朝早係酒店食早餐(領隊視點)，因為今日我哋要check out之餘，仲要趕去一個景點。
放低行李係大堂暫存，我哋就搭地鐵出發。因為我尋日係列車跌咗張蠔咭，所以領隊要用信用咭入閘。
King's Cross St. Pancras站搭6分鐘左右車就到，人行就話要半個鐘。
一行出車站就見到沿路有攤檔賣精品。
輕裝上陣，呢度仲未係球場，過埋條橋至係。
突然肚痛，入場前急去搵廁所，兩母子影住相等。
會合大隊，入閘前嚟張自拍照。
過晒安檢同閘口，搵到座位所在地，就去買嘢飲，無諗到啤酒汽水係買一送一。
由於啤酒唔可以帶入看台，兩母子先入去坐低。
我就努力連飲兩杯啤酒，有唔少fans著住SAKA既波衫。
我哋早入場，所以大把時間係度影相。
我諗我哋已成功融入主場球迷區，老外球迷見我幫兩母子影相，主動幫我哋影家庭合照。
近距離到智能電話都影到熱身花絮。
主隊球迷除咗有旗手，仲有樂隊打氣。
由於只係食咗個晏早餐，所以去咗小食部買個雞肉夾包俾幸男。
吉祥物出場與球迷合照，J League我就知每隊都有，但平時係now睇英超就唔覺。
好在我哋早入場，因為有部份球迷因入閘系統問題而入唔到場，大會宣布延遲30分鐘開波。
自拍住嚟等開波，可惜出發前都未有Flip 5上市，我要身在英國係SAMSUNG香港官網訂購。
阿仙奴既NKETIAH先開紀錄，SAKA攻入阿仙奴第二球，下半場82’AWONIYI為森林破蛋。
為免散場人流管制，我哋臨完場前分補時階段就離座，順利入到地鐵站兼上車。番酒店拎番行李，call Uber直去機場。幸男係車上用電話睇白禮頓對盧頓，用盡啲數據嘛。
一個鐘頭多啲車程到機場，行李寄存因為過重，領隊要即場開喼，將重量轉移到另一個喼。過埋安檢，搵咗間拉麵店食晚餐，買埋嫲嫲既手信就準備上機。
呢餐係我哋係英國既第一餐日本料理，味道都算ok。
2星期理應好耐，但又唔覺唔覺又過咗半個月英倫生活。今次旅行中，幸男多咗參預幫手提議景點兼搵路，仲記得小學幸男係本日本旅遊書上貼滿企鵝貼紙(表示佢想去既地方)。我就依舊做身兼跟班及攝影紀錄既金主，當然仲有做丑人嚟執整吓年青人既品行。
準備飛12個鐘番香港，完結足球為主題既英倫之旅。
PS:原本諗住可以探埋阿Bill，但佢一家咁啱番咗香港探親(向左走向右走)。David就話下個月番香港探親，叫我唔好特意上去無咩嘢玩既Nottingham搵佢，所以只係於同一個時區用whatsapp閑聊。
