我的頭盔s

身為一個騎士,頭盔當然係唔少得啦,今次想同大家回顧吓曾經同我出雙入對既裝備.呢個係我第一個頭盔(台灣叫安全帽),係02年尾,我同契細佬去台灣旅行時買既,100%台制"海鳥牌",特色係橙色風鏡,得額頭兩個通風窿仔,樣子普通,勝在夠平,三舊水左右,係香港買同款要成四舊有多.呢個頭盔陪我係學車階段努力,始終駕駛學院個啲真係幾殘同唔乾淨....

攞咗牌,03年豆姐同慧雅姨送咗個NOLAN西瓜皮頭盔俾我(上圖相中右邊).其實個款係我揀(大角咀安定),當俾錢時豆姐搶住刷咭.當時即補錢配茶色風鏡.意大利品牌都幾"襟"用,個風鏡位仲好順暢同實淨,七舊幾水價錢,但無通風孔,較熱,加上有個別同事話拉花似係一條底褲笠住個頭盔咁.

04年,我係九龍城既勇記買咗個日本品牌OGK既teleo's頭盔(上圖相中左邊),八舊水價錢,特色係有個太陽帽仔,前後對流通風窿仔,覆蓋過耳仔,風鏡都大啲,無咁易入風.當時俾錢配咗個太深色既風鏡,夜晚睇野唔太清,所以要花錢配番個淺色啲既(淺藍色).話就話係可拆內綿,但啲摩術貼好唔掂,一拆就連個依附外殼內邊既摩術貼都甩埋出黎,所以都係無拆過出黎,只係好以之前咁用頭盔內綿清潔劑黎清洗.另外個風鏡轉動位好快就因滑牙而導致鬆動...用耐咗仲覺得個頭盔好以愈黎愈鬆咁,包唔實個頭仔......

嘩,影番張三代同堂先.呢三個都係我正式成為電單車駕駛者後專用既頭盔,學車果個因爛咗而無keep.

我而家用緊既係日本品牌YAMAHA YJ5 ZENITH頭盔(上圖相中最左邊),05年十一月係大角咀安定買入,千二有找;原廠附有淺茶色防uv風鏡(唔洗花錢配,同keep多塊鏡);前後通風窿仔;"啪"樓式可拆除內綿(個位好fit又實淨,拆咗十幾廿次黎洗都無問題);風鏡轉動位穏陣(但都係NOLAN個隻最掂);静音,初用時自己開快咗都唔覺.

咁多個最滿意現任頭盔,所以今年五月買黎送俾台灣女生作為女友專用頭盔時,都係揀番呢款既黑色版,情侣裝嘛~