逃

尋晚同大佬健傾到頭到爆,都係唔知點做至可以令兩老冷靜咁坐底傾件事,雖然十二點就訓(比平日早),但都係好攰,好無精神咁返今日既早更..

好耐無試過覺得返工好過返屋企lu,由尋日起已有呢個感覺,工作環境比家更寧靜.對上一次有呢種心情,正係剛畢業,感情空白時個三年.返工,出街飲酒,訓覺前要飲芝華仕,好似係搵緊啲野黎逃避現實咁.

放咗工,駕羊去台灣女生樓下接人家去新墟既巴倫紐荷趕睇兩點半既"死亡魔法".泊好隻羊係戲院斜對面,近河邊既欄杆,我負責冚車,人家去買飛先,原來係兩點八,又俾yahoo網上既戲院時間表昆添~

全場戲都無咩冷場,真係分唔到邊到係高潮位,加上戲內中後期有謎團,結局更叫我始料未及,兩個謎團只能估中一個~

睇完戲後,本來諗住同人家兜去置樂拮魚蛋,但泊底隻羊行咗幾步,就見阿sir起勢咁抄牌,為咗免食牛肉乾,於是折返騎羊直接入元朗既正記食飯.

由於係公路出錯出口,搞到比平時多用咗兩個幾字.由於大家都好肚餓,一坐底就叫野食.星期日真係好鬼多人,我地坐底時已無巳咩吉枱~等野食就硬係耐啦~今次除咗叫蠔仔粥同蠔餅外,仲叫多咗個胡椒蝦,味道一般.

食完野就駕羊送人家返上樓,坐多陣至返自己屋企.今日都總算係偷咗日黎俾自己休息吓,但臨訓前都同大佬健商量咗陣至訓.