電影狂熱

朝早用羊仔送台灣女生番早更,自己就去運動場跑步.太耐無跑,跑得十一個圈,圈速都慢咗,要兩分二十一個圈..睇黎要多加努力.

番屋企晾吓衫.睇"地下劫"dvd,又係一條爛片.訓醒覺,換衫搭輕鐵接人家放工.係建生間巴蜀風食晏時撞到阿潘同阿強.本來佢地叫我一齊食,但我話要陪人家,婉拒咗,但最終都係一齊食~食飽飽,同兩位兄弟分手,我同人家搭巴士出旺角行吓.

係信和,潮流特區,兆萬行個轉,見瑪莉奧蘑姑公仔太貴同唔太好攬,結果無買.跟住我地去旺角電腦中心買dvd燒碟,跟住就搭地鐵去油麻地既百老滙電影中心.

今日既主要目的之一,係買電影海報黎遮吓入門口個邊牆既花痕兼點綴吓新居.係信和只係有動畫既海報,於是係最有電影元素既電影中心搵靚海報.

人家揀咗一輪,就話呢張幾靚,感覺好classic.雖然未睇過呢齣戲,但黑白舊片又真係幾有feel既,於是投贊成票.

人家突然話想睡房都搞吓貼海報黎點綴吓.但又睇唔啱邊張合心水,於我提意用啲細張既小海報黎砌上牆.同人家係咁揭啲clear book,坐住橷仔,用店內既白板仔同mark記得所需既號碼.

本來諗住揀啲好型同好靚既小海報,但覺得好似無咩主題,突然提出"不如揀晒啲有kiss既黎貼".人家都話好,於是一齊再揀過,就係咁我地就係電影中心逗留咗一個鐘有多~用vip咭埋單有九折,仲可以儲吓積分添.

搭巴士入屯門,係大排檔食過晚飯.番到屋企就急不及待咁先貼大海報,同砌睡房既小海報.經過一輪相討同編排,最終以呢個陣勢貼上牆~(有剩既兩張就貼係客廳)

唔知可唔可搵番晒海報既電影出黎同人家睇呢?

半個鐘洗十五年牙垢

今日係我自小學牙科保健以來(唔知而家啲小學生仲有無),第一次去睇牙醫.

其實舊年巳經參加咗公司優惠既ump,但由於懶同忙於搞結婚同屋企事,一直拖到臨近deadline至去book.好好彩星期一都俾我book到今日既期.阿潘就無咁好彩,今日book都趕唔切係三月內有期.

阿潘行開下路入油,順便兜埋我去元朗check牙(感動).去到診所,由於咭上面個名有一個字母打錯,所以要等一陣,姑娘問清楚,至可以入房.

入到去,牙醫先生問咗少少health history,跟住就開始洗牙.久違了既強勁超聲波,令我很酸軟,不太舒服,身水身汗,額頭又標汗,加上又要擘大個口黎容納牙醫既洗牙儀器同姑娘既suction管.

半個鐘左右搞掂,最後都無話有飳牙,仲話平時刷牙都刷得幾好添,早晚刷牙戰術成功!!

ps:洗完牙至體會到,.原來平時睇開既日本動作片,女主角都幾辛苦添~~

早晨miss wong & 兒嬉家俬

番完夜,係建生買早餐時,撞到預科既bio miss.Miss Wong好似又有喜,亙相打過招呼.咁又離開中學九年,以前既bio miss亦由初出茅廬變得成熟咗.我亦由一個好性既小伙子變成一個將近三十既男子.

以前我地成日都玩bio miss,蝦佢junior,比較林善.起初我跟唔太上課程,好多時test唔合格,miss覺得我唔太上心,加上兼顧拍拖既我上堂不時訓覺,我亦有啲覺得miss 有啲針對.

直至搞學會時,有一日放學後我係操場同miss wong講我拍拖同屋企反對既事,大家開始了解多咗.之後我既成績好咗啲,無咁多唔合格,多咗備課,會問吓miss野.雖然期間都係有啲反叛(e.g.話miss講得唔太明,結果俾miss叫咗出去present muscular skeletal system,結果當然係甩甩咳咳啦),但其實我蠻欣賞呢位老師,因為佢好有心咁為我地打一份又一份既notes(有誠意).

畢咗業,係街撞過miss好幾次,又有icq,手提號碼,偶而發吓短訊聯絡吓.training時,都有同阿bill,阿錦一齊去元朗生命堂出席miss既婚禮~

番到屋企,食過早餐,訓到點幾鐘,起身同台灣女生,伯母係市中心美食廣場食麥當勞(撞見中一同學stephen chan),就搭巴士出IKEA買少少野.

本來想買既單人梳化床,突然又無貨,最後買咗個有轆既茶几同其他野垃雜野.夜晚係南山谷食飯,由於太辣,所以都唔係食咗好多,台灣女生同伯母又真係幾食得辣...

番到市中心買床頭燈(人家係省城見到賣貴六十蚊),兩個客用枕頭同一張夏天毛巾被,就搭的士番屋企.

番到屋企,諗住砌個茶几時,就發覺其中一個部件係爛既,個燒焊位斷咗,唔洗砌.................

望番menu,原來係底部支撐架既腳位.深深感受到"兒嬉傢俬"呢個名既由來打電話去熱線,職員話沙田無貨(明明買個陣都仲有一盒殘啲既剩,唔通都係爛既?)要過幾日係上水店send番去沙田,到時要我拎番件爛貨去換過件.希望快啲有貨就好了.

安裝信箱

今日個早更都幾忙吓,手換埋衫都成搭半至走得人.本來德輝約我搭半係我屋企用玻璃膠黐信箱,但由於遲咗走,所以急急腳去攞羊仔,用咗兩個字既時間騎羊返屋企德輝師傅原來已經泊好佢阿妹既綿羊,係我家門口等緊我,真係唔好意思.. 

德輝師傅帶埋玻璃膠同槍黎,我入屋拎個幾日前係建生五金鋪買既信箱出黎度位.準備好晒,就由師傅親自操刀,唧玻璃膠~

我負責將信箱拍埋牆,同hold住個位.但係咁樣hold法真係唔係辨法,於是德輝提意攞拎佢送俾我既入伙禮物(工作梯仔)出黎頂住個信箱,攞本雜誌攝住梯腳,用catalog攝埋個虛位,嘩,fit晒位,頂到實

德輝入客廳坐陣,飲埋罐可樂,臨走check多次個信箱有無訓落黎,跟住就騎羊仔去市中心會阿嫂.百忙中抽空出黎幫手,真係唔該晒~

入屋洗吓衫,沖個涼,出門口望多次無倒塌,跟住就係房訓番陣.訓咗個半鐘左右,六點醒咗,出去試吓拎走個支撐架.嘩~已經夠力拉住個信箱啦,戰術成功~

六點多啲,伯母拎住啲野入黎家訪兼煮飯.用printer印好信箱地址,我見無粗身封箱透明膠紙,於是騎羊出建生買.點知老闆話無,於是配過幾支番工筆既筆蕊,就騎羊去市中心,係老牌文具店"明思"買透明牆紙($4一呎)再去吉之島既超級市場,買牛奶同士多啤梨俾人家(兩樣我都唔好).排完隊俾錢,騎羊去盈記買個楊枝金露外賣俾伯母,就騎羊番屋企落貨,再度位貼埋地址係信箱上.

見差唔多時間,騎羊去市中心接台灣女生番屋企.人家買咗唔少戰利品番黎,要將啲貨分散放入行李倉仔內,最大既紙袋要人家單膊咁孭住坐羊仔. 

九點鐘至開始食飯,有餸有湯,辛苦晒伯母.德輝仲有打電話黎問黐得實唔實,真係太好人啦(感動X 1)今日都真係好似無咩點停過咁~聽日放假,希望好天可以去跑吓步啦~~

愛羊是日之duty

今日番晏,同台灣女生一齊騎羊番工.係NEAT位放低人家,自己都落埋車,去攞衫.接過阿姐遞過黎既一叠衫,行出門口就放入行倉仔,再騎羊去橋底泊車.落埋布冚,至孭住背囊,拎住叠衫行去更衣室換衫番工.放工同人家騎羊去市中心還碟.為免鎖黎鎖去,於是將愛羊泊係滿記對出既避車處,叫人家上商場還碟.

其間見有兩架電單車都泊係避車處,一架係銀色既super four, 一架係黃色掛住p牌既CB400.兩個車主企係路同另一個有意出車既人吹水.想當年我P牌時,都只係可以出150-250羊仔,棍波車係保險公司唔太受,一係就重LOADING(咁啱個排多啲電單車意外既..)於是我就由學車時用既125CC 升級到150CC,再提升到而家既250CC,好隠陣咁逐級上見有阿SIR係附近徘徊,於是"tart"車行去對面避一避.掛住p牌既CB400係cut出右線時俾架私家車呠佢.跟住我就諗起,p牌渣咁大cc同重既車,又要適應路面,真係幾辛苦~

人家買埋少少野,坐羊仔去人家屋企,攞定啲野,方便伯母聽日黎家訪.兩大袋放入行李倉仔,背囊都孭埋貨,人仲手拎住盒外賣炸両(人家話肚餓,想食嘛).

番到屋企至醒起個外賣盒既size咁細,應該可以放係前面放電筒既櫃桶仔.用實物試吓,又得喎,早知就唔洗人家拎住咁唔方便啦.

ps:愛羊真係帶來不少方便~

傷城

今晚同台灣女生睇埋呢隻碟,感覺麻麻地,唔太緊湊.金城武真係又型又靚仔,梁朝偉好似被比下去咁.一早始已經影住梁朝偉去殺人, 剩低既時間只係睇金城武點樣查出真相同動機.

杜文澤依舊笨拙惹笑,結局偉仔既身世驚喜不大.間中要開字幕,至明金城武同舒淇既廣東話.

好在當年無去戲院睇啫,租碟就有呢樣好,爛爛地都無咁覺揼心口嘛

記得以前大佬健成日話我"食薯片,睇爛片"...

ps:今日晏晝煮完個麵食,就抺羊打腊,自跌車起,已經有成個幾月無打腊啦.而家企理晒,精神晒~

hdmi

今日卒之都收到部dvd機,之前訂咗話星期六送,但星期五中午又話無貨.

好開心咁駁線,諗住可以試吓用HDMI線黎睇1080i畫面既電影.點知竟然係唔可以出到full screen,畫面上同下都係有條黑色橫bar係度..試過用普通video線出電視,先至可以係full screen,不過質數就差啲.

都唔知係咪自己當初買錯機....試過其他唔係16:9既dvd碟,又出到full screen.睇黎要問吓電線鋪買過條靚啲既色差線黎睇16:9既碟..錯晒........

夜晚出咗去市中心一間影視會做會員,租咗兩碟(邁阿密風暴,傷城),十蚊隻,三日兩夜,都幾抵玩.以前有百事達既年代,我成日都去租碟睇,因為唔係齣齣戲都會搵到人陪睇嘛,加下有啲戲又唔係咁值得入戲院睇嘛.

番叮尋晚人家為我煮既晚飯,就熄晒燈睇邁阿密風暴,好有幾年前係屋企客廳睇碟既feel.齣戲麻麻地,加上sleeping day體能大減,所以睇睇吓係梳化訓著咗一陣.醒番時就熄機,入房訓,人家打電話黎時,我都係半夢半醒咁答人家.今晚真係幾relax,如果飲住芝華仕黎睇戲會更好~

暖意

今日要A/N,放工同台灣女生騎羊去市中心食pizza下午茶,係吉之島超級市場買少少野,就騎羊番屋企.沖完涼,就訓覺叉電,準備夜班.今日都算訓得到,無小朋友嘈同狗吠聲.七點半訓醒行出客廳,見到人家已經準備好晚飯(感動~)

雖然唔係啲咩佳餚美酒,但可以開開心心,有傾有講咁食飯,已經很足夠,起碼唔係好似以前屋企咁惡形惡相,睇面色黎食皇家飯咁....唔知老豆呢排食飯時仲係咪仲俾老媽"卒"呢?

食食吓收到包租婆既電話,話住隔離既媳婦話我隻羊放係客廳簷下阻住佢地出車.我話原身既泊車位有架van仔泊得好貼,我扭唔入至放係客廳簷下,加上都仲有好多位剩.點知包租婆叫我要泊番原本既圍牆邊位,如果唔係就要我擺對面馬路既爛地場.我個吓都幾慶,一黎啲後生既唔夠薑同我講,搵個老人家黎出口;二黎包租婆婆完全唔聽我既苦衷,(可能泊van仔既人唔係同佢太親掛)一句壓埋黎話唔俾我擺車.

我嬲嬲地出去門口數有十個階磚位,再用拉尺度到一個階磚有一呎長,十呎都過唔到架車?唔通係拖頭阿柏文?就算後面係兩架私家車平排擺,係我簷位後面個架車仲有成間屋既長度黎扭s字出車丫,再者佢都唔應該架車係我簷下好近我廰邊駛過,簷下既位置係歸我嘛,我放幾個箱頂住都可以.當初包租婆話唔可以晾衫都算,而家我覺得係有啲過份.我仲立即打電話問德輝一架私家車有幾闊,同吐苦水.

其實我門口前都好多時有架私家車泊係度,後邊個架車點都要s字咁扭出黎,渣車係咁架啦,洗唔洗好似飛機跑道咁clear晒至出發?完全係破壞晒大好既心情,唔怪得好多時啲女司機係馬路俾"洽" 

ps:番夜時同大豆講呢件事,連大豆呢個雪藏牌都話十呎闊佢都有信心過..

愛羊復康日

朝早十點起身,梳洗完,十點半至騎羊出發去觀塘鈴木科研換parts兼check車.十一點兩個字就到步,哥仔話有一個師傅請病假得番一個係度做野.我問三四點攞唔攞得車走,哥仔話要五六點...唯有搭車入屯門做吓自己野先啦.唔知點解,哥仔問我用咩機油,半合成定全合成,我梗係話要全合成啦.之前都係只係得suzuki既全合成油,唔通啲客嫌貴?

十二點都未夠已經好肚餓,可能係長程車既關係啦.係工廠區行過一間食廳,見門面幾ok同闊落,於是問有晏食未.職員話就黎有,叫我入去坐底等一陣就可以落order.

呢間餐廳都幾大吓,又有大電視睇,我望定個午餐牌,揀定個焗豬扖意粉,仲見到話一點十分前結帳離座,可以有八折優惠,咁又幾盞鬼喎,啱晒我~

個餐一上,影埋張相,就係咁食,好肚餓,食要洗碟,只剩底配菜同骨埋單時姐姐仔收我32蚊,無俾折.我係咁望張八折優惠poster,睇吓有無望漏啲咩細字條件.另一個手紀較大既阿姐見我係咁望,就知道無俾到八折,提番收銀姐仔,仲同我講有咩問題要出聲架.

食飽飽,行番去巴士站,見到有個鐵騎忙裡偷閒咁係架落咗大架既電單車上訓覺~咁鬼嘈,又大塵,馬路邊,係咪直係訓得著架?

搭番259d入屯門,係市中心格吓價,最後係中原買咗個室內手提電話(問問吓至先2.4Ghz會同Wi-Fi撞).搭輕鐵番屋企途中,德輝打黎話A完一齊飲茶,我話我食咗野唔啦,下次先同埋都想做吓家務.

係屋企晾吓衫,四點收鈴木既電話,話個死氣喉冚有少少花,問少收一百的話,我會唔會收貨.我答我要出去望吓先,跟住就換衫搭小巴出市中心,再轉62x去觀塘.

去到鈴木,望過件貨,只係兩個小點.原價380 我屈多30,最後以250蚊收貨.俾尾數時真係有啲肉赤(總數$2039)唯有當係破財撞災,人無事就好了,加上愛羊都只係皮外傷,無礙表現,而家搞番好就足夠了.

騎羊入番屯門,見無咩油剩,去村口相熟油站入油.去屋企洗個臉,再騎羊去置樂食飯.

今晚呢個飯局係老媽既生日飯局,前兩日大佬健打過俾我,但miss call,再收到sms話今晚有飯局.我係屋企搬野時問老豆至知係老媽既生日飯.我七點八左右到達,坐老豆隔離.契媽契爺,姑媽姑丈,同幾個老媽所謂既"朋友",大佬健帶埋女友黎,坐我隔離,但我望都無望過佢.我成晚只係同老豆講幾句野,亙相夾吓餸.老媽只係開頭問我飲唔飲紅酒,同臨尾問我要唔要拎個壽包俾台灣女生.成晚對係nds個螢幕,同食野,最後散場時都只係同老豆講聲,就騎羊走人.

呢個飯局真係好焗促,可以的話,我只係想同老豆食餐飯.我又記起年三十後有一晚同老豆係茶餐廳食飯時,我好嬲咁話"呢個家簡真係污煙瘴氣"

愛羊盡載黃金甲

今朝起身,騎羊入村進行玩具大遷徙,首選當然係我既聖闘士聖衣神話~其實之前阿潘幫我車兩轉野個日,已經用羊仔將四盒未砌既黃金聖衣(双子,金牛,射手,双魚)運到新居.今日係將剩低已砌好既黃金聖闘士,用包裝膠片包好,放入紙盒裡,再將內附配件既吉盒用羊仔運載~

由於兩點過後會有人黎裝寛頻,所以只係走咗一車,跟住就係屋企食晏.本來諗住叮番熱尋晚打冷食剩既蠔仔粥同炸生蠔,點知個蠔仔粥已經乾晒水(應該係俾啲飯吸晒啲湯),成舊飯團咁

,唯有叮番熱個炸生蠔,同沖個杯麵食啦~

食完晏無耐,雞脾,大豆,ronnie,大力(攬住個電飯煲)就黎到我屋企坐,德輝就因為要去屋企攞條工作梯送俾我而晏少少至到.大家一致都覺得好"四正",抵租.

坐咗陣,德輝就拉大隊去附近佢阿姨既士多麵檔食野,而我就留守等師傅裝寛頻.

四點左右,師傅上門,開門時聽到其中一人叫"xxxxxxx",咦?咪係我中一既英文名?原來其中一個師傅係我初中同學carol.對上個次見佢係係我yr1時,咁啱係醫院輕鐵店見到佢,個時佢做保險,我仲俾咗個call機冧巴佢添,跟住就無再見到佢lu.

奉上冰凍可樂,一路安裝,一路講番舊同學既去向,大家既近況.carol仲講笑咁話以前就佢高過我,而家我反而高過佢.搞咗大半個鐘,佢地就走啦,carol仲話遲啲出黎飲茶~

見仲未夠鐘去台灣女生屋企食飯,所以番入村運埋剩餘既黃聖衣黎新居.有兩個盒入唔落個行李倉仔,所以用個膠袋裝住,用手穿住個手抽位,放係大脾上面,慳番轉時間嘛

放低啲貨,冚好愛羊,出去搭van仔去置樂newtype攞訂咗既keroro防狼器.係相熟商場行一轉,就去搭的士上人家屋企食飯.

食完飯,伯母同我地一齊攞人家既行李落樓下的士站(3個紅白藍袋,1個孭袋,三個手抽大膠袋)

真係好鬼重,其中一袋係我送俾人家既野,真係估唔到會有今日........要用埋的士尾箱,我要坐前座至搞得掂.

夜晚又係執執抺抺咁,安放黃金聖闘士係display櫃(搞好耐,成日都fall,可能太重身),洗吓衫,咁好累既一日.

訓兩個鐘,忙十幾個鐘

番完夜班,係建生買過麵包早餐,騎羊番屋企沖涼食野訓覺.訓咗兩個鐘多啲,就收到送梳妝枱既電話.起身洗個面,係客廳坐一陣就開門俾運送工人.收完貨,又一輪既抺洗.跟住就騎羊走一轉入村,開始收拾電腦,微型組合,衣服同其他雜物,方便阿潘晏啲出車黎幫手搬運.

阿潘車完阿嫂番晏後,就約我係村口茶餐廳食晏仔.一人一個雞翼薯條,食飽飽,就動手搬貨~撞啱隔離地盤有工程車塞住,所以阿潘將架車泊係出面既錶位,我地要行遠啲去放低係車度.執執吓,老豆番黎,原來係放假.佢見我地搬緊野,就索性唔抺地住,去醫院攞藥先.load滿架車,就由我騎羊帶路去新居放低啲貨.我將星星叫master piece同超獸機神超合金放入背囊,重有四盒未砌既黃金聖衣超合金放入行李倉度添~

台灣女生番完早更,就帶埋一大袋厨房用品入新居.我地到達時,人家就幫手接貨.我同阿潘落晒貨之後,就再番入村走多轉貨,真係辛苦晒阿潘

percy同阿yo就大約四點幾渣車到我新居,將我住市中心時買既電風扇,風筒微波爐送黎(唔該晒~).percy同阿yo都話新居擺設同裝修唔錯,抵租~

人家四點半左右走先,出去搭小巴去紅穚轉巴士出上環上堂.阿潘,percy同阿yo坐到五點左右就渣車走人.我就趕住搭番電腦啲線,等陣間網絡公司黎裝寛頻.點知六點左右,寛頻公司打黎話約咗聽日下午黎上門裝寛頻.我問唔係應該係今日咩,點知哥仔話電腦落order係約聽日,無法啦,可能係sale搞錯.......唯有繼續執執抺抺.

大約八點幾,太肚餓,於是搭小巴出市中心食啲野,點知人家話不如等埋佢番入屯門一齊食,唯有係吉之島四圍兜吓.係文具部見到有花師奶做招來既顏色筆檔攤,睇黎真係幾受歡迎,難怪人家一得閒就上網睇啦~

近十點鐘,係輕站坐低,打住nds機戰w黎等人家落車.電話一到就去隔離既車站接人家,同幫手攞野.人家上完堂,去咗沙田宜家買啲屋企野至番黎,辛苦晒~

我地行咗去新墟打冷檔食晚飯,今次我地去咗間新既大排檔食.唔知點解,而家每檔都有幾企理既帳篷,唔再好似以前咁用舊式舤布,感覺整齊同光鮮好多~

我地叫咗個蠔仔粥,酥炸生蠔同蒜茸炒菜心.雖然係貴過新金榮少少,但個粥又無咁咸,炸生蠔又炸得啱啱好,夠鮮味又唔韌~食到十一點幾,已經好攰同眼訓.同人家搭的士番屋企,人家係咁執新買既家庭用品,我就開機洗咁啲衫,相信今晚都會幾好訓.

剪髮

 前個排太多家事,所以新年前都無時間去剪頭痛,今日"的"起心肝去新墟相熟髮型屋搞搞佢.途經期間,見到有部HONDA既PS250,佢俾我既感覺係好軍用FEEL~簡單,不修飾,樸實.

由於係星期日,十點半左右己經有人剪緊,相熟姐姐仔話要等兩個,唯有打住機戰w黎等.其實之前已覺得好長同厚,加上爛頭事故,真係好想修短啲黎幫助吓.

剪髮時,姐姐仔話六月會轉去hairline,類似係合併之類,但係我四月中都要剪多次黎去影相,到時再問清楚先,唔係摸錯門口就弊,唔經唔覺就幫襯咗佢三年~

剪完髮就行番去市中心食老麥,跟住就搭輕鐵番晏lu.

裝電視

今朝早都未有收到日立既電話,於是騎羊番晏,叫台灣女生係屋企等師傅同打電話去中原追吓.騎羊行出村時見有兩個身穿藍色風褸既人係行人路上,好似係有HITACHI既字樣,唔通係幻覺?

交完更,打電話俾人家問電視事宜.人家話原來師傅收既電話係LAST一個冧巴錯既,所以打極俾我手提都打唔通,去士多問又搵唔到地址,坐的士又兜過黎搵,後黎佢地再打番公司問至攞到人家既電話.師傅入屋後同人家吐咗五分鐘苦水,就開始安裝電視上牆.人家話佢地係兩個中年男子,又幾有心機同禮貌.人家照我既指引坐係梳化唔同既位置黎試位,仲要係"艾"晒落個梳化背黎試位,師傅都話人家咁做係啱.

師傅一個鑽窿,一個用垃圾剷黎兜灰,令人家少啲清理功夫人家因為唔夠散紙,所以俾咗封大利是俾師傅

由於近日太潮濕,洗好既衫都係唔易乾.我同人家又唔係成日都係屋企,可以將個活動晾衫架拎出屋外晒衫.把心一橫,去買部抽濕機黎解決室內晾衫既問題.

補鐘七點半走人,搭的士上人家屋企食飯,再搭輕鐵去市中心.落車時係天橋上向寛頻公司街邊檔問plan,本來玩緊啤牌既sale,即刻放低副牌黎介紹.搞埋條電話線,人家話圥去實惠訂梳妝枱,因為之前人家已睇中.落完訂,再行番去中原睇抽濕機.點知係中原,百老滙,泰林,best既十字路見到師傅同師母.於是一行四人去中原睇抽濕機.

哥哥仔介紹部日立16L既機款俾我地,話特價做埋今日就無(原價3千幾而家2千幾),加上日本制,又有香港機電處既能源標籤.相比其他牌子同機款,又真係幾抵既.

本來想去埋best睇埋先,但哥哥仔話其實佢地拉閘架啦,做埋我地呢單架咋,於是就即買呢部人生第一部既抽濕機.

十點鐘,抽於部幾重既機,係的士站等人家,人家上去惠康睇吓拉閘未.人家打黎話收十一點,我就抽住部機,行去同人家一齊買厨房野,途中仲見到阿YO添~係惠康買咗一大堆調味煮食野,就搭的士番屋企,又一輪執執抺抺,不過今次可以睇住電視黎搞~

PS:人家預電視個位都唔錯,坐係梳化睇好舒服吓~應記一功!

週月日

朝早去新居試吓之前買落既慳電膽啱唔啱安落士多房,厨房,厠所同走廊既燈座用.試過無問題同夠光,就騎羊去華都相熟商店配燈膽同拖板.阿叔好pro咁將我帶去既原屋有既舊慳電膽放入燈座,用測光錶度吓,再度下我配既慳電膽既光度,又真係佢賣個啲光啲喎~

去埋隔離鋪(阿叔老闆自稱係佢既妹開)買天線,阿姐問要普通定係靚啲,我答靚啲.阿姐攞條一舊水多啲既線出黎,我問佢有無靚啲,點知阿姐答有之餘,就攞條$420瑞士線出黎!!我問有無啲中價啲,阿姐話無,又sell話呢條線好靚又耐用,十年都無問題.我問佢如果天台條魚骨架無變,只係屋內既天線靚啲會唔會有分別,阿姐話會幫補吓,好過用平線.由於之前係村睇電視都係有時有雪花,唔太爽,於是都買咗條瑞士造既天線(massive bleeding X 1)

再騎羊去台灣女生樓下既惠康買咗啲飲品,同少少日用品.跟住就急急騎羊去新居等收衣櫃同電視.兩點幾左右就有人黎到送衣櫃(一個趙門款放掛衫,一個抽屜款放摺衫),即場篏砌.三點左右就收電視,台灣女生放咗工番屋企攞埋同伯母一齊買既"砂煲冷撐"搭的士黎新居.
人家同我又一輪執執抺抺,一心等電視安裝師傅上門,點知等到六幾都無聲無影,於是打去中原問吓.點知哥仔話日立個邊可能漏單,叫我地唔好等,聽日幫我地問清楚,盡量改聽日一點前(因為我番晏).週月日無電視睇,好似爭咁啲......

由於忙住執執抺抺,所以叫咗pizza hut外賣餐(夏威夷三重芝士pizza+咖喱雞皇飯+燒豬肋骨+忌廉湯X 2)加上我今日係超市買既香檳仔(已雪凍),咁就係我地既週月晚餐la,cheers~

搞牌費,德輝技工師傅大家訪

番完個早更,好趕咁騎羊去元朗新B附近既良記車行搞牌費,上次係原廠訂parts時,個sale(黃生)好似唔係好想幫我搞咁,可能係唔收錢既關係.問德輝意見,於是去佢幫襯開既良記搞,俾多$50水腳錢,就可以第二日傍晚六點就有得攞~

俾完錢,去咗建城食野.雖然係轉咗手,啲野食無咁好食(好記得德輝惋惜既表情),但呢度係之前同啲兄弟既聚腳地,所以都係情意結下幫襯吓.好趕好趕咁走去7-11買兩支可樂同一支水,騎羊仔去新居,因為德輝放三點幾,黎我屋企幫手鑽窗簾架~

德輝帶埋個電鑽同電批,配上我放工係更衣室攞起既工具箱,德輝師傅就開工啦.我就好似學師仔咁跟頭跟尾(e.g.拎住個垃圾剷黎兜住啲灰)一路鑽架,一路同德輝講吓屋企野,德輝話我比之前無咁唔開心,但都係未下到啖氣(我都係咁諗,咁大既衝擊,可能要多啲時間黎沖淡吓)講到新居,德煇都話低租同"四正",配上傢俱都幾舒服~

臨尾叫德輝幫我鑽多個窿黎掛鐘,提意搞好晒之後就一齊搭輕鐵轉西鐵去元朗食飯.

一人一個鐵板餐,請客聊表謝意~雖然直系家庭無咩溫暖,好在身邊既兄弟好友都好關照我呢個"孤兒仔"~

收貨日

今日好忙吓,中午時份到新居,等收雪櫃.送貨哥仔又係好似送洗衣機個哥仔咁話個盒留住幾日,過咗頭七(購買後七日)至好掉個盒.講真,真係要換既話,用番個舊盒都入唔番落去同砌番一箱野攞走啦....跟住有一個時間,有七個男人,一個女人共相處一屋....其實係IKEA送貨同吉之島送床,每邊三個大男人度砌傢俱,我同台灣女生做監工~

本來間屋除咗個客廳有張梳化,就空洞洞,但當送貨部隊到達後,成間屋就唔同晒.三個IKEA既哥仔係客廳擺地攤咁砌書架,飯枱椅,書枱,電視櫃,金屬雜物架,display櫃,浴室trolley仔,床頭櫃同金屬掛衫架.無幾耐送床黎既哥仔又黎到,將一件件散件拎入睡房砌.台灣女生番完夜,訓醒黎到時己經見有兩team人做緊野,仲提我俾利是兩team人.好在當初俾多少少錢叫IKEA啲人黎砌傢俱,真係幾多野搞,食飯橷都要砌,書枱,書架,櫃桶,床頭櫃更加不在話下.....

送床個team人好好禮貌,一個鐘唔洗就篏好張床.IKEA個team就要個幾鐘至砌好晒啲傢俱.人地有晒架生又熟生都要近兩個鐘,如果只係我同人家搞既話,都唔知搞到幾時至收科.

本來IKEA送埋我地之前買既雜貨,但點數時發覺少咗窗簾布同兩個膠箱,後黎哥仔上番車check到有箱不知明貨品,拆出黎睇至知係我地既貨品,好在無漏到同唔洗再等補番貨啫.張食飯枱玻璃面好似有條花痕,哥仔話係包裝時俾啲熱熔膠黐住咗,用白電油抺吓就得,再唔係打電話去客戶熱線換個塊.唯有試吓搵白電油試吓先啦..

兩TEAM人走晒之後,我同人家就著手抺野,抺地.遲幾日就要收電視,再去搞上網電話線,搬新居真係好多野要做,日日都好似好忙咁

A/N收梳化,無覺好訓

今日A/N,但都係無咩點訓.早更之後,騎羊去食單身漢餐,再去新居等收梳化.其實張梳化本來話無貨,要一個月後至有,但又唔知點解前幾曰收到電話話唔會再有得訂,賣埋陳列品就算.我地見特價(5千幾減到3千幾),加上望過陳列品都唔係好殘,係當初佢地話唔賣啫,所以都好接受~

係地下訓一陣,就收到歐化既電話.件貨送到都大件吓,比想像中大件,睇落去同台灣女生當初既設計圖真係有啲出入.

張梳化真係幾好坐,我打橫訓上去都夠長.本來諗住可以好好地訓番兩個鐘至番夜,點知業主啲孫仔女係我屋企對出玩羽毛球,數字球,同SURROUND SOUND尖叫奔走..跟本訓唔到.

唯有攞部nds打機戰W,打到咁上下就騎羊去台灣女生屋企食晚飯,再番夜更.....

星期六日真係好不利我地呢啲番shif既在職人士........

搞三保

又到三月,愛羊既三保同費又到期啦.之前打去德輝介紹既agent問三保價,報$998,原廠就報$1000.既然平得兩蚊,我就今朝搭巴士出去觀塘鈴木科研搞三保.係市中心等268d時,台灣女生同伯母坐263途經市中心站時見到我係度等車,仲打電話話我知兼揮手.人家今朝出去宜家買多少少野喎,所以同伯母出去一趙.

出到原廠,都係見到啲舊臉孔,由03年出第一隻羊到而家都係無咩點轉過人.本來想搭單搞埋牌費,但黃生話啲同事見人多排隊就唔會排住,所以可能要好幾日至有得攞,好似唔係好想幫我搞咁,於是我只係搞三保就算.

坐番巴士入市中心,去咗大姆指打住nds機戰w食晏.本來人家話買完野,一齊係市中心集合食晏,但由於人家同伯母買耐咗野,所以只係夠時間番娘家放低啲野同係自己屋企食少少野,再趕番晏.我都係一樣,食完晏,就搭輕鐵去番工lu,再問下德輝有邊間相熟代辦三保既車行先~

機動警察BRAVE合金

番完早更,騎羊去置樂,食單身漢餐.上埋去相熟玩具商場兜吓,見機動警察超合金出咗,去多幾間格價,都係得前"反斗"鋪有得賣($698),於是急急去附近既自動櫃員機"o禁"錢.

行番上商場時經過newtype,醒起要買個keroro防狼器俾台灣女生,於是入去搵哥哥仔.點知賣晒,要訂貨,大約十幾號會番貨.見都係等兩個禮拜左右,於是落訂等貨~

跟住又行番去買超合金,叫老細俾隻新既過我.老細開箱攞盒新既俾我check.由於太興奮,不禁同老細講"等咗咁多年卒之都出超金啦~"老細話有八成係合金,幾重手吓.交收完畢,騎羊去村放低阿魯凡超合金,再騎羊去新居.

有啲攰既關係,係新居沖個涼先,再拆盞燈落黎,再去華都相熟電子店鋪配慳電膽同買電拖板,又番去新居試吓個慳電膽啱唔啱用.

心血來潮想同人家睇吓戲,之前新年話想睇齣"翻生侏羅紀都無睇到.八點零鐘騎羊去新墟,見凱都有得睇,九點十個字有一場,send短訊俾人家,人家都話好.係老麥食個反脂肪餐,再騎羊番公司,冚好羊仔.係七仔對開橷仔坐低,打住nds既機戰w黎等人家放工.

同人家搭兩個站輕鐵去買飛睇戲,我同人家講齣戲係賠罪,因為我今日花咗錢黎買超合金.人家無話我,因知道我真係鍾意,始終覺得交代聲好啲,呢段時間係應該一齊挨既時刻嘛~齣戲都幾ok,輕鬆吓近來繃緊既心情都好丫~

ps:"阿魯凡"係機動警察裡面,主角泉野明所駕駛既一號之名字,佢由細到大都將自己既寵物起名做"阿魯凡",之前係狗同貓,跟住係特車二組第二小隊既一號機.

(食野+抹野) x 2

朝早遲咗出門口,係村口茶餐廳食過早餐,就搭的士去台灣女生屋企.幫手拎啲野落樓,同人家,伯母一齊落的士站,伯母去買拜四角物品,我就去雜貨店買張圓櫈,人家去買水.人齊集合,一齊搭的士去新居搞清潔. 

伯母拜完神之後,就開始掃地拖地,人家就抺窗,我就抺門同摛高抺冷氣機位,再同人家一齊抺窗.伯母好快手咁抺埋厠所同厨房爐頭.一點鐘多啲,我地就搭小巴去市中心飲茶小休,兩個字時間就到市中心~

去到海霸,見有人等緊位,但唔知點解我地話三位,姐仔就俾咭同枱號叫我地入去,好彩x 1~好快咁劃點心紙,大家都攰攰地,食過點心之後,有電話打黎話會黎送洗衣機.

埋單好趕咁去番吉之島既傢俱部買之前睇中既衣櫃.嘩~真係有折喎,九折呀,阿姐真係無講錯等多兩日真係有著數~阿姐認得我地,好快就開單.行去隔離既十蚊場買多兩個水桶同抺紙,清潔刷就搭的士入新居等收洗衣機.

送貨哥仔好快就黎到同裝好部機,簽收完之後哥仔唔幫我地扔包裝紙皮同發泡膠,話留幾日以防要換機,搵笨..

我同人家繼續抹房窗,我抺出面,人家抺入面,好係法國黙劇咁.啲窗又真係幾"那渣",要抺成三四桶水至乾淨,好攰,三間房,一個厨房.抽油煙機頂有多玻璃碎,可能係鑽窿俾條氣喉過時,無洗理到.人家同我講第時可能真係要re個O黎抹窗,我半開玩笑咁話不如叫家務助理黎抹窗跟住抹埋厠所牆,厨房...

夜晚上人家屋企,伯母已為我地準備好晚飯,今日真係太充實同勞動..聽日仲要返早更添.....