補鐘x食飯+買飛

今日番晏補鐘返屋企食飯,目的係想兩老可以試多次和平飯局,大佬健都係屋企監察.老媽又攞咗四對筷子出黎,咁即係佢都預老豆會番黎食晚飯啦.整個飯局都無咩交談,只係老媽同我,大佬健講一兩句,不過都無反枱,一額汗 ><"

食完飯,一個人騎羊去市中心大會堂買<不可思議魔術show>既飛.其實係台灣女生睇舊雜誌(十月中)見到有呢個表演,已售票一段時間,好在都仲有飛賣,只係無中間位...不過算啦,聖誕節檔期兼咁遲買飛,已好好彩

我同台灣女生都鍾意睇呢類型表演,之前齣電影<死亡魔法>我地都有去戲院睇咁大個仔第一次睇live魔術表演(仲要有美相伴),好期待~

細個好鍾意係電視睇大衛高柏飛,預科時佢黎過香港表現,我當然無錢買飛睇啦,就算有錢都未必買到飛呀~係宿舍時代曾經買過本教玩魔術既書,但都睇唔明又練唔到,於是轉贈俾有慧根既percy.

今日係楝哥牛一,買完飛我約咗佢去新墟蛇王輝食蛇羮賀一賀兼聚吓,咁又識咗十五年.我同楝哥係由中一到中七都係同校(三間都係),只係中二,三係唔同班.後黎我地咁啱都係以遙距形式,讀同一間英國大學(野雞),不過係經唔同既agent,因讀唔同科嘛

食蛇羮仲前係idc執到件平衫添~感覺好似今日做咗好多野咁.

ps:賣飛阿姐話有好多小朋友同埋家長一齊去睇,希望唔會好似上次睇<白雪公主>咁"熱鬧"啦~