朝早係JR站附近搭巴士,落車後徒步去名古屋城.街道仲保存住不少明治時代既印記.
經過愛知縣護國神社,雖然個名好勁,但唔係今日既行程景點.
日本人喜歡為愛駒改裝,但無諗過實用型號既綿羊都會被"增值"其載貨量及便利.
行到目的地啦!舊年去北海道時已發現當地既標示,除了日英中之外,好多都加埋韓文.
兩母子都曬都縐晒眉頭,一行後生日本男生搵我幫手影合照,用開無反既我對單反有點雞手鴨腳.
護城河已乾涸,斗斜的石垣,其高度與上蓋樓層相若.
城內已變得現代化,有電有冷氣及時尚內飾,樓層內擺放著展覽介紹名古屋城之歷史由來,以及模擬古時既街景,遊客(幸男)更可以騎上金鯱道具拍照留念.頂層為瞭望台,兼紀念品售賣店.雖然我地都有買紀念品,但本人較喜歡上野城既古樸,憩靜以及古舊內飾.
名古屋城旁邊既本丸御殿,雖然內飾其實係根據古籍記載既修復版,並非真品,但尊貴既氣派並沒有被打折扣.參觀前,遊客要先將鞋及背包行李放入儲物櫃,方可內進參觀.
臨走前搵番大會女攝影師,為我地一家影合照.收得你錢,當然可以用閣下之相機補影多一張~
搭火車去豐橋總合動植物公園,一出車站就見到指示牌及恐龍花圃,睇黎該公園係當地既地標.
入到公園已經一點鐘,先搵餐廳食晏.幸男願本想食冷烏冬,可惜賣晒,唯有轉食湯烏冬.
大熱天時,除咗雪條,食鮮果冰都係一個好選擇.
餐廳頂層餐廳之上就係瞭望台,除咗我地一家三口外,只係有當地人兩婆孫(嫲孫),我可以輕鬆地拍照.
公園內有機動遊戲區,除咗例牌既摩天輪,仲有個小型KART車場添,不過我地今日只係去博物館區同動植物區.
公園空曠位置既一條大道,中間有人工水溪,小朋友可以涉水而行,降溫之餘又可以當玩水.
呢個"恐佈之小便小僧"好搞笑,一面自轉一面向四周噴水,我同幸男講個BB有好多尿尿....
今個景點既大賣點,就係自然恐龍博物館,我對上一次睇恐龍展係中學時代去科學館.
呢副恐龍骨獨立展出,唔知係咪就係真品呢?
幸男面向鏡頭拍照,電腦將未來之人類預計圖呈現於屏幕.
有我最喜愛既翼龍,配合右下方既射燈,翼龍好似係烈日下飛翔.
館內有不少恐龍骨架模型供遊人參觀,可惜呢張相未有恐龍戰隊全員。
館有不少有趣資料展品,例如比較各種恐龍既速度(有人類陪跑作比對).
睇埋個恐龍劇場（森林佈景加介紹短片），我地就出番去户外區，幸男先係遊樂場玩一陣。
目標動物之一既斑馬，匿埋係樹蔭下抖涼。説好了的長頸鹿不知所踪，大笨象亦都留守休息室内，我地只能係從外面窺見。
未入室内冰館前，幸男先係户外既玻璃窗向企鵝打招呼。
企鵝們總是儍乎乎，悠悠閒的。我地仲去咗一個夜間出没之動物館，内裏一片暗黑，只亮著微弱綠色既光源。雖然動物被圍欄阻隔，但我地都係急步行向出口就算了…
四點半就閉館，幸男把握機會同公園主题角色影相。
今年最後一個全日既旅行天，有少少唔捨得。雖然好攰，但一家三口可以24小時相處實在難得（管教，交流，共享係親子既重要元素）。
其實今日好熱，我要用idc買既冰巾圍頸至可以行得郁（重要不時加水制冷）.臨到火車站,都買支凍飲俾幸男消暑補水.呢張相令我諗起沖繩旅行,去完沙灘既一幕(幸男伸住懶腰等媽媽既樣).
夜晚係矢場町食晚飯(45分鐘車程,要轉一次車),因為領隊應幫我上網搵到呢度有FRED PERRY既專門店,我可以買番頂新帽.舊果頂麻質帽已經三年多,開始殘,香港又唔見有帽買,不過而家啲帽全部都係100%紙,無麻質.
幸男愛食咖喱,於是揀咗呢間湯咖喱食店用餐.
我同幸男都係食厚切火炙叉燒湯咖喱,幸男食1/5辣度,我就食3/5.雖然話係北海道既分支,但始終覺得當年蜜月旅行係北海道食既SOUP CURRY YELLOW好味啲.
人家既湯咖喱雞,辣度為3/5.
上酒店前,係樓下既便利店買番尋日係京都7-11買過既提子味冰粒俾幸男(因為太熱,買黎自行邊食黎消暑,順次序-男男>媽媽>爸爸),大家都覺好好味.
