番完早更,搭輕鐵去外母屋企接幸男出旺角,去Action Robo訂購第三廠(Generatiom Toy)出既變形金剛Gravity Builder(即係正廠既Devastator).原本想買日本第三廠MAKETOYS出既Giant,但上網做功課時見到有3款大陸第三廠出既Devastator,始終都係覺得Generatiom Toy比TFC 及Toyworld(相片右下方為Toyworld)既出品好.現貨得兩手兩腳,最新既腰部要先派貨俾已訂既客戶,我要等第二輪貨番至有得攞,最後既胸部預計未來一個月有貨.
由近廣華街既玩具店行番去朗豪坊,又熱又遠,大人細路都辛苦,為既係food court果層既貓貓主題展覽.
台灣女生番早兼夜班,幸男無平時笑得咁開懷,可能我既形象比較嚴謹.
其中一間房以坐係梳化,望住大屏幕顯示自己同活潑既AR貓咪.唔醒起拎開袋玩具,搞到好似街貓摷垃圾袋咁(無美感可言).......
貪就腳,係food court果層叫幸男揀食店.原本話食一風堂,但見人多排隊,幸男望果我建議果間食店,話要食咖喱豬肉烏冬.我係咁用相機幫幸男影相,隔離既人一定覺得好奇怪,好少阿爸單獨帶阿仔出街兼港女式影相.
食完飯,就去補多幾張相,因為正話啲相多人入鏡.
是日另一目標就係帶幸男去香港第一間既Lego Store,排隊時secu叔叔話要等半個鐘,但我地用咗15分鐘就排到入去.
幸男與Lego版旺角街景合照,由於人多兼要拎住袋玩具,所以只能以手機拍照.
幸男見有小朋友試玩專區,向我示意想玩就走入小朋友人群中.
幸男叫我幫佢同作品影相,唔知主題係咩呢?
店內有一個lego掛板,客人可隨意係上面砌上lego塊,呢個係幸男既抽象派傑作.
回程時幸男攰到係巴士上訓著,送番上婆婆家過夜,等媽媽明早放工後回家訓醒至接番幸男~今日咁頻撲都係想幸男暑假結束前多點節目,升小學後就無咁多機會閒日出街.
PS:特別鳴謝Thomas告知Action Robo有得賣第三廠變形金剛.
