英倫親子遊Day 7

朝早係WEMBLEY PARK車站等車，今日既主題係為我而設既NATIONAL MOTORCYCLE MUSEUM。

EUSTON站轉搭Avanti West Coast列車，唔少長途乘客都好似我哋咁離開倫敦。

開車前被領隊吩咐快買早餐上車食，結果都係三文治加果汁。

一個鐘頭十五分鐘既車程，經過當年大佬健留學既地方。

出咗Birmingham International Station都要再轉的士去目的地，上車前問司機大約要幾錢?司機回"你有幾多錢?"，我答"應該足夠"。13分鐘車程，大約70蚊港紙。

一落車就見到有隻孔雀行向的士，司機仲係車內搵麵包屑黎餵佢。

門面無咩特別，入到去就有古董電單車既陳設，以及懷舊海報。踏入館內，就係小食部及精品部，另一邊廂既景像，令我感動-MANX TT SUPER BIKE!!

呢架車充滿阿基拉既味道，真係無印象真實世界呢款車既存在。

飲食的確係好大既衝擊，小食店有砌餅，焗薯，包類三文治，熱湯及飲品。晏晝果餐就係咁樣，輕食填肚。

呢個PIZZA刀夠晒騎士風。

除咗襟章，我就睇中咗呢款薄褸，雖然唔係英國製，但總算係英國品牌。埋數時問職員係咪執冧，回覆係另一間(美國)至係。

我同領隊先行一轉，幸男坐定定看行李。

二人自拍，諗起拍拖時同人家去香港電單車節。

呢架1959年既Velocette Venom 500cc，非常得我歡心。

速度錶安置係車燈上，另外仲有個電壓錶，感覺好特別。

銀色油缸撞黑色車身，油缸兩邊仲有膠片俾車手夾油缸用，方便隔熱隔震?

領隊用XPERIA 1幫我補影。
軍用電單車，side car係流動炮台。

空投物資見得多，無諗過電單車都可以。設計呈長形，把手同seat位可以摺疊作收納於保護capsule內。

呢款大包圍，究竟可唔可以轉彎0架呢?睇落似純直路比拼。

職員為展覽品作保養，我諗至少係除塵同防銹。

點會諗到有以前啲人會咁樣揸電單車咁前衛，就算Batpod同TRON都無趴咁前個身，兼雙腳fing到咁後。

第二轉我帶幸男入去作介紹導賞，係咁以叫佢坐低影張相就算，畢竟今日只係得我對電單車有興趣既團員。

為咗同幸男一齊壓彎，我走去一枱銀髮族問有無散銀唱，"因為我想同阿仔分享中學回憶"。

昔日既中學生，而家望住個中二學生玩番同一款街機。

希望幸男可以享受電單車既樂趣，叫幸男訓側啲黎影相，但車身好似無郁過......

臨走同Side Car的士合照，真係辛苦司機要日曬雨淋。

辛苦大家就我搭個幾鐘車去睇電單車古董。

由於未夠鐘搭番倫敦，係車站商場搵地方坐吓兼飲嘢。

咁多日都搵唔到tetley's既踪影，明明上網見TESCO有得online買。

落番去Bond Street，因為領隊受同事所託要再買包包。領隊不解我同幸男點解唔覺凍，我哋一致回覆"無你咁凍囉~"

今晚食唐餐，係皇朝同皇朝會之間，我哋揀咗繁體字餐牌既皇朝會。店內環境唔錯，十足香港既高級(酒店)中菜廳。

中餐點可以淨係開支Still water而無茶呢?問侍仔有無茶嗌，侍仔問我哋幾多個飲。我當然答三位，一向酒樓都係斷人頭計嘛。每位£4.5，呢壼鐵觀音就成$130港紙。我地無飲到要加水，唔知會唔會另收錢呢?

帶我哋入座既中年男侍應，係同我哋講普通話(唔太重捲脷口音)，安頓好我哋就忙招待其他客人。當我哋落柯打時，較後生既男侍應幫我哋落單，並同我哋講廣東話，我立即笑住答"嘩，掂呀掂呀~"。

椒鹽鮮魷，£17.8，乎合menu裡starter既份量，但真係好味道既。隔離枱有個非裔男士一人食片皮鴨(齋香酥鴨)，但只係包麼麼，無夾京葱同青瓜。

鮮蟹肉小籠包(8件)，£26，幸男既至愛。

可以係英國食到有水準既唐餐，大家都好滿足!

肉絲炒麵，£17，都夠鑊氣架，麵條仲要係脆口。

秘制麻辣法國走地雞煲(半隻)，£48，我就最鐘意呢味。市道唔好，區內好食既雞煲唔係執笠就係差咗，反而係英倫食到回味既雞煲，唔通係食材先決?

埋單後，就行番去車站搭鐵路番WEMBLEY，中餐加搭鐵路番屋企，滿滿香港既日常感。晚飯前，一齊同領隊睇包包，結果揀咗呢款Made In Spain既手袋。

PS:去Baker Street時係鐵路站見到孤星淚既宣傳廣告，諗起Tammy為朋友手作既實體飛。