早餐係和式朝食,雖然唔太啱口味,但總叫填包個肚.食飽就同幸男浸多次溫泉,仲要係全露天既湯池.Check out後,搭番一個鐘多巴士番札幌.
放低手提行李入商場LOCKER,立即搵地方食晏.
我原本以為呢間日式洋食餐廳有牛扒食(店外MENU相),點知要晚餐至有得order,結果叫咗芝士pizza,海鮮意粉同肉醬意粉.
幸男好似要用餐叉捲最多既肉醬意粉,再一大口食.大家都對午餐感到滿足,係東急百貨行童裝部,揀咗兩件T恤及一條手巾俾幸男(長袖T恤同手巾係新幹線主題;短袖T恤就係THOMAS).
跟隨領隊,地鐵轉市電,再駁免費穿梭巴士,黎到藻岩山展望台.
幸男對大型纜車感到新奇,因為過往乘纜車既經驗,頂多容納8位乘客.
兩程纜車之後,係展望台見到掛滿情侶鎖既"恋人聖域".舊年去九州既褔岡塔都有類似既"恋人聖域".睇黎凡係有浪漫夜景既景點,就會有"恋人聖域".
黃昏時間,人流開始增多,溫度亦開始下降.
正當我挨住風吹黎調校相機設定時,幸男狼吞虎嚥咁處理暖烘烘既罐頭粟米湯.
搞咁耐,為既就係呢張合照.由於大風,我都好驚相機會被吹翻.我係相機隔離守候一陣,見相機都無被吹郁,我至召喚人家抱起幸男,自己就跑去騰空既位置.
趁未多人,倆母子係"恋人聖域"搖鐘合照.
一家三口入去搖鐘影相太迫了,都係以鐘塔融入背景黎合照就好了.
太陽落山了......
今日天氣好,能見度高,夜景份外明亮.
於禮品部買咗少少紀念品,搭番纜車落去轉免費穿梭巴士,再上市電,前往晚飯地點.
原本諗住幸男生日果晚黎食,但當日番到札幌間酒店已經六點幾,所以順延到今晚至黎.
有橙汁食既小朋友係特別開心,我細個跟屋企人去深井食晚飯,都好想有杯果汁先生飲吓.
有相熟牌子既生啤,當然要叫番杯黎嘆吓~
無餐叫,全部都係逐樣計,海鮮方面,我地叫咗魷魚同扇貝.
黎到日本當然要食和牛,和牛固然係好食,個醬汁亦都好正~
我地仲柯打咗豬腩肉,同豬腸,食材同味道都比香港既日式燒肉店好.埋單後,臨出門口,我同男職員講"おいしい",職員笑著點頭送客.
鬧市五光十色,不時見到有案內所招牌,但較吸引我既係本地酒品既盛行.
臨番酒店前,我地係便利店買嘢.番到相熟酒店,不止一次為我地check in既酒店男職員望過passport都不禁説"また(又黎)?"幸男係房間食士多啤利雪糕,雖然當地士多啤利未當做,但幸男都無話唔好食(唔通係外果士多啤利?)
奉太座之命,落樓酒店去前方既天橋影札幌電視塔,可惜出酒店時發現燈己熄.......
手持SONY A7同Manfrotto Befree腳架,心血來潮,手動模式影汽車燈軌.其實係香港都想影,但屋企附近既天橋欄柵太高,我個腳架未能應付.再加上天橋人來人住又窄(兩個成年人身位),除非深夜時份出動.札幌商場八九點就閂門,人流亦較疏落,我可以好放心咁展開腳架及慢慢調校設定.
調番轉方向,面向酒店旁側,如果有鐵路經過就更加好lu.
番到酒店,享用係小樽買既咖哩杯麵配今晚買既high ball.當時買呢個杯麵,係因為早食晚飯,怕臨訓前肚餓,點知當晚同人家分咗個小芝士蛋糕就食飽.呢個杯麵跟住我地去洞爺,登別,定山溪...到今晚至有機會肚餓,當作宵夜食.
明日就出發去東京,旅程去到最後幾天,有點唔捨得北海道.結婚蜜月旅行,始終有情義結,忘不了第一次睇雪既感動,鐵道遊既飄泊......二人世界既對話,無論情深對白,無聊閒話,定係人生觀交流,匯總成現在幸男的父母.
PS:地鐵站內有燒鯛魚店,幸男好似大白鯊獵食咁~
