朝早係溫泉旅館享用自助早餐,台灣女生陪幸男揀選心儀食品,幸男就乖乖坐低.
是次旅行無咩正規早餐時間,多數係酒店食買定既麵包或車上享用,好珍惜嘆早餐既悠閒.
食完早餐,搏其他客人唔會咁趕去排獨溫泉,結果戰略成功,一家人可以享受私人空間.
今次幸男卒都可以享用到冰凍益力多,大人比小朋友更貪心,每人飲兩支.
於大堂check out兼暫存行李後,領隊帶我地去高山陣屋參觀.職員伯伯熱心地為我地一家三口拍合照,但可惜一張回得太遠,一張又拉得太近...
德川幕府時代,地方官在此設置辦公機構.明治時期開始, 陣屋繼續被用為政府分支機構辦公室, 這亦是日本國內僅存地方政府辦公建築.由於要接待官員,陣屋內既設計充滿日式亭園美學,
雖然唔知有幾多陳設係古物或修復物,但300多年既建築物可以保存得咁好,讓遊客可以近距離接觸,已令我十分驚嘆.
部份區域被設置矮圍欄,遊人只可以遠觀內飾.陣屋內博物館展示不少古時之文物資料,例如古代地圖世界觀以及消防工作.
屋頂都係以木塊一層一層重叠,再蓋上瓦片,古人既智慧足以令陣屋屹立至今.環境咁靚,古時係度打工既公僕都應該覺得好開心~
陣屋外有朝市,出售各種農產品,見高山好似出名蘋果,於是買咗三支蘋果汁.
團員一齊行去陣屋附近既高山古街,咁啱係溪澗見到隻雀,經幾次嘗試後,成功拍下相片,只係天涯鏡拉得太盡,少少散....
古街內充滿國內國外既遊客,遊走街內既食店同土產店,與江戶時代既繁盛重叠.
既然無特定係邊度食晏,倒不如行到邊食到邊(掃街).首選項目當然係飛驒牛串燒,一人一串,坐係店外既木櫈黎食.
將自己果串飛驒牛交託幸男,再為幸男影單獨享用和牛照.食過番尋味,幸男話要食多一串.
我同人家就多咗個飛驒牛饅頭,仲叫幸男用人家部手機黎為我地合照.
繼續係古街流連,係一間蜜糖店試飲過一款芒果蜜糖後,買咗一樽兼做埋會員,可以係香港網上訂購.大熱天時,最好當然係食雪糕.幸男揀牛奶味,人家就揀牛奶加香桃味,係店內涼住冷氣黎食.
見到好多人係一間飛驒牛壽司外賣店排隊,因為趕時間而放棄.行番去車站時，見到一間掛著被當地電視訪問照片既小店無人排隊，於是上前向師傅示意點餐,但原來師傅正為一位女顧客製作壽司.耐心又焦急地等候,卒之到我俾錢,一心諗住行埋一邊等,點知師傅示意叫我上前睇住佢整(可見師傅既自信及堅持).同領隊一齊第一次食大半生牛肉壽司(火槍只係輕輕咁燒咗幾嘢),無想像中既血腥,反而好好食.
急急行過車站,再行番去旅館大堂取回暫托既行李.尋日既燒肉店竟然無開業,好在尋日食咗咋~
搭番個幾鐘去名古屋,落車就去咗Big Camera行吓,幸男睇玩具部,我就一心去搵A7既芒貼,兼幫賢仔搵MACROSS DELTA既CD及3DS既龍珠game.晚餐係車站商場既鰻魚專店享用,之前去完長島水上樂團果晚食唔到(因太夜兼要等位),今次呢間分店就無咩人等位,但人家點完餐就一個人趕去買好出名既蛋糕.
等埋領隊番黎至開蓋,雖然係好食,但都係唔及九洲柳川食果一間既咁好味,粒粒飯都索滿燒汁及鰻魚味.一飯三食,齋食,撈配料食,泡茶食.人家試均三食,我就獨孤一味齋食,因我怕溝淡啲味.
番到酒店,兩母子享用貴價蛋糕(2件要成19XX円),味道又真係唔錯既,食材先決?我係商場食店買既羽手先外賣就麻麻地,都係名鉄站果間專門店買既最好食.
係香港吉之島睇中既火車玩具,今次係日本Big Camera買平啲,當係是次暑假旅行禮物.幸男唔識幫玩具變形,當然由爸爸代勞.
我就係玩具部搵到呢個新出既黑武士牙籤座,之前上網見到已好想要,仲諗香港究竟會唔會入貨添.免除運輸及中介成本,加埋退稅,真係好抵(兩父子之玩具,朋友及老媽託付既商品)~~
