返完夜,約十一點左右,大佬健入我房話老媽見老豆同個女人講電話,話陪人地去睇湖康診所婦科,搞到喊苦喊忽.我打俾老豆問佢係咪陪人去睇醫生,佢一口叫我唔好埋佢咁多野....無幾耐,老媽返到黎,仲講咗好多老豆既不是,仲係咁喊...我同大佬都相信老媽,覺得老豆離譜.
我又再打俾老豆問佢食唔食晏晝飯,於是應佢既提意,一點三係市中心既大姆指等.老豆話只係同人傾計,無咩關係,話最多應成唔會再見個女人.
夜晚食飯前,老媽話要一家人講清楚件事.於是一家四口係客廳度講.老豆只係認話係同個女人傾計,飲茶,無咩關係,但老媽就唔信,係咁數以前老豆鬧佢同對佢唔好既事,仲話老豆之前夠話唔見個女人,成日講大話.老豆有老豆係度話番老媽有幾咁不仁道同無禮對待...
我有幫兩老從中調和,但無效,老豆開出既做法,係佢以後唔再見個女人,繼續留守家中,但老媽始終唔甘心,話打死都唔這老豆同個女人無關係,只係傾計調情咁簡單,又話要老豆唔好過,要刮個女人出黎.
談判破裂,老媽好求其咁就煮咗晚飯,得我地三父子食,老媽同老豆講話呢餐係佢在家既最後一餐,叫佢食完就執野走.呢餐飯,大家都無咩心機食,我只係扒咗幾啖飯同食幾口餸就離席.
老豆返入房,老媽係客廳同我講到喊.跟住又入番房同老豆嘈,要老豆執野走,仲拎住個電視遙控,好激動咁,好以要"車"落老豆個頭度.一直係佢地房門口監視住既我見勢色唔對,就上前阻止老媽.大佬都入埋黎一齊拉老媽出客廳.
你一句我一句,兩老俾對方既感覺就愈講愈差...老媽入番房攞返個袋,話要走因唔老豆唔走,而佢又唔想見住佢.我係門口欄住老媽"氹"咗好耐都係要走.老媽喊住話咩都係佢錯,當呢幾十年發場惡夢,又話都唔知自己會去邊,死都唔肯講佢會去邊過夜.我喊住攬住老媽黎留住佢老人家,話陪佢係舊屋過夜,老媽訓我間房我訓客廳.......提意一一被拒.最後大佬健出黎幫口,老媽至肯入返屋,放低個袋.其實老媽好在意大佬健係拉佢出客廳時,用咗個粗口黎話佢(數番以前同係咁嘈都無X用假!")
老媽沖完個涼,就入番房訓,兩老玩"與敵同眠",我都等到兩點見再無嘈吵聲至訓,好怕半夜又黎過同有人做儍事,今晚真係好攰.....
