朝早坐JR去京都（45分鐘左右）,趁火車尚未離開月台,特意叫小火車迷幸男去車頭位置與N700合照.
另一邊路軌有另一款新幹線經過,咁啱月台無咩人,感覺似唔似post card呢?
一出JR車站就見到呢個京都塔,感覺係好多年前既設計,尤其係塔下方既方體外型酒店.台灣女生book咗個本地團,坐旅遊巴上貴船食川床料理,我地於車站出口近劇院既位置等待接洽.
坐個幾鐘車上貴船,團友們魚貫進入餐廳,感覺好似係香港買groupon去食飯咁.幸男著住外套,因為真係好似係冷氣房咁涼.高山,樹蔭,流水,消除了惱人的暑氣.客人用餐既位置,其實係架係流水之上既平台.
前菜非常精緻,雖然唔知係,但每樣都試食過.
食客們都對天然冷氣感到新奇,讚美用餐環境與自然融合,忍不住要拍照留念.
唔知係咪物資上山成本高,我呢杯生啤要800円.........
坐我地隔離枱既一對老夫婦,見我地搵幸男用手機幫我同人家影合照,於是主動走過來為我地一家拍家庭照.
魚生當然係唔少得,由於幸男唔啱食,我同人家變相每人食份半.
S形既燒魚充滿動感,幸男試過都話好食.補打日記時上網search至知係塩焼鮎-川河垂釣的天然鮎魚.
小心係少骨既位置夾魚肉俾幸男,不過幸男自少就懂得吐魚骨.
唔太明白呢個冷麵點解可以咁幼兼咁齊整?
炸物小食,只係知有魚同菇.
呢碟真係唔知係咩食材....
用餐區上方有竹簾作遮蔭,免得樹葉掉落客人身上,外圍亦以竹簾作阻隔,保障客人之私隱.
臨尾仲有山椒小魚(ちりめんじゃこ/Chirimen Jyako)配白飯和京漬物,我都只能食晒啲魚仔,白飯就真係要投降.當初仲怕懷石料理未必飽肚,無諗細細份密密食會咁滯...
人家預訂咗2大1小,唔知點解幸男都有一份大人份量既餐食,埋單只係收咗我地三杯飲品價錢(啤酒,果汁,梅酒梳打).
單線雙程上落,行人同司機都不時要亙相禮讓.
領隊無話過會有神社參觀項目,見咁有規模同有樹蔭,當然入見識吓.
善信要行上一段長樓梯,幸好兩旁既柱燈,令遊人沉醉於浪漫古典美學.
人家同幸男排隊去添香油兼祈福時,我就四處影相,見到有呢個水占既奇特求籤形式.
於神社揀選平安符既櫃台領取"水占"紙並繳款200円,讓幸男將水占紙放係池水上.
有字浮現啦~~中吉~~趕住時間去集合地點上車,都唔得閒用手機scan個QR code......
幸男對呢個求籤方法,感到新奇有趣.非常佩服日本人可以將科技融入傳統元素之中.
坐旅遊巴番京都JR火車站,人家帶我地去西本願寺,途經山本興正寺.兩母子行過望過就繼續向西本願寺進發,我就駐足感受平和慢板氣氛,兼試咗好幾個方案黎影眼前既和諧美.
卒之都到咗西本願寺呢個世界文化遺產,寺院內遊人唔太多,反而更彰顯出莊嚴及清靜.
寺廟神社一般都係嚴禁拍照,以示尊重神明.我見寺內無豎立不可拍照之告示牌,而僧人亦無阻止其他遊人拍照,於是膽戰心驚咁影咗一兩張."見真",要開啓慧眼,看破凡俗,直觀真理,確係人生大課題.
寺院露天地方有維修工程,不時見到告示板及圍欄.
臨走前為兩母子影合照,好難得係烈日下雙眼無得番一條線.
每當參觀舊建築,都會想到古人既思想如何引領現今既進步,而現今世代又如何一如古人般,以浪漫既方式啟發後人(可能後生一代覺得laser碟同錄音帶已夠晒舊派浪漫).
幸男有一架同呢款貨車一模一樣既tomica車仔,故特意舉機拍照.
今次京都一行其中一個重點係去呢間電單車用品店朝聖,因為人家幫我上網search過呢度有得買我想要既電發熱手套.可惜只得2015年既款色,今年既新款要秋季至有.結果我都買到對啱大細既taichi e-heat手套,一件暗迷彩雨衣.原本係店內既catalog睇中一件童裝電單車褸,可惜無貨......
俾錢時發現小意外,急急趕搭番JR番名古屋,以求心安.幸好有驚無險,於酒店安頓好戰利品就落番去車站附近既商場搵地方食飯.
晚餐由幸男挑選係一間鐵板食店享用,人家揀咗和風牛肉.
我就揀咗個芝士漢堡扒,一咬就食到內層既芝士,幾特別.
每次從車站行番酒店時,都會經過呢間酒吧.感覺好休閒,起初很有衝動想入去飲番杯,但見室內客人手中都夾著香菸,打消了念頭,免得衫褲有煙味嘛.如果唔係親子旅行的話,定當與人家坐係戶外位,邊飲酒邊東拉西扯的瞎聊.
番到酒店立即以剛充完2小時既電池,試用電熱手套(因為店員示意無充好既電池俾我試對手套,一係要等2個鐘再去店舖試,結果我地搏唔會咁黑仔買著壞貨,番名古屋先試).嘩~真係堅熱!今個冬天十度以下都唔怕啦~
