午餐係札幌ESTA商場大樓10樓拉麵共和國搵麵食,我呢碗期間限定既辣豚肉拉麵.
幸男揀入呢間拉麵,但一入到去就話唔啱,結果都坐底咗,但個醬油拉麵真係好重色水同鹹口,胃食男都有失手之時......
食完個拉麵,突然好肚痛,唔知係咪太奔波,作腸抽筋.我同幸男係巴士站候車處坐住黎看管手攜行李(兼且等药力發揮),台灣女生就一個人去商場買蛋糕.上旅遊巴,訓咗陣,好似無咁痛,飲晒成罐奶茶都無事.
是晚投宿既溫泉旅館係"乃の風リゾート",一落旅遊巴入大堂check in就有職員為我地拎手提行李上樓上.於留宿之樓層小lobby呈上wellcome drink同小食,介紹完晚朝食時間以及蛋糕換領劵,才帶我地入房.
房間對正洞爺湖，唔係望到左右既山巒陸地，仲以為係對住個海。藍天白雲，其實係打緊風。無香港既颱風級别參考，齋睇電視根本唔知個風幾勁…安頓好行李,一齊落去CAFE換蛋糕,行旅遊書介紹景點之一既旅館商店.
和式矮枱，每次都好怕要跪坐或盤膝而坐，但呢個豆袋坐墊又幾舒服。除咗唔洗硬坐塌塌米，仲有部分既豆粒填充物支撑腰背(盤骨背)。
呢間房既另一賣點，私人温泉，涼完涼就可以鬆一鬆。
一家人先浸一次溫泉，換上溫泉旅館浴衣，準備落餐廳食晚飯。
晚餐係自助餐形式,幸男繼續果汁不離口,菜色亦合心意.
呢個就係我晚餐第一輪既選擇,牛扒非常好食,日本牛係唔同啲.
是日牛一,兩父子一齊合照,其實每次由人家操機都擔心唔會知影咗啲mug.
用餐時間侍應忙過不停,帶位,換碟,收拾枱面,我地都唔好意思強拉一個侍應生幫我地合照.
肚痛不再,當要進軍第二輪晚食,和牛同刺身當然唔少得,無諗過洋蔥配壽司飯都幾夾(予人清新既感覺),沙律菜配煙肉粒亦令我歡喜.
尋晚係札幌番酒店前,係便利點買咗排雞蛋黎幫幸男"碌"眼(又起眼瘡),我地帶埋排雞蛋黎洞爺繼續療程.
人家以蘋果批當生日蛋糕,因為唔洗雪糕保存,室溫安放都無問題.ROYCE朱古力薯片,係幸男係午飯後,同人家一齊買俾我既生日禮物.
Set好腳架，加上閃燈，擺好個陣，“do do do do dodododo.....咔嚓”蠟燭係人家買蛋糕時經過百货公司loft揀選，汽球同充氣泵就由香港帶黎。幸男出年就升小學,自己今年36歲,正正有點唏噓,突然想起何不潤飾一下呢份唏噓?結果造就了今次闔家日本旅行過生日之初型(冚家剷去日本過生日),當然多得台灣女生既精心安排前期準備,以及領隊工作.
沖完涼，一家人再浸多一次房間既溫泉。上次去九洲旅行，幸男只係試過浸足湯，今次就真係正式溫泉。起初幸男嫌熱，先浸腳一陣，再落半身，繼而全身至頸。耐力當然唔及大人，但幸男無抗拒之餘，仲好鍾意(當玩水？)。
臨近十二點,將收係玄關既當地玻璃頸飾送俾人家,生日快樂~原本想買花,但禮品部既職帶我去櫃檯問,但要開車至去到附花店,職員亦無示意可賖一支玫瑰花俾我.........唯有齋買禮品部既北海道制既玻璃頸飾,呢款顏色確實好有秋意,切合今次紅葉之旅主題.付款時不忘賖番張咭寫字,仲要問職員借筆,坐埋一邊寫.....
PS:原本係房間可以望到洞爺湖既煙火表演,因颱風影響而取消,但沒有破壞我既心情.可以輕輕鬆鬆,三口子浸溫泉同食豐富晚餐,已經很足夠了.
