為咗慳時間,朝早起身梳洗後落去酒店既餐廳食早餐.選擇無預期中咁多,比溫泉旅館遜色.
Check out及寄存行李後,行去巴士站等上車前往定山溪.
車程約一個鐘,由於房間未準備好,我地先係cafe坐住等.住客可以自由享用咖啡,最特別既就係各式蜜糖,用黎沖蜜糖水飲.
台灣女生為幸男揀咗提子味蜜糖,幸男試過都話啱口味.
房間比登別既旅館新淨,兩大一小床,仲有位放張梳化同茶几.
房間望正定山溪,如果山巒下無另一間旅館,就會係純天然風景.
放低行李,一行出旅館無耐就見到河童手湯池,幸男好開心咁將溫泉水注入河童頭,因為溫泉水會從河童口吐出.
咁細個地方既有個許願既繪馬架,唔知遊客係咪買定繪馬黎掛既呢?
近三點鐘,好多食店已關門休息,好在呢間"紅善亭"仲未閂.呢位part time職員都年紀不輕,但店主都無紀相若(爺爺級).店內既奬狀舊到發黃,可見該店歷史悠久.
呢間食店主打天婦羅,以有限日文去理解菜單,應該係10月期內只有限定既款式.唔知係食材當做,定係減少選擇以應付多遊客到訪賞紅葉?
人家同幸男分別揀咗冷蕎麥麵同冷烏冬,如果有多啲種類選擇就更好了.
定山溪比登別更少食店,可能本身地方較細.樹林地方不少,紅葉亦比較明顯,感覺蠻舒服.
行咗陣就見到有足湯,由於人家著咗長襪,所以得我同幸男方便浸腳.有個當地年青人浸咗一輪就離開,番黎拎住便利店買既飲品,再除鞋襪浸浴雙足.
足湯隔離有個毛巾自動販賣機,可惜毛巾賣晒.....見有部求籤機,投入硬幣,幸男求得"小吉".
街道上不時出現紅葉,雖然未至於通街都係，但確實為秋意生色不少(始終相片不能表達溫度)。
行去二見公園，賞楓景點之一就係二見吊橋。
吊橋無咩特别，大力dum地至會有少少搖晃,唔知背後有咩歷史故事?
人家話呢個景靚，我就覺得近橋一點就仲好，可惜再近又無位企……
有遊客企係溪澗既石上駐足賞楓，相信紅葉全盛期會壯觀得多。
臨天黑,趁未收腳架,黎多張家庭合照.
番到溫泉旅館,我同幸男去浸溫泉,番房會合人家,一齊落樓去食晩飯.枱上有張手寫菜單既副本,幸男食既當然係兒童定食.
菜單都唔係樣樣啱食,但個飯就真係幾盞鬼,酒精啫喱燒住小型飯窩黎煲飯.
每碟菜色都好精巧,份量唔多,以多碟數黎滿足住客既胃口.
我同人家都追加廚師精選之一：芝士焗龍蝦，雖然唔及容龍既芝士焗龍蝦咁好味，但總算試過日式既手法。
甜品貫徹菜單精緻既風格.定山溪地方唔大,感覺好似係去咗長洲咁,但距離大城市札幌只係一個鐘多車程,相信吸引唔少本地人來度週末.如香港有咁既地方,我願意騎著愛羊,遊車河之餘又可以浸溫泉放鬆一下身心.
番到房間,執定毛巾準備去浸多次溫泉,幸男卻係兩大一小床之間走動,享受彈與走之平衡.
幸男右眼持續紅腫,人家繼續趁幸男訓著後,以熟雞蛋熱敷.今次隨團既毛公仔加添當年去北海道蜜月旅行既旭川動物園企鵝(迎合睇企鵝巡遊既項目).
PS：臨訓前一個人去咗湯場浸多次溫泉,獨個兒享受深夜既寧靜同沉思.明明夜深湯場無咩人,但鞋架上既拖鞋被人攞錯,結果要求其攞一對黎著番入房(好似人家係飯前浸溫泉既經歷一樣).
