聖誕撮要

今日台灣女生都係唔太舒服,但都繼續番早.放工後,我同羊仔黎兜去建生間巴蜀風食麵.人家都係無咩胃口,食幾啖就食唔落,於是送人家番屋企抖吓,今晚仲要返夜班呢~
夜晚andrew約我同八個洞一齊去燒野食,話晒係星期六兼聖誕前席,所以我提早騎羊入龍鼓灘"流星花園"攞位,好在咋,好多人,已經係得番last兩個爐

好可惜,andrew同楝哥搭巴士入黎要兜好耐,我一個人係度燒住雞翼黎等,對面張櫈放住個背囊,好似cast away中TOM HANKS 同個排球WILSON一齊咁.........枱枱都係一班人,可能人地覺得我係一個痴漢,一條冷黎燒野食.

等到人齊時已加咗次炭,無所謂啦,繼續燒,食吓傾吓咁啦,不過人家就好唔舒服,仲俾同事捉咗去睇A&E,但要等三個鐘,所以人家番上ward繼續番工幹活...

24/12

本來諗住接人家放工,但太攰唔知醒起身,唯有放工騎羊上人家屋企探病坐咗陣.

25/12

朝早番早更,幾忙吓,放工時已好攰.上咗人家屋企食過外賣下午茶同坐陣.幫人家拆開上次係戲院睇鐵金剛時送既keroro figure set,放入之前送俾人家既keroro房間,等佢地聖誕節熱鬧吓,就同人家出門.夜晚係水邊圍間泰國野食,但水準愈黎愈差,睇黎下次都唔會點幫親.

跟住元朗劇院睇"美國史賓沙之不可思議魔法show",真係一分錢一分貨,個表演好"雞".....無咩新意之外,仲要係擺明係觀眾有"梅",個個都有英文名.....(在場有個翻譯講中文,魔術師講一句,佢講一句)

好幾個所謂大型啲既表演都俾我同人家睇出端倪.其中一個表演係穿石屎磚牆,魔術師講到好似好勁咁,又話係台上面好多年無人表演過.我心諗當年大衛高柏飛係穿長城喎!其他濕濕碎碎既小魔術反而可觀性高啲.睇完個表演,我地行去買沙嗲燒雞翼食,之後就搭輕鐵走人lu~

ps:多謝人家既聖誕禮物