九點幾起身,食少少野,就騎羊去市中心附近剪髮,tiffany依舊健談,仲話師傅前幾日至去剪髮黎添.剪完髮,成個人都爽晒,之前長到好似"龍虎門"啲主角咁,又熱又焗又遮晒眼,辛苦......
返工前係屋企煮咗個燒鴨米粉(隔夜餸),話晒都成個成期無返工,都係食定啲野打吓底先(呢款四洲紫菜米粉幾好食),之後騎羊返工.
今日同蛟龍一齊做"o靚",感覺好似啱啱畢業咁,雖然初段有啲忙,但整體都可接受,當然英雄都幫我地兜唔少野啦.
畢業就五年啦,真係老盡少年心(當年廿三),理想,抱負,助人,體恤...好多好多衝擊,笑臉都都比剛畢業時少.以前讀高中部時一股傲氣,成日同啲廢既阿sir頂撞同挑戰.其中一個"斌仔"(外號禿鷹,全名張子斌)同我講"而家你幾反叛都好,出都黎做野,你就會馴晒"當時既我唔明,而家明晒.係更衣室撞番之前係我工作環頭實習過既後生仔,以前佢精神奕奕.好多野講,俾人活力型既感覺,但而家見佢好低調,少說話,打招呼都係點吓頭,好似好攰,又好似係是人事令佢好怕同人多講野咁.我曾忍唔住同佢講"你以前都唔係咁靜o架?"佢以緘默黎作回應....
支持我信念既學說有幾個:
阿公教我中文字時話"做人豈能盡如人意" "難得糊塗";
會考部化學科黃濟宏老師話"無人要你一定要做到一百分,但基本既野同你能力所及既事就一定要做"(暗示你班友仔攞唔到A都要攞合格番黎交代);
大佬健聽完我吐苦水後講既一句"PK到處都有"(粗俗咗少少)
(省略)
"後生仔蝕底野唔怕做"呢句說話係咪已經不合時宜呢?
PS:中年人點解會發褔?可能佢地要食多啲野至有力氣去迎接更多既衝擊~
