尋日區內行,今日通山走

尋日番完夜,訓到十二點幾就起身,幫台灣女生包好份禮物(夜晚中大同學飯局交換之用),騎羊去人家樓下送貨兼兜人家去兆康西鐵站搭西鐵出去.
放低人家之後,騎羊去富健間銀行搞啲手續,再騎羊仔去海趣坊間大新換coupon,點知原來係要去市中心既豐明至有得換,於是又騎羊去市中心.幾經波折,卒之都換到兩張意粉屋既coupon,唔錯~

跟住行去相熟髮型屋剪頭髮,中途見到架電單車又忍唔住影張相(honda CBR150R)~

同tiffany講吓近來腸胃炎同食錯嘢既經驗,又講吓出年結婚既野.剪完髮,行去置樂食個單身漢餐,再係相熟商場睇玩具,無咩心中,去藥房買支keri既body loion.

係實惠買咗個兜黎裝更衣室既沐浴露,再行番去市中心睇吓有無平衫執,最終係idc既18/20買咗件半價衫(半價咗都係有啲貴喔..內疚x1),再去吉之島既超級市場買咗三罐tetleys同特價錢14.9兩兜既五粒裝CP雲吞(人家好鍾意食嘛~).

最後係雄峯睇天朁衣everwarm,sale哥仔介紹mont bell較通風唔出汗,仲話薄身都啱我渣電單車用.我話渣電單車好大風同凍喎,但哥仔答中厚係去日本至著,咁咪買薄身個隻囉.點知番到屋企睇番個包裝至知係爬山(climbing),水上活動(water sport),行山(treking),踩單車用(cycling),中厚至係電單車(motorcycling)用.....(好在用日文拼到出黎啫)

騎羊去接人家落巴士兼試件天朁衣,效果麻麻,可能直係要補錢換件中厚......

今日去同阿潘,阿飛,a&e同事一齊打war game(paint ball).朝早起身太me mo,戴埋con都八點十個字,於是打的趕九點係公司七仔集合,點知仲有人未到,可以唔打的都得.....

估唔到有李兄弟都去,但係佢就sleeping,打半日就走.坐阿飛車入去個場,由於彩彈槍成日jam彈,入彈又較煩,每個夾只能入廿粒,換彈夾要密同準,唔係就會打空槍(我試過好幾次因此而被打中),粒彈射程又比bb彈短....整體係晏晝既盆菜較出色.

其實今朝起身時已喉嚨痛得好緊要,但為免放飛機掃興,所以都帶住愉快既心情去打,但愈打就愈攰同個人發慶,四點唔夠就留守係安全區飲可樂抖吓~

坐阿飛車入村,真係唔該晒.沖個涼就食感冒藥訓覺,訓到八點幾至醒.騎羊去接人家放工,再去市中心.

先去雄峯補錢換過件厚啲既天朁衣,再去老麥食個餐當晚飯.係人家既陪同下係市中心買咗兩件特價衫~跟住就騎羊送人家番屋企lu~~

PS:呢一兩日洗得太多錢添