因為早起身,幸男喊住話好眼訓.尋晚幸男掛住八卦大人執嘢,唔願自己訓先,結果攪到咁,真係自己攞黎.
是日重頭景點,鈴鹿賽車場兼AMUSEMENT PARK MOTOPIA.從酒店附近車站起計,用了一個鐘頭零廿分鐘去到(需要搭一程鐵路,再搭穿梭巴士)
入場劵可以貼係衫上,但為咗留念,故只係袋住.係Kid's Bike排到隊頭時,我以電單車部師兄身份,係模擬把手教幸男右手油筒俾油與回油,以及剎車手制.
排咗近一個鐘,幸男卒之都試學電動電單車,睇落有啲似我係駕駛學院學電單車既模樣.語言不通,幸男得個聽字,難怪個個都望住幸男,心諗:"你明唔明0架?".
排隊時職員會問小朋友能否踩無輔助轆既單車,其實幸男同我當年一樣,未學曉踩單車就去學電單車,結果當然係同老豆一樣啦.經過好幾次跌車,我同台灣女生向職員示意退出,以免阻礙其他小朋友.
跟住我地就向F1賽車區域進發,電單車比賽"鈴鹿8耐"都係呢度舉行.
咁啱有房車係度試圈,今次係我第一次去賽車場,對於喜愛CYBER FORMULA既我,絶對喜歡今個景點.
係全露天既寛闊大道,兩傍有降溫用既霧化水,最直接既當然係買枝凍飲解暑(我都買咗支可樂).
一家三口係F1賽車館一齊睇動感影院(CG賽車短片),跟住就係館內影相及體驗小玩意，例如感受賽車手承受既風速,以及配合腳踏節奏和配合既賽車遊戲.
呢架F1好似流咗少少,連個前擾流都無,可能只係預你感受下車倉既狹窄.
幸男愛搗蛋,每當合照時都不合作或直言"我唔想影",換來媽媽既責備.
一點鐘左右,我地行番去F1看台位置,等入場玩CIRCUIT CHALLENGER既電動KART車.
幸男坐係人家大髀上,我就負責駕駛.軚盤下紅色拉制係剎車,藍色拉制係加速,軚盤中央位置上有加波及減波按鈕.
電動車極速只有30Km/h,四前速都好似有啲無謂.曾經試過以3波入彎,只見俾其他車超前.咁闊既賽道,30km/h理應可以輕易過彎,點解我地會係灣位被過呢?無駕駛執照既台灣女生,一語道破-負載,我地架車載住2大1小.雖然只係行一細部份,但可以係一級方程式賽道上遊車河,已經好難得,好值得開心~
交車後,託職員為我地一家三口影合照,以看台及訊息板作背景.猛烈日光之下影人像,ISO 50配閃燈係是日既啟發.
近兩點,係FOOD COURT食晏,但係點錯晒餐.首先係幸男點既咖哩炸豬扒飯,大人都未必食得晒;跟住係人家點既MEGA冷麵,原來係四人前;最後係我既大碗拉麵,四塊叉燒配四份麵條(我一心以為四塊叉燒配一個麵).結果當然係食唔晒,如果一早知個份量,幸男應該點兒童餐,我同人家分一個冷麵就好了.
ACRO-X EVOLUTION越野車,要行過巔波既路面,涉水及過橋.見遊客會因車子衝落池水而濕身,所以事先將相機收入背囊.
幸男最愛行過霧水黎降溫,我同人家行過就要抺眼鏡......
蝸牛觀景車，可以鳥瞰花園區域及遠望周邊設施。我就死守排隊位置附近既掛墻風扇前，真係熱到個身臭咗……幸男話要坐多次，結果我都係要陪坐。
迷你小火車，幸男坐完一次後，要求再坐另一架。
花園小箱車，有趣既公仔穿插於童話世界般花海。
樂園主题人物出巡與小遊客合照，幸男怕羞地排隊等合照。
見到高低起伏既地壇小山丘,幸男就忍唔住加速跑上去(扮忍者飛簷走壁?).
幸男玩到成頭濕晒,但都無話叫攰,小朋友既精力真係令大人吃不消....
路軌電車內有頂司機帽,小朋友可以扮車長.
臨別在即,幸男把握最後機會,玩碰碰巡邏車.
最後既項目就係呢個叫Test Flight既旋轉機動遊戲,幸男特意降低高度衝向旁邊噴出既霧水,因為好涼~
跑住去趕搭穿梭巴士,再轉火車.我同幸男都係車上訓咗,唯一唔同既係我知道要醒,而幸男就要被我抱落車.出咗火車站,幸男至醒過來自己行.
晚飯係酒店附近既居酒享用,其實我地只係記得經過一間開業65年有和牛食既食店,入到去坐低至知係居酒屋.
居酒屋食飯,點可以無酒,我點咗杯Highball.
幸男有橙汁,人家有梅酒梳打.店舖內飾好靚,係傳統和式既格局.人家叮囑我唔好四圍影相,話無禮貎喎.
唯有影食物,天婦羅蝦,始終都係無當年結婚度蜜月於北海道網走既咁好食.
五色刺身,係食材先決既日本,真係食魚生真係無得輸.
名古屋名物-手羽先,香濃醬汁同芝麻配合皮脆肉嫰既雞全翼~
魚生唔啱小朋友食,所以叫咗條燒魚俾幸男試食.
抺茶冷麵,幸男係唔知情之下食咗,如果佢知道係抺茶冷麵,仲會唔會食呢?
輕燒和牛,簡單以食材屈機既菜式,包含著廚師既匠心.食客可以自由選擇調味配料,清涼既蘿蔔蓉,深濃既鹽粒,醒胃既檸檬,幽香既葱花,以及刺辣既山葵.
幸好同一個細廳既食客,唔係太多人食煙,否則就苦了幸男.
由於手羽先實在太好味了,人家話要叫多一碟黎食,我當然要分一隻黎食啦(幸男已飽到停晒手)~
盛夏去旅行真係好消耗體力,相比濕熱既香港,日本絶對會令你肯踏出戶外,去享受各個景點.
PS:如果CYBER FORMULA同鈴鹿賽車場cross over的話,一定會吸引眾多fans黎朝聖~
