經過一晚辛勞,卒之都起咗個七年半後既留言下集.我將同一份內容,抄寫到現行既留言簿,跟番個時間序嘛.
可以八點起身,已經係恩賜,幸男卒之都可以精神兼心情靚靚咁出街.
第一個景點係當地出名既洋菓子店LeTAO,當年我同台灣女生都有幫襯過.以前無樹遮擋,而家就因綠化而有紅葉睇.
Cake Set做早餐,大人細路都會啱.我同人家揀咗當年紅到而家既人氣蛋糕-Double Fromage!
幸男當然揀咗士多啤梨忌廉蛋糕,加埋杯大人份量既凍橙汁,絶對無投訴既空間.
搵番當年同人家坐既枱,為人家拍照懷愐.
唔記得以前有無得行上頂樓搖鐘,不過我就好記得影呢張相時我踎低又側彎腰.....
經過郵局,原本一心入去望吓有咩精品買,見到郵局造型既明信片,忽發奇想,不如寫張POST CARD俾外母,以及自己屋企(記下此刻心情).
人家捉住幸男隻手一齊寫祝褔字句俾婆婆,下款的名字當然係幸男自己寫.
郵局内有個踩三輪車既熊仔郵差(標本)，幸男無懷疑真偽，就同郵差合照。人家就係後方努力寫第二張明信片。
無花無假，真係同門口既郵筒一模一樣。
番到坂之上館，見屋主係花園修剪盆栽，我以手機展示七年前冬天於門口與屋主之合照。屋主對我地故地重遊,感到開心;對再一次合照,感到難為情(恥ずかしい).
屋主既主館以花園連結別館,相信平日屋主都會係花園度消磨時間,別館既露台仲可以BBQ會友.
臨近交匙,set腳架係屋內影相留念,呢張梳化當單人床訓都得.
呢張相原本設定係大家一齊幸男笑,可惜我同幸男出賣了人家.
交收屋匙及房租之前,屋主送咗個木制既象形擺設俾幸男.道別後,我地行番落斜坡,見到氣笛報時,今次趕得切以相機拍下特別時刻.
午餐我地去咗當年係網走幫襯過既西餐廳集團Victoria Station,職員俾咗一籃小玩具俾幸男揀一個,幸男好似禮物收過不停咁.
餐廳賣點係鐵板餐,而且有個燒熱既厚鐵餅,俾客人將攤涼了既肉扒加熱.我點既係牛肩胛希少既部位ハネシタ,雖然唔知係邊忽(打日記時上網搵到係Chuck Flap Tail下肩胛襯底板肉),但肉嫰味美就可以了.
食完飯,係玻璃手工店OUTLET買咗三隻杯(平3分1價錢),行去巴士站等車去博物館,見到LeTAO既職員向途人派發甜品試食.當地既車夫亦好識做,會停低車子,俾乘客試食,間接幫本地商店搵生意,守望相助.
小樽市綜合博物館,門外好似好冷清咁,啱晒怕迫既我.
原來博物館分本館及運河館,我地只參觀前身為交通紀念館既本館.大部份地方係戶外, 幸男可以入去舊式火車既駕駛室參觀.
俾入場費時,職員話有得搭蒸氣火車,一日得三班,咁啱我地可以趕搭最後一班(15:30).
領隊話只知有個小樽博物館內有火車相關主題,官網都無咁介紹有蒸氣火車.
車卡上除咗我地一家三口,仲有一對夫婦,及四人家庭.
路軌車程只係戶外區域既一頭一尾,沿途可以觀望其他停泊於戶外之舊火車,順道當遊車河兜風.
話咁快就到站,唔知以前呢個車站真係叫手宮呢?
幸男係回轉台望火車轉方向,再搭番回程往起點,之後火車係回轉台往後駛入車棚.
幸男家訪蒸氣火車頭,呢架只供觀賞,應該不再可以行走.
幸男行均成個戶外區,與各心儀既火車合照,呢架全黑色既火車,有我鄉下釧路既字.我同人家第一次坐蒸氣火車,就係釧路.
呢架成隻龍蝦咁既工作火車,唔知高度線準唔準呢?
室內區只係擺放咗呢一部火車,未知是否鎮館之寶,館內有舊式火車工作員既帽同外套供遊人穿上拍照留念.
係精品部買過紀念品,搭番巴士去JR車站.原本可以趕搭4分鐘後既指定席,但職員覺得太趕(太唔了解香港人既生活節奏),要我地買半個鐘後既指定席車票.我係車站商場內買咗份炸雞同人家分黎食(見店舖張貼電視介紹之報導),幸男見咁香口,又話要一齊食,結果一家三口分半隻雞.
小樽車站月台掛滿懷舊既火水燈,其實內部已改裝為黃光電燈炟,驟眼望落去與火水燈無異.個人好喜歡將新元素加入舊事物,充分表現出傳承既本質.
於札幌相熟既酒店CHECK IN,今次個房升級咗(無加收我地錢),有茶几,雙人梳化兼兩張靠背椅.廁所都在兩個,一個連浴室,一個淨座廁同洗手盆.行李喼可以放係另一邊角位攤開,夠晒空間,唔再舉步維艱.
晚餐係火車站商場既餐廳樓層揀選,原本想食炸豬扒,但幸男要食冷麵,結果揀咗間普普通通既日式料理,我只係叫咗個咖哩牛肉烏冬.
番到酒店,幸男自己坐咗係浴缸內,一心今晚要bubble bath.
幸男訓著咗,我就邊用手機配耳向聽歌,一邊享用消夜.人家亦邊食LeTAO買既提子朱古力,邊手機上網及整理行程表.原本尋日晏晝去火車博物館,但因太趕而無去(幸男亦太攰).今日抽起咗番札幌參考白之戀人朱古力廠(貪有小朋友玩樂場兼坐小火車),補去火車博物館.幸男於火車博物館玩得開心,點都比朱古力廠吸引,反正幸男都唔鍾意朱古力.
