朝早係酒店Check Out兼暫存行李後,搭兩程火車去上野市站.第二程就係搭呢架火車,今早既主題已呼之欲出-伊賀忍者.
だんじり會館內有傳統祭典既服飾用具及花車抬轎介紹,但另一個功能就係上野公園既售票處兼忍者變裝間.
睇完祭典錄影介紹兼館內之展品,變裝成忍者家族並於現代街道行走.到達上野公園後,忍者服飾變得融入自然環境(幸男對藍色鞋及台灣女生既黑色涼鞋都好襯忍者衫,反而我對白色帆船鞋有點格格不入)~
身穿忍者服游走於古色古香既建築,令人有一種上山修行既感覺.
伊賀流忍者博物館坐落於公園内，台籍既工作人員姨姨熱心地向我們翻譯日籍女忍者(工作人員)既介紹.原來館內既忍者屋係從別處搬過黎,而且一般忍者屋只有兩個機關,但呢間就有八個機關設計.女忍者邀請小朋友們試玩第一個機關旋轉木板牆,剩餘既機關(隱藏樓梯,天花監視,藏身暗格,短劍暗藏格配合狹小房間,逃走秘道.......)就由女忍者示範.
忍者都會肚餓,係公園內既一間食店享用松阪牛肉烏冬,我就只係叫咗杯啤酒飲(未肚餓).
200円5枚金屬飛鏢練習,雖然幸男未能命中紙靶,但都玩得開心~
由於忍術表演不可拍照及攝影,所以只係介紹時段影相留念.忍者表演包括忍者裝備示範(劍,連繩苦手),擲飛鏢,火藥推進箭,雜技.滑稽既表達,以及熟練既技藝,令大人小朋友都拍手叫好.
公園有紀念品店,遊客可於隔離既大型涼亭休息.除咗外國人之外,唔少日本人都黎玩.
影相時間幸男不合作,結果俾我責備,連台灣女生都覺得幸男搗蛋.我要幸男對住棵樹5分鐘當作罰企兼冷靜反思,不可回頭望大人,小懲大誡.
伊賀上野城,原來係戰國時代之後300年,才正式重建(當年大風摧毀頂部天守,而且戰事提早結束,故以未竣工之狀態荒廢).城內有不少戰國時期文物,武士盔甲當然係重點.
遊客可於各層欣賞內飾及文物,頂部天守之天花鋪滿各式書法畫圖,非常巧妙.人流唔多,我可以有足夠空間細味及感受,訓係木地板上取得呢個視野紀錄.
城外有小檔販賣刨冰及凍飲,幸男食士多啤梨刨冰時,我就專心試驗此刻最佳既相機設定.
行落去だんじり會館交還忍者服,係車站附近既咖啡店稍息.
由於我無食晏,所以叫咗個松阪牛米漢堡,配上店舖推介既咖啡.
係火車站投幣locker取回手提行李,搭三程火車去今晚投宿既地方-二見浦.人家就係為咗旅遊書見到既呢個景觀，而入住呢間浜子代館，我地既房號係“黑潮（kurosho）”
旅館鄰近海邊，我地可以沿着海岸綫散步吹海風。
連領隊都無諗過呢度有神社，突然多咗個景點，幸男立即洗手。
幸男抽到“中吉”籤，買過御守符,就繼續前進.
夫婦岩,遊客到來祈求婚姻幸福,天氣晴朗時,可以望到太陽從富士山升起.
神社大神之使者青蛙,日文"かえる"與回家"帰る"同音,故保平安.呢張相完全睇唔出兩母子係驚青蛙,夏天屋企花園遇見青蛙時會大慘叫及疾走.
夕陽下沉,海面泛起一片金光,輕輕鬆鬆咁行番旅館.
沖完涼,於房間坐定定等職員端上晚餐,以腳架固定相機自拍豐富既和式料理.幸男全程睇住電視卡通黎食飯,仲有果汁為伴,不亦樂乎.
職員呈上松阪牛既證書,以示意是晚牛肉之出處,證書上有牛隻既鼻印.
伊勢出名既龍蝦,以刺身料理形式處理,好耐都無食過龍蝦刺身,感動~~~~
人家大讚呢款SUNTORY既梅酒,配埋支梳打水及冰塊,成晚飲唔停(我飲完杯High Ball都有幫手飲).
熟食既龍蝦比刺身既大隻多肉,唔知我同人家係咪分同一隻龍蝦呢?
試過係香港買和牛番屋企煎黎食,覺得太油,但呢餐A5和牛絶對令我地食得開懷~呢餐咁特別既晚餐,係人家以旅館之日文網站預訂,如以綜合酒店預訂網站介面預訂係無呢個餐0架.
幸男好鍾意呢把係忍者村商店買既布質玩具忍者刀,握緊劍柄時會發聲(好似BB公仔個種),我提議幸男斬擊時握緊劍柄,因發聲有點似"哎吔"既叫聲.
晚飯後,一家係落地下大堂,因為預約咗享用獨立風呂,一家人浸浴.原本仲擔心夏天浸浴會好辛苦,但入黑後既半露天風呂,露出上身會感到微涼.雖然唔及冬天浸溫泉既溫暖感覺,但紓解肌肉疲累亦唔錯丫~
PS:房間硬粒枕頭幾舒服,轉幾下身就訓著,另外上網發現上野城最後既城主係 藤堂 高猷
