小歌仔last day

朝早起身幫愛羊抹洗兼打腊,好趕好趕咁食埋個杯麵,沖埋個涼,就騎住乾乾淨淨既羊仔返工.

今日係小歌仔既last day,但都幾忙吓(近排都無咩停過).漢爺出錢叫kfc黎餞行.大家都係百忙之中抽時間入去pantry食野.

咁又識咗幾年,咁又話要走啦.大家都定咗十二月七日同佢係酒樓食餐飯,兼且歡送另一位轉ward既同事.

太多野食剩,我同蛟龍,小歌仔都係食飯時,留係pantry食埋啲剩餘物資當晚飯,我做跑腿落七仔買可樂,一人一罐(小歌仔都係照舊要coke light).

放工蛟龍話同小歌仔,星陳一齊去食b仔,我當然去坐吓啦.蛟龍用愛車兜兩位去目的地,我就騎羊出發.食完野,佢地三個去附近超級市場買聽日請大家食既野,我就騎羊去會台灣女生.

由於無咩油剩,所以入番自己村個相熟油站入油,再去人家屋企樓下.特意兜去油站,花多咗時間,搞到要人家係巴士站苦等同擔心我有事添(因騎緊羊,覆唔到多個人家既來電).

ps:可能係忙既關係,呢個P更好快就過咗,"g"字簽名要收係腦海裡了.

專羊護送雞脾餐

三點三左右到達工作地點接台灣女生放工,見人家未到,於是同制服房阿姐打牙覺.人家成三點半至換好衫出黎從後嚇我.由於人家未食藥,要食啲野先,故我地騎羊去卓爾廣場,人家上去美心買雞脾餐外賣,而我就看住隻羊仔.買完外賣,安放好係羊仔行李倉仔,咁啱有架押款車停係愛羊隔離,好在都夠位駛出(唔會唔會俾人以為我地係"步"住黎打刧呢?)

話咁快就到我屋企,人家就邊上網check資料,邊食美心雞脾餐(配一杯紅豆冰) .上網check完資料(七點四左右),我地搭小巴出市中心,仲撞到樓上小朋友阿弟同佢媽媽-王太.

去咗市中心間"法國婚紗"睇相兼問價.之前聽同事講話呢間都ok,上網見好多人都俾唔差既評價,所以都一心諗住呢間.加上熊貓酒店有cupon送,平少少($1500).聽個sales姐姐話只係得佢公司同姊妹公司有游艇出海套餐,價錢都唔太過份既,只係比我地預期多咗少少,於是即場落埋訂同book日子.

搞掂晒,就去行多陣睇吓電器同printer,玩具部,又係文具部落買咗本clear book黎keep住大project既單同資料.結果行到成九點至lagoon cafe食鐵板餐.

食完飯,徒步送人家返屋企,同cut低結婚雜誌上有用既資料,搵日得閒一齊打電話問或親自去望吓.

十二點幾,好攰咁搭番輕鐵入村好在今日無渣羊仔,行入村時落起雨黎.唔係又"揼"濕晒.

出皇牌

今日一眾同事係station內圍圈抽大假,我抽第六.
當抽完晒之後,經理話邊個出皇牌揀假(結婚專用既)就行出黎book假先.大熱人物,麗儀,慧賢,德輝都相繼行到經理面前既book leave form前,而我就行埋出黎殿後.大家都好驚訝,可能覺得我係"黑馬",爆冷跑出,其實得幾個同事知我出年結婚,大部份都係唔知既.經理都係今日至知,佢同我講"照寫埋囉"
好多謝大家既祝賀,以及遷就大假
註解-房口07囍事:
五    月   麗儀
九    月   慧賢
十    月   德輝
十一月   ball

中醫clinic

由於食住西藥都無咩起色,加上台灣女生做facial時,姐姐仔話人家可能係"血熱"所致,所以人家諗住今日放工去中大睇中醫.
三點幾接人家放工時,人家話原來元朗都有分柁(聽同事講),都係中大既教授,所以book咗四點四,省番啲車程同時間~地點係容鳳書診所,我當然識路啦,因天陰隨時落雨既關係,我地搭輕鐵前住求診.雖然入到去好似好簡陋,但一上到去三樓,嘩~~全新裝修.有中大注支,係唔通啲~~登記完,去評估室俾個護士問病情,對住個電腦黎輸入o架.

跟住就望住個screen,等打出自己張飛既冧巴,再跟指示入房見醫師.人家話裡面仲有多個中醫學生一齊應診.係現代化下,醫師開葯單係用手寫板黎輸入電腦,同以"克"代替傳統既"錢"作葯量單位.

睇完醫生,攞埋藥,都係五點幾鐘.好耐無食過水邊圍間泰野,加上有啲肚餓(晏晝只係食麵包),於是行去該店.六點唔夠就到達,雖然間鋪未夠六點唔做生意,但店員都叫我地入去坐住先,等到六點至落order,唯有睇住啱啱係書報攤買既雜誌同打孖宝賽車黎等.

今晚除咗叫生蝦,明爐烏頭同芝士蝦餅外,我地仲叫咗個鐵版蠔黎試.感覺係幾有當年去泰國食街邊小食檔既風味,好食~食飽飽,都只係七點幾.行去影視鋪,睇吓有無平碟執,最後買咗反斗車王既vcd,跟住就搭輕鐵去人家屋企.齣戲都幾好睇,不過粵語碟好似啲對白好細聲同矇.

鐵波波智破起哄黨

今日返A/N,交更簿上有"情書",係同事既口中得知尋日晏晝係新紮RN做我個team,今日我都要交番俾佢.成班同事都起哄,話人地等咗咁多年,花錢讀埋書,今日last day卒之都可以接到我交更,平起平坐........

其實交更事少,起哄事大.臨別在即,唔想該同事再俾大家搞到唔知點咁,加上我又唔太想事情被嚴重誇大報導(以往已發生好多次同類事件).

臨近放工時(約一點九),我同ic(準警察太太)話想早走,因為要番夜,叫ic代交更.一眾同事都話唔得,唔可以,一心要目睹歷史性一刻.

既然被困,於是心中盤算好"秒殺"對白:"十九號discharge等NEATS,舊CASE無特別"目的係以最快既速度交完更,坐都唔洗坐,寫都無野好寫.鑑於尋日係佢入呢team,所以可以唔交舊case都無問題,新case只係stable 既coad又真係無咩好交.

兩點鐘,交緊更同交完更既同事都係度等緊歷史一刻,我見到下晝大ic徐sir時就靈機一觸,用平時徐sir既技倆解圍,"徐sir,我A/N呀,兩點走先啦,我個邊係19 NEATS走啫,其他無野交"徐sir一句話"哦,好啦"

一眾期待既同事都好失望同"唓~"我就急急離開,一時退却~~~
係lift口見到準警察太太,佢問我咁快交完?我話無交過同無見過人,兩點都唔見人,我返夜係offical兩點走,佢唔係返夜都換好衫走人,我仲唔走咩~

ps:今日真係執番身彩........

場地會面,老媽氣焰

朝早九點係人家樓下既茶餐廳開位等台灣女生同伯母一齊食早餐,跟住就一齊搭巴士出荃灣睇多次場地.由於人家落車時肚仔有啲唔舒服,所以先去洗手間,我地遲咗少少至去到lobby.老媽同表妹已坐定,等我地.老媽講大佬話陣間睇完場地就去酒樓傾埋啲細節,唔好再拖.我尋晚都有話睇去場之後坐低兩家人三口六面傾吓,佢就話唔夠時間,又話唔知荃灣邊度有地方可以傾,大佬講就咩都啱,我就係頂心杉,講咩都係錯.

大佬健去完洗手間,人齊成團,同黃小姐一齊上五樓既場地行個轉.老媽又嫌新娘房無獨立洗手間,又話要同隔離廳共用一個洗手間,又話人地啲椅套顏色唔係夠金碧輝煌......其實個場地本身無咩大問題,只係老媽好似係雞蛋裡挑骨頭.搭lift落返lobby時見人家眼紅紅時,問吓咩事.原來上黎五樓時,表姨問人家係唔係唔舒服.人家唔為意,聽唔清楚,表姨責怪咁講"我問你野,你聽唔到o架?"伯母都聽到表姨咁講,所以兩母女都好唔開心...

係lobby睇相時,老媽又係一副大隊表既款,又話相中既陳設點唔好,又話都無咩得選擇,唔係A餐就係B餐....我心諗:新樂最好,咩都無俾你,場地核核突突,咩都自己搞就最好?落訂前,老媽問我洗唔洗代寫支票,我一句話唔洗,自己刷咭落訂,穩奪老細寶座!

我同大佬健等簽合約時,其他人落樓下裕满人家酒樓開位.

搞掂手續,落到酒樓,我已經幾唔"老黎".當講到禮單時,伯母話無咩所謂,老媽一句"唔好話無所謂呀",好似想講數兼玩寸個party咁.女家唔係好識回禮要俾番一半禮品去男家(因伯母唔係土生土長既香港人),老媽竟然話"唔可以咁貪心o架,要俾番一半過我o架"說話真係"銀"耳同無品,搞到好似人地賤賣個女出黎咁.....老媽無問過我同人家就話以"如意玉"黎做送俾賓客既禮物,我聽到立即話要送就送俾老媽請既賓客,我地送啲西式啲既俾後生既賓客.

對住酒肉朋友你咁講都還可以,但女家係咪有必要受老媽既氣焰先?大不了咪唔嫁個女,或者推高個禮單要求,令男家難做,再唔係話番你轉頭都仲得,最多咪不歡而散,下次有心情先再傾.

老媽成日都係覺得自己最大,最威,得佢講,無人講,呢個正正係佢無咁交心親友既原因.大佬健之前拍枱拍櫈講埋粗口黎話老媽就得,老媽仲好似好冧咁,而家咩都係搵大佬作主.以前都係大細超,而家仲過份,大佬話咩都得.我只係一個衰仔,無能用者.

係我心目中老媽只係一個滿口大話兼無理既人,上次俾大佬健鬧完,我又攞埋老豆張lab result出黎做證,出走時除咗老豆外又無人留佢.佢無晒面而家係度以"老來從子"既方法黎好落台,其實份人無改變過.

之前老媽講到要見到張禮單至有得講,張禮單得四五樣野寫咗,咪又係要即場改.同我當初話一面傾一面即寫咪一樣,始終我講親咩都係錯.人人都要跟佢既做法,佢唔會專重同遷就其他人.(我最唔鍾意呢樣)

十二點半左右,我就同人家,伯母一齊走先,人家一落樓就忍唔住喊,伯母話好唔開心,但為咗唔好搞壞囍事,所以忍住唔出聲....我地係紅橋落車,伯母自己返屋企,我就同人家行去工作地點,陪多一陣.

ps:今日心情好差,好想好想快啲搬走,咁多年付出既家用同心力,原來係不值既........

師徒聚舊

朝早洗完衫,騎羊去市中心會師傅.由於燈位多車,係市中心等燈等咗幾耐吓,師傅係惠比壽門口見我係騎羊經過,就示意係入面等.

泊好羊仔,行番去惠比壽搵師傅,坐底叫過野食後,就吐吓苦水.師傅都話係老媽既問題,我仲用相機俾師傅睇場地既相,食吓傾吓,師母都黎埋坐(元朗入黎市中心),真係感動~~

經師傅師母既安慰後,覺得自己真係盡晒自己既能力.師傅散叫咗個蕃薯天婦羅,散叫係唔通啲,連啲鼓油都係座熱咗既,平時叫餐都係室溫o架咋~

食完飯我同師傅係市中心,置樂逛多陣就分道揚鏕,師傅返工,我就去番市中心攞羊返入村,洽咗頭晏覺.

夜晚係屋企食飯,同老媽講聽朝十點半約咗去睇地方,問佢會唔會睇完之後,同台灣女生同伯母飲茶傾吓,點知一句話:傾得啲咩?邊夠時間?(人家返晏)又未見到張紅紙"睇地方半個鐘都夠啦,十一點係附近酒樓傾到十二點半,有心既話咩都傾到啦!擺明玩野兼唔合作.

我話咁你到時鍾意傾就傾,唔傾住就搵日再傾過.老媽繼續係咁話未收到張紅紙,我話到時一面傾一面寫都得啫,老媽又好蠻咁話唔係,點都要收到張紅紙至有得傾,固執到爆,....我忍唔住,係咁依扒多幾啖飯就離席,好無理.唔約又話唔約,約又話無時間,簡真係無方向兼無常理.

谷鬼氣,係接人家放工之前,騎羊去市中心既"明思"買張紅色大畫紙同marker,再去接放工.兜人家返到樓下,買杯麵同淨魚旦上樓(食因係屋企無咩食到野),再寫埋張紅紙,用黎聽日招架老媽.

ps:伯母好犀利,去隔離鄰居問野,番黎手拎住電腦print上網資料既紙張,好似去完網吧搵料咁希望人家屋企既寛頻可以快啲搞好啦.等我再諗吓買部新printer好定係接收師傅部舊機好先~~

90km/h,吹走鬱悶

難得今日放工無咁落雨,只係天陰陰,騎羊去買番啲日用品.先去置樂食單身漢餐,食完係相熟商場行個轉,再去藥房買柔順劑(支持環保,無用膠袋,手抽到羊仔行李倉仔).

再騎羊上公路入元朗"石崗"店買綿羊護理用品(日本品牌SOFT 99膠邊保護劑,車腊).俾完錢,用頭盔兜住兩支噴劑同罐腊,行去攞羊仔.滿載而歸咁上公路返入村,希望呢兩日會好天啲搞吓隻羊仔啦~

元朗公路一來一回,直路高速公路行run吓副engine,自己又吹吓風,清醒吓透支既頭腦.

屋企沖個涼,又搭巴士出去上堂,台灣女生係先達會合一齊轉車.課堂都幾悶,speaker又照讀power point,於是中途早走.炭火燒食完個晚飯後,就試食咗間泰式燒烤小食,但唔好食,雞翼啲肉好乾,元朗仲平啲同正啲添........

回程前陪人家係零食物語買搬遷平貨入tea bank,好逼咁買咗近一舊水野~跟住就搭巴士走人lu~

動口,郁手,出走

今日返晏,因落雨兼羊仔係公作地既停車場,故搭小巴返工.落車買咗個牛什米上厨房食.食到中途,見近兩點,出去接過蛟龍既更,又繼續食埋兜野.

本來今晚放工係去德輝屋企燒野食,但屋企既事搞到個人無咩心機,加上怕落雨,無得騎羊,所以無去到.

放工就一片心,騎羊返屋企,諗住早啲抖吓.點知十點幾,老豆係廳睇完電視返入房訓時又俾老媽鬧,一句又一句難聽既說話,今次我無介入.當老豆攞啲被鋪出客廳時,老媽行埋出黎打老豆(上臂),大佬健忍唔住出聲.

老豆係梳化,老媽坐係食飯枱張櫈,大佬健出客廳講數.老媽係咁數番之前啲野,根本無話原諒過老豆,係房度仲講到出口人地叫雞,個男人都係搵到錢,咁即係嫌老豆搵錢少啦.事實上係自老豆有病,人工少咗,老媽就對佢愈黎愈差.當講番老豆"野"病老媽時,大佬話老豆個lab result無野,老媽話"咁耐好番唔得o架?".大佬健叫我出黎講,我話就算表面上無野,但驗血係一定驗得出,你問幾多個醫生都係咁話.

老媽繼續兜圈,無俾答案,點解老豆無而佢話佢有病.跟住又話要叫個女人出黎對質,問係咪無野.大佬健話人地出黎話無野又如何,老媽話"咁我咪走囉,成全佢地囉"諗野全無logic可言,要走幾時都走得,個女人又點會咁順攤出黎認丫,有都話無啦.其實老媽根本無準備好要點做好自己同接受番老豆,唔相信老豆會唔見個女人.老豆講到話辭埋份工,老媽去邊,佢就去邊以示誠意,老媽又係一句唔駛啦,無謂,個心都唔係度.........(省略)其實我話老媽唔想無咗個屈老豆既機會啫,如果係咁既話,就會全世界既人都覺得老豆好有心,如果老母對老豆唔好就會俾人講番轉頭.而家啲人都係聽老媽講老豆點衰點衰,但只係齋講嘛.

擾攘一輪,老媽要走,今次我同大佬健都無留佢,只係老豆出手話離婚就離婚,返入房訓先,聽日至搞文件,但老媽都係走.今次正正係狼來了既故事,女事主太多大話,搞到無人再相信佢,仲難落台.
相信老媽只係會去舊屋度訓,咁要面,自己返上去訓,咪盞人地覺得你屋企有野,同無人埋你.四周圍同人地講老公有外遇,咪盞平時受過你氣焰既人笑番你,很儍........

ps:數吓手指,個仔都廿七歲啦,你仲可以管到啲咩?無理欺壓啲咩?

驚濤搶救

朝早好攰咁返工,點知有急件,搞咗半個幾鐘至交俾頭輪同事,帶隊食早餐.臨放工,又有多件急件,又忙一餐..

返完早更,天黑黑,落晒雨,無得騎羊走,搭輕鐵返入村.由於天氣關係,無得出去置樂買番啲日用品.係村口茶餐廳食下午茶,同師傅係電話度講吓屋企老媽死咬老豆單野,同阻撓我同台灣女生既婚宴籌備.師傅都話老媽癲喪,好大機會連17/11日都唔會到.無法啦,照住個plan,老媽會叫人黎就十五圍,唔黎就十圍俾minium charge.約咗星期五出黎聚吓兼傾吓.

係屋企訓咗頭訓,就搭小巴去接人家放工,老頭見老媽無煮飯,就同我一齊搭車.點知去小巴站途中,老豆話無帶鎖匙,問我攞鎖匙入屋帶番自己條鎖匙,叫我係個人地門口既簷下避住雨先,等咗一陣老豆又行番出黎,真係大懵.

黃色暴雨,見老豆又一個人出去食晚飯,不禁心酸..老媽有老媽自己係房.......人家係工作地既小巴站上車,搭多幾個站,我同人家就落車,老頭子自己繼續搭去市中心食單身漢快餐.係人家屋企食完飯,九點多啲就出發會番完晏晝更既華b,阿潘係凱都睇"驚濤搶救".

有啲似海上top gun,但中途文戲較多,臨尾無諗過係會悲劇收場.感覺好似係老成既男主角係後生既男主角身上搵到自己既宿影同繼後人,並加以身心磨練,最後更捨身救繼後人.點睇都好睇過無記既<隨時候命>多多聲(架生都多啲).不過top gun就緊湊啲~

ps:睇戲之前,黃色警告已經被除下,唔果唔係會睇得仲應境~

擺酒場地一日遊

朝早九點半係台灣女生樓下,騎羊兜人家去我屋企上網check資料同打電話去問酒席.台灣女生好有心機咁做紀錄,集低邊幾間係budget內同mark底邊啲係打過去問以及結果.

打咗成朝,得ymca有位,有啲連5/11都爆,十一月既週未週日更不在話下....為咗舒緩吓近日繃緊既氣氛,我以新色辨兼網上輔導員黎氹吓人家,人家都好喜歡.

搭的士出市中心,係小巴黎過晏晝,就搭巴士出去逸東.睇過場地,感覺都好企理,比新樂好好好多,只係樓底矮啲.之後再搭地鐵去佐敦,約咗ymca宴會部職員三點半係lobby等.雖然係望住太空館,但望唔到維港,加上厨房同厠所係埋個廳裡面. 厠間數少又簡陋,似中學厠所咁.另外又有柱位,有啲枱係望唔真個台做緊咩.個台又細,樓底又同逸東差唔多,但整體感覺比逸東差.只係天台個花園可以以維港做背景影相~

人家同我都係prefer逸東多啲,之前諗如果ymca唔係差太遠的話,我地都會揀17/11既ymca,但我地既意向都係逸東,可想而知ymca有幾差咁啲.

同人家去新世界既pacific coffee坐底,傾咗陣,一人一咖啡兼分一件tiramisu(用一張咖啡贈卷). 等到五點一個字,打俾老媽,話打咗成日電話都係無17/11日子,諗住都係係逸東擺5/11.老媽一接電話時己好負氣"點呀?",又話"你鍾意點搞就掂搞,唔好再同我講,我就黎入青山啦"跟住就cut我線.當我打俾大佬健時,佢又打黎講"你理你外母得架啦,唔好理我死活"跟住又cut我線.

為自己既婚禮搵個歡既場地有錯嗎?大佬健口口聲聲話我當初無約老媽同外母出黎飲茶傾,但出黎咪又係得老媽開條件同話擺邊度,外母無得異議先?新人先揀個地方都無權?要低聲下氣咁同自己阿媽講話"可唔可以係第二度擺?"之前老媽一口就話唔可以擺囍囍都係咁啦,佢有尊重過我咩,都係佢一意孤行啫,而家話番我轉頭?佢老人家"鑑粗"黎就得,我受唔住,強硬反對同堅持就唔得,係不孝?愚孝既野,由細到大我都唔會做,今次都唔例外.由老媽屈老豆同今次婚宴呢件事起,我對老媽已經係絕對既失望,相信如果係大佬健結婚,絕對唔會有咁既待遇..

六點幾,人家"蠍"場地書時,話不如試埋悅來,打到去問,竟然話有,於是約七半去睇場,聲稱係梗廳.係尖沙咀企地鐵到荃灣,去到酒店地下搭liftt時見唔太新淨,仲要大堂係三樓,地下係商場.上lobby仲見到好多自由行,印象真係一般.點知姐姐仔帶我地上到五樓個ball room時一睇個門口咁大既,仲有吊燈添,樓低唔矮喎.

入到裡面,嘩~華麗~~台夠大,無柱,枱枱都望到個台,厠所多間數,新娘房好似化裝間,燈胆圍住塊境.我同人家都好鍾意,不過又再將個budget加大,因要$5300一圍,minium charge$70000再加一.計過條數,如果老媽唔到既話,係逸東同呢度俾既minimum charge差唔多,呢度仲靚好多添,於是都內定係呢間.如果擺足15圍,就由當初$80000有找,飊升到$8800,足足多咗一萬.

做仔做到咁都係唔著,真係無野講......同人家係荃灣間濠江餐廳食完晚飯後,仲附近精品店買咗兩份準聖誕禮物,老細見我話鐘意影月,仲特意攞份介紹4月新貨既catalog黎俾我睇影月既頭像,係咁話型,靚,正,cyber....搞我同人家都忍唔住笑.

送人家番屋企,自己再搭輕鐵歸家,應人家所提出既建議,用張請帖寫幾隻字俾老媽,話佢知我地打過幾多次電話表,搵咗幾多間酒樓,酒店場地,今日親自出黎油尖旺蕩咗成日,最後由尖沙咀撲去荃灣睇場,同埋係以17/11日子,無流動板間為題黎搵,唔係只係純粹我地鍾意.由於我覺得我無做錯,所以我係咭裡無講過一句唔好意思,對唔住,只係客氣咩講番我既付出,同我當初話擺逸東既原因並非女家外母指示.

我將張帖同場地資料放係客廳張枱上,近三點先訓(三個鐘頭後起身返早更)

ps:我對呢個家,心已死..無錯,之前我既概念係正確的,我只係周家門下既食客,別無其他,咁樣會令我好接受啲~

打電話

今朝早起身,俾大佬健"哦"完兩句後,又開始對住本婚宴場地天書07逐個電話打黎問有無17/11,搏下有無人取消或自己之前未打過既冧巴.大老健話想我搵遠啲同貴啲黎擺17/11個日,但唔係得你一個俾得出錢o架嘛,加上又增加我既負擔....

由始至終,我都無諗過用老媽錢,唔想受太多恩惠,又唔想第時俾人數番轉頭話我係靠佢老人家.唔想令自己對老媽更多負面感覺同評價.

打咗好多間,都係無17/11,十一月既星期六日全爆,有啲連非週末既吉日5/11都已經俾人book埋.有佬健睇住我係咁打("你好呀,我姓X既,想問吓出年十一月十七日酒席既野"),無得再話我無打過啦卦.只係剩番幾間酒店未有得問,因佢地宴會部職員放假,唯有mark低聴日再打去問.

唔鍾意大佬健成日話我當初無叫雙方家長出黎傾,先至會搞成咁,程序有問題.老媽份人咁講野,由零開始出黎傾,一定係嘈.到時台灣女生,伯母,都唔開心,邊個幫到我先?到時大家傾唔埋,幾時至再決定點呀,唔通就老媽新樂咩?"針唔拮到肉,唔知痛".....

人家今日返晏,但都補鐘七點半走,我就係市中心排定元氣等人家.等埋人家黎都仲要企咗好一會兒至有位入座.坦白地同人家講咗老媽之前一啲對人家屋企唔好既說話,所以至諗住安頓好地點同日子至出黎傾其他細節.人家聽完喊起上黎,(當時仲排緊隊)我只有搭住人家膊頭同將人家既哭臉放係我既胸前.可能人家無諗過老媽真係咁過份吧....

食完元氣,去對面許留山食多少少甜品,就徒步送人家番屋企.
呢排實在發生太多事同考驗係呢對情侣身上了......

病假 due to胃痛

成晚都訓得唔好,肚痛又標汗,朝早起身打返工作地方,報上名子,講低唔舒服,要告病假...係張床碌黎碌去都係訓唔著,加上老媽五點幾就開始係騎樓洗衫,幾噪吓.九點幾再起身,打去staff clinic 熱線book咗十一點九appt,忍痛騎羊去見醫生.

醫生問我近來做咩胃痛,我話屋企野stress加埋食無定時囉,跟住仲俾醫生心理輔導咗幾句,跟住就去藥房攞藥: gastrocaine + pepcidine.

打番ward 報sick leave cert,騎羊返屋企食藥,再食少少野(杯麵+小型脆粟米片)就再床上休息lu~

話就話再訓多三個幾鐘,但個胃"那住",要食野,於是早啲出門,騎羊去建生食粥.用咗20分鐘至食完碗粥(龜速),好似阿伯咁....

食完粥,個人好似有番啲體力,再騎羊去市中心買魚生做宵夜.成晚都ok,只係兩點後收咗兩個,都無話打大搞既,ronnie同細佬仔都好幫手,等我呢個"病拐"可以回吓氣.

為免胃痛,我係五點再食藥,食碗叮叮粥黎醫吓個胃.胃痛好似甘過腸抽筋咁......

革命

九點係台灣女生樓下集合,一齊騎羊去囍囍睇吓個環境.去到先知原來係開十點半,係附近既茶餐廳食早餐,等到九點半就打去逸東酒店問,因尋晚太夜,cantering啲人放晒工.姐仔話5/11仲有位,對我倆黎講係一個喜訊,加上當初都諗住係囍囍同逸東其中一間(能力同要求之內).

兜人家去華都轉搭巴士出去睇skin,我就去老媽鋪頭等老媽開鋪.同老媽講話伯母睇過啲資料,加上我地商量過想係逸東擺多啲,但日子就無咁好,5/11,但都算係吉日黎.老媽話一定要17/11,無得改,擺第二度都係要個日,咁即係為難我啫.我同佢講新方案下,地方企埋啲,又係油麻地,只係日子比佢原定既無咁好兼係星期一啫.點知老人家發難,話女家當然係要就男家,5/11既話就唔擺,女家自己擺到夠,佢唔會到,咩人都唔會通知.

我忍唔住將手上既紙巾掉係地下好大聲咁話,邊有人做阿媽唔到個仔既婚宴?我仲話再逼我就搬出去,再旅行結婚都仲得,話唔到既我做個唔到既結果俾佢睇.最後講話係5/11,訂十五圍,佢有六圍請親友,到唔到我都照俾錢,跟住就離開.

我一向都唔想動凶相,同動粗去做事,但對住咁專橫既老媽,我真係無法子,慢慢講,換黎係不被專重同體諒既回答,係要搞到人地火滾,同佢鬥爛至會收聲.一家人係咁既咩?

我騎羊返入村,再用電話打去搵番尋晚個經理,問清楚老媽未落訂,就話屋企仲未傾妥,個日子唔洗hold住.繼續洗衫,叫人家打去逸東問多啲野,同係電話hold場地.

身心疲憊咁返晏,無時間買牛什米食,好肚餓,係tea個陣買咗啲三宝黎同同事一齊食.夜晚食first時為留肚bbq,加上又攰,於是係store開camp bed訓黎叉電.

食過仇姑娘代買既三明治,繼續工作.放工係七仔等埋瀟灑,一齊打的去黃金bbq,六十幾蚊都幾多選擇~~同多位兄弟傾過,都係話應該為自己出發黎搞地方,支持我既企硬,只係需要做番份內事就行了,好記得阿禮講,就老媽的話兩個人唔開心,就我同人家既話只係一個人唔開心:  1+1>1 台灣女生都搵死黨傾過,覺得我地無咩做錯.

之後我地落番去星群地中海餐廳飲tetley"s 坐多陣至散人.咁又識咗八年,大家都仲可以出黎聚吓,可惜阿彪係結婚週年紀念旅行中,未能出席丫.

有你地既支持,我會撐落去既,幸福係需要付出,我唔會做一個愚孝既兒子.由細到大都係啱就做,唔合理就唔做.我係一個獨立個體,唔係一個扯線公仔.

返學,新樂,送禮

朝早同老媽講話想係屯門既囍囍擺酒,老媽一句話唔好,僻.話一係新樂,黃金,雍龍,仲要係包場,唔同其他人分個隻(唔想板間).
我心諗,你有無理過我感受?起初又係你老人家話擺酒啫,無話邊日唔得,十一月ok.到台灣女生揀咗5/11打後兩個禮拜,老媽又話一定要17-11. 我知係好日,但我地都要就返工攞假o架嘛.我話5/11都係吉日,只係搭住重陽既農曆九月,但地方真係靚好多喎.
心好唔舒服,受不住老媽既霸氣同不諒解.想訓番都訓唔到.十一點就打電話去問,黃金-無;容龍-有,但要板間廳;新樂,有,可以成層包場(15圍).騎羊去老媽鋪,當面講俾佢知,老媽一聽到新樂就打俾表舅父話17/11係新樂擺.再約我夜晚一齊去睇.
接人家放工時,同佢講俾老媽局我去新樂,吐吓苦水,係市中心既delifrance食晏.人家既帶子意粉麻麻地.

我叫既雞扒伴薯蓉都係麻麻地.....相信下次都唔會再試,或都只係食麵包餐就算..

食完飯,去咗市中心老麥隔離既FOCUS揀咗隻casio橙色撞灰色既運動計時表俾楝哥做生日禮物.

七年前我都係呢間野買咗隻運動計時錶,仲帶到而家添,不過換過電池同表帶.

上人家屋企坐咗陣,就搭巴士去HAHO上堂.我地中場break時就早走,搭巴士去佐敦新樂會老媽兼睇吓個場.

上到所謂裝修過既上層睇,T字形,樓底矮,邊位"笠笠突突",廁所細兼唔企埋,陳設較陳舊,個台都細......

老媽高興咁同個經理講話點搞點搞,話落名留場地同17/11日子,跟住叫餸食飯.本人覺得你都無問過我地好唔好,唔通我當場話唔掂咩,見唔洗落訂住咪當hold住先囉.

楝哥九點左右到地鐵站,送過禮物俾佢,就夾佢上埋黎食飯,因食唔晒兼想楝哥聚吓.

回程時我同人家,老媽一齊上市260x,企返入屯門.老媽係市中心轉的士,我就同人家搭多一兩個站再行番上樓.

俾人局既心情唔太好,大家唔係應該以主角既意願為主嗎?同人家傾過,諗住聽日去囍囍望吓同打電話去逸東問吓5/11有無位.個地點真係好唔掂,唔係好明老媽諗咩,係我行開就同人家講我份人唔好,同老豆一樣....

好煩....好無心機..好難相處...

貴人招風雨?

返完個早更,落毛毛雨,諗住都好細雨啫,一陣就無,於是照騎羊去置樂食單身漢餐.點知愈落愈大,好在著住台灣女生送既牛仔褸,擋咁啲雨.

放低隻羊,就走去食野,再係相熟商場逛吓,執咗啲好野~冒雨騎羊返入村,羊仔污糟晒,連皮手套都濕晒,牛仔褸更不在話下,於是拎晒出去騎樓吹乾..

夜晚老媽番黎時唔太好老脾,煮完飯,食咗少少就返入自己房.本人初步懷疑係老豆今日放假無去老媽鋪頭度"葡"頭,所以又亂諗野,發老脾...

食完飯,坐多陣就搭輕鐵去接人家放工,落雨嘛~~

ps:日子好難過咁..

波仔飯

今日同大佬健係村口茶餐廳食過晏晝飯,就急急騎羊返工.接更後都幾忙吓,無咩款得揀..

為咗放工去跑步,所以無食夜晚飯,只係落canteen陪坐.裝修中既canteen得番幾款野食揀,四處都楝晒板,好似地盆咁.

放工之後,係運動場跑咗十三個圈,5.2km,半個鐘有找,幾好~本來諗住去"金銘"買碗牛什米上台灣女生屋企食,但諗諗吓兜黎兜去有啲無謂,於是係人家屋企附近既超市買咗個波仔飯上人家屋企"叮"~仲順手買啲特價野補下屋企個倉添.

坐定定,等開餐,人家好似派飛機餐咁,遞上熱辣辣既快餐膠盆係枱上,我仲叫埋杯清水添.哈.

由於太肚餓既關係,唔記得影吓個賣相,其實係無盒上面張相咁多同大舊雞肉(封面與內容不相符).呢次係我第一次食波仔飯,細心咁睇,原來係陽光一代公司出品.

以前讀何福堂,lunch好多時都會去位於而家市中心奇華餅店鋪位既"陽光一代"食pizza(最鐘意四川雞味)+是日焗飯或意粉+汽水既晏晝餐.可惜無幾耐就全線執晒.....

雖然份量唔太夠,但味道都ok,加埋人家屋企既叮叮燒賣,就啱啱夠飽坐多陣就騎羊返入村lu~

ps:多謝台灣女生既款待~~

補鐘x食飯+買飛

今日番晏補鐘返屋企食飯,目的係想兩老可以試多次和平飯局,大佬健都係屋企監察.老媽又攞咗四對筷子出黎,咁即係佢都預老豆會番黎食晚飯啦.整個飯局都無咩交談,只係老媽同我,大佬健講一兩句,不過都無反枱,一額汗 ><"

食完飯,一個人騎羊去市中心大會堂買<不可思議魔術show>既飛.其實係台灣女生睇舊雜誌(十月中)見到有呢個表演,已售票一段時間,好在都仲有飛賣,只係無中間位...不過算啦,聖誕節檔期兼咁遲買飛,已好好彩

我同台灣女生都鍾意睇呢類型表演,之前齣電影<死亡魔法>我地都有去戲院睇咁大個仔第一次睇live魔術表演(仲要有美相伴),好期待~

細個好鍾意係電視睇大衛高柏飛,預科時佢黎過香港表現,我當然無錢買飛睇啦,就算有錢都未必買到飛呀~係宿舍時代曾經買過本教玩魔術既書,但都睇唔明又練唔到,於是轉贈俾有慧根既percy.

今日係楝哥牛一,買完飛我約咗佢去新墟蛇王輝食蛇羮賀一賀兼聚吓,咁又識咗十五年.我同楝哥係由中一到中七都係同校(三間都係),只係中二,三係唔同班.後黎我地咁啱都係以遙距形式,讀同一間英國大學(野雞),不過係經唔同既agent,因讀唔同科嘛

食蛇羮仲前係idc執到件平衫添~感覺好似今日做咗好多野咁.

ps:賣飛阿姐話有好多小朋友同埋家長一齊去睇,希望唔會好似上次睇<白雪公主>咁"熱鬧"啦~

鹿頸遊,重返飯局

朝早同班同事兼朋友去仁愛堂"碌lane",我地分三隊參加(每隊四個人),十點鐘開始,3個game.我同大力,漢爺,虛擬哥頓一隊.我最高有101分,最低有71分....每次"碌lane"都會諗起預科唔開心既事,撈埋近日既麻煩,心情真係麻麻.

十二點鐘左右玩完,同大隊分手後,就騎羊去台灣女生家,同人家及伯母一齊落茶餐廳食晏.食飽飽就兜人家去我屋企上陣網,再執多件衫同相機,就去"秋季郊遊".我地上元朗公路,經上水,入粉嶺,再往沙頭角行到去目的地"鹿頸"

第一次(03年)去鹿頸係德輝用vanvan電單車帶住p牌既我黎既.呢度有山有水又綠油油,幾舒服吓.上一次黎係05年中,一個人同隻羊(burgman150)黎吹風散心.今次係第一次同女友及現任愛羊黎行吓.

一到達就落側架,影番張相先.人家第一次黎呢度都話幾靚同舒服.我地沿途慢駛,愛羊變咗觀光羊~~

係腳架既幫助下,影咗呢張山水照~跟住駛到去茶座,泊好愛羊,就同人家一齊坐低飲杯野,食碗豆腐花.今日都幾多人黎出車郊遊,茶座泊咗成十架電單車係度,一大兩細枱車友.出一出黎郊遊真係幾好,繃緊既心情都被沖淡.可能係一次過擺晒啲鐘意野出黎面前既關係:唔繁忙既公路,晴朗既天色,和暖既陽光,休閒既境地,電單車聚集,喜歡既女友....

回程我地行新娘潭路,經船灣淡水湖,大美督,入汀角,船灣,大埔,再上番公路番入屯門.人家著住我背囊件人造皮褸,我就著番件牛仔恤,因太陽落山會凍好多嘛,我地仲係大美督海邊行車時見到咸蛋黃(太陽落山)好靚~

返到屋企就繼續關係復修行動,騎羊去市中心"應老豆所求"買海霸既鴨掌翼俾老媽,攞羊時見有鐵馬,處埋緊一架的士同私家車,於是快快手放好啲野開車走人.

由於今朝老媽同大佬講老豆今晚會番黎食飯,但老豆話無同老媽講過野,於是叫老豆照番黎食.今晚姑媽姑丈都係度,加埋大佬健,我同人家.我同咗老媽講話係老豆叫我代買鴨掌翼,因怕會賣晒同遲返到屋企食飯.雖然無話有傾有講,但起碼都無反枱同怒啤,已經執番身彩....

人客走咗都無見兩老嘈,好耐無齊人食飯lu,希望呢個係好既開始,兩老會冰釋前嫌啦.

ps:老媽同姑媽飲埋我個兩罐tetley"s(台灣女生買俾我) 話味道好似怪怪地(我係房偷聽到),我心諗:"怪?你又飲~~~~~~"後黎聽到姑媽話"都幾純",算啦....

星期六

今日放假,起身就係房度係咁打日記,清咗妤幾篇之前未打既blog.約兩點就駕羊去接台灣女生放工.係更衣室對出NEATS位等到人家出現後,叫人家合埋眼,將放係綿羊把手下,被皮手套遮住既平面攞出小禮物黎送俾人家.人家好鍾意,呢類型禮物都係第一次送俾人家(之前老媽送過中式既俾人家).

跟住我地騎羊去市中心食晏,撞上老問題-週末人頭湧湧....本來想去元氣,但都排長龍,delifrance新鋪要等8張飛至可以入座.正當諗住行去明將求其食時,見惠比壽仲問緊(三點多啲,平時兩點九就唔俾入),於是衝入去坐底.

今次我叫咗個肥牛烏冬鍋定食,人家叫咗咖哩什綿海鮮飯定食.麵頭湯嗒落無之前係皇雀會間"炭火燒"咁清香.隔離枱有個大隻男子一個人食野,細聽之下發覺係日本人,唔通連日本人都覺得呢度啲野似鄉下口味?

係吉之島買咗一大袋野,愛羊即刻變咗做買餸號,兩個字左右就上到人家屋企.今晚人家話要落厨,最終只係親手整咗個雞絲粉皮,因時間關係,其他餸都係伯母代勞.

食完飯,睇埋隻"生死諜變"就趕去下一場,就係同andrew,楝哥,oscar係何福堂附近既打冷檔食野.andrew話好正油鹽浸蛽賣晒,"單車皇后"阿姐話星期六太旺,吹水吹到胡言亂語既境界......叫咗幾樣野食都太好食,麻麻地....坐咗陣就騎羊返屋企lu.(夠晒夜,兩老訓咗,可以偷雞抖吓...)

緊急迴避

番完個夜班,好鬼攰,無力好似平時咁騎羊去建生買早餐,直接返入村.係客廳食咗少少野,沖埋個涼就進入睡眠模式.

訓到十二點幾,自己醒咗,見咁好太陽,就開始搞大清洗,首先洗衫(再唔洗真係無長袖衫著),之後就洗羊同打腊,近來懶咗,對上個次搞隻羊已係21/10 既時候lu.

搞掂晒,已經六點幾了,當我去沖涼時,老媽就返黎.大家都無出聲,老媽係"騎樓"搞機洗,我換過件衫,就騎羊去置樂睇吓心儀既超合金車仔出咗未.係相熟商場行咗個轉,都唔見有出或其他心水,七點左右就去咗老麥食"黑椒漢堡餐"加多隻蘋果批.呢餐可以話係我今日第一個正餐,其實晏晝都無食,一黎無咩胃口,二黎又趕住抹羊仔.

食完野,為咗避開老媽係屋企厨房煮野食既時間,於是騎羊兜咗去黃金海岸,吹吹風.細個時好想多啲去海金海岸,因為少去兼覺得個灘好長,今次黎我先知,我原來仲鍾意呢度既靜.之前遇到唔開心既事,都無騎羊去黃金呢頭行吓,最鍾意去行龍珠島條長堤(兩邊都係海,一條直路去前方走,感覺很好),可惜而家俾度閘截咗,要見你係住客至俾開閘俾你行入去....

本來可以家人一齊食飯,但而係大家各有各食,兼避不見面,唔通呢個係老媽覺得最舒服既家庭模式?前晚因佢又重提舊事嘈老豆,我一入屋就入佢地房睇吓咩事,再叫老媽唔好嘈,見佢好蠻,我忍唔住踼爆咗一樣佢屈老豆既野,暗示佢都有講大話,老媽發難,又屈我講過會走黎等佢孤獨終老,我係無法之下都要大聲回應我無兼且強硬表示唔好再屈我.

呢兩晚老媽都好靜,得佢一個人食晚飯,老豆放工例牌食埋至返黎,大佬健上堂,我時間啱係屋企食都自己搞掂,免得又因受不住老媽既"梵音"而再嘈架.

我八點多啲番到屋企,見老媽仲晾緊衫,枱頭有食完野既碟盤,安心老媽有食野,我就返入房栅埋度門(平時好少栅,除咗訓覺虛掩).打日記打到約九點就出門去接台灣女生放工.出門前大半個半個鐘(老豆遲我少少返到),老媽都無出廳同老豆嘈.

嘈又嘈過,而家等佢感受吓咁樣樣既屋企係咪真係佢想得到既答案,睇黎都係長久戰.

ps:目標明確,唔會有枝節,安全穏健,簡單直接,可能就係我鍾意行長堤既原因,當然仲有風景靚啦,有埋個咸蛋黃就仲正~

A/N 手記

尋晚嘈完後,今朝返工都無咩心機,喉嚨又涸,講野都無咩聲.返完個早更,同台灣女生騎羊去建生食KFC,試吓個蜜糖燒雞翼,味道都ok丫.送人家返到樓下,再駕羊返入村,沖個涼就訓咗兩個鐘.由於無同老媽講我返夜,老媽番黎都無煮啲咩,我醒時佢己係房棚埋度門.我食幾塊麵包就騎羊去買楊枝金露做宵夜.

成晚都幾忙吓,無咩停過手,約三點至有秩序分批食野...我就四點幾至入厨房,但五點時,elaine入黎pantry話31個"吐"咗條ET tube出黎,本來"洽"緊既我又要出去應付難題...上次night好多時間休息,今次真係做到嘔突.....本來諗住打埋sdr既label但係郁都無郁過.....

PS:要煩屋企野之餘,又要顧自己野,真係幾傷神.

study day

今日係study day,要出去HAHO上堂.六點九起身,七點三出門,結果早咗半個鐘出到目的地.
呢個workshop得26個參加者,想"鐘"眼訓都唔方便.其實都幾吹水吓,又話自我管理,其實只係psycho therapy加counselling啫,如果撞正啲好無耐性或無insight既客仔都係無用....

困係個課室度聽啲廢野好眼訓同惡頂,但話晒唔洗返工,無所謂啦.晏晝仲要圍圈坐,每人講一個行動計劃出黎(提升個人自信),我就話想聽晚跑十二個圈,有八成信心(救命...).好唔容易至挨到五點,行番去旺角,但都係買唔到label 帶,無得交功課俾經理添.....
搭車返入屯門,老媽話同埋姑媽姑丈食,但又無話搵埋老豆一齊食.佢地叫啲餸又唔啱我心水,都只係夾咗幾舊餸,食到肚空空,得個隆.係呢排自己既時間表己被打亂晒.
ps:星期四仲要上多一堂添

香港電單車展

台灣女生夜班後訓醒,約點半係人家樓下集合,一齊搭巴士過對面海,目的就係去電單車展襯吓~個場地唔係好大,加上人又多,所以都唔可以好好地同啲靚車合照吓.見到有trinity"片"過既DUCATI 998,即刻叫人家企埋去影番張相先,香車美人嘛~

當然人家無TRINITY咁身手靈活同"辣"啦,如果係我就驚囉~在場既車唔係真係太多,不過勝在可以近距離咁睇吓啲貴價車,其中以HONDA,KAWASAKI較多新車擺出,其他攤位都係擺啲落過地既電單車,見到污垢同花痕.

在場BIKE GIRL唔多,但DUCATI個位就幾落本,套SUIT拍得住日本水準,只係個BIKE GIRL差啲~行咗半幾鐘就行完,如果地方大啲,方便啲影相就好lu~~~下年再搞的話,都會再出黎襯吓~~

同人家行去天星碼頭既零食物語買少少野食,見好多人係度影相.人家突然醒起,天星碼頭會搬去起緊新碼頭,所以啲人紛紛黎影相留念.我地都即興影咗幾張~~人家手風不太好,好多張幫我影既都係背光黑人.

跟住我地搭地鐵去會展睇緍紗展.肚餓得滯,係金紫荊廣場買咗個富豪軟雪糕黎食,想幫人家同金紫荊像,國旗,區旗下照相~

每人廿蚊入場費,雖然係星期日,但都無想像中咁迫.係云云情侣之中,好在我都仲係適婚年紀.一路行,一路收啲資料章程,成大袋.其中俾一檔台灣攝影公司拉埋攤位坐底睇相,我地睇完就走人,無理會介紹姐仔既台式留客對白.

行行吓見到間overseas wedding既攤位,坐底睇咗啲相同package,好似好過之前上網間global wedding.行行吓又見到global wedding有擺檔,睇啲package又好似呢間抵啲同好啲.於是行返第一間睇多次,比較下就知global wedding比較好,加上為咗攞優惠(成功屈咗三樣),就落咗一千蚊訂,後補book 日子~~

跟住我地搭返地鐵去旺角,諗住排板前壽司,點知等咗好耐都無咩人走,成五十幾張飛.....突然醒起正話行行吓袋咗張傳單食日本野,於是把心一横去試吓有無位.太偉大了,竟然係唔洗等位,呢間野係皇雀會集團既,行去隔離就可以打牌,篤波,仲有間有吧枱既西餐廳添~

我叫咗個燒牛仔骨定食,人家就叫咗個燒豬頸肉定食,份量都ok.一心以為個湯會好鹹或重味精,點知又幾清吓喎~~埋單都係百二蚊左右,ok la,計埋餐飲啦喎~

食飽飽,就搭巴士走,今次無村巴入站兜搭我地,可能太早啦,十點都未夠.十點二就送到人家上樓,可以錄"一公升眼淚"~~(人家今日出門時唔記得預校錄影嘛~)

健康都市人@一刻館

今朝返完個早更,同台灣女生去食個晏晝.由於諗住會係晚飯前跑步,所以都無食得太飽.騎羊送人家上樓,跟住就去置樂兜下玩具鋪,無咩心水,但奉大佬健之命,代買x box 360既need for speed carbon,再騎羊入村.回程時仲特意去運動場睇下有無俾人包場,以免摸釘.

今日狀態幾好,都跑到十二個圈,近5km. 夜晚係屋企同老媽,大佬健同阿嫂食飯,老豆都係要食自己.....

本來夜晚諗住出去同andrew飲吓野,見無回覆,就係家中自斟自飲tetley's同食人家送既佐酒小食.可能跑完步有啲攰,好快就好眼訓lu都好既,聽日要同人家出對面海行,好好地叉吓電~

ps:屋企漸漸變得好似旅館咁,有人出出入入,但說話唔多,各自各有生活既模式......

冷靜期

今日訓得幾晏吓,好趕咁同大佬健係村口茶餐廳食咗個晏晝飯(咖哩反蛋牛扒飯),就再騎羊返工.

唔洗call,人頭又ok,今日返工真係賺咗放咗工同台灣女生騎羊去置樂食少少野,再送人家上樓,仲打咗成個鐘孖宝賽車至走(點都係差少少至可以攞到crown cup冠軍).

尋日成日都無撞到屋企兩老,今日都係一樣.當係冷靜期都好,大家都好需要時間去諗吓野,反思吓,自己究竟想要啲咩同要做啲咩呢?

相聚係緣,維繫係份.當年相識相戀一定有緣;大家相處咗咁多年,都算係有份,何解唔好好珍惜,反而要斬斷緣份既延續?

風險評估,感情儲蓄,呢兩大科題,真係好需要學習,否則只會自討苦吃..

相愛很難 梅艷芳 / 張學友

作曲／編曲：陳輝陽
填詞：林夕
監製：陳輝陽／蔡一智

女：最好　有生一日都愛下去
　　但誰人　能將戀愛當做終生興趣
男：生活　其實旨在找到個伴侶
　　面對現實　熱戀很快變長流細水

＊女：可惜我　不智或僥倖
　　　對火花天生敏感
　男：不過　兩隻手拉得太緊
　合：愛到過了界那對愛人
　　　同時亦最易變成一對敵人
　女：也許相愛很難
　　　就難在其實雙方各有各寄望
　　　怎麼辦
　男：要單戀都難
　　　受太大的禮會內疚卻也無力歸還
　女：也許不愛不難
　　　但如未成佛昇仙也會怕
　　　愛情前途黯淡
　男：愛不愛都難
　　　未快樂先有責任給予對方面露歡顏
　女：得到浪漫　又要有空間
　男：得到定局　卻怕去到終站
　合：然後付出多得到少不介意豁達
　　　又擔心　有人看不過眼＊

Repeat　＊

合：無論熱戀中失戀中
　　都永遠記住第一戒　別要張開雙眼

時差-上堂兼大家樂邊爐

尋晚返夜,交更前太肚餓,問仇姑娘"些"咗個日清咖喱海鮮杯麵黎食至出去接更.成晚除咗有兩個客仔係有野搞之外,都有好多時間休息吓~

朝早放工時唔知點解好肚餓,於是騎羊去建生相熟麵包鋪買早餐(兩個雞尾包搭一個菠蘿包=$5).同羊仔番到屋企,食過早餐又沖涼就訓.

訓到十二點就醒咗,上陣網,兜去台灣女生樓下.出車前send咗個sms俾老媽"阿媽,尋晚對唔住,我見你咁唔開心,我自己都很無用同忟".跟住同人家係市中心惠比壽食晏,仲收到人家既安慰禮品:佐酒小食.去銀行入埋張票,就騎羊入村.坐多陣(約五點)就出發去巴士站搭車返學~

其實上個星期就要返第一堂,點知有突發事故,要人家自己一個一出去上堂.今堂書對我都幾有用既,溫故知新~臨走時係洗手間見有規液,咪用黎抺下件人造皮褸既污積,好似又好啲喎,但俾人家係女洗手間望到我係對面背住佢抺褸添件褸太耐無攞出黎著,污糟咗都唔知添.

晚飯係原本擬定上星期食既大家樂邊爐,我地去咗兆萬睇玩具,再去買埋份禮物,就上大家樂搵位.九點幾都幾人頭湧湧,不過好快就等到張四人枱.

我地叫咗鮮蠔藍青口火煱x2+可樂x2,人家個隻船就以餃子代替肥牛.見就好似好正咁,但食落都係無酒樓(大戶人家)咁新鮮,只係方便一條友都可以過吓邊爐癮~

食完野,買多杯益沙冰,飲住黎行去巴士站,見空無一人,又要有排等...點知突然有架村van停係我地面前,人家話我先知(因我望緊另一邊),見司機話有兩個位,於是又半個鐘入到屯門~上堂同大家樂邊爐,本應係上星期既組合,但今晚至經歷,感覺好似有時差咁.加上呢一個星期裡發生既事的確令我有驚濤駭浪既震撼.我已係生活歷史中迷失了...