朝日係房間食過乾糧早餐,就行去鄰近既火車站,天氣很好,一點都唔似有過暴雨.
第一個景點係リニア 鉄道館,見有得蓋印,台灣女生即刻為幸男呈上舊年係北海道小樽火車博物館買既蓋章收集册.
係日本,有火車既地方就會有Thomas.即使呢度唔係thomas主題,一樣都係個Thomas佈景俾小朋友影相.
館內有不少機關俾小朋友體驗火車既運作原理,以及近觀車廂下之組件.
遊客可以登上多款退役火車,一睹懷舊車廂內飾.
終站係名古屋,當然要影番張合照.
見唔少遊客係其中一架火車外既月台排隊,原來係為咗去駕駛室影相留念.職員會為小朋友提供車長外套及帽子,1100円就可以買下連火車主題封套既照片作留念,職員亦會以遊客自攜之相機為遊客拍照(影得好唔好就唔包).我趁兩母子埋位時試咗幾張相,較好晒設定至交俾職員,效果比預期好~
戶外有一個供遊客休息既車廂,內有冷氣,遊客可以係度享用自攜便當或餐廳買既食品.幸男就係手動拉門既罅隙,扮西鐵宣傳既阻口魚.
行番入室內二樓,去餐廳買飯盒醫肚.日本有別香港,即使主題公園或展館既小食店,食物既質數都唔太參差.
座位可以盡覽地面既火車(支鏡唔夠wide,呢個view只係3分1左右),我地一家於駕駛倉合照既新幹線,就係相片最右果架零式新幹線.
幸男既兒童便當係以黃色新幹線作主題,個紙盒可以留念.水樽既獨特外型配上新幹線花紋既包裝,令家長無法抗佢為小朋友添購.
行番去火車站，準備搭一個鐘頭車去下一景點-名古屋港水族館。月台雖然無冷氣，但通風良好，未至於悶熱。
大熱天時等睇殺人鯨表演，係附近既小食店買士多啤梨味雪糕俾幸男消暑.正當我俾完錢並接過雪糕時,幸男剛好走到我身邊,唔知係咪感應到雪糕既冰涼?
遇上厚雲遮擋太陽,大人小朋友都唔洗等得咁辛苦.
實在太熱了,我都係小食店買咗杯ASAHI生啤黎降溫.我係上一層既觀望台,邊飲啤酒邊等待殺人鯨出沒.
殺人鯨除咗水中跳躍外,尾段更衝上淺水區,近距離與玻璃圍欄外既觀眾對望.
入到館內,乖乖課金係主題場景拍下家庭紀念照.依舊將A7託付攝影職員,雖然已SET好,但職員都係企得太後,要事後剪裁至有呢個視距.
輕輕鬆鬆咁係館內涼住冷氣睇海洋生物,家長們可以趁機回一回氣.幸男對毒性魚類又驚又好奇,可能該魚類樣子有點不友善吧.
企鵝係冰館內活動,隔住玻璃窗影得未如理想,唯有專心觀察企鵝們既儍氣亙動,上水落水之調皮.
手背蓋上紫外光顯示印後,去隔離既名古屋港sea train land樂園.
不設入場費,每玩一樣遊戲俾一次相應既代用劵,最抵買既係1000円有十一張面值100円既套餐.
笑臉之前係哭鬧,因為幸男原本想揀另一個卡廂,係九洲果次坐摩天輪已同過winnie the pool坐.
黃昏時份坐摩天輪望風景確係唔錯,唔會太曬同熱,卡箱內有微涼冷氣~
呢款投幣式既玩意係兩部一齊搖動,所以幸男同人家一齊"偽"遊電單車河.
臨走前玩撈玩具,以撈金魚之方式撈取順著水流而轉動既塑膠小玩具.雖然第一次成功,但臨前話想玩多次,原來幸男當初睇中兩款公仔.職員姐姐好好人,即使幸男失手,亦俾小朋友揀一款玩具.
趕番入去水族館,因為要霸位睇海豚表演.為照顧後座觀眾,大會有攝影師實時將影像傳送到大銀幕,咁啱試機影現場氣氛時影到兩母子.
雖然有射燈,但晚間影動物表演都係考起A7配備24-240呢個組合.
係日本先至可以咁樣影相,香港一定係逼滿人,想停低都唔等.
晚飯係名古屋港既RED LOBSTER食,其實都係水族館行前少少.附近數間餐廳中揀呢間,因為貪有龍蝦食,特別啲嘛.
同人家一人一個龍蝦湯,酥皮好脆,湯頭夠晒濃味~
幸男點既海豚（白飯形状）兒童餐,包羅萬有,最緊要係杯橙汁.
鐵板牛柳粒配芝士龍蝦尾,份量睇落普通,但加埋之前既龍蝦湯真係飽到叫唔落甜品.著重晚餐既我,都好滿意是晚用膳,同尋晚既不正經食法差好遠.
番工酒店,幸男話想食埋尋晚我係樓下便利店買既冷面.雖然知道小朋友無可能食得晒,只係貪試食,但當同媽媽一齊食宵夜就無所謂吧.
PS:如果香港既便利店都有咁多選擇就好了,畢竟大家都習慣了密集連鎖式超市
