北海道東京親子旅行Day 7

繼爸爸媽媽之後，幸男擔當是日之星，早餐時間就撒嬌地表明“今日我生日，我要食我想食既嘢”(暗示媽媽唔好以均衡飮食黎左右幸男既選擇)。

自從同幸男講過star war漫画，幸男常擺出奇怪姿勢並發出劍擊聲“鏘(chang)”.

JR站放低行李入locker,一齊行去民居彼鄰既主題樂園~登別マリンパークニクス.
登別海洋樂園既主打,企鵝巡遊.幸男見到爸爸媽媽去北海道旭川動物園睇企鵝巡遊既相,話好想睇企鵝,人家見登別呢個主題樂園有企鵝,至將登別列入今次親子旅行既其中一站.企鵝小隊後方既職員推住既BB車,原來內藏清潔工具,因率性既企鵝會邊行邊方便.

兒童天地有不少玩意,由於幸男唔夠高,玩唔到碰碰車,所以只能玩小型軚盤車.幸男話要揀方程式車款,唔知係咪受高智能方程式所薰陶(定係瑪利奧賽車).

眼利既幸男,話要坐企鵝卡廂,我心諗:都係外裝有企鵝啫.等咗一個轉,原來卡廂內有隻企鵝公仔.

上次係九洲坐摩天輪,卡廂內有WINNE THE POOL公仔,今次就有企鵝公仔,我係幸男都會覺得開心.

幸男件毛衣"eat(食) sleep(訓) play(玩) repeat(重覆)"完全切合小朋友去旅行既心意,人家話睇到呢件衫時就覺得一定要買俾幸男.

急住步入去霸位睇銀河水槽,其實係由一萬條沙丁魚配合燈火音效既誘導游動,交織出閃爍既大型絲帶舞.起初幸男話無興趣,但完場時幸男都話好靚又好睇,我本人都覺得蠻有新意.

因為我地仲未用晒兒童天地既代用劵(一千円11張),所以再入番去用埋剩餘既代用劵.

指定動作之一當然係迴旋木馬,可惜人家安頓好幸男上馬後,旁邊既木馬已被人佔坐.

路軌機械人,行得好慢...

最後既代用劵,俾幸男自己一個人坐多次迴旋木馬.細心既職員姐姐幫幸男上馬,停止轉動時亦幫幸男落地.

呢一款既電動車,係投幣式,幸男變成tomica的士司機.當限定時間到,電動車就失去動力,停在路中心.我嘗試將車推回原處,但輪胎被鎖定了,唯有棄車潛逃....

午餐時間係一間餐廳內享用,幸男揀咗個香口之選-薯條配炸雞塊.

之後繼續行海洋館內既展覽,累透既我原本已收相機,但結果都有為兩母子合照.

出番戶外,睇多次企鵝巡遊,跟埋佢地行番居住區.呢隻郁都唔郁既企鵝,我仲為係假貨,原來係真品.

細細地都有個海洋劇場,好在我地早到霸位,因為後來就連大後方企位都逼滿人.海豚表演比較簡單,無係九洲果個咁多花款及富速度感.

原本打算早走就時間黎追火車,點知海洋劇場15分鐘就散場.

臨走買咗盒海洋動物造型既曲奇餅,俾幸男番學時當手信,正式告別登別.旅行期間,我不時拍下幸男同人家既背影,心情係望著你倆安好就足願矣.

火車往札幌時,有彩虹出現,幸男仲好自豪地話好在無訓覺.

房間無好似上次咁upgrade,幸男當然心急想玩生日禮物玩具,但都要乖乖影埋生日全家幅先.

人家自己係札幌JR站商場搵店舖買蛋糕,我同幸男係車站邊看管行李邊等候,於附近既花店買咗一細束玫瑰花補送俾人家賀生日.

雖然細束少少,但都有兩種顏色,望人家笑納.

由於酒店雪櫃唔夠放入蛋糕,所以我地先食晒生日蛋糕.原本諗住同幸男搭地鐵去食燒肉,但見已七點有多,又食咗蛋糕打底,於是問幸男介唔介意去酒店附近既相熟拉麵店食晚餐.一句"唔介意",我地就出發.今次唔再一人一碗,兩碗拉麵加一碟餃子,份量啱啱好,只係我今次果款叉燒較少.第一晚黎食果陣,幸男已經話好好食,今次再度惠顧,幸男依舊滿足.

幸男,生日快樂,身體健康,快高長大~希望是次生日旅行,為你帶來美滿幸褔既回憶.從呢份幸褔,培養出善良既心,令身邊既人都感到幸褔~