今晚契媽同契爺黎食飯,我梳洗完後出客廳,老媽問我係唔係度食,我話唔係.同契媽契爺打招呼,契媽話知道我今年結婚,仲問我幾時好日.子.我答六月係關島旅行結婚,契媽唔知係聽唔真定係以為自己聽錯,話聽唔清楚黎問多次.我重覆多一次,契媽無問點解,只係話"好丫,今年金豬年好多人結婚"跟住我就騎羊去買宵夜,再番夜班.
其實我真係好想答契媽,"老媽打老豆,又成日話老豆出面有女人,但又無證無據,我好怕擺酒個日老媽又會失控打老豆,所以咪唯有唔請親戚擺酒囉,其實我都真係好想同你影張相o家"
講咗出黎只係令在場既老豆難堪,同埋俾大佬健插我處理得唔好....好想搵日去契媽番工間鋪度,同契媽講明一齊,再搵日約埋人家一齊飲餐茶,好讓內心好過一點.
ps:今晚買宵夜時買咗五碗楊枝金露,其實得四個人番night,睇黎呢排我真係好攰..
