國慶圍村盆菜

返完早更,同台灣女生去太興食下午茶,人家好雀躍咁叫咗個乳豬叉燒河粉食,真係第一次識得咁溫文既女仔係鍾意食燒味,有啲明白點會鍾意麥兜.我就食雞中翼配冰鎮奶茶~送完人家上樓,自己騎羊入村沖個涼,睇咗陣angel heart 第20期,就出門去屏山同同事一齊食國慶盆菜.一落輕鐵就見到好多彩旗寫住"慶祝國慶",一路伸展到食盆菜既祠堂對開空地.

坐坐吓就開始落毛毛雨,大家坐咗陣至有盆上,分兩枱坐既我地一齊舉杯開餐.台上例牌好多"阿姐"唱歌擾攘,仲不時落台同大家握手影相,我地個枱都有兩位代表丫~今年收到同事贈送既大盒電單車模型,1:6呀~多謝晒先

食到七點幾,大家都食唔晒個盆同有啲疲態,於是打的去新b仔食糖水甜品.之後就同大豆,大力一齊搭輕鐵,我就落車先過佢地~
咁又一年啦,望下年大家都健健康康,開開心心.