名古屋親子旅行Day 1

原定既13:15往名古屋既航班,因天氣影響而順延至下午16:00.中午左右,上預約既的士入機場,12:45就落番去3號風球.可能司機心知車程中途會取消8號風球,故無照行規雙計,只係加多一百就可以了.雖然車資結算為$340,但我都俾齊頭$400,畢竟呢啲時間真係一車難求.

雖然機場內比平日多人,但可能啱啱落8號波,航空公司櫃台前都未大排長龍,我地好順利就可以完成check in及寄存行李.食開既Grappa's已執咗,快餐部就仲有,於是去咗稻香飲茶.

原本最壞既打算係航班順延一日的話,我地就係當地住多一晚,兼另買回程機票,以完成原定11日既行程.Delay 3個鐘,頂多出日本機場時食晚飯較麻煩.

等上機時,幸男坐定定睇美式卡通打發時間.

時差關係,落機時間將會係當地九點,過得入境同攞行李都會近十點.一上機就order定兩個飛機餐,人家同幸男分一個,我就自己食一份.

廉航唔包餐飲,想飲啤酒都要課金,但可唔可以俾罐凍少少同無咁凹....買啤酒送一小包花生,當然以幸男愛食花生作理由而獻出$45.

出機場一心去搭鐵路去名古屋市,但人家從鐵路職員得知當地是日暴雨天氣不穩,原定直達名古屋市既班次已被取消,要轉兩次綫至可以去到近酒店既車站.
明明話有啲站唔經,但人家見列車又真係照去,於是膽粗粗以列車線及車站名問隔離既日本當地人.該女士示意本列車會經過名古屋,而我亦從電子提示板得見將會行經名古屋站.

卒之都見到酒店啦,已經係當地十一點幾.落車時見車站月台外有人流管制,應該暴風雨令本土鐵路受到影響,車站大出入口既大堂都有唔少滯留人士.

去九州旅行時係住Royal Park Hotel(FUKUOKASHI) ,今次就係NAGOYA分店,幸男第一件事都係坐梳化睇電視.

幸男沖完涼就坐係床上,邊見電視邊享用我係酒店樓下(Family Mart)便利店購買既啫喱.

我既宵夜餐係啤酒配芝士撻,人家無咩胃口,連電糕球份量既Tiramisu都食唔晒,忙住安放日用行李及為明日既旅程作準備(交通時間).

訓覺時已經係當地時間一點多,雖然多點波折,但總算有驚無險.