你就得,邊個"till"起件事先就係唔啱,唔會理會事情既本質.

執好張床俾老豆訓,我就出客廳訓sofa,成三點鐘都係洽唔著,於是打電話番公司,問有無地方訓,之後換衫搭的士,係公司3號位訓,醒吓訓吓咁直到六點三就起身落更衣室換衫,再番早更,好攰好攰,快要被撕開般..

台灣女生穿耳(live)

今日同台灣女生出旺角穿耳環,打之前我地去咗食MOS BURGER,買野食都要排隊.又真係幾好食,但都要成三十幾四十蚊個餐.

講番正題先,呢間鋪頭位於朗豪坊,打一對k金耳環都要$390,因為大公司兼且標榜獨立即用即棄既膠囊equip,保證衛生~

同人家揀好耳環款,跟住人家就坐定定,由掛住"ear piercising specialist"既職員黎操刀.見個姐仔係咁用alcohol swab抺人家既耳仔,跟住用marker定位(skin marker??)跟住就一野俾姐仔用手力打穿耳仔.

人家竟無叫出聲,但後黎姐姐仔話左邊個耳環打歪咗少少,話最好打多次,仲叫埋佢senior黎幫眼,最後都成功丫~姐姐仔話人家好驚好震,係咁叫人家坐多陣先,又遞水又俾粒士多啤利味瑞士糖過人家,搞到人家好似個小朋友咁.後黎見有個小妹妹穿耳,都無叫又無震,反而好似個大人咁

係鋪頭見到啲頸飾都幾ok,價錢又唔太過份.人家試戴過後話唔似得"法國"賣個啲咁硬蹦蹦,係比較貼服同可以捲摺~睇黎真係要行多啲街黎比較吓呢~為咗幫吓人家止痛,我地去咗間叫UNCLE RUSS COFFEE既咖啡店飲咖啡因水劑,不過麻麻地(尤其係我個杯MINT MOCHA)... 

PS -是日斬獲:耳窿連耳環X2, 珠鏈X1

無名中毒?

前幾日發覺頭皮多咗少少,不以為然.直至發覺我額頭兩邊紅晒兼甩皮,先知要睇醫生.

尋日睇完staff clinic,話係皮脂腺???濕疹.女醫生開咗啲藥水過我用,叫我三個星期後再黎睇吓有無好到,但我諗:唔係要成三個幾禮拜至會好轉呀嘛??

無神神都唔知點解會咁,會唔會番工"high"到啲污糟野呢?定係好似台灣女生話齋我太stress,immune低晒,啲病走晒出黎呢?定係好似伯母話齋係無名中毒呢?

用咗兩個dose都覺得無咁紅腫同itchy,希望快啲好番啦....

ps:身心快要崩潰了....

華麗

失眠,訓得三個幾鐘,四點幾醒咗訓唔番著.眼光光咁返完個早更,去staff clinic睇醫生.同台灣女生係村口茶餐廳食過下午荼,打的去市中心相熟店舖睇情人節禮物. 

相熟既姐姐仔見我地入店就攞出預先留定既耳環,頸項,其實係我早幾日番完晏,騎羊去市中心睇吓有啲咩野添俾人家,最後揀咗一款,仲叫姐仔留起兼去其他分店搵埋對耳環,始終咁大個女都應該有一點飾物~人家睇過都話靚同後生feel.

我覺得就咁買份野送俾女友係無咩誠意,起碼要自己包裝吓,花啲心思.但屋企給我負面既感覺,我真係唔能夠係咁既環境下好開心咁整禮物仔,加下又無咩假放,日日番工都忙到震.

呢排過既日子真係好難受,每天好似係將自己關閉係一個盒子裡.家中任何人都任不過,多點接觸都會招來煩惱,要架起圍牆黎保護自己...

今晚仲要night,因之前re唔切duty,人家有點唔開心,但即使係齋A,我都怕我無咩心機,唔太多笑,令氣氛怪怪的.....

十點幾人家拎住手制情人節蛋糕同幫我買既野上黎,本應多講幾句,但出面既工作都未搞好,亂七八糟,快快送人家出門口,又要埋首厭倦既工作,唔夠訓,個人仲辛苦咗.

心理身理質數都好差,新一年真係需要啲好運~

ps:唔知點解今年同上年情人節都係同人家過得唔太如意???

停職騎士

愛羊負傷,身為主人既我又困係人生既低潮中,所以自尋日去配parts後,就開始放低車匙,做番個普通人搭輕鐵,小巴番工放工.

心情差,真係好影響駕駛既判斷,都係等自己平伏吓先,不過都唔知要幾時至可以走出呢個困局.

唔完整既我,好想好似以前既我咁,飲酒,訓覺,番工,黎逃避吓.好可惜我知道咁係改變唔到個現實,只係借點酒意黎令自己好訓啲,因為在這兒我確實有窒息既感覺.

幾時至可以開始新既生活?開開心心咁騎羊同台灣女生兜風?回復完整既我?

訂parts

今日番完早更就騎羊出觀瑭原廠配parts,由於係厨房搵到啲野食,所以食晏時間都慳番~

相熟既路線{註1),相熟既時間(註2),咁就到咗位於工廠區既鈴木科硏.

唔知點解閒日都咁多客人係度,有個中年男人講住英文係度訂緊parts,我邊攞啲新catalog(新屋可以貼吓嘛~)近門口既維修部依舊都係繁忙,後生師傅都係好cool咁,凶神惡煞咁整車,老師傅都係游吓游吓咁走黎走去.

卒之都到我啦,我同哥哥仔講話隻羊係排係排骨位俾人推"冧"咗(果個咪係我囉.....), 哥仔話都無咩大礙既,電鍍呔的有貨,死氣喉暗電鍍隔熱板有貨,只係珍珠白既右邊包圍(farling)無貨,要等兩個星期左右至有貨.

落咗訂,hold住兩件parts黎等珍珠白包圍,借個洗手間,就騎羊番入屯門,但係工廠區至龍翔道好塞車.其間見到一個p牌仔騎住部burgman400(舊款2 tone),真係幸福,我當年都係騎150咋...(不過算啦,都係逐級逐級黎好啲,我今次騎250都搞成咁...)

呢次既意外洗費真係有啲傷元氣........整好隻羊之後,真係要走轉車公至得

註1:屯門公路>汀九橋>長青隧道>龍翔道>黄大仙>彩虹>九龍灣>觀瑭道

註2:四十分鐘

對唔住丫,嗚嗚....

家嘈屋閉,身心疲憊.泊羊跌車,力挽無效.

愛羊受損,皮肉受創.

大錯鑄成,痛泣自責.

願羊安康,不記前嫌.

共渡患難,永不分離.........

排隊換油劵,緊張代買機

今日出咗旺角既栢裕中心14樓去攞信用卡積分禮物-我既至愛油劵~入到去個換領中心,幾焗吓,好多人排緊隊,我同台灣女生見有啲攞住渣打既單,有啲係citibank,netigator.....唔通我去錯地方?睇真啲,原來好多間card中心都係搵呢間禮品換領公司黎分派禮品.

人家因約咗brenda,所以中途就要走先.我一個人排多陣就攞到呢張油劵啦~~~

之前人家話brenda想添置一部ndsl,想我幫手買.反正出開黎,於是係好景格吓價,但竟然話唔包頭七日,擺明老昆!

於是走去信和望吓,見價錢相約,但有頭七日既保證,有壞包整,不收費用,其後一年內包人工,零件另計,以水貨機黎講都好合理.

打電話俾人家向brenda報價同套餐內容,得到consent後,就去之前買第一餅nds game-孖室兄弟俾人家既店舖試機.由於之前買俾人家個部睇漏光點,所以今次都好緊張會又睇漏眼.

大汗搭細汗咁開關畫面,用黑同白畫面黎搵出光點同死點既存在,重覆好次黎check上下"mon".跟住就試玩相熟既孖宝賽車黎試吓啲制既反應,都ok喎~

採購完畢,出埋張單,就送貨上k房,再向brenda講解吓番屋企點搞.交收完畢,人家送我去到樓下,我就去搭巴士番屋企.希望brenda滿意部遊戲機啦~~

ps:可惜晚飯後局勢變得動蕩,家不成家,愈黎愈覺得家呢個字早已名存實亡....

先跑步,後食飯

番完夜,騎羊去建生買麵包,臨開車時,聽到有人叫我.一望,原來係哥頓行路番屋企時經過見到我,係佢行得太快,定我係停車場攞車時太"me mo"呢???

訓醒咗,就出村口茶餐廳食個下午茶.趁好天,洗埋幾件衫,就執好個背囊,騎羊番公司既更衣室換衫,去附近既運動場跑步.由於近排個膝蓋又痛番,所以今次都帶番對patella band黎跑~
咁耐無跑過,今日都可以係兩分十左右一個圈,之前太凍至疏於運動啫~~跑完步,行番去公司既更室沖個涼,就騎羊番屋企.

係屋企打陣nds既孖宝兄弟,就騎羊去市心接人家(人家係對面海上完堂搭車入黎同我食飯).由於天氣回暖咗,所以雙騎去深井食飯,唔洗成日屈係市中心~人家怕大風,叫我帶條頸巾俾佢,我就攞出幾日前買俾人家既頸巾,人家當然開心啦.事源有一日同人家行過ice fire,人家係咁望住條頸巾.前幾日行過見有七折,所以買落黎.

上屯門公路,用咗15分鐘左右既時間就到深井,泊好隻羊,就去之前食過一次lunch既kcal食飯.

我叫咗個澳洲黑椒t骨扒薯菜,唔知點解六成熟都好乾身咁,加上塊扒好多係肥膏.

人家叫咗客美國生蠔什菌墨魚汁麵,三隻蠔,大中細各一,食落又真係生生地,唔係全熟,唔錯~

本來播住輕音樂,感覺唔錯,可惜中途侍仔哥哥開電視睇"突圍行動"....搞到好似茶餐廳咁......點知人家都睇埋一份...

食埋個甜品,我地就埋單走人,騎羊行下路(青山公路)送人家番屋企,輕鬆既一日,溫暖既一日~

新不如舊

今日同台灣女生睇完"血鑽"之後,騎羊去市中心幫伯母既電話咭增值.係附近既書報攤買相熟既遊戲齊潮流雜誌,見到超獸機神nova個封面,覺得好可惜,因為真係新不如舊.....

呢張係原板超獸機神既海報(貼係我房),你睇,十幾年前既設定都靚過nova多多聲.

我記得我睇呢套動畫係我小學時(亞視台),集集都追,覺得個機械人好型,故事又幾特別.其實我未睇佢之前,已擁有佢既台灣制塑膠玩具,因為老豆帶我同大佬健去安定一間文具兼玩具店買玩具,我無咩睇啱,又要就價錢,所以揀咗超獸機神.後黎睇埋套動畫就愈黎愈喜歡啦~

當其他機械人動畫無咩突破兼開始淡出時,"超獸機神"以著重駕駛者既精神力量同消耗,軍隊模式等元素打出一個缺口~可惜之後機械人動畫就停產一段日子,才等到"福音戰士eva"既出現,以及勇者系列既救濟~

ps:我連佢既超合金魂都有兩盒(零三年買),一盒用黎珍藏,一盒用黎玩.

訓過龍..

今日番完早更,一個人騎羊去秋田食單身漢餐,番到屋企約台灣女生七點三係人家樓下等,用羊仔兜去和生食晚飯,點知自己訓過龍,訓到七點四五個字,人家打黎至知醒.....

急急梳洗,騎羊直接去和生會人家,好在人家無嬲我啫~~坐底咗本來想叫個沙嗲蝦球煲,點知阿叔介紹牛油芝士蝦伊底,於是試吓,點知.......

芝士味唔太突出,蝦又唔太大隻,麻麻地.人家話"會唔會係厨師試菜呀?"當時我諗咁我地咪成為料理路上既白老鼠??

食埋其他餸,臨走時見到我同房,不過佢趕時間,所以無再詳談

只係sms開吓玩笑~

騎羊送人家返夜班,人家係後座拎住盒外賣泰式辣鳯爪做宵夜,近排少時間見咗,所以食晚飯黎見吓,今次晚飯卒之唔洗咁趕住食lu~~~

無選擇中既選擇

今晚同台灣女生係市中心間目黑食飯,其實係無咩特別想食,又好耐無食壽司(因為元氣執咗),明將都要等位.由於人家趕住要返夜班,所以係呢間食.

之前佢新開個陣都幫親過,但唔太好食.事隔兩年有多,今之既感覺都係唔太好食,真係食都有啲"忟".等人家食埋個烏冬煱就埋單走人.捉人家去七仔食燒賣,同買檸檬茶,就用愛羊送人家番工.

自己好肚餓咁一個人同羊仔去紅橋附近既茶餐廳食飯,可能係太肚餓,胃酸過多,好唔舒服.好慢慢咁食完個餐,去隔離惠康買埋早餐,就急急騎羊返屋企食pepcidine........

真係好想"北海道 活壽司"快啲開,以及"元氣"快啲復出,咁我就可以係"目黑"圍住板等拆時影番張相~~