朝早係酒店check out兼寄存行李,帶住手攜行李去JR站,因為我地今日會去高山兼會過一晚夜.
幸男於火車享用尋日係麵包超人館買既主題麵包,從矇鬆既眼神可見幸男其實未訓夠.兩個鐘車程,幸男於尾段時間都有訓多陣,我就不時訓貓仔覺.
溫泉旅館附近有一間幾大間既和牛燒肉店-味蔵天國,唔洗等位就可以入座.
和風燒牛肉,邊位係全熟,但中央位置呈半生熟.無所謂丫,平時我都係食5成熟既牛扒.
味蔵盛り,2-3人份量之雜錦飛驒牛,上牛肋肉,牛背肉,角切,薄片,燒肉片.
叫多一份牛舌,滿足自己之餘,亦好讓幸男及台灣女生可以多吃一點味蔵盛り.
一家三口食唔停口,因為實在太好食了.計埋飲品埋單14,392円,雖然係貴咗啲,但係香港有都唔知貴幾多.
食完晏,搭個半鐘巴士,再駁10分鐘的士,去飛驒市神岡町玩gattan go鐵道單車.首先要入講解室攞頭盔兼聽介紹及注意事項.
呢架就係我地既坐駕,動力設定似香港禁用既混能電動單車.兩位大人負責俾餅踩,小朋友係中間坐定定.
奧飛驒溫泉口駅至舊神岡礦山前站之路段來回行程約6公里,沿途可以遊覽山區小鎮風光.
因為中途無得變裝,相機配天涯鏡加閃燈,以便不時之需.
平時坐火車望唔到呢個景觀，頂多係坐特别火車最尾個卡至望到隧道黑影呑噬風景。隧道內涼風迎面吹來,感覺好似自已變咗火車頭咁，見證户外光點從黑暗中放大,繼而成像為風景.
職員於終點等待遊客，並為客人搬動車子，方便依序返回起點。等候期間，遊客可享用清涼青瓜及蕃茄作消暑。
幸男同我都係橫間衫,卒之都有張父子合照.
回程時我以閃燈之LED補光,影吓呢個近似肉眼所見既能見度.單車上之前燈會於黑暗環境自動啟動,不自覺地湧現冒險的童心.
雙腳交替地踩下腳踏,轉動的不是單車輪胎而是中央既滑輪,每經過路軌之駁口,直接又清脆既"咔噠"聲響,非置身車箱內所能比擬.
即使鐵路已被荒廢,但月台上既陳設還停留著原有既時空.
臨近起點時,職員示意加速,因為要上一段小斜路.交車後於休息間見到我地出發無幾耐時影既相片,成像較一般主題樂園既即印相差,唔知係printer定係相機問題?見300円咁平,乖乖課金.之後職員示意的士師機已於門外守候,我地急急趕上的士.
的士司機係巴士站放低我地,司機從休息室取出一個紙包裝牛奶咖啡俾幸男(日本小朋友會飲咖啡?).
又坐番個幾鐘頭巴士,係車站附近既手信店入貨後,卒之都番酒店歇下.
領隊話高山溫泉旅館既價錢偏貴,呢間飛驒花里の湯 高山桜庵已算係性價比高.
安頓行李行後,落去旅館既精品店為人家選購浴衣,再約職員十分鐘後上房教授穿著步驟.幸男亦穿上剛買既童裝,兩母子著住日式衣服落旅館餐廳用餐.
兒童餐都係以炸物黎俘虜小朋友既心~
晚餐係半自助餐形式,前菜及主菜上枱之後,食客可去自選區挑選心愛食物.
主菜係和牛涮鍋(4塊和牛加配菜),人家話呢個食法都好好食~
我食多幾舊天婦羅已經好飽,但幸男境然話浸完溫泉要同媽媽去食免費拉麵,仲話要早啲去做第一個食客.
我就無落去食拉麵,相片由人家提供,結果都係兩母子分一碗麵,兼且排第二.因為輪候人數太多,今晚未能排到獨立溫泉房(客人每次用半個鐘),唯有我同幸男去男子公眾溫泉池,希望明早會人少啲.
PS:排獨立溫泉房時,幸男見免費益力多已沽清,扁住咀說:"都話飲咗先0架啦......"(因為晚飯前我地上去視察場地時話留番浸完溫泉至飲)
